[突發]新年流流，我中咗嘉頓之神嘅詛咒

三聯幫牟中三 2018-02-16 00:48:01

每年年初一我哋都會先去阿嫲屋企，因為早兩年阿爺過咗身，唔想逢年過節阿嫲要孤伶伶咁過，去到坐咗冇幾耐，阿叔同姑姐都嚟到，大家例牌恭喜發財派下收下利是咁。阿爸嗰邊算姑姐同姑丈最有錢，佢哋早年炒樓賺得幾多，又移民回流揸外國護照，所以講嘢不嬲比較大聲，姑丈最中意分享自己威水史，姑姐得閒仲會埋怨阿嫲偏心兩個仔之類。

阿爸成日都話，屋企人因為有血緣關係，有時候對得耐會忍唔住表露晒心底嘅黑暗面，所以唔係話親戚特別乞人憎，而係親戚特別會現真身。

我由細到大都知道對住姑姐姑丈要零舍小心，一陣講錯嘢可能就會俾佢唱通街唱幾年，可能每個人屋企都會有呢啲麻煩親戚啦，所以拜年時氣氛都會有些少緊張，冇乜屋企人開開心心嘅感覺。

寒暄一輪之後，班長輩就開始入正題，姑丈不懷好意咁望一望我，然後就問下讀書點呀乖唔乖呀，點知我都未答完佢就已經嚟料。

「香港教育質素真係麻麻呀，你睇下教到啲大學生成日搞事，做埋英國人啲傀儡，咩港大中大都冇用啦！有料就去外國讀呀知唔知呀！」姑丈老氣橫秋咁講，

姑丈個女即係我表姐就係去咗加拿大讀書，所以佢一得閒就會鬧下香港大學生有幾廢幾戇鳩，同時又暗串老豆冇本事送我去外國，新年流流阿叔同阿爸都廢事出聲，於是姑丈越講越過癮，開始分享佢同姑姐去荷蘭玩啲相，周圍問人有冇去過荷蘭去過歐洲。

「嗱我份人就最謙虛嘅，但係講真錢呢就賺唔晒嘅，搵到咪出去見下世面囉你話係咪呀，呢盒餅呀，我特登係荷蘭買㗎，香港買唔到㗎！」姑丈指住佢帶嚟嘅賀年禮盒，

「咁似啲百佳牌嘅！」阿叔講笑話，

「呢啲荷蘭嘢呀，我哋自己抬返嚟都不知幾重呀！」姑丈碌大對眼，

其實姑丈不嬲都出名孤寒，當年佢請我食過餐沙嗲王都講咗有幾年，仲試過利是入面塞現金卷，唔講仲以為佢係獎門人，要周圍派下咩加多賀同埋咩流行時裝禮卷。

「係呀，我哋不嬲有好嘢都同屋企人分享，唔會咁自私淨係俾一兩個咁㗎！」姑姐一有位又要入下阿嫲，

阿嫲、老豆同阿叔面色經已唔係幾好睇，突然間阿爸望咗我一眼，然後拎起姑丈盒餅。

「嘩……真係荷蘭文呀……好勁呀阿仔你快啲睇下……」阿爸攞住盒餅讚嘆不絕，

我立即意會佢喺度搞邊科，我伸手接住盒餅，好認真咁左睇右睇。

喵喵星人 2018-02-16 00:56:21

過年實有d聲大大又吝嗇親戚