［是咁的］ 我喺加拿大住咗十幾年, 識到一個女仔叫Z.....（5）

到D收咗線之後我已經距離開心茶餐廳唔夠十分鐘約嘅距離, 望一望時間應該仲趕得切kitty媽收工前殺到過去.

不過以防萬一, 我決定打個電話畀Z.

Z聽電話就插過嚟：喺邊呀你？kitty媽收緊檔喇！

我：十分鐘、丫...八分鐘、八分鐘..

Z：快啦, 我已經不斷喺到掩掩樣樣擾亂緊佢㗎啦...再拖落去kitty媽應該攞刀斬我都似...

我：er...

正當我唔知點答佢好嘅時候, Kitty媽把聲經Z個電話傳過嚟：係咪阿仔呀？

我：係呀媽~

Kitty媽：阿靚女好似叫我斬你喎？

我：唔係呀, 係斬佢呀, 你聽錯啦！

Z：我頂你呀！

我：er.....

Kitty媽：唉, 阿媽唔理你邊個斬邊個, 總之唔好整污糟我的地方就得...

我：咁講嘢呀媽...

Kitty媽：衰仔你仲有幾耐到呀？

我：五分鐘！五分鐘！

Kitty媽：咁好快啫, 放心, 你有心阿媽實等埋你,你慢慢揸車啦, 唔係你臨走之前仲中張ticket就搞笑...

我：知道知道...

Kitty媽：咁你小心揸車啦, 我帶靚女去揀刀先..

我：喂屌！？媽！？

Z：好好好....kitty媽邊把好用？

Kitty媽：呢把丫, 有咩新仇舊恨, 一刀落去乾手淨腳....

我越聽越唔對路, 好緊張咁大叫：喂喂喂！？兩位靚女冷靜啲丫！？
但下一秒我發現自己已經畀人cut線....

眼見前面掟埋隻灣就轉入旺角, 只能夠....唉....

泊好車行到入去開心茶餐, 見到Z捧住碟梳乎厘、䟴䟴腳睇緊電視, kitty媽戴住副老花鏡坐喺大枱埋緊數.

我：媽~

kitty媽：衰仔, 嚟咗呀？
一路講一路坐直個人、除低副眼鏡.

我：係呀,媽.

kitty媽望咗我兩眼：嘩衰仔你last day都唔買啲嚟孝敬下你契媽？仲係人嚟嘅？

我：er.....

kitty媽另外望住Z：靚女！

Z即擰過嚟：係？

kitty媽：立架撐！同我拖個仆街仔入後欄隊冧佢！記得乾手淨腳呀, 斬件煲熟先好掉過隔嚟垃圾站！

Z成個彈起身：知道！

我：喂屌, 你兩個使唔使咁呀..
我隨手攞起放喺門口嘅餐牌：你兩個食想食啲咩就講, 鋸塊靚扒好唔好？我埋單！

kitty媽：玩嘢呀衰仔！廚房收咗工喇！埋你單就有份！
一路講一路擰轉面喺佢後面放餐具嗰個兜拎咗把鋸扒刀出嚟：等阿媽大義滅親、劈你個仆街仔先...

我：er.... 媽唔好咁啦, 呢把嘢有排劈喎...

Z呢個時候走過嚟, 拉住我向門口嗰個方向行：仲講？拿拿聲過隔離買碗糖水俾kitty媽食啦..

kitty媽聽見就攞住把刀指住我：好心你學下人哋靚女啦, 幾醒目呀！你一把年紀仲戇鳩鳩咁, 返到香港畀人玩撚死你...

我：係係係....我即刻跟佢去學做女人先....

kitty媽揮一揮佢手上嗰把刀：咁就啱喇, 呢把嘢都利㗎, 攞去切啫啫丫...

我：媽, 乜你咁客氣呀, 整污糟你啲嘢就唔好啦...

Kitty媽：後欄有洗碗機呀？

我：er...

Z：妖你仲講？行啦！！
之後勁大力一嘢扯咗我出門口.

我出咗門口之後, 就話：講多兩句啫, 都未問kitty媽佢想食咩...

Z：kitty媽同鴻福堂班人識咗咁耐, 過去問咪得囉！

我：丫屌..又好似好有道理咁喎...

過到去嗌完糖水畀埋錢之後, Z就話：喂, 你喺到等, 我出去打個電話畀我男朋友.

我：使唔使咁痴纏呀？

Z：唔係呀, 我今晚冇揸車, 佢車我過嚟㗎, 我諗住話聲畀佢聽你到咗, 叫佢預時間過嚟接我.

我：好趕咩你而家？我一陣車你返去咪得囉？

Z：你老人家聽朝早機吖嘛！食埋糖水散㗎喇~我仲有下場呀.

我：有冇咁忙呀你？

Z懶係野咁撥一撥頭髮：使乜講！我本身同佢班friend係hwy7嗰邊飲緊嘢嘅, 見你得閒就拿拿聲衝過嚟邊等你咋, 做朋友叫係咁啦？
講完用隻手指篤住我心口.

我：辛苦曬辛苦曬...

Z：仲唔快啲感激我啦~

我：感~

Z：乖. 而且我男朋友話雖然同你見得嗰一面, 但話曬相識一場, 佢想過嚟同你打聲招呼先走喎.

我：吓？唔使咁嚴重呀？會唔會阻到佢呀？
心諗, 佢想同我打個招呼啫, 但你肯定我都想見到佢？..當然我冇講出聲..

Z：傾兩句啫, 反正佢係唔係都要過嚟接我㗎喇~

我：不過佢過嚟都好丫, 反正我今晚有揸車呀,叫佢過嚟望一眼先啦...唔係一陣有咩事, 我費事你上身..

Z：都係呀可？唔係因間有咩事, 我等你返嚟先開你波, 你啲利息都幾襟計..

我：丫屌...
聽見Z咁講我拿拿聲推佢出門口：快啲死出去打畀人啦...

Z：係係....

到係開心茶餐廳, 同kitty媽一齊食完糖水之後, 再同kitty媽傾左陣計, kitty媽話時間都夜, 就趕我哋出門口, 叫我哋快啲返屋企瞓覺.

當我哋拎住啲垃圾行緊去掉嗰陣, Z就話：咁我call我男朋友叫佢過嚟接我啦？

我：好丫.

隔咗陣, Z收線之後話：佢佢而家過嚟..

我畀咗個ok嘅手勢Z：使唔使上車等佢？

Z：唔洗啦, 佢揸過嚟最多咪四個字？企一陣囉又唔係凍.

我：好丫.
講完我就拎咗啲包煙出嚟望一望：丫屌, 得返最後一支..

Z：hmm哼哼！

我：獨頭你都搶？

Z用號堅決嘅語氣發出：hmm哼哼哼哼哼哼！...

我：丫屌, 怕撚咗你....

然後我哋就用好慢嘅速度、一齊share埋最後呢支煙, 直到聽見嗰條響到仆街嘅喉轉入嚟旺角停車場.

Z男友喺我哋附近泊好車之後, 就行過嚟同我打招呼, 咁我當然趁有機會即刻拉佢過去睇下我架車, 好彩佢老人家睇完都滿意, 然後我哋又無無聊聊咁吹咗幾句水, 不外乎咩幾時返嚟呀、一路順風呀嗰啲廢話, 廢噏咗十零分鐘之後大家就準備各自離開.

正當我準備擰轉身上車嗰陣, 背後突然傳理Z勁大嘅叫聲：喂！小C子！！

我聽見Z嗌我就下意識擰轉身, 正想開問佢又點嗰陣, Z已經勁大力飛撲過嚟攬實我, 嗰度衝力大到我成個人退後咗一步.

當然平時冇事冇幹Z要幾大力攬住我我都無任歡迎, 但係而家佢條仔企咗喺我後面...總係有種隨時屎忽不保嘅感覺..

不過既然Z當住佢條仔面前都唔介意, 我作為利益既得者, 冇理由推開佢㗎？所以我亦都大大力攬返實佢：點呀小姐你又？

但Z冇出聲答我, 淨係勁大力咁攬實個我, 個頭挨咗喺我膊頭隔離.

攬咗唔知幾耐, 雖然我唔知Z諗緊乜, 但係我feel到自己開始眼濕濕, 始終我一直以為, 無論我生活點過、同邊個拍拖都好, 我都會同呢個叫做Z嘅女仔一直量子糾纏落去..

直到永遠.

冇諗過原來突然間, 話要分開就分開.

原來世界真係上有樣嘢, 叫做因果循環.

當年我仆街地令到細c中咗遞解令,估唔到今日自己硬食返. 所有野到最尾,果然總會係一個意想不到嘅情況下返嚟玩鳩你...

但至少, 我有機會同Z好聚好散.

而且嗰一刻嘅我,係唔知道自己會返唔到加拿大, 呢一下擁抱, 係我同Z呢一世入一邊最後一次.

當我喺度亂諗嘢嗰陣, 我開始feel到自己心口有啲濕, 然後Z突然開口：十年喇可？

我：...係呀, 戇鳩鳩咁就十年啦...

Z：你就戇鳩鳩, 我都唔知過得既充實..

我：一定啦...

Z：唔知...我哋人生會有幾多個十年呢？..

我：唔知㗎, 不過肯定你已經攞咗我其中一個十年..

Z：大家咁話啦...

各自沉默咗成分鐘之後, Z再開口：不過你喺我識得嘅咁多個人入面, 真係唯一一個我以為一世都唔會離開嘅人...

我：離開加拿大？定離開你？

Z：兩樣都係.

我：我自己都冇諗過㗎...

Z：如果...呢一刻先你唔好走, 會唔會太遲呢？

我：其實我自己都諗過搬去其他城市, 繼續烏鼠落去....

Z：認真？

我：諗過下㗎...不過...我覺得呢一刻乖乖地聽 immigration話, 都係為咗將來可以光明正大咁返嚟啫..

Z：你識路返嚟就最好...

雖然我一直都冇諗過自己唔會再返加拿大, 但突然有種奇怪嘅諗法：喂...

Z：咩呀？

我：如果...我有咩事返唔到嚟, 有咩欠你嘅...留返下世還啦..

Z：你肯定你下世還得曬？

我：屌你咩..

Z：你屌過啦, 有咩幫到你？

我：丫仆你個...

Z：有咩就今世搞掂佢, 最憎人拖拖拉拉...

我：屌丫...由你把口講出嚟,特別有說服力..

Z：小！

我：係係...盡力而為啦...

Z：不過...如果touch wood..你真係返唔到嚟...我希望我哋喺未來嘅某一日, 都會搵到自己認為最好嘅結局..

我聽見佢咁講, 只能夠苦笑咗一下：斷估..你應該會過得比我好..

Z：點解呢？

我：因為係選擇題呢方面, 你犯錯嘅機率比我低..

Z：唔係㗎, 有時我都覺得自己揀錯咗, 不過錯咪錯囉, 總會有路行過去嘅~

我：師太, 乜突然睇得咁化呀？

Z：睇得你多..

我：啤..

再過都唔知幾多分鐘, Z突然發出啲怪音, 好大力咁攬實咗我一下, 然後放開手、捽一捽對眼：走啦, 你早啲返去瞓啦, 聽朝早機！

我：係係..

Z：返嚟再約？

我：好呀！到時第一個call你！

Z：係至好講！

我：一定啦！

Z：咁....到時不見不散？

我：一見..

Z未等我講完就接咗：即殺！

然後我哋兩條戇鳩笑咗陣, Z再次發出佢嘅招牌怪音：hmm哼哼！

我：係係..

Z笑住揮一揮手, 之後轉身、向住佢男朋友方向行過去, 而我亦都擰轉身就開門上車、揸車返屋企, 沖個靚涼之後達落床, 攬住我三隻貓, 準備迎接我係加拿大嘅最後一個朝頭早...

然後..

我只能感嘆一句, 果然係選擇題呢方面, 我永遠都選擇錯.

然後嘅然後...

係13年之後, 我身處喺距離toronto距離16258km嘅墨爾本、一路戇鳩鳩咁等待返加拿大嘅機會, 一路錄低自己過去係加拿大發生過嘅經歷.

不過, 我仍然慶幸係呢段兜兜轉轉、亂七八糟嘅四十幾年入面, 我曾經遇上過一個女仔, 陪我一齊經歷咗四分之一嘅人生.

從來冇諗過一個七年前、短短十三篇, 加埋只係千幾字, 純熟只係為咗兌現自己對Z一個人嘅承諾而寫嘅故, 最後會變成而家過百萬字嘅Z大長篇.

雖然一切已經事過境遷, 只係希望如果有一日, 我同你仲會撞得返, 當我問你仲記唔記得嗰晚我係kennedy station對面間cafe應承過你嘅嘢嘅時候, 你會笑住舉起中指同我講：

妖, 你當我好似你咁老人癡呆咩！？小C子你個仆街, 當時應承我, I will always ..

最後, 感激所有由鬼故開始, 到黑化、不舉、食囡等等, 一路追到Z故嘅各位巴絲.

感謝你哋無論我中間發生幾多奇撚怪怪嘅事,你哋都願意等落去.

希望有一日, 你哋會遇到屬於你哋人生嘅Z.

到時記得無論發生咩事都好, 記得唔好放佢走.

如果真係唔覺意走散咗, 點都要搵番佢出嚟.

就算最後搵唔返, 都唔可以忘記同佢發生過嘅一齊.

應承過佢嘅事, 無論隔咗幾多年、係死前嘅一刻都要做到.

最後嘅最後,

Z故最尾一個夾帶私貨時間：
https://youtu.be/FHJ497bmR7A

有緣嘅, 下個經歷再見














































最後嘅最後, 其實仲有一個最後..

我老婆世一

感謝老婆畀返個account我, 等我可以喺有生之年post完嗰經歷.

我愛我老婆

真係黃左

冇黃, 呢到紅到發紫, 愛中國愛香港

Welcome back

感謝老婆畀返個account我

到底發生過什麼事

冇事發生過, 老婆突然要攞我個account,做老公嘅當然唔會詐型

明白

今世嘅債今世還
下世嘅債下世先算

幾時去加拿大呀？

終於埋尾，由鬼故到而家都有半年？

上個月通知咗要去做police check, 但因為我唔諗住飛轉返香港搞, 澳洲呢邊打指模要排到9月先有得做

鬼故八個月前開

貓巴！！！！！

咪撚再催, 一炮過完

你老婆好難唔知囉，期實Z都睇緊