「唔係呀!!唔關我事架!!」我理直氣壯回答,
「哦?咁盒金莎都係呀細佬換走架?」大哥隨即再問,
「呃.........」
就係呢一下猶豫,大哥一記勾拳已經打中我腰側,痛到我眼水都標埋出嚟。
「你當我傻架!唔關你事你會咁搏命唔俾我發現?!」大哥雙眼瞪到最大,
「唔係呀....誤會嚟架.......其實擒晚.....」
「收聲!」大哥截停我,「我唔理中間發生咩事,入面台戲我會拆掂,一陣我仲要同阿蓉屋企去飲茶,你同我即刻攞返隻戒指返嚟。」
「係係係冇問題!」我不斷點頭,
「如果天黑前我見唔到隻戒指,你哋兩個以後都唔好返屋企嘞。」大哥慢慢講確保我聽得清楚,
我「咕嚕」一聲吞咗啖口水,腦入面快速閃過幾十種被大哥折磨嘅畫面。