［古希臘神話］由宇宙渾沌到白銀時代-12主神介紹

gay佬多靚仔 好似樓主啲故事咁 個個外貌都可以比美天神們

多謝曬

樓主好勁
留名

想問下如果神被忘記就會死 咁係咪開辟天地既蓋亞係例外 照計個時係咪未有人類存在 係點樣轉變到之後既神冇人供奉就會消失

啲希臘神話人名全部靠睇星矢同玩god of war 識
期待樓主講冥界 哈帝斯三兄弟入面好似係唯一清泉？
個人覺得波塞冬先係最小氣 又無貢獻 又鑊鑊衰鹹濕

張岱《四書遇》話：知其不可為而不為，賢人也；知其不可為而為之，聖人也
普羅米修斯有先見之明，明知咁做會有後果，但都照做，然後承擔後果
真係擁有大智慧嘅聖人風範

可能神由始至終都唔需要人類亦能永生，只係當人類唔再需要神既幫忙時神就離開，古人應該理解離開為死亡

因為上面都有提到阿波羅想代Hyacinthos死去，但係佢既永生及命運不允許

明知救果一個人會累死其餘99個人

咁仲救唔救

潘朵拉

一次過追晒，細個都好鍾意希臘神話，然後大個改左自己個英文名，成為其中一個神

叫親Venus既都.......

一定叫Venus既咩，唔俾我叫Hera既咩

娘娘名Venus

我識親啲Venus都做唔到娘娘

所以我點會叫Venus啊

雖然今日係情人節不過都係要完埋金羊毛依個悲劇嘅愛情故事


美狄雅同Jason 仲有亞果號（Argos）嘅船員離開咗柯爾基斯之後，國王即刻派咗自己個仔，亦都係美狄雅個細佬阿比圖斯（Apsyrtus）捉捕佢地。

為咗順利逃走美狄雅不惜犧牲自己親生細佬，佢派人傳話阿比圖斯美狄雅係被綁架。對如愛姐心切嘅阿比圖斯黎講，家姐嘅生命重要過所有野，包括金羊毛。佢依約去到某個地點揾美狄雅但係等待佢嘅人係哈帝斯。美狄雅叫一眾英雄埋伏，等待阿比圖斯嘅到來並將佢殺死。殺死都唔止，美狄雅仲將阿比圖斯嘅屍體肢解後拋入海中。前來捉捕嘅國王見到阿比圖斯嘅部份屍體就不停停低執返佢嘅零碎屍體，美狄雅同亞果號一眾英雄得以逃脫。


但係美狄雅弒兄嘅事激嬲咗宙斯，佢製造咗一陣雷風暴雨阻礙佢地返屋企。其中一位船員提出佢地應該揾巫女Circe淨化宙斯嘅詛咒，所以佢地去到一個名叫Aeaea嘅島上面尋找古希臘史上最美艷同法力高強嘅巫女Circe。

Circe 亦都即係美狄雅嘅姑姐答應咗幫佢地，佢向宙斯獻上祭品平息咗宙斯嘅憤怒。之後佢地又繼續行程，途中經過Siren嘅島嶼。Siren曾經出現過係奧德賽遊記（The Odyssey）同時亦都係為人熟悉嘅希臘神話女妖。佢地會利用美妙嘅歌聲引誘係海上面飄流嘅船然後食咗佢地，係一種又美麗又殘酷嘅生物。（同美狄雅一樣 ）



Chiron曾經同Jason講過，如果冇咗英雄俄耳甫斯（Opheus）佢地根本唔會順利渡過Siren嘅迷惑。所以好運地俄耳甫斯當時係船上面，當Siren嘅歌聲響起時俄耳甫斯就同時吹響咗佢嘅樂器Lyre (有啲似現代嘅豎琴不過係手握size），順利離開咗Siren嘅陷阱。

當佢地返到去愛奧克斯，但係Pelias (Jason個阿叔即係愛奧克斯個國王）食言，佢根本就冇諗住將王位讓比Jason。美狄雅帶住憤怒嘅Jason返到屋企然後再諗辦法報復Pelias。咁啱之前美狄雅用草藥幫一個老人回復部份青春嘅事比Pelias個幾個女知道咗，佢地要求美狄雅對Pelias用依種草藥。美狄雅心諗，送到上門仲唔好好利用下？所以就用羊示範咗一次，首先將Pelias殺死再剁碎，整成一碗魔藥然後落啲草藥就可以回復青春。Pelias啲女見到羊嘅示範咁成功所以相信咗佢，並且返去殺咗自己老豆（我都唔知話佢蠢定無知 ）最後美狄雅梗係冇幫佢地復活Pelias，依個奸險嘅國王最後比自己個幾個女親手殺死。

可惜繼位嘅並唔係Jason而係Pelias個仔，佢將Jason同美狄雅流放到去Cornith。美狄雅並唔介意，對一個女人黎講身份同財富都係身外物，佢最在意嘅係同自己愛嘅人一齊，執子之手與子皆老。只要係同Jason一齊，美狄雅由公主變平民都唔介意。可惜嘅係希臘嘅英雄大部份都係多情而無情，Jason並唔滿意現況，佢做咁多野都係想功同名利依加反而所有野都冇晒。有時望住美狄雅佢會諗，如果當初冇遇上佢，自己嘅人生會唔會好啲。Jason忘記咗自己當初得到金羊毛其實都係全靠美狄雅。終於Jason都係背叛咗美狄雅，同意娶Cornith嘅公主。Jason猶豫咗好耐終於話咗比美狄雅知，美狄雅質問Jason佢曾經為佢做過咁多野，背叛自己國家、殺咗自己細佬但係換黎嘅竟然係Jason嘅拋棄。Jason講咗真相出黎，話係阿芙蘿黛蒂令到佢愛上自己，所以要感謝都應該係感謝愛神。最後美狄雅心冷咁接受，Jason仲要好仆街咁講咗句「我曾經愛過你」。


係佢地大婚個日美狄雅送咗一條好靚嘅婚紗比Cornith嘅公主，並唔知道內情嘅公主好開心咁著咗。係結婚嘅時候條婚紗自燃，燒死咗公主同諗住救個女嘅國王。一睇就知係美狄雅搞鬼嘅Jason撲返屋企揾美狄雅但係發現美狄雅已經消失咗，而佢地兩個生嘅兩個仔都比美狄雅殺死咗。佢 諗住兩個仔嘅屍體痛不欲生，十分後悔。 冇咗愛人，冇咗王位連自己兩個仔都死埋，依家嘅佢先真正失去才所有嘢。而且因為違背咗自己會愛美狄雅一生一世嘅諾言，佢都受到希拉嘅嫌棄而唔再得到希拉嘅祝福。

Jason嘅餘生都係孤單同唔幸福咁渡過。

而美狄雅，有傳佢嫁咗比雅典嘅國王。佢擁有咗榮華富貴同權力，但係心底裡都係會諗起當初係王宮大殿對Jason一見傾心嘅時刻。或者根本唔需要愛神之箭美狄亞依然會愛上Jason。佢永遠都唔會忘記當初兩個人係月下，當住阿蒂蜜絲嘅面前私訂終生，發誓不離不棄嘅個個晩上。

美狄雅恨Jason同時亦都深愛著Jason。



題外話 Jason完成咗旅程之後將亞果號獻咗比亞波塞東，波賽東送咗上星空因而變成咗南船座。

每一次睇完Jason嘅故事都會諗起星爺係西遊記嗰句「曾經有一份真摯嘅愛情擺喺我面前但我唔識得珍惜，當我失去咗之後先後悔莫及。」

個人認為叫親Athena 個啲都幾女神

樓主就叫Athena

美狄雅

我唔係用希臘神名啊 做唔到女神

個人意見係好似蓋亞依類原始之神係唔需要人類供奉，因為佢地嘅出現係遠早於人類之前。而宙斯佢地嘅力量其實同原始神比已經係差好遠，可能就會依靠人類嘅供奉同信仰多啲

👍🏻對神話都有興趣，覺得啲神之間既關係7國甘亂😂

伊阿宋真係大仆街嚟

其實美狄雅都真係幾慘，明明係比人拋棄個個但係就比人話係古希臘史上最狠毒嘅女人。而Jason拋妻棄子但係大部份人都以為佢係英雄