有無巴絲傾下舞台劇(2)

但我守好那片夢

1001 回覆

29 Like 5 Dislike

可唔可以覆我野 2022-08-13 14:18:43

首演做極都做唔到嘅大狀王又賣飛啦

但我守好那片夢 2022-08-13 19:42:10

有冇人今日睇咗hkrep讀劇《醫•道》
好似不錯，希望能夠成功公演

但我守好那片夢 2022-08-15 12:48:55

呢套應該唔差，但要買飛就趁快，呢套好似幾好賣

但我守好那片夢 2022-08-15 16:33:20

https://www.facebook.com/108102623935984/posts/pfbid02qzryNpVTXgmq4aygcTdTVjqXePBotXaV5QHdVcNNN7Ke9v915dbPBmB7K1e3dApwl/

舞台劇《最後禮物》神奇觀眾事件

首先要講《最後禮物》，實在太太太太太太好睇，有得入場睇絕對係幸運。

演員、劇情、Set、燈光，全部都好精彩，連轉場都係一種表演。

潘燦良同黃子華呢個組合好夾，子華神係會有少少「太過子華神」嘅味，但好快大家就會入戲。

莊梅岩大師寫嘅劇本同對白，相信觀眾同演員都好享受……除咗噚晚嘅幾位觀眾。

話說，舞台劇中場休息嘅時候，下層突然間有一位中年女士舉手大叫：「帶位員！過嚟！」。

所有觀眾都好奇，到底發生咩事呢，嗰位女士繼續嗌，原來佢投訴前面一對男女擋住視野，搞到唔方便睇個台。

咁睇開舞台劇都知，香港演藝學院觀眾席嘅斜度係好細，前面擋到你係好正常。

而「佢個頭郁來郁去」呢啲指控，都係口同鼻拗……咁被投訴嘅一對年輕男女，後果生女被多番攻擊，就回槍：「收聲啊！八婆！」

然後真係上下層掌聲雷動，上層有觀眾大叫：「坐下面係咁㗎啦！」。

然後全場爆笑，再拍手掌。

本來只係一個小插曲，但係雙方擾攘太耐，兩層嘅觀眾接近每隔30秒就有人鬧：「唔好阻住睇表演啦」、「鬧交就出去鬧啦」。

呢場戰爭令我附近一對想去廁所嘅情侶，笑住話「都係唔痾，睇埋先…」。

如果無睇錯，連編劇莊梅岩都出嚟徘徊咗好耐了解事件。但可惜，除咗靠當事人自己冷靜，仲有咩方法呢？

結果，每隔一分鐘就鬧幾句，拖延好耐，點知竟然雙方都冇走，順利完埋下半場。

謝幕嘅時候，全場對每個演員鼓掌，子華神突然開口：

「頭先呢有場暴風雨，台上有，台下都有。好感激佢哋忍得住，仲可以坐到完場。（全場拍掌）

係㗎，如果忍唔到擒上去呢…（特登講返舞台劇劇情引大家笑）係囉，唔值得㗎。」

最後，大家仍然係笑住離場。當事人亦再無爭執。

有一個小插曲，就係黃子華基本上有粗口嘅對白，大家都會當笑話咁瘋狂爆笑。

但其實…啲劇情都唔係為咗搞笑。當然你可以話，呢個都係佢自己做開棟篤笑嘅地心吸力，但其他演員，包括潘燦良講粗口，唔少觀眾都會好high咁笑甚至拍手。

點講都好，《最後禮物》真心精彩。對家庭倫理關係有咁深入嘅剖析，同時兼顧到戲劇效果，對白亦都好自然，真係人類講嘅對白，唔係下下Chok金句，個結局更加係功力所在。

最後，好希望大家可以多啲入場睇香港舞台劇，真係有好多好作品。

風車草劇團嘅《回憶的香港》都就快上，十月記得睇騷。