[突發]新年流流，我中咗嘉頓之神嘅詛咒

其實貼圖唔係主因，主因應該係班友瘋狂恥笑

三哥求下你出快啲

「咦？」

女班長發出驚呼聲，我更加唔敢望埋去，都唔知阿婆婆會唔會以為新年流流我哋兩個夾埋整鬼佢。

「呢個係……」婆婆好驚訝咁拎起一塊餅，

「肯定係搞錯咗啦！等我出去換先！」我講完就想拎走盒餅，

婆婆伸手制止我咁做，我愕然望向佢，發覺婆婆竟然係好開心咁望住盒什餅，原來冷淡嘅表情仲流露出一絲絲嘅笑意。

「阿婆以前……細個就係食呢個餅㗎……」

普普通通一塊餅竟然令婆婆態度大變，仲講起好多以前嘅故事。原來現年八十幾歲嘅婆婆細個最中意嘅零食就係嘉頓嘅餅乾，佢經歷過抗日時期，當時嘉頓廠房搏命生產俾抗日軍人食嘅餅乾，日治時期仲俾日本人破壞過廠房，所有事情都喺佢眼皮底下發生。

由童年到長大成人拍拖結婚，當時嘅人生活質素冇而家咁高，能夠選擇嘅嘢食都唔多，所以嘉頓餅就係過去幾十年香港人嘅共同回憶，簡單一塊餅卻可以令阿婆回顧佢一生嘅喜與悲。

（我真係冇收嘉頓錢）

我同女班長坐喺度聽咗好耐故事，明明發生喺我哋生活嘅香港，一切卻係如此遙遠，直到阿媽過嚟搵我哋，原來義工活動已經差唔多完結，臨離開前婆婆好開心咁多謝我哋，彷彿呢盒什餅就係佢收到最好嘅禮物。

離開老人院之後，我同女班長告別，阿媽帶我去其他親戚度拜年，我突然有個諗法，同阿媽講完之後佢都覺得非常好。

既然我冇辦法解開呢個詛咒，但係對於某啲人嚟講，或者呢個懲罰可以化作一種祝福。

＝＝＝＝＝＝＝＝＝＝＝＝＝＝＝＝＝＝＝＝＝＝＝

你咁講我出又唔係唔出又唔係 新年流流不如求過第二啲啦

阿爸之前同我密謀賺錢，所以搵定一啲平賣過期餅嘅地方，我哋一家三口一次過買咗廿幾盒餅，搞到個店員以為我哋神經病，再三強調呢啲餅已經過晒期。

通過我嘅詛咒，呢廿幾盒餅全部「翻新」成什餅，我哋將餅乾重新包裝成一袋袋透明袋，好似啲傳統麵包鋪賣嘅咁樣，之後一家人去到深水埗、北角等等比較多無家者嘅地區，將呢啲餅派發俾佢哋，當係慶祝新年嘅小小心意。

截至2015年，香港無家者數字逾1600人，而且每年不斷上升，「無家者」包括露宿者、麥當勞難民同埋居住政府收容中心嘅人士，由於食環署或者某啲地區嘅區議員會驅趕露宿者，雖然數字上露宿人數下跌，但總體無家者其實不斷增加緊。

當我哋將餅乾送俾無家者嘅時候，佢哋臉上並無喜悅，農曆新年應該係同屋企人喜慶嘅日子，但對佢哋嚟講就毫無意義，因為佢哋想要嘅，只係重新掌握自己生活嘅機會。

相比之下，我嘅煩惱係幾咁微不足道，零食唔好食、女神包餅咩味、上網追故又冇文，原來我只係一個身在福中不知福嘅細路……

「喂細路！」

一個拎住啤酒嘅阿叔叫住我，仲招手叫我行埋去。

「人仔細細，印堂發黑喎，搞乜咁大鑊呀！」阿叔笑住咁望實我，

我聞言大驚，呢位著到好街坊嘅阿叔擔住口煙搖住啤酒，但係個樣就同其他人好唔同，有股自然散發出嚟嘅氣勢。

「阿叔，你……點解咁講呀？」我忍唔住問，

「哦，瞓街只係我嘅興趣，其實我本身都有涉獵下面相學呀風水學等等，見你咁好心地，唔啱贈你兩句呀？」阿叔說，

「好呀！阿叔，你覺得我點呀？」我彷彿見到救命稻草，

「你份人係點我就唔知，但睇你屋企人關係都幾好。」阿叔扯一大口煙，

「好準呀！你點知我屋企人關係好㗎？」

「唏，頭先見到你老豆老母㗎嘛！」

「哦咁樣樣……」

「不過最近遇到啲凶險喎，雖然暫時未有性命之憂，但拖落去就唔多掂喇！」阿叔突然語氣變得認真，

「咁……咁……有冇方法化解？」我心怦怦狂跳，

「贈你兩句啦，聽住嘞！」阿叔乾掉手中啤酒，

我暗吞一啖口水，好認真咁爭在未搵嘢抄低佢。

live again

三哥
句disclaimer

三哥

重諗緊今年主題係乜，原來係無家者
三哥好野
要鳩得黎好笑，重要有意思，提醒大家節日重有群需要關心既人
係三哥！

live咗

live咗

三哥 啪啪啪 啪啪啪 啪啪

#530呢段真係正

in 三哥 we trust