[突發]新年流流，我中咗嘉頓之神嘅詛咒

2017年嘅農曆新年完結時，我屋企一共收到四盒賀年禮盒，當中有兩盒……應該係兩罐係我由細到大都好唔憎意食嘅什餅，我唔明，點解呢個世界咁多種餅，有曲奇餅、光酥餅、老婆餅、朱古力餅、芝士餅等等等等你唔整，係要整十九幾種冇人想知冇人想食嘅什餅出嚟，仲要一嚟就咁大罐。

「衰仔！我哋細個邊有你咁幸福呀！有呢啲食不知幾開心呀！」阿媽聽到我嘅怨言之後話，

「唓！阿爺細個打仗要食草添啦！又唔見你食埋一份！」我當然即刻駁嘴，

「哦你阿媽讀書嗰時有食㗎，食法同你阿爺唔同啫。」老豆一路捉寶可夢一路搭嗲，

結果老豆同我一齊俾人罰企，嗰晚阿媽仲扭計唔肯煮飯，阿爸唯有低聲下氣去認錯。

「唔好啦，我好想飲雞翼魚蛋湯呀，俾次機會啦老婆！」老豆企喺房門口講，

「你暗串我咁話啦！唔煮呀！」阿媽怒喝一聲，

阿爸退返出嚟，用快過保特嘅速度喺茶几下面抽出張外賣紙，一嘢塞到我手上。

「快快快！喺你老母改變主意之前嗌嘢食！」阿爸壓低把聲講，

於是兩罐嘉頓什餅嘅事就不了了之，日子一天一天過去，每次我買零食返屋企就會俾老母鬧，話點解嘥錢買都唔肯食兩罐餅，仲話唔食晒就唔會買新零食乜乜乜。卒之，我頂唔順阿媽嘅轟炸，每朝返學之前都會偷偷地拎幾塊餅，然後落樓下扔入垃圾桶，呢種愚公移山嘅方式足足進行咗大半年，去到兩個星期前，所有餅終於成功俾我扔晒。

我望住兩個空晒嘅餅罐，心入面多少都有點兒內疚，但係隨之而來就係能夠攞正牌買零食嘅喜悅，我為咗慶祝呢件事特登買返一大堆自己中意食嘅嘢，喺屋企一邊打機一邊咬住薯片，簡直係人生最大嘅享受。

就喺嗰一晚，我發咗一個好撚怪嘅夢。

請唔好怪我講粗口，因為個夢真係好撚怪，夢入面我坐咗喺一個好黑嘅密封房間入面，房嘅空間成個禮堂咁大，雖然周圍好暗，但我依稀見到四面牆都係金屬物料，而房間樓底高到無倫，幾乎要到廿樓咁高先係天花板。

正當我百思不得其解嘅時候，面前突然出現一道光，然後一個裝束好神經病嘅阿叔出現喺我面前。佢留住二撇雞嘅鬍鬚，頭頂戴住紅色廚師帽，臉色紅潤到好似關公，全身仲要著晒紅色衫，我淨係望咗一陣都覺得血壓有啲高。

「點解你要浪費食物！」大叔皺起眉頭講，

「……你唔係財神咩？問埋啲咁嘅嘢嘅？」我好奇咁問，

「財你個頭！點解扔晒啲食物都唔肯食，你知唔知呢個世界好多人冇嘢食㗎！」大叔好似好嬲，

「哦我知啦！阿媽你又學人玩cosply！唏唔好玩啦，我扔唔扔非洲細路都係冇嘢食㗎啦！」我忍唔住笑咗出嚟，

「放肆！簡直毫無悔改之意，喺你明白珍惜食物嘅重要性之前，我要令你自食其果！」

大叔怒吼一聲，頭頂突然傳嚟強烈嘅光芒，我抬起頭一望，突然間我發現自己身處嘅地方竟然好似一個超級巨型嘅空餅罐。

怪夢嚇醒咗我，窗出面已經天光，於是我起身準備返學，夢入面嘅事就慢慢俾我忘記咗。去到小息嘅時候，我同幾個同學落球場射下波，順便去小食部買啲嘢一陣上堂食。英文堂成日都無聊到爆，個個唔係瞓覺就係打機，我就借用呢段時間快手做返其他堂啲功課，做到有啲肚餓我就開頭先買嗰包朱古力餅嚟食。

一放入口，我就察覺到啲味唔對路，明明係朱古力夾心餅，點解成口都椰絲味嘅？我拎起包裝紙一睇，的確係朱古力餅冇錯，然後我拎一塊餅出嚟，竟然係嘉頓什餅入面嗰隻椰絲圈！

留名

留名

三哥

留名

三哥

三哥又黎啦

三哥

三哥

lm

又黎

嘉頓正仆街公司

朝拜三哥！

新年睇三哥故特別有氣氛

三哥

三哥

In 三哥 we trust

三哥

追擊嘉頓

三哥

一年中一次詛咒