春泥
2018-06-28 23:05:18
Chapter 108 陰謀(上)
自從孖腸失蹤,朱斌仔取代了孖腸的位置後,石蔭的真技安便趁虛而入,搶佔了不少原屬8座數字幫的地盤,加上有南乳等人不服朱斌仔坐正而另起爐灶,朱斌仔面臨內憂外患的局面。
面對如此困局,朱斌仔只好向湯仲謀求助,道:「阿湯,真技安趁火打劫,南乳嗰班仆街又嚟抽後腳,你話好唔好搵炒蛋佢地幫幫手啦?」
湯仲謀道:「斌仔,你搵炒蛋幫手就中咗佢地計喇!你叫佢地幫手,到時你就要起身,讓個位畀佢地啲人坐架喇!」
朱斌仔一臉徬徨道:「阿湯,依家8座得返一半多啲人企喺我地嗰邊,人我地唔夠真技安多,講打我地又唔夠人打,咁點算好啊?」
湯仲謀道:「斌仔,我喺出面闖過一排,都識落唔少朋友,可以試下出去借兵返嚟,但係唔知你信唔信得過我啫?」
朱斌仔道:「阿湯,一世人兩兄弟,唔信你信邊個啊?況且無你,我都坐唔到依個位啦!」
湯仲謀點頭道:「斌仔,只要我地可以打低真技安,就可以話畀炒蛋佢地聽,我地有能力喺石梨立足,而南乳嗰班友仔,都唔再敢攪攪陣。」
得到了朱斌仔的首肯,湯仲謀聯絡了王公覆,道:「王公,朱斌仔落搭喇!我地啲人可以入嚟喇!」
電話彼端的王公覆喜道:「好,咁我叫凌霸佢地聯絡你啦。」