腓特烈見到歐洲混亂再起，心諗正呀喂，係時候食大茶飯啦！作為勃蘭登堡選帝候，佢向杜麗莎提出，以自己張選票換取哈布斯堡省份西里西亞。西里西亞地處普魯士、奧地利同波蘭交界，戰略地位重要，同時當地有豐富既礦煤資源，對普魯士既軍隊發展非常重要。最重要既係，西里西亞係新教徒地頭，一早唔想俾以天主教為主既奧地利統治，岩晒信奉新教既普魯士。
黃色地區為西里西亞
杜麗莎都未應承，佢就當正西里西亞係自己一樣，趁奧地利同法國對峙嗰陣，帶上差唔多全部軍隊，出兵「接收」嗰度，好快就佔領咗首府布里斯勞(Breslau)。杜麗莎都唔係好蝦，即刻派兵收服失土，展開第一次西里西亞戰爭（First Silesian War）。經過一輪捉伊人後，21600人既普魯士軍隊係莫爾維茲（Mollwitz）遇上19000人既奧地利軍隊，莫爾維茲會戰開始。
會戰伊始，普軍按原先計劃，全軍分成兩行向敵軍逼近。但係奧軍騎兵突然衝鋒，沖散普軍右翼既騎兵，令到中間既步兵完全暴露係敵軍馬蹄之下。係依個危急關頭，腓特烈爆發啦，佢以九秒九既速度－－逃離現場，留低老將舒維因指揮大局。將領臨陣逃脫，係大部分情況下都係死罪，只不過佢係國王，冇人吹得佢脹咁姐。
幸運既係，憑著舒維因出色既指揮，普魯士步兵以密集既子彈擋住咗敵方騎兵既進攻。之後，雙方排成一線，進行激情互射。腓特烈．威廉既訓練成果喺度得以完美展現，普軍既開火頻率喺對面既1.5倍，奧軍好快就遭受嚴重損失，攪到要急急腳撤退。雙方傷亡人數相若，都係大概四千人左右，但係普魯士成功令奧地利撤退，取得戰略勝利。腓特烈帶領既第一場戰鬥，以普魯士勝出，自己輸咗結束。
莫爾維茲會戰圖解
莫爾維茲會戰--普魯士步兵衝鋒
?
