［古希臘神話］由宇宙渾沌到白銀時代-12主神介紹

最後一位哈帝斯嘅情人，亦都係冇咁出名嘅一位，白楊樹神女/海洋女神-琉刻（Leuce）

因為關於佢嘅故事唔太出名所以我揾唔到好嘅圖片如果有啲dry 唔好意思啊

Servius (十四世紀末嘅一位古羅馬拉丁語文法學家加注譯家）所翻譯嘅牧歌集（Eclogues）原著為Virgil (著名古羅馬文學家維吉爾）裡面提到琉刻係一位海洋寧芙仙子，佢係古老嘅海神Oceanus 個女。



哈帝斯愛上咗佢並將佢帶到冥界，亦都有傳哈帝斯安置咗佢係幸福島（Elysium）。可惜琉刻並唔係永生嘅女神所以佢都係面臨咗死去嘅日子。哈帝斯為咗紀念佢地之間嘅愛情就將佢變成咗一棵白楊樹，而白楊樹亦都成為咗哈帝斯嘅聖樹。


有傳說話冥界裡面嘅白楊樹係黑色嘅，但係喺Elysium (個概念有啲似天堂，係古希臘哲學思想延續出黎嘅一個樂土。有時都會被稱為Fortunate Isles 或者The Isles of the Blessed，不過同樣存在係冥界。）嘅白楊樹係潔白嘅。

仙子、仙女、精靈、妖精等通常係古希臘神話都會被歸類為寧芙（Nymph）佢地係古希臘神話中次要嘅女神，多數由大自然幻化成嘅精靈，通常出沒於山林、原野等，一般係以美麗嘅少女形象,鐘意唱歌跳舞

Nymph並唔會老去或者生病但係會死亡，係一個好矛盾嘅存在。佢地同天神結合同樣可以生出神，有啲Nymph會追隨某啲天神例如狩獵之神阿蒂蜜絲（Artemis）,酒神戴歐尼修斯(Dionysus)，音樂之神阿波羅（Apollo)或者係野林之神潘（Pan)

極樂淨土

Pan係唔係即係摩羯？

魔羯係潘係變形記裡面嘅其中一個形態

潘係咪畀耶撚屈咗做惡魔嘅化身

我係上網揾Source個陣揾到依個神話但係原來係一本日本漫畫星座宮神話嘅自創角色 我覺得幾符合主題所以寫埋大家可以當故仔聽下就算



典伊原本係一位冰之女神，好受宙斯嘅寵愛，但係佢就鐘情於宙斯個阿哥-哈帝斯。典伊並唔介意哈帝斯嘅黑暗同孤僻，佢放棄咗光明嘅奧林匹克山而墮入冥府只係為咗陪伴冥王。佢係哈帝斯嘅紅顏知己兼得力助手，佢睇住冥王從人界帶泊瑟芬返黎做冥后同其他天神決斗，佢都一直係旁邊睇住。係哈帝斯需要援手嘅時候伸出雙手，直到佢為救哈帝斯而死（係漫畫裡面）哈帝斯先知道依個一直默默陪係自己身邊嘅女神係全心全意咁愛住自己。可惜哈帝斯嘅真心已經比咗泊瑟芬所以佢只可以對痴情嘅典伊講一句：我永遠都唔會忘記你。

以上係部份漫畫嘅內容，依本漫畫講嘅係冥王同冥后嘅故事。有少少似美少女戰士，都係講少少前世今生感覺上個故事線有啲複雜我自己係未睇過所以可能個故事概括得唔係幾好，典伊係漫畫嘅其中一個角色並唔係真實神話大家唔好誤會不過有興趣嘅朋友可以去睇下，作者係冬木琉璃香

好似係有啲咁嘅事話潘個頭上面有角定唔知點

推

期待十二星座

不過算啦
對一神嘅耶撚嚟講
全部希臘神都係異端嚟
同惡魔無撚分別（對於佢哋嚟講）

冥界介紹

冥界對於古希臘人黎講唔算係特别恐怖嘅地方，佢唔係好似地獄咁嘅存在，所有亡者都會係死去之後到達冥界。後來希臘嘅哲學家提出咗所有人類死亡之後都會被審判，獎賞或者懲罰都會係冥界執行。

好多英雄都曾經去到冥界，包括海格力斯（Heracles），提修斯（Theseus）同奧德修斯（Odysseus）都係曾經成功可以出返黎嘅英雄。但係大部份人類入咗冥界就好難出返黎。

冥界嘅地理環境

相傳冥界裡面有五條主河，分别代表咗五個同死亡有關嘅情緒。

仇恨之河（Styx）-根據赫西俄德嘅神譜記載，Styx嘅河神係斯堤克斯，同時亦都係五條河中最著名嘅一條。有時睇電影同小說會見到啲神或者英雄講「我以冥河發誓」指嘅就係Styx。以Styx嘅名義所起嘅誓係極其神聖，任何違背者就算係神靈都會受到昏睡一年嘅懲罰。而且Styx有能到人刀槍不入嘅功效，著明英雄阿基里斯（Achilles）細個浸嘅個條冥河就係Styx。Styx嘅長度能夠環繞冥界七次。

而著名嘅勝利女神Nike就係Styx個女，係古老神話都有傳泊瑟芬都有可能係佢個女。


（我上網揾到嘅Styx係咁嘅樣）

愁苦之河（Acheron）亦都係渡船者卡戒（Charon）所過個條。依條河嘅河神叫阿刻戎（Acheron）佢原本係古老太陽神赫利俄斯（Helios）同蓋亞（Gaia）或者狄蜜特（Demeter）嘅仔。但係阿刻戎係泰坦之戰當中幫助咗泰坦，因此作為懲罰成為冥河之神之一。古希臘哲學家柏拉圖（Plato）曾係佢所寫嘅斐多（Phaedo）提過Acheron係世界第二最長同最大嘅河流,只係比Oceanus略為遜色。



遺忘之河（Lethe）,任何飲過遺忘河水嘅人都會忘記晒所有野。根據古羅馬嘅詩人奧維德（Ovid）遺忘河會流過睡神Hypnos嘅洞穴，睡神嘅話語會引起睡意。河女神Lethe並無特别嘅故事，主要係冥河嘅擬人化。不過遺忘河感覺同中國神話裡面嘅忘川河，奈河，仲有日本嘅三途河有啲相似，都係能夠令人忘記前塵往事。


火熖河（Phlegethon）,根據柏拉圖記載火熖河就係因為係一條由火熖形成嘅河流而因而命名。係但丁嘅神曲（Dante-The Divine Comedy）裡面有提到Phlegethon係一條煮熬靈魂嘅血河，係地獄第七圈，專門懲罰對其他人使用暴力，殺人同暴政嘅人。根據佢地嘅罪業黎決定佢地企得幾深。
根據古希臘神話Phlegethon同Styx係相愛但係因為佢嘅火熖而誤殺咗Styx,後來哈帝斯允許佢地兩條河相交，所以佢地又再重遇。



最後一條係哭河（Cocytus）亦都即係薄荷仙子門塔（Minthe）本來所屬嘅河流。係古時哭河曾被多位著名作家提起過，包括荷馬（Homer）、維吉爾（Virgil）、但丁（Dante）、柏拉圖（Plato）同古羅馬政治兼哲學家西塞羅（Cicero）都有提過哭河。


淨係講冥河都寫咗好多，遲啲再寫埋其他關於冥界嘅地理

冇辦法啦唉當初耶教興起嘅時候佢地要爭取羅馬信徒，當時羅馬係信奉羅馬神（希臘）所以就有機會要抹黑佢地爭取信徒

重撻埋人哋d節日添
最出名就聖誕
明明係鬼佬冬至嚟

如果冇記錯樓主講嘅嘢，宙斯係蓋亞嘅曾孫

Pan變魔鬼化身？

咁所有山羊都係魔鬼啦⋯⋯

輩份呢啲嘢喺希臘神話根本可有可無

CLS
正評再追

有輩份嘅，係會亂倫咁解

係希臘神話裡面基本上係冇親情
咩弒父殺親依啲情節好常見，烏拉諾斯係蓋亞個仔兼老公佢都照樣殺
蓋亞係錫克羅諾斯想佢做神王但係唔一定會鐘意埋佢個仔宙斯 加上蓋亞同宙斯冇感情所以會想推翻佢

冥界入口

有傳古時通往冥界嘅入口係位於Campi Flegri，原名係希臘語嘅「燃燒的」。Campi Flegri係位於意大利嘅一個寬13千米嘅大型火山區，現今大部份面積位於水下。而入口就係Lake Avernus，依個係當時傳說嘅入口之一，當時係生人勿近嘅地方。

當亡者去到冥界就會係Acheron（其中一條冥河）遇到渡船者卡戎（Charon）。


希臘人死去嘅時候親屬會放一枚金幤係舌頭上面，用黎比卡戎載佢地過河。而冇錢比嘅亡者就要係岸上面永遠徘徊，冇被安葬嘅亡者都會被趕落船。卡戎大部份時候嘅形象都係骯髒，雙眼為火熖同埋雙頰至下巴有一束污糟嘅鬍鬚。



過咗岸之後就會遇到守護冥界，哈帝斯嘅寵物，三頭犬刻耳泊洛斯（Cerberus）。佢守護住係冥界嘅閘口，佢放任所有人入冥界但係就唔會容許任何人出返黎。


刻耳泊洛斯附近就會有一個地方係用黎審判亡者嘅去向，極樂淨土（Elysium)、Asphodel Meadows (揾唔到中文譯名通常係比啲生平不過不失，唔需要落地獄亦都未有資格去樂土嘅亡者）同塔耳塔諾斯地獄（Tartarus），亦都即係困住克羅諾斯碎片嘅個個地獄。

負責審判亡者嘅有三個人，米諾斯（Minos）宙斯同歐羅巴（Europa）個仔，佢亦都係被波賽冬落詛咒個老婆愛上咗隻神牛生咗半人半牛嘅怪物米諾陶諾斯（Minotaur）跟住起迷宮困住佢個個國王。不過關於米諾斯係冥界判官嘅說法係去到好後期先有，最初荷馬史詩只係提到拉達曼狄斯（Rhadamanthus）。


拉達曼狄斯係Crete嘅一位明君，係米諾斯嘅兄弟。後來王位被米諾斯搶走，佢被流放去維奧蒂亞（Boeotia）死後同米諾斯一樣成為咗冥界嘅判官。

最後一個就係艾亞哥斯（Aeacus），佢曾經係一位英雄。佢亦都係阿基里斯（Achilles ）嘅祖先，根據古希臘詩人品達（Pindar）所講，當初波賽冬、阿波羅係凡間做奴隸個陣曾同艾亞哥斯一齊起特洛伊嘅城牆。起好之後分别有三條蛇爬向三道牆，其中兩條蛇跌返落黎只係得艾亞哥斯個條成功咗入到去城牆裡面。阿波羅就解䆁艾亞哥斯嘅後裔有一日會征服並攻佔特洛伊，而預言亦都應驗咗。

呢三個名我認得
冥界三巨頭

到啲冥界人名同地名好有親切感 睇冥王篇啲回憶返哂來
不過想問下星矢入面講個七個地獄係咪同希臘神話一樣？