春泥
2016-12-31 22:19:53
我與阿興面面相覷,阿興道:「哥,你會唔會記錯咗?個鐵盒唔係擺係床下底,而係擺喺其他地方啊?」
我搲著頭,道:「無理由架!我好肯定擺咗喺床下底架!一係我地四圍搵下先。」
半小時後,我和阿興在家裡翻箱倒篋亦找不到那個藏有二萬多元的鐵盒子。
我坐在椅子,瞧著仍在努力搜索的阿興,頹然道:「唔好搵喇!搵唔到架喇!」
阿興眼泛淚光,不依道:「我行咗幾日豐澤同泰林,先睇中嗰部腦架,我好想打金庸群俠傳、好想同人玩ICQ、好想睇VCD啊!」
我打量了四周一眼,道:「個鐵盒無腳唔識走架!睇落又唔似有賊入過嚟!唔通係…」
阿興恍然道:「係肥佬陞,佢尋晚見住我竄入床下底擺番個盒入去架!」
我沉聲道:「成間屋得五個人,等佢地返齊晒,一次過問。」
晚上十點,肥佬陞和青雲陸續回來,阿興以怨恨的目光瞪著兩人,兩人亦察覺到氣氛不妥,肥佬陞問道:「阿興,仲咩個樣嬲爆爆咁啊?係咪喺學校畀人蝦啊?」