我無啦啦同隻芝娃娃交換咗身體,跟住無啦啦又遇上喪屍大爆發
佐治戰車
410
回覆
84 Like
21 Dislike
第 1 頁
第 2 頁
第 3 頁
第 4 頁
第 5 頁
第 6 頁
第 7 頁
第 8 頁
第 9 頁
第 10 頁
第 11 頁
第 12 頁
第 13 頁
第 14 頁
第 15 頁
第 16 頁
第 17 頁
鐵拳無敵鍾培生
2022-10-13 23:50:48
支持
在最燦爛時光
2022-10-14 00:57:45
加速
佐治戰車
2022-10-14 01:01:35
啲雨落咗成晚終於都停。
第二朝天一光,太陽從窗外射入嚟,喚醒睡夢中嘅我地。
趴喺度訓咗成晚,壓到個心口赤赤痛。
「早晨!」Irene熱情同我講早晨。
見到佢個樣,又令我諗起琴晚佢想偷咀我嘅畫面,堂當有啲毛管棟起雞皮。
「喂!你過嚟!我有嘢同你講!」阿明拉我起身,「的」我入雜物房。
啱啱訓醒嘅我捽一捽眼屎,問:「有咩事呀?」
「琴晚我見到曬!Irene竟然幫你冚被!你條友仔趁我唔注意,居然偷偷地勾引我嘅Irene。」
「我鬼有勾引佢,係佢無啦啦對我獻殷勤。」
「我唔理!總之Irene係屬於我嘅,唔該你離佢遠啲!否則咪怪我對你唔客氣。」阿明露出狠樣。
我心諗。我都想大家離遠啲,問題係屈喺福利會入面,遠極都唔過一百米。
「叩叩!」Irene喺門外敲門,「電話又收到緊急警示,你地快出嚟睇吓!」
琴日電話收到一條片,今日就係一條中英對照嘅文字訊息。
內容簡短,全文如下:
「於兩小時前,一間來自本地的匿名藥廠聯絡我們,稱已研發出喪屍病毒的特效藥。聯合國和香港政府將分別派出代表和對方洽談。
假如洽淡成功,相信就能解決目前的喪屍危機。另外我們的救援工作仍會繼續進行,請各位市民堅持和靜候。」
睇完呢則訊息,我地三個似乎終於望到一絲曙光。
假如真係有解藥,咁就可以令啲喪屍變返正常人。當無咗喪屍,咁柴灣乃至整個香港社會都會回復正常。
經過一番商量,我地三個決定就留喺福利會呢度等待救緩。
目前所儲備嘅糧食同樽裝水,估計都夠我地三個捱一個禮拜。
希望一個禮拜之內就會有人嚟救我地,同埋有解藥拯救班喪屍。
為咗隨時可以接收緊急通知,我地需要部電話長期有電。
有見及此,Irene就叫阿明搵有無「尿袋」同叉電線。
而我就主動搵到咗一卷紅色嘅膠紙,打算大大隻字喺窗門外面,黐一個「SOS」嘅求救標語。
我揸住卷膠紙,上半身探出窗外,伸手將啲膠紙黐落玻璃窗上。
「你咁樣好危險架,等我扶一扶你。」Irene行過嚟話要扶我。
結果佢一嘢就摸我屎忽,我心諗條友似抽我水多過扶我。
SOS,黐完呢三個大字後,我快快手移返個人入嚟,兼擰返轉個身,唔俾對方繼續摸。
跟住Irene含情脈脈咁望住我話:「有啲嘢收埋喺我個心入面,我想同你講…」
一聽呢啲口吻,唔使估都知佢想表白。
我即刻望出窗並叉開話題:「咦你睇吓出面,今日天氣幾好喎…」
但Irene好似想繼續講:「其實我鍾…」
「哈哈!我搵到啦!」呢個時候,阿明搵到到尿袋同叉電線,好興奮咁行過嚟話俾我地聽。
佢頭先係逐個locker撬開曬摷先摷到。
「你唔好喺呢個時候阻住我表白啦。」Irene口快快講漏嘴。
阿明即刻面色一沉,將尿袋、叉電線同電話放埋一邊,然後指住我好認真咁講:「我要同你決鬥!我要證明俾Irene睇,我先係最好!」
「決鬥?咪玩啦!」我話。
「我唔係玩!呢度有張乒乓波檯,我地三盤兩勝,贏咗嗰個先有資格同Irene一齊!」
「我…」我啱開聲就俾Irene把聲掩蓋過。
「好呀!如果你輸咗,咁就唔好繼續鍾意我。」
Irene同阿明咁樣講完,跟住就推我到乒乓波檯前:「加油!我撐你!」
「但係我唔想…」
「接住!」
阿明一嘢丟塊球拍過嚟:「開波!」
「喂等陣先…」我都未有機會講嘢,阿明就一吓ban個波埋嚟。
本身我係完全唔想打,但個波一飛埋嚟,我隻手就揸住球拍,打返個波過去。
個波喺阿明身邊飛過,佢想接但接唔到。
佐治戰車
2022-10-14 01:25:25
「1比0!」Irene興奮咁報出賽果。
「再嚟!」阿明執返個波再開過。
我本身係完全唔識打乒乓波,呢刻純粹係靠身體嘅條件反射,令我識得接波、開波。
睇嚟個南亞仔以前有打開乒乓波,因此身體有肌肉記憶。
最後我仲一個唔覺意,直落兩盤贏咗阿明。
「可惡!我竟然…我竟然輸咗!」阿明個樣好唔忿氣。
「乜你原來打乒乓波咁勁架?好犀利呀!」Irene挨埋嚟想抽我水。
我拿拿臨縮開個身,跟住阿明又對我話:「唔得!我地再比過!」
「吓?仲嚟?」
「係!不過唔係比乒乓波!」
「咁比咩呀?」Irene問。
「我暫時未諗到!諗到再話你聽!」
「我對你有信心!無論比啲咩,你都一定有本事贏到阿明!」
Irene又想借啲意挨我膊頭,逼我又要退一步避開。
頂!今鋪真係煩q死人,無端白事陷入一段三角戀入面,仲要大家屈埋喺同一個地方,我想避都無得避。
之後接住嗰幾日,我每一日訓醒擘大眼,阿明就行過嚟話要同我決鬥。
條友乒乓波輸俾我就轉鬥拗手瓜,拗手瓜輸俾我就鬥長時間唔眨眼,連眨眼都輸埋俾我就鬥邊個多腳毛,總之就係想搵一樣嘢鬥贏我。
至於Irene一樣都係成日纏住我,一得閒就借啲意挨身挨勢抽我水。
我日日就係俾呢兩條友輪流煩住。
其餘嘅時間我就企喺窗邊望住個天,等緊幾時有直升機經過營救。
結果等吓一日,等吓又一日。
等等吓一個星期就咁過去,依然都係等唔到人嚟救我地。
而且每日望出窗,更會發現喪屍嘅數目一日比一日多。
頭兩日都好地地,之後五日嗰啲喪屍嘅咆哮聲,晚晚嘈到我地訓唔到覺。
今日已經係第七日,過埋今晚就係第八日,我地啲食物同水已經耗盡,如果聽日中午前都係無人嚟救我地,咁我地就必須要出去搵嘢食。
「Raughhh!!!」
外面不斷有喪屍喺度咆哮,又嘈又大聲,搞到我地三個都訓得唔太好。
眼見就快天光,呢個時候我地部電話突然喺度震。
「滋滋—滋滋—」
隔咗成個禮拜,電話終於再次收到緊急警示。
打開一睇,今次嘅內容竟然比上次更加短,只有幾行字:
「病毒傳播速度比我們預期中的快,喪屍數目每天以幾何級數上升,導致拯救行動十分困難。現粗略估計全港已有八成市民變成喪屍,情況十分嚴峻。」
我地三個睇完都呆咗,心諗係咁架渣?
之前又話有間本地藥廠研發咗特效藥嘅?點解無曬下文?
本來仲以為有一線生機,但依家睇嚟似乎比之前更加絕望。
「砰!」
突然間,樓下傳出猛烈嘅撞擊聲。
我地拿拿臨落去睇吓,發現外面成堆喪屍想撞開道門衝入嚟。
從狹窄嘅門嚹望出去,外面喪屍嘅數量比之前多咗好多。
而呢樣嘢其實我地早就發現咗,所以呢一排我地搬得就搬,幾乎已經將福利會所有搬得到嘅嘢,包括乒乓波檯、locker都搬落嚟塞住門口。
只但係,依家睇嚟門口呢大堆嘢都就嚟頂唔住。
「出面n咁多隻喪屍,再咁落去,佢地遲早撞開道門入嚟,點算好呀?」阿明慌慌張張。
「上去再搵吓仲有無嘢可以用嚟頂住道門?」Irene提議。
「應該無架啦,搬得到嘅我地都已經搬曬落嚟。」我話。
「砰!!!」
就喺呢個時候,福利會道大門被撞爛。一大班喪屍伸手入嚟,想推開塞住門口嘅檯櫃、locker、波檯等雜物。
我同阿明、Irene立即衝到門前,合力出手頂返過去,同班喪屍鬥力。
而做過喪屍嘅我知道,喪屍係唔會攰,相反人嘅體力就有限。
所以估計我地唔會頂到好耐,班喪屍遲早會闖入嚟。
鐵拳無敵鍾培生
2022-10-14 01:49:40
佢哋匿埋咗喺福利會成個禮拜,啲屎尿點處理
椒鹽蝦米
2022-10-14 02:03:40
STAT
2022-10-14 02:30:55
求下你畀返個女人身Irene
被竇軍師(A1)
2022-10-14 02:35:16
可以俾主角
鐵拳無敵鍾培生
2022-10-14 03:05:11
留名主角做大波妹
安茲烏爾恭
2022-10-14 06:40:36
變咗喪屍啦
野原。小新
2022-10-14 12:00:25
做過啦
鐵拳無敵鍾培生
2022-10-14 13:46:37
再做多次
Cdrom1344
2022-10-14 13:53:48
得hehe,點解無sheshe嘅
STAT
2022-10-14 14:07:53
求其搵個女人身畀佢都得㗎姐
只想身體健康
2022-10-14 21:54:06
求hehe線 比人頂人癮得唔得
鐵拳無敵鍾培生
2022-10-14 22:37:41
問作者
佐治戰車
2022-10-15 00:45:15
我地三個出恆曬力,抵禦外面一班想衝入嚟嘅喪屍。
「唔得啦…我無力啦…」阿明漸漸手軟腳軟。
「咁渣架你!咁快就無力!」肌肉爆棚嘅Irene把口咁講,但佢其實都開始攰,額頭大汗疊細汗。
我自己亦都一樣,體力已經消耗咗大半。
班喪屍則同我地相反,佢地體力仍然充沛,而且數量有增無減。
此消彼長之下,我地越退越後,就快頂唔住。
大約頂多一分鐘,阿明徹底無曬力,迫不得已鬆開咗雙手。
再過多三十秒,我同Irene都無辦法再支撐落去,一瞬間,防線徹底被衝破。
一堆密密麻麻嘅喪屍,推開塞喺門口嘅檯櫃、locker同波檯等雜物,一窩蜂咁衝入嚟。
我地三個第一時間衝上樓梯,飛奔返上樓上。
「Raughhh!!!」
一隻隻飢餓嘅喪屍就跟住我地上嚟樓上。
無路可走嘅我地只能擸架撐同佢地打過。
弱雞啲嘅阿明用斧頭,我同Irene就揸鐵通。
同喪屍搏鬥咗一陣,我地就發現唔對路。
喪屍嘅數目實在太多太多,佢地幾隻幾隻咁上,我地根本無得打。
逼於無奈,我地只能使出殺手鐧。
匿埋喺福利會嘅呢段期間,我地逢親屙屎屙尿都係用個膠桶裝住。
每人一個桶,分別放咗各個角落頭。
我最先搵到機會突破喪屍嘅包圍,隨即跑去右下角角落頭,攞起自己桶嘢,潑向嗰班喪屍。
啲臭味一攻出嚟,啲喪屍確實係退後咗。
Irene同阿明就趁呢個機會,分別到其他角落頭,搵返自己桶屎尿,先後淋去喪屍身上。
而其實我地儲落嘅屎尿好有限,畢竟呢段時間除咗餅乾之外都無啖好食,自然就無乜屎尿屙。
所以兩三吓手腳就潑曬啲屎尿出去,不過份量少唔緊要,有味就得。
殊不知,啲喪屍唔知係咪餓得太耐,定還是我地啲排洩物唔夠臭,佢地聞到啲臭味都好似唔係好介意咁,趕都趕唔走。
睇怕呢啲就係所謂嘅「餓起上嚟屎都照食」。
樓上嘅喪屍唔肯走,樓下又不斷有喪屍湧上嚟,眨吓眼,千幾呎嘅地方已經聚集咗超過三十隻喪屍,而且數目相信只會越嚟越多。
「無辦法啦!跳窗啦!」
Irene用鐵通將佢面前嘅喪屍掃低,下一秒轉身拉開窗門,諗都唔諗就跳咗落去。
我同阿明都嚇咗一跳。雖然呢度離地下唔高,但估唔到Irene咁勇咁果斷,直接就跳落街。
「喂!你地快啲跳落嚟啦!」
眼尾睄落樓下,原來Irene並唔係直接跳落街,佢只係跳咗落對出馬路一架校巴嘅車頂上。
既然Irene跳咗落去,我地都無理由唔照跟。
「阿明!我嚟掩護你!你跳先!」我同阿明交換咗武器之後,就上前幫對方做掩護。
校巴停泊嘅位置距離福利會大概有三米,假如出盡力嘅話,要跳過去應該唔難。
只不過阿明行到窗邊,望住出面,遲遲唔肯跳。
我就揸住斧頭,幫阿明做掩護,啲喪屍一埋身一伸手過嚟,我就斬斷佢地啲手。
「等咩呀你!快啲跳啦!」企喺車頂上嘅Irene催促。
「我…我有啲驚…」
「驚乜鬼呀!有我喺下面接住你!快啲跳啦!」Irene大聲喝阿明。
我一邊揮動斧頭斬喪屍,一邊用激將法同阿明講:「你咁樣都唔敢跳,唔怪得Irene鍾意我都唔鍾意你!」
「你收聲!邊個話我唔敢!我依家就跳俾你睇!」
激將法果然有用,阿明鼓起勇氣,向前一躍,用盡全身力氣跳出窗外。
可惜佢跳得唔夠遠,只係勉強掹車邊掂到車頂邊緣,好在Irene及時伸手接住佢,並且將拉佢上車頂。
阿明都跳咗,咁就得返我一個。
雖然我其實都有少少淆唔敢跳,只不過面對住眼前數唔清嘅喪屍,我只有一個選擇。
喺心入面數三秒後,隨即我一個轉身,揸住斧頭衝向身後嘅窗口,然後飛身一跳。
憑借住南亞仔優越嘅運動神經,我輕易而舉就跳落下面校巴嘅車頂。
佐治戰車
2022-10-15 01:17:36
嗰班喪屍當中有十隻八隻跟埋我跳落嚟,好彩嘅係,佢地跳得唔遠,直接由二樓撻咗落地下。
本來以為可以暫時鬆一口氣,點知由二樓撻落地下嘅喪屍居然無事,好快就起返身。
係喎,喪屍係唔怕痛架喎。
佢地連同馬路附近其他喪屍,一齊圍埋嚟架校巴到。
啲喪屍一定係餓得太耐,明顯比之前兇猛咗好多。
佢地露出猙獰嘅面貌,係咁向上跳起,想擒上車頂。
我地呢刻可以做嘅,就只有用鐵通同斧頭阻止佢地爬上嚟。
「哎呀救命呀!」阿明條友論論盡盡,一個唔小心行近咗車頂邊緣,俾一隻喪屍扯住條褲腳,想拉佢落車。
我同Irene一聽到佢嗌救命,立即就反應過嚟,伸手拉住阿明唔俾佢跌落去。
之後,拉住阿明條褲嘅喪屍,仲有隔籬嗰啲喪屍擘大個口,好似想咬阿明隻腳。
眼見情況危險,我同Irene吸啖大氣,分別雙手捉住阿明嘅左右手,出力拉返佢上嚟。
最後人就成功救到,不過阿明條褲就被喪屍扯甩咗,唔單止面嗰條,連底嗰條都甩埋。
阿明立即拉低件面衫,遮住自己裸露嘅下體。
同時間,圍住喺校巴嗰幾十隻喪屍突然改變策略。
佢地唔再嘗試爬上車頂,反而選擇全部聚曬喺車身嘅右邊。
見到咁嘅情況,我地就知大獲。
班喪屍合力出手推架校巴,想成架車由右至左推冧佢,等我地從車頂跌落嚟。
幾十隻喪屍一齊發力,成架車即刻俾佢地推到傾斜咗四十度。
我地雙手捉緊車頂邊緣,唔俾自己滑落去。
慢慢架車由四十度斜到五十度、六十度、七十度...
當架車九十度翻側,咁我地到時一定跟住一齊「仆街」。
除咗掹住車邊之外,我地走又走唔到,都唔知仲可以做啲咩。
或者祈禱嘅話,上帝會出現拯救我地。
就喺校巴接近傾側一刻,估唔到真係有救星出現!
不過唔係上帝,而係「關公」。
柴灣關公!
「喂!你地班喪屍要咬就過嚟咬我,等本人一次過收拾曬你地!」
「柴灣關公」將把關刀棟喺地下,擺出無畏嘅姿態。
對上一次見佢,當時嘅我仲係喪屍,俾條友劏開個肚,跌曬啲腸出嚟。
隔咗咁耐無見,估唔到佢仲未死!
佢嗰一把長頭髮依然飄逸,然而身軀之上以及手上嘅關刀,卻染上斑駁嘅鮮血,臉上亦多咗一份滄桑。
「關公」撥一撥頭髮,再喝一聲:「你地聾咗呀!定係驚咗我唔敢過嚟!」
一大班喪屍卒之放開架校巴,擰轉面向住「關公」,一邊咆哮一邊衝過去。
「砰」一聲,成架車「鄧」返落嚟,我地仍然安全咁留喺車頂。
面對住五、六十隻喪屍,「柴灣關公」無半點退讓。
照道理我地應該幫手,不過對方卻叫我地走:「呢度我撐住,你地快啲走!」
叫得「關公」,果然係義薄雲天、捨己為人!
呢一帶周圍嘅喪屍統統湧曬去佢嗰度,我地要走就一定係趁呢個時候。
既然對方仗義相救,我地亦無謂辜負佢嘅一番好意。
我地就由車頂跳返落地面,然後向「關公」講咗聲多謝同保重,就向相反方向逃離。
阿明話與其留喺柴灣等人救,倒不如靠自己離開呢度,主動出去搵救援。
佢咁講其實都啱,再留喺柴灣都係死路一條,咁不如搏一搏,睇吓可唔可以離開呢度。
由於陸路遍佈喪屍,單憑三人之力殺出血路,基本上無乜可能。
因此要離開柴灣,就唯有靠水路。
經過消防局,只要再向前行,就會去到工廠區一帶。
喺工廠區裡面有一個碼頭,平時唔少船都會停泊喺個度。
游水出海就唔得架啦,咁即係就揸船。
「只但係,我地呢度有人識揸船架咩?」我問。
「唔識,不過應該唔難嘅,最緊要搵到開船嗰個掣啫。」阿明答。
「話唔定船上會有說明書。」Irene就話。
我地進入常安街,再行前少少就係碼頭,偏偏又遇上喪屍攔路。
好在數量唔算好多,大概有十隻。
趁附近其他喪屍未發現我地,我地拿拿臨搞掂前面呢班,然後去碼頭。
佐治戰車
2022-10-15 01:21:53
因為要代入女仔鐘意女仔,我既想像力去唔到呢個位
其實我第一個喺連登寫既故,就係關於性取向不斷變來變去,當時寫到個女主角變左les,我就唔識寫,最後爛埋尾
佐治戰車
2022-10-15 01:23:30
但irene想做男人
佐治戰車
2022-10-15 01:25:21
阿明同irene咪單戀hehe線
鐵拳無敵鍾培生
2022-10-15 01:36:56
咁畀男主角做女仔
椒鹽蝦米
2022-10-15 23:36:33
推
椒鹽蝦米
2022-10-15 23:54:12
推
第 1 頁
第 2 頁
第 3 頁
第 4 頁
第 5 頁
第 6 頁
第 7 頁
第 8 頁
第 9 頁
第 10 頁
第 11 頁
第 12 頁
第 13 頁
第 14 頁
第 15 頁
第 16 頁
第 17 頁
吹水台
自選台
熱 門
最 新
手機台
時事台
政事台
World
體育台
娛樂台
動漫台
Apps台
遊戲台
影視台
講故台
健康台
感情台
家庭台
潮流台
美容台
上班台
財經台
房屋台
飲食台
旅遊台
學術台
校園台
汽車台
音樂台
創意台
硬件台
電器台
攝影台
玩具台
寵物台
軟件台
活動台
電訊台
直播台
站務台
黑 洞