https://lih.kg/3030639
預計仲有七日就寫完，多謝咁多位巴絲打支持
。。。。。。。。。。。。。。。。。。
我有好多問題想問芯玥，但又唔知從何講起。
我哋兩個就咁坐喺長凳，望住躁動不安嘅海浪，相對無聲。只有海浪湧嚟同退去嘅沙沙聲。
點都要有個開頭，或者今次我終於可以得到所有答案。
不過與其一開波就問想問嘅問題，倒不如講返啲應該講嘅說話，我唔想芯玥覺得我係個自私嘅男人，乜都淨係諗自己。
我係真心鍾意佢，以前係，依家都係。
所以我喺佢角度出發，講咗四個字。
「節哀順變。」
芯玥微微點吓頭。我哋兩個嘅皇后燒賣擺咗喺中間個位，阻隔開所有親近嘅可能性。
「依段日子你實好辛苦。」我知道咗一啲以前唔知道嘅事，佢嘅家庭。所以我覺得有責任講兩句。
我會諗，如果依個唔係芯玥，甚至係我覺得唔合眼緣嘅女仔，今晚我會點同佢相處？
無論點，我覺得知道一個人有親人意外離開，面對面嗰陣都應該要同對方講一句節哀順變。
「嗯，有心喇。」
「如果當年你有話我聽有個家姐，可能會早啲認到你，咁就無今晚依個咁尷尬嘅見面。」
芯玥停頓咗一陣，吸咗啖氣，好似下定決心咁。
「其實⋯⋯我嗰陣無你想像中咁鍾意你。」
時至今日，我先知道自己原來聽到依句說話，係會心絞痛。
「都明嘅。」但又有種釋懷，因為唔需要再去諗我嘅「好愛你」同芯玥嘅「好愛你」係咪一樣。
就係唔一樣。
「記唔記得當年你介紹我畀你媽咪識之後，我講過咩呀？」芯玥問。
