我無啦啦同隻芝娃娃交換咗身體，跟住無啦啦又遇上喪屍大爆發

緊貼lgbt潮流

無得做大波妹

今晚仲有冇

無了，大家早抖

訓醒推推

哈囉

「咦喂，乜原來你兩個喺度！」

「你係邊位，我地好似唔識架喎。」Irene同阿明退後一步。

我變咗個南亞仔，佢地唔認得我都好正常。

「係我呀，本來我上咗Irene你個身，不過頭先又同咗個南亞仔交換咗身體。」我解釋話。

「聽把聲又好似熟口熟面咁喎。」Irene話。

「入嚟商場之前，我同你地喺小巴放屁，趕走咗班喪屍嘅，記唔記得？」我咁樣一講，佢地就知我係邊個。

「乜係你？不過點解無啦啦你又會變左差仔嘅？」阿明問。

「唉！傷心事唔好提啦，我反而想問你地去咗邊？我屙完尿出嚟就唔見咗你地嘅？」

「頭先你應該都聽見有喪屍入咗嚟廁所，咁啱嗰嗰係我地嘅小學同學，我地趕咗佢出去廁所，後來落唔到手對付佢，最後唯有趕埋佢出商場。」阿明回答我話。

Irene接住講：「跟住我地返轉頭入廁所就唔見咗你。估唔到再見返你，你竟然變咗個阿差。」

「拿拿拿！『阿差』、『差仔』呢啲係帶有歧視成分架，正確叫法應該係『南亞裔人士』。」我糾正二人。

「知啦『喬寶寶』，惠康喺嗰邊，我地行啦！」Irene指住前面方向。

「喬寶寶好似印度人架喎，我個款好明顯就係巴基斯坦啦。」

「一樣啫一樣啫，不過你到底係點樣變成南亞仔？」

「呢樣就要從我屙完尿出嚟見唔到你地講起……」

我一邊行一邊講，將自己剛才差啲俾人強姦嘅經歷講出嚟。

佢地兩個聽完都替我抹一把冷汗。

入到超級市場，裡面竟然無喪屍，而且貨架仲剩餘少量食水同乾糧。

我地一人推一架車仔掃貨，總之食得飲得嘅統統擸曬。

「滋滋—滋滋—」突然間褲袋部電話喺度震。

部電話本來係屬於Irene嘅，啱先俾條綠毛仔搶走咗兼袋咗落袋。

我停低拎部電話出嚟望吓咩事，熒幕顯示電話係一格信號都無，至於呢刻收到嘅係，由政府機關發出嘅緊急警示。

警示內容唔係文字，而係一段影片。

我叫埋Irene、阿明一齊過嚟睇。

片中嘅發言人係一個裝住軍服嘅白人鬼佬，佢用英文發言，隔籬有個華人翻譯佢嘅講話。

個鬼佬主要講咗三樣嘢。

第一，佢話一種前所未見嘅病毒正喺香港肆虐，導致受感染嘅人變成失去常性嘅「喪屍」。

第二，佢表明聯合國已經出動軍隊，協助香港解決今次嘅喪屍危機。

另外世衛專家亦已經積極開會，嘗試搵出消滅病毒嘅方法。

第三，佢話除咗聯合國軍隊之外，軍隊亦挑選咗一班被救嘅生還者，參加接下來嘅行動。

講到呢一點，鏡頭畫面由個鬼佬，轉移到去嗰班被救嘅生還者。

佢地每一個人都配備整齊嘅裝備同武器。

鏡頭一路pan，突然閃過一個熟悉嘅人影。

我即刻㩒停佢，拉返後去睇。

「做咩唔睇埋落去？」Irene問。

「呢個人…呢個人係我！」

我指住個mon，畫面影住其中一個生還者，就係我原本嘅身體：「呢個係我最原本嘅身體！」

「呢條友係你？乜你本來個樣咁柒嘅。」Irene講嘢好直接。

「係喎，望落你依家個差仔樣仲靚仔啲喎。」阿明再踩多腳。

「得啦得啦，唔使你地講我都知自己樣衰。」

我叫佢地唔好再講，而睇見自己嘅身體仍然安然無恙，心入面因此感到安心。

咁即係代表，我仲有機會攞返自己個身體返嚟。

全片大約兩分鐘，講到最後，個鬼佬發言人話，佢地會盡一切努力處理今次危機，並會加派人手繼續搜救生還者，呼籲各位市民堅持落去，唔使擔心。

聽完佢咁講，我地總算叫做放心返少少，希望到時真係會有人嚟救我地。

條片播放完後，畫面就彈返去主界面。

我睄到Irene部電話有成兩百幾條未讀訊息。

於是手多多開嚟睇吓，結果發現呢二百幾條短訊，都係嚟自一個叫「仆街冚家剷」嘅人send嚟。

我就八卦去問Irene：「呢個『仆街冚家剷』係邊個嚟架？幾日前佢send百幾二百條message，問你喺度邊喎。」

「佢咪就係我仆街老豆囉，大約一個禮拜前，條友話無啦啦話要送我去東平洲，我死都唔肯去，所以咪離家出走，去咗阿明屋企度住。」

「東平洲好遠架喎，佢要你去嗰度做咩呀？」我問。

「我唔q知喎，反正無論佢講咩我都唔會聽，因為我呢世人最憎嘅人就係佢！」

一提起佢老豆，Irene又有啲扯火。

之後我地坐低喺地下，一邊咬住餅乾，一邊就聽Irene數臭佢老豆。

原來佢老豆真係幾仆街，唔單止唔俾Irene變性，仲係咁逼佢留長頭髮做女仔，一旦唔服從就搵棍毆佢，甚至令燙斗辣佢。

所以，Irene身上嗰啲疤痕唔係玩sm得嚟，而係俾佢老豆打成咁。

換轉我老豆咁對我，我應該都會憎到佢死。

不過話分兩頭，雖然Irene老豆好仆街，但就幾有錢。

佢地住喺小西灣藍灣半島複式單位，聽講仲有無敵大海景。

唔怪得Irene銀包袋住咁多現金，原來真係有錢女嚟。

「咁你老豆係做邊行賺到咁多錢？」我問Irene。

「佢係做生意嘅，不過做咩生意我就唔清楚，我亦都從來無興趣過問，我淨係知佢成日唔喺屋企，但又好鍾意管我！」

「哦~我仲有個問題，你係咪叫金敏英，你係韓國人嚟架？」

Irene點點頭答我：「我老豆係韓國人，我阿媽喺好細嗰陣就走咗，之後我老豆就帶咗我嚟香港。」

「哦~原來係咁~咁你大個之後，有無返過韓國？」

「呢個梗係有啦，不過我鍾意香港多過韓…」

「喂喂喂！你地兩個幾時變得咁好傾架！」一直都無機會出聲嘅阿明突然間搭嘴。

「做咩呀你，無啦啦喺度站亂歌柄。」Irene話阿明。

「你地兩個由頭先到依家，一路雞啄唔斷，Irene你完全都唔理人嘅！」阿明好似呷醋咁款。

「邊度有唔理你，係你自己唔出聲喳嘛。」

「哼！」阿明擰轉面，好認真咁對我講，「我警告你唔好諗住撬走我嘅Irene！」

我就覺得好笑：「你放心啦， 我鍾意女人架，同埋Irene變咗男人，正常都唔會鍾意返男人啦。」

「呢層又唔係喎，雖然我變咗男人，但仍然都係鍾意男人。」Irene修正我嘅說話。

「吓？既然你鍾意男人，咁點解唔直接繼續做女人，仲要變性做男人？」我無法理解。

「我性別認同係男人，但唔代表我嘅性取向係女人，仲有邊個話做咗男人，就唔可以繼續鍾意男人？」Irene反駁我。

我都唔知應佢好，只可以話，LGBT嘅世界果然好難理解。

我地醫飽個肚，仲剩咗一啲嘢食，諗住攞膠袋裝好佢打包，偏偏就係呢個時候，傳嚟「鄧鄧鄧」嘅密集腳步聲。

我地聽聲都知咩料，於是加快手腳，可惜最後啲嘢食都未塞曬入膠袋，一大班喪屍就陸續湧咗入嚟超市。

故事待續

依家差仔咁大味 夠唔夠臭走班屍

咖喱

Irene老竇未卜先知
係咪同病毒爆發有關

無睇幾日 又追到live
雖然未有甜 但唔格硬加已經幾好睇

痴線 臭走d 喪屍都諗到

Irene原本個身體已經

泡菜妹

「Raughhhh！！！」

超過二十隻喪屍向住我地衝埋嚟。

當中有兩個係無著褲嘅南亞仔，同埋一個赤裸嘅大波妹。

佢地俾喪屍咬完之後，都變成埋喪屍。

「對面有咁多隻，我地散開穩陣啲喎。」我提議大家散開。

Irene同阿明點點頭，表示認同。

於是我地數三聲後，就朝唔同嘅方向散開。

Ireng向左，阿明向右，我就向後走。

個南亞仔副偈真係唔錯，好有腳骨力，我輕輕鬆鬆就跑到超市嘅後方。

但係啲喪屍無追過嚟，佢地淨係追住Irene同啊明。

我聞一聞件衫同手臂，係就係有啲味，但唔算好臭。

如果係臭嘅話，頭先條友強姦我嗰陣已經聞到。

我感到莫名其妙，主動捉隻喪屍，稱起佢衫領問：「喂！做咩唔咬我？」

「聞落去…係香…但…望落去…黑蚊蚊…唔要…」

哎呀呀！啲喪屍淨係咬華人，唔咬我呢個南亞仔，算唔算種族歧視？

我再望一望嗰兩個變咗喪屍嘅南亞仔，佢地身上分別只得一沓好淺嘅咬痕。

咁係咪代表啲喪屍咬咗一啖就唔要？

係咁嘅話就實在太可惡啦！

今時今日，喺呢個提倡人人平等，種族共融嘅社會，就算做喪屍都唔可以歧視人！係咬就要個個人都咬！

我將以上一番說話，同眼前嘅喪屍講。

好坦白講，以前我喺街見到啲阿差都會行遠少少，避之則吉，對佢地多多少少會帶點歧視目光。

然而今時已經唔同往日，既然家陣我變咗差仔，咁我就要捍衛自己身上嘅膚色！

「唔理係白人、黑人定黃種人，總之係人都要咬，咁先合乎人人平等嘅原則，明唔明？」

隻喪屍點點頭答我：「明白……Raughhh！！！」

佢mak個開口想咬我，我立即退後，並手持斧頭一劈，將對方隻腳斬斷。

隻喪屍當堂仆咗落地：「又係…你叫我…咬你…」

「拿！一樣還一樣，我叫你咬我，係想你明白人人平等呢個道理，而我還手係出於自我防衛，兩者係無衝突。」

「仆街…陰臭我…」

斷咗一隻腳嘅喪屍起身想覆卓，不過俾我一腳就踢到佢再跌低。

與此同時，喺另一邊廂，Irene同阿明正俾一堆喪屍圍攻。

滿身肌肉嘅Irene身手敏捷，用鐵通毫不留情咁扑穿喪屍嘅頭。

相反阿明就論論盡盡、姐手姐腳，嗰隻由Irene肉體變成嘅喪屍，嚟到佢面前，mak大口想咬佢。

但阿明仲呆吓呆吓咁，遲遲唔出手攻擊。

呢個時候Irene衝過去，用手上碌鐵通，隊穿「自己」條頸，並大聲喝阿明：「搞咩呀你喺度發夢！」

「我一時失咗魂，以為佢係你。」

「呢個只係以前嘅我，依家係時候同佢講byebye！」

Irene一吓掹返碌鐵通出嚟，紅色嘅鮮血如噴泉般湧出，跟手再出盡力兜頭扑落去。

面對住自己以前嘅身體，佢照樣都係唔留手，甚至係更加重手。

咁其實都唔難理解嘅，畢竟呢個身體盛載過佢好多痛苦嘅回憶。

佢出手咁狠，或者證明佢對過去真係毫無留戀。

出咗兩招之後，Irene棟高支鐵通並跳起身，嚟一個李小龍飛踢，一腳伸到「自己」出超過咁十米咁遠。

佢變成喪屍嘅身體撞跌曬一排貨架，成個人仆咗落地，而條頸啲血繼續喺度狂噴。

而且佢雙腳俾貨架壓住，之後就再都無辦法起返身。

Irene打低「自己」之後，隨即就俾四隻體型大份嘅喪屍圍攻。

「Irene等我嚟救你！」阿明把口係咁講，但事實係佢俾幾隻喪屍纏住，根本行唔開。

兩隻喪屍合力搶走Irene手上嘅鐵通，另外兩隻就訓身用膊頭撞佢。

兩隻喪屍大大份，加埋超過三百磅，連Irene咁大隻都頂唔住，成個人被撞到向後仆。

我見地下有玻璃碎，假如佢跌落地嘅話，肯定傷得好甘。

因此我就唔理面前隻喪屍，第一時間衝埋去接住佢。

就喺佢就嚟跌低嗰吓，我及時趕到，雙手抱住佢，好在南亞仔手臂都夠粗，夠力接得實一個肌肉硬漢。

Irene向後一倒，枕喺我嘅臂彎，佢嘅眼神由下而上咁望向我。

我地就係咁對望咗一秒。

跟住突然間，有人向我地掉臭雞蛋，成個身即刻一陣臭味，啲喪屍嚇拿拿臨到退後。

而掉臭雞蛋嘅人就係阿明。

今鋪佢總算係醒目咗一次，睄到冰櫃有發臭嘅雞蛋，就唔理三七廿一，突破喪屍嘅包圍，衝過去擸咗一排返嚟。

依家我地身上散發住陣陣臭雞蛋嘅味，啲喪屍無曬胃口，唔再接近我地。

我地三個就趁機會拎住三袋嘢食，大搖大擺咁離開超級市場。

待續

主角俾三條友鹹濕嗰度算係甜位啦

一口氣睇左好多個故想問下樓主點解咁鍾意寫喪屍同埋楊過喺邊個故出現的

我感到莫名其妙，主動捉隻喪屍，稱起佢衫領問：「喂！做咩唔咬我？」

仆你個街