[歷史台]普魯士之逆襲，德國統一之路

等睇俄佬幫拖

我想問 都打到落門口 點解peter要放佢一條生路

點解露西亞個大佬叫沙皇嘅?唔通因為中亞有沙漠?

點解露西亞個大佬叫沙皇嘅?唔通因為中亞有沙漠?

tsar係凱撒Caesar既音譯，伊凡三世自稱繼承東羅馬帝國，所以話自己係第三羅馬既凱撒（斯拉夫音譯：沙），後來講講下就變做沙皇

btw保加利亞皇帝都是沙皇

我想問 都打到落門口 點解peter要放佢一條生路

因為佢好崇拜大帝

雖然腓特烈取得兩場史詩級既勝利，但係聯軍既包圍網依然慢慢收窄。而同時，普魯士既劣勢越嚟越明顯--前線補給不足，國家財政開始出現困難。自1758年起，雖然普軍屢次以少勝多，但係軍損失比例往往係對手兩倍或以上。1759年，庫勒斯道夫戰役（Battle of Kunersdorf）展開，普軍同俄奧聯軍都各有約59000人。


由於經過連場戰鬥，普軍精英已經消耗殆盡，淨返啲老弱殘兵，同埋臨時係監獄徵召既雜牌軍，攻擊力大降。加上腓特烈魯莽進攻聯軍突出部分，點知因為戰前偵察不足（已經唔係第一次），事前唔知突出部後面係山谷，普軍要繼續進攻，必先越過山谷。就喺普軍步伐俾山谷拖慢時，俄軍展開猛烈既炮擊，普軍陣形大亂。有子彈射中腓特烈既胸部，好彩被動技－－主角光環啟動，佢既金質鼻煙壺擋住咗粒子彈，得以死裏逃生。


庫勒斯道夫戰役中，一籌莫展的腓特烈大帝


庫勒斯道夫戰役形勢圖

但係普軍就慘咯，俾敵軍殺個落花流水，總共損失19000人，是為腓特烈生涯最慘既一次失敗。腓特烈依家能夠集合既，就只得返15000人。更嚴重既係，依場敗仗導致勃蘭登堡中門大開，90000聯軍可以直入柏林。腓特烈抱住必死既決心，指示柏林守軍準備作戰，自己迅速回軍，諗住死係首都城牆咁話。佢喺日記到都交代埋自己既身後事。但係唔好意思，腓特烈你今次表演唔到壯烈殉國啦，因為我哋發現主角光環又啟動咗，奧俄聯軍因為擔心補給線太長，竟然冇乘勝追擊，令腓特烈可以鬆一口氣，史稱勃蘭登堡奇蹟（Mirakel des Hauses Brandenburg）。