［是咁的］ 我喺加拿大住咗十幾年, 識到一個女仔叫Z.....（5）

貓巴無事呀嘛

收到風佢老婆知道有連登呢篇文，靜靜雞返澳洲仲當場捉姦斷正佢同泰妹喺房.....

貓巴你係咪遇到d咩事呀

貓巴，我等著你回來

個post就咁比個弱智搞到完左

貓巴， 個故事完唔完唔重要。我諗有經歷既人都唔會咁執著個結局。

但報個平安好嗎？

貓巴呢
上下水報下平安都好丫 平時都上嚟吹下水

消失的貓巴

故唔想繼續ok
報個平安可以啩？

希望貓巴唔係有咩事

希望貓巴只係拎到簽證趕住去會合老婆所以先冇時間理呢度

一係咁，貓巴既然唔想回應
係你嘅話就請正評呢個留言，就擋報咗平安

其他友負評ok

鳩吓鳩吓終於去到十月, 亦係我係加拿大住咗十幾年嘅最後嘅一個月份.

諗落真係有啲好笑, 我當年因為香港讀中學嗰陣行為大過良好, 連續兩年創下負操行分嘅佳績, 結果係同一間學校讀咗兩年F2都仲未升到上去F3, 係講緊要讀第三年嘅時候, 間學校終於頂我唔順、同我割席.

呢個消息重要係特登拖到暑假中期、八月頭先同我老母, 講搞到佢老人家臨急臨忙四圍幫我搵學校, 但因為時間關係好多間都已經收曬學生, 搵到就嚟八月底都冇聲氣, 最後佢老人家嬲嬲地直接送咗我去加拿大讀書.

當時佢送我去嘅, 就正正係鬼故post出現過嘅Robert Land Academy.

亦因為咁樣, 對比其他人我係遲咗一個月先開學, 而當年到埗加大嗰陣時, 正正就係十月.

所以正式嚟講, 由落機到上機, 我剛剛好係加大住足十二年.

雖然我住咗咁耐, 但我唔係鍾意亂買嘢嘅人（主要係因為窮）, 而傢俬亦都唔諗住搬走、全部留返畀房東（當係我嗰三隻貓係間房入面作出破壞嘅補償）, 所以就算拖到距離遞解令只係淨返一個星期先開始執嘢, 我都冇諗過會趕唔切.

正當我係機場放工返嚟沖個涼, 之後開始執野、直到執到差唔多七七八八, 點著支煙感嘆緊自己十二年嚟所有家當只係得2個行李喼、兩個垃圾袋、一部電腦、電視機同一堆書, 再加三隻貓嗰陣, 收到Z嘅電話.

我：咁錯蕩呀, 唔使做咩你？

Z：放lunch呀.

我望一望個鐘原來已經成點, 成朝掛住執嘢都未食飯, 講嘢就有啲肚餓：丫係喎...

Z：喂老細, 你下個禮拜走喇喎, 執齊未㗎啲嘢？

我再望一望嗰堆少得可憐嘅“行李”：七七八八㗎啦..

Z：有冇啲嘢要放去我嗰邊？

我：嘩~咁有心呀..不過你而家先嚟問呀, 會唔會遲咗啲？

Z：丫超..好心啫..

我：都係嗰句, 你個好心遲咗少少咁囉..

Z：唔好俾我睇死你丫, 你咪又係而家先嚟執！

我：er.....

Z：小！

我：係係...返工忙丫嘛...

Z：咁又係, 你條痴線佬, 下個禮拜三就走今晚仲返緊工..

我：我想㗎？窮丫屌...

Z：唉..講呢啲...幾時last day話？

我：後晚, 不過星期五晚返多去一次.

Z：吓？搞咩呀？

我：還返個pass同拎 reference letter呀..

Z：哦...仲諗住約你去echo唱k添.

我：umm...都可以呀, 你想約幾點？

Z：收工過到嚟....七點囉？

我：使唔使食埋飯先過去呀？

Z：求其係echo拍碗公仔麵算啦~

我：咁ok呀, 到時唱埋先拎返去囉, 又唔急嘅..再唔係機場嗰邊改禮拜六晚先返去都得..

Z：係咪㗎？

我：係呀, 我都係約咗阿頭喺機場門口交收咋嘛..

Z：咁hea?

我：無謂嘥錢泊車喇..

Z：咁我約定你星期五晚7點echo㗎啦喎..

我：ok啦..你唔好遲就得...

Z：傻豬嚟嘅, 講埋啲咁嘅嘢....

我：一定係啦...

正當我放低電話準備收線嗰陣, 電話另一邊嘅Z突然大叫：喂喂喂！

我唯有拎返起個電話：又點呀小姐？

Z：爭啲唔記得講, 到時你記得拎埋你架車轉lease啲文件出嚟呀.

我：吓！？搞咩呀？

Z：你之前唔係話搵緊人接手你架車咩？

我：係呀, 再搵唔到就諗住蝕錢還返畀dealer㗎喇..

Z：咪係囉, 我幫你搵到人接啦, 到時記得拎出嚟畀人簽呀！

我：竟然？

Z：係呀, 跪拜我啦！

我：跪.

Z：讚美我啦！

我：讚.

Z：小C子乖~~

我：但邊個咁夠義氣呀？last min都幫我接手？

Z：星期五你咪知囉！

我：咁神秘？

Z：得啦, 總之我碌爆人情幫你搞掂曬, 到時記得拎份野出嚟就得.

我：um..之但係...我之後都仲要用車喎, 起碼要等到禮拜二先交到車....

Z：um.....你啲嘢係咪搬過去D到？

我：嘩屌, 乜你個話題會突然間返轉頭嘅？

Z：妖, 咁係咪呀？

我：係呀, 星期二搬過去.

Z：咁你上機之前, 都係過去佢嗰邊先出發㗎啦？

我：梗係啦..

Z：你嗰朝揸車過去？

我：突然咁多野問嘅？你又更年期呀？

Z：係呀, 妒忌定羨慕？

我：樣樣都有啲咁啦...

Z：咁不如我幫你提早完結你個生命周期丫？

我：咁客氣呀...

Z：答啦~妖..

我：哦....唔係呀, 我call阿wing咋..

Z：咁掂啦, 到時你泊底架車喺你屋企, 鎖匙走之前畀D,我過去搵佢攞咪係囉！

我：都得....咦？仆你個街丫！

Z：你又仆乜春呀？

我：仆你個仆街囉！你唔係諗住唔嚟送我機吓話？

Z：送乜鬼嘢啫, 你都識講啦, 窮呀..要返工呀..

我：屌丫！窮又唔係第一日㗎喇, 我哋識咗咁耐, 咁都唔嚟！？

Z：妖, 你又唔係唔返嚟, 到你返嚟嗰陣, 我車埋D去接你機又點話丫？

我：um...咁...都ok...嘅..

Z：咪係囉！唔講啦, 你快啲執埋啲嘢啦！唔好漏呀, 唔係到時你返到香港翹起手要用, 我都唔知去邊到燒畀你.

我：丫屌..

Z：咁你轉頭call肥仔book k房, 我哋星期五晚見啦！

我：係係...

到星期三晚返工派埋散水餅, 臨收工之前又俾肥C捉咗去食煙, 吹咗成個鐘水先行返停車場攞車, 正式完結咗我係加拿大暫時最後嘅一份工.

到星期五晚, 見唔算太凍就懶得揸車、決定求其著件hoodie加件薄褸, 行路過去echo.

等緊過馬路嗰陣, 見無聊就順手打個電話畀Z：喂, 你到咗未呀？

Z：到咗喇, 喺停車場, 你喺邊呀？

我：差唔多啦, 等緊過馬路.

Z：咁ok啦, 一陣...咦？咪住, 等緊過馬路？你行路過嚟呀？

我：係呀, 咁近行過嚟得啦, 費事要搵位泊車.

Z突然勁大反應：我頂！你~咩~~~

我聽到Z咁樣都有啲奇怪, 但繼續hea答佢：頂乜呀又！？死咗捐一邊肺畀你頂餐飽啦~

Z 把聲灰到爆：大佬呀, 你唔係玩我呀話？

但我仲繼續唔識死：吓？冇呀, 你識我咁耐都知我冇興趣玩啲過咗更年期嘅女人..

Z：大佬呀, 又係你話要轉lease呀！

我：係呀, 啲文件拎咗出嚟囉？

Z：你淨係拎啲文件出嚟托咩, 你架車呢！？冇車人哋睇條毛呀！？

我：er.....
心諗, 係喎, 戇鳩咗添...

正當我諗住同Z講我返屋企攞車嗰陣, 突然聽到佢嗰邊電話傳嚟一把男人聲：無所謂啦..

Z：吓？大C你等等先..

我：吓？哦..

然後聽到Z同個男人姨姨哦哦咗一輪, 之後又再問我：你架車之前有冇撞過？

我諗都冇諗就好誠實答佢：有呀, 被人係intersection左轉撞到左邊個車頭,不過claim曬保險返原廠整返曬.

Z：哦哦哦...
跟住又同佢隔離個男人講咗幾句嘢, 再問我：咁仲有冇其他大小問題？