不過想真D以上既「聯想精神」、「放乎感性」好多時都只係流於理想
呢個世界呢個社會實在太侷促，生活太乏味啦，大家都為生計為糊口奔波，尤其是有小朋友有老人家要照顧既人更甚，只流於身在，如何有時間，有閒情，有空間去發揮情常在呢??
好啦有閒餘時間嘞，即使收工坐車，有時假日行街，短暫地擺脫工作既束縛，過程中精神卻大量地投入於玩手機上、飲食購物上(玩樂)，一切都被物質精神長期佔據....係物慾世界馳騁得攰左啦，偶然餘下少量時間呆望外面眾生相、城市僅餘既草木....，卻難以有咩精神進行「聯想」啦 (至少我覺得唔易)
係而家社會中，「物」同「情」似乎非常疏離，有時諗諗下都好少能夠揾到共通點，可能要高手先得
不過至少睇完呢幾篇我都嘗試實踐下，雖然成功率唔高
大抵藝術精神，都係理想境界之呈現，理想與現實，概是人生最應當思考之問題
張巴唔知有冇睇La La Land？結局正正呈現藝術於人生之作用。人生或許充滿庸俗、忙碌、功利，遇上無數失敗、阻礙，甚至造成種種憾事，無可挽回
但藝術於人生確有大用。只不過，呢一種用途往往唔係我地所幻想，藝術必然不是萬靈丹。我地唔會強求感冒藥可以醫到外傷，功用係有局限。常人高呼文學有用無用之論，大多不能理解此義
現實係瑣碎又佔了我地人生大部份時間，而理想境界嘅藝術呈現，往往只係一𣊬間。但一𣊬間卻能比現實深刻，係心靈間長存不滅。一刻之完滿，有時比起好多嘢都更加重要
朝聞道，夕死可矣。凡有此精神體驗之人，大多都會念念不忘。既然念念不忘，即使身在物慾橫流嘅世界，想是必有回響。因為我地都不甘於此，唯有呢種不甘，先能令我地更好咁生活
上不著天，下不著地，內不著己，外不著人。唐君毅講得好，現代都市人嘅危機都說中了。我地既無形而上之精神信仰，自然環境亦不過係一種功利資源，而內在自我又充滿疑慮，對外在人際係疏離、冷漠
藝術不是萬靈丹，但於人際物情之間，多少令人再見於現實之外嘅美。美，有時係生活嘅一種原動力，有如行經沙漠中尋得清泉，身心都受到洗滌。理想之於現實，本來就係困難，但我地都甘於此難
講完好似無講咁，共勉之
多謝戈巴用心回應
我係絕對相信文學、藝術無論對個人精神定對人類文明都有滋養既作用(或者叫暗中默默幫助左都未必知)，只係覺得越來越容易被現實生活侵佔，擔心第日工作或家庭越來越忙可能連欣賞藝術、發揮「情」既僅餘既心思都消失埋。向其他人推廣呢種精神更難上加難
la la land 有睇呀
你係咪講最後一幕ryan gosling 終於實現左自己藝術理想開左間jazz既酒吧，跟住偶遇Emma stone就ff自己同佢共諧連理? 
係喎呢套係講藝術理想同現實既衝突既好例子
多謝巴打支持
其實成套戲都幾大路，不過導演功力幾好，都算將平凡嘅故仔加以昇華，音樂都唔錯
