三聯幫牟中三
2017-01-24 16:11:20
「點....解...唔食得?」阿嫂愕然問,
「哈,因為阿哥拎錯咗呀,呢盒先係送俾你哋嘅~」我堆起笑容將手上嘅金莎遞上,
「哎呀,我開咗添,唔打緊啦都一樣啫!」阿嫂老豆微笑回答,
「咁又唔得!阿哥特登揀呢盒架,我哋阿媽又好鍾意記低哂邊盒打邊盒,唔係幾好嘅~」我好牽強咁講個理由,順手想搶返盒金莎,
阿嫂好似意會到啲嘢,佢含笑偷望大哥一眼,而大哥神色閃爍,有少少唔肯定我做緊乜。
「唔緊要啦阿爸~咪交換返囉~」阿嫂出聲,我成功攞返盒彈彈波金莎,
阿嫂一臉含情脈脈咁撕開盒金莎,我心知不妙,因為佢明顯已經估到大哥想求婚,同埋好有可能就係同盒金莎有關。
「點呀~我應該食邊粒呀~?」阿嫂斜眼望向大哥,
「呃....右上角嗰粒啦哈哈...」大哥乾笑兩聲,
我心情複雜到極,唔知係咪兄弟同心,大哥放戒指嗰粒金莎就同細佬放彈彈波嗰粒一模一樣,即係我好彩避過殺身之禍,但係而家大哥阿嫂都以為我遞出嗰盒就係正貨......