之後我同海狗就上左車
搭巴士就唔多講啦,
兩個男人一齊搭巴士邊有咩特別
落車嗰陣發現仲有時間就去左海港城行下
途中撞到幾條毒撚
之後就圍埋喺度吹水
一班毒撚圍埋一齊吹水仲會講咩丫
咪又係女
唔知大家仲記唔記得開頭嘅故事喇,
主席咪打畀我嘅
話我哋班有對新人結婚架嘛
男嘅叫Davis,
女嘅叫Manus,
故事入面嘅時間線
我同海狗喺海港城撞到嘅其中一條毒撚就係Davis
依家都可以爆定料,
Davis喺呢個晚會個partner就係Manus
印象中Davis同Manus自從喺呢個晚會之後就熟絡左好多
我都唔肯定,
始終同佢兩個唔係話真係好friend,
所以真係唔記得
大個左諗返,
先知際遇嘅野係得來不易
我本身個人唔叻,
好難每一樣野都計到咁精準,
變相好多時真係靠因緣際會
細個從來都唔知呢個道理
永遠覺得好多野都係好容易
咁當然都同我呢條友啲目標唔高有關啦
大個左先發現際遇個影響係可以好大,
所引發嘅蝴蝶效應亦都係可以令人意想不到
就好似Davis同Manus咁,
如果當日佢兩個唔係同一組,
好多年之後嘅今日會唔會共諧連理,
老實講我真係覺得值得商榷
唔係話一定唔會,
但經歷嘅事換轉左
個結局又係咪真係會永恆不變呢
可能你哋會覺得我喺度鳩吹
邊有咁誇張
唔好神化蝴蝶效應啦
咁你哋都有道理
只係我覺得際遇嘅野係好寶貴,
環環相扣,
錯過左嘅嗰次,
好可能就係成世人唯一嘅一次
邊有咁多下一次
有時我又唔認為係殘忍,
可能大個咗
自自然然會覺得好多嘢都係需要配合,
講嚟講去,
我噏咁多廢話,
好明顯受到呢個舞會影響嘅人
並唔止Davis同Manus兩個人啦.