[真人真事]新年流流，因為金莎掀起爭奪戰

http://facebook.com/threeformthree


唔經唔覺又一年，我同細佬安坐家中睇廿四年前經典賀歲片龍過雞年，電視下面放咗一大堆金莎禮盒，金光閃閃一睇就知道係拜年送禮用。


細佬偷望一眼係廚房忙緊嘅阿媽，然後鬼鬼祟祟將一盒金莎抽出嚟。


我行年廿五，屋企對上有個廿九歲嘅大哥，對下嘅細佬啱啱二十歲，大哥同女朋友拍咗六年拖，最近買哂戒指密謀求婚，細佬讀緊大學，由細到大都頑劣到嘔嘅佢竟然入到U，全個家族真係差啲眼珠都跌埋出嚟，佢放假無所事事，撞正我放假，日日捉住我打fifa，打到我頭都暈。


「喂你唔好拆啦！阿媽要送人呀。」我細聲阻止佢，


「殊……二佬你放心啦，我同大哥上網睇片學咗招絕技…」細佬伸長條頸確認阿媽唔會睇到，


「點呀﹐backup人哋啲片再鬧人過橋抽板呀?」我笑問﹐


「唏﹐新年流流講埋呢啲衰嘢。」細佬反應好大﹐


舊年屋企有親戚濫送嘉頓餅，搞到差啲傷和氣，好彩最後堂哥以妙計化干戈為玉帛，所以今年講明大家都轉送金莎，實行和和氣氣過新年。