自己因為由細到大都好鐘意古希臘神話，細個會成日去圖書館借書睇。機緣巧合之下去佐外國讀書發現學校有古文明讀，一直選科都有揀，依加大學準備讀考古
身邊啲朋友話對希臘神話好有興趣所以開po分享下
我地現知嘅希臘神話大部分都係口述相傳，因此有好多唔同講法，所以有機會同你所知嘅有可能會有出入。
首先係講12主神前都要提返少少背景， 相信雅典娜同宙斯個名大家都唔陌生，但係其實佢地只係希臘神話嘅第三代神。係宙斯之前曾經有兩個神王，一個係烏拉諾斯（Uranos ）另一個係克羅諾斯（Cronos）。三位神王全部都係父子關係所以宙斯係名符其實嘅神三代
所有希臘神都係大地女神-蓋亞（Gaea）嘅子孫，當中包括佢自己老公烏拉諾斯都係佢個仔
係希臘神話裡面亂倫係一件好常見嘅事，因為佢地相信近親繁殖先可以保持血脈純種。依種理念去到斯巴達（Spartans）時（大概公元前500年前左右）仲信奉，依個亦都係直接影響斯巴達沒落嘅原因。首先根據公元前700年前希臘作者赫西俄德的神譜記載,宇宙渾沌時期天地都係冰冷同黑色，所有事物都冇形態，直至蓋亞嘅出現。神譜形容蓋亞為第一創世神，「 在她身上既看到創造，又看到毀滅。既看到秩序，又看到混亂。 黑暗和混亂是她的本質。」
蓋亞其實就係宙斯嘅阿嫲，佢分别生佐三個原始之神，天空之神烏拉諾斯、海洋之神蓬托斯（Pontus）和山脈之神烏瑞亞（Ourea），然後同烏拉諾斯生佐十二个泰坦巨神（Titan),三個獨眼巨人（Cyclops）同三個百臂巨神（Hecatonchires），而所有天神都係佢嘅子孫後代。
泰坦神裡面最出名嘅就係克羅諾斯，亦都係第二代神王，宙斯個老豆。
佢嘅稱謂係農神，掌管農業，佢係泰坦中年紀最細亦都係蓋亞最寵愛嘅泰坦。因為烏拉諾斯嘅妒忌佢不停壓逼擁有完美外表同頭腦嘅泰坦特别係克羅諾斯。烏拉諾斯開始有想殺死晒所有泰坦嘅想法，而且烏拉諾斯愈黎愈獨裁同濫權對蓋亞亦都唔再尊重。 蓋亞不滿烏拉諾斯想剷除佢但係又唔忍心親自落手，最後話泰坦裡面邊個殺佐烏拉諾斯邊個就係下一任神王。克羅諾斯想反抗烏拉諾斯嘅殘忍暴政，而且又受到母親嘅慫恿，之後佢用蓋亞采用大地深處黑岩石所打造鋒利無比，可以弒神嘅神器一把鐮刀閹割咗烏拉諾斯。克羅諾斯將烏拉諾斯嘅生殖器拋到海裡面濺起咗泡沫，泡沬中誕生咗愛神阿芙蘿黛蒂（Aphrodite）係羅馬時期又叫維納斯（Venus）。
烏拉諾斯係死前詛咒克羅諾斯都會好似佢一樣比自己個仔推翻同殺死，因此克羅諾斯非常擔憂。佢掌管世界嘅時期被稱為黃金時代，根據神譜記載當時係世界上最幸褔嘅年代。但係因為烏拉諾斯嘅詛咒佢好怕有小朋友，所以每當佢嘅神后瑞亞（Rhea）生佐一個小朋友佢就食佐佢。瑞亞對此非常不滿，所以係生第六個小朋友（宙斯 Zeus）嘅時候將佢同一塊石頭掉包。宙斯被托管去克羅諾斯嘅家姐照顧，到佢成為一個壯健嘅青年再話佢知身世。宙斯去佐問擁有無比智慧同預知能力嘅女泰坦美狄絲（Metis）推翻克羅諾斯嘅方法。美狄絲比佐一樽催吐催眠嘅藥水宙斯,聯合母親宙斯將藥水混入克羅諾斯嘅酒裡面。昏迷後克羅諾斯將肚裡面個五個小朋友嘔返出嚟，分别係農業豐收女神-狄蜜特（Demeter ）， 婚姻、家庭女神-希拉（Hera）， 冥界神-哈帝斯（Hades），海神- 波塞冬（Poseidon）
宙斯同其他兄弟姊妹合力將克羅諾斯撕成碎片並將佢扔到塔耳塔諾斯地獄。
其他神一致推舉宙斯成為新一代神王，宙斯、波塞冬同哈帝斯抽籤劃分領域。宙斯抽到天空，波塞冬抽到海洋而哈帝斯抽到冥界。都有傳說話係宙斯和波塞冬出老千所以搞到哈帝斯抽到冥界
總之最後由宙斯統領嘅白銀時代正式開啟
下一篇會開始正式介紹宙斯生平同佢嘅淫亂史
有興趣嘅留個名比個正皮G持下
巴打讀緊咩科？
好正
