三聯幫牟中三
2017-01-26 18:31:49
拳館內其餘幾人都望住我哋,似乎佢哋都好奇怪點解馬師父會咁決絕。
「馬....師父.....唔知有冇咩方法可以補償俾你....?或者我哋同你買咗佢?」我試探性咁問,
「唔需要。」馬師父搖搖頭,
「唔好呀師父大人!死人架!我求下你呀,小弟願意為奴為婢服侍左右呀!!」細佬即刻哭腔跪地哀求,
「係囉馬Sir,小事啫,新年流流玩少人一陣啦。」一個同我差唔多年紀嘅男仔幫口,
「嘿,進仔你呢排多嘢講咗喎,過完年要加操先得嘞。」馬師父輕笑一聲,
我一聽,知道事情未必冇彎轉,可能呢位拳師傅要面子,嫌個台階起得唔夠高啫。
「馬師父,年初一都要打攪你真係非常唔好意思,唔知有冇啲咩我哋兩兄弟可以做嚟略表歉意呢?」我即刻好有禮貌咁問,
「唔......咁都唔係話冇嘅.......」馬師父皺眉思考,
我聞言大喜,知道自己終於搵到個位去說服呢位泰拳師傅。
「你哋兩兄弟,喺呢度幾位學員度揀一個出嚟對打一回合,如果捱到兩分鐘唔投降就俾你哋攞返走盒嘢。」馬師父說,
「呢度?揀一個......對打.........?!」我愕然反問,
三聯幫牟中三
2017-01-26 18:33:53
「係呀,不過唔想打當然可以拒絕啦。」馬師父點頭回答,
我望一望拳館入面幾個人,三個男人生得高大,就算著住件薄褸都睇得出佢哋身型非常健壯,加上係拳館學員,就算再新手對住我同細佬呢兩件純白鎮村民級數都肯定打得死有餘,剩返一個就係身材圓圓地嘅師奶。
本來我考慮搵頭先幫口嗰位男仔,畢竟新年流流,唔通真係拳拳到肉打死人咩!相信大家都係交下戲啫。
「你哋幾個唔好放水呀,如果唔係過完年就每堂同我打返兩round先。」馬師父好似洞悉到我嘅諗法,
嗰幾位學員一聽完馬上倒抽一口涼氣,個樣仲即刻變到非常認真,令到我如意算盤又打唔響。
「呢個!我揀呢個阿姐!!」細佬未同我商量就大聲叫咗出嚟,
眾人從佢手指方向望去,只見著住U記薄羽絨嘅師奶默然不語,但係其他幾位已經即刻面色大變。
拳館內怪風陣陣,我突然覺得好似身處雪藏庫之中,忍唔住渾身打咗個冷震。
唔會呢個阿姐先係拳館掌門吳留手之類咁老土啩............?!
================