我和鄰居大姐姐的故事（7）

葉開葉開 2021-04-28 19:26:00

一百六十三點五

（崔宏鋒視角）

我同Bonnie，慢慢咁行返黎呢一間我讀左已經七年既母校。

「鋒仔，返黎探老師呀？」校工霞姨坐左響接待處對我笑道：「考完晒試嗱？」

我笑住咁行過去接待處，道：「未考完呀，不過今日係中五既Last day，諗住返黎探下啲朋友，順便影幾張相咋嘛。」

霞姨望住我身後既Bonnie，取笑我道：「探邊個呀？唔驚盈盈呷醋咩？」

呃…

霞姨咁樣取笑我係有原因架…

*

我中六果年既社際歌唱比賽，響台上面當眾向我既心儀對象林秋兒表白。

雖然果陣我冇當眾講出林秋兒既名字出黎，但因為我同林秋兒響學校都係好出名，所以基本上全校都知道我表白既對象就係佢。

然後…林秋兒拒絕左我。

結果…因為呢件事既關係，直至我中七畢業果日，我感覺自己都仲比全校笑緊。

講起黎，我係中五既時候開始留意林秋兒。果陣佢係中三既黃社幹事，而我就係啱啱卸任既副社長。

喜歡上佢既過程，其實冇乜驚天動地既過程。

當時我雖然已經卸任左副社長，但間中都會返去幫下手，同分享下經驗比當時既現任幹事。

然後，我就見到面上經常掛住溫柔微笑既林秋兒，好盡心盡力去對待每一件社務、真心溫柔地對待每一個社員同幹事。

咁樣既林秋兒好吸引。

我就係咁樣比佢慢慢慢吸引到。

為左佢，我拒絕左唔少女仔，包括佢既好姐妹張潔婷。然後，我暗地裡決定，如果我可以順利原校升上中六既話，就向林秋兒表白。

有左動力之後，我就更加發奮讀書，原本我成績就唔錯，有左動力溫書之後成果更佳，輕輕鬆鬆咁就升到上原校。

新既學年，我做左黃社既社長，而林秋兒就做左副社長。

好機會。

當時我係咁諗既。

然後一切都進展得好順利，我地兩個處理社務出奇地合拍，相處得亦都唔錯，有時仲會因為社務而兩個獨處，令我地兩個既關係升溫，所以我果陣真係認為如果我表白都有好大機會成功。

林秋兒有個契細佬叫余正熙，個樣好似baby face，但真係好靚仔，而且踢波好好好好好勁，但就非常之冇禮貌，甚至響黃社入面生起唔少事端。

但係唔知係咪因為愛屋及烏，雖然我地既幹事Paul睇佢唔順眼，但我就覺得佢其實都係年少氣盛先會咁唔合作既啫。而且佢踢波又真係好勁，憑一己之力為黃社拎到社際足球比賽亞軍，其實我對呢個後輩都幾有好感。

不過，佢就好似好敵視我咁。或者，佢對全部人都係咁。

但都要感謝佢，因為之後有一次佢練波既時候應該係唔小心省中我，我先有機會上林秋兒屋企食晚餐。

本來我以為係二人世界，但點知余正熙都響度一齊食，原來佢地真係好似一家人同兩姐弟咁。

成餐飯我就響林秋兒面前show off，希望可以提高佢對我既印象。

雖然之後淨係去過兩次，跟住就冇乜機會再上去食飯，但我覺得我同林秋兒之間既距離又縮短左。

於是我決定平安夜表白。

我趁住屋企人去左旅行約晒全部黃社既幹事上黎我屋企開Party，然後響自己買左好多花瓣響自己張床鋪左個心形出黎，到時候夾埋其他幹事玩遊戲，搵機會製造我同林秋兒入房獨處表白既機會。

我以為好大機會成功，但最後係大大失敗既。佢冇講點解會拒絕我，只係話響呢一個時刻，佢唔想拍拖。

然後林秋兒就急急腳咁離開。

我當下雖然好傷心，但都盡一個紳士既風度，留低一班幹事繼續玩，自己就送林秋兒返屋企。路上面雖然都仲有傾計，但佢都有小小刻意保持距離。

直至送到佢去屋企樓下，佢都仲係好溫柔咁笑住多謝我。見到佢既笑容，我忍唔住同佢講，我會等佢，等幾耐都等。

我思前想後，覺得我同林秋兒既關係其實唔差，我諗只係爭個感動位。佢個性咁溫柔，只要感動到佢，一定冇問題既。

我決定響社際歌唱比賽上面表白，個場面一定會好感人。

諗返起，其實由林秋兒決定退出社際同我既合唱項目開始，我就應該醒覺呢個主意行唔通。

我響台上面表白之後，林秋兒就刻意避開我。

咁樣…比起直接拒絕我更加難受。

明明…我地之前既關係仲咁好…

一諗到呢度我就好心痛…

加上因為表白事件，我比訓導記左個缺點，仲比全校當左做笑話。

係Bonnie呢個識左七年既好朋友響呢段時間扶持我。

其實我一路都知佢對我有意思，不過我一路都覺得佢所有野都好平凡，所以我只係當佢係好朋友。但係當我覺得所有人取笑我，我覺得所有女仔好似當我傻佬咁避開我既時候，只有佢一個響我身邊支持我。

之後既日子，我同佢出雙入對，但係即使好似多人以為我地拍緊拖，但其實唔係。

我唔否認對Bonnie開始有好感，但我仲有一個心結未解開。

我決定要做一個了斷。

所以我而家要返黎。

*

我對住霞姨笑一笑，道：「呷乜鬼醋吖，當年既事都過左去喇。」

其實，我已經放低左唔少。

「Bonnie，妳不如過去雨天操場果度等我一陣？」我轉頭向Bonnie道：「保證好快。」

Bonnie點點頭，笑道：「我知道喇。」

*

「呃…林秋兒走左未呀？」我探頭問5A班房門口附近既一位男同學。

佢用奇怪既眼光望住我…

我明既…

上年件咁瘀既事真係傳千里，佢作為林秋兒既同班同學見我畢左業仲黎搵佢一定覺得好奇怪。

「秋兒…」男同學轉身道：「崔宏鋒搵你！」

響課室入面一堆女仔當中既林秋兒抬起頭同我對望左一眼，然後尷尬咁笑一笑。

我走埋去，大家既眼神都變得好奇怪。

唉，我知點解既。

「Hi。」我有啲生硬咁打招呼。

「你好。」林秋兒微笑道：「好耐冇見喇喎，返左黎既？」

「係呀…」我諗左一陣，道：「不如…影幅相？」

「好呀。」林秋兒笑答。

我中七last day果日驚尷尬冇去搵林秋兒影相，而家總算還返個心願。

僅此而已。

「係呢。」我有小小尷尬，但鼓起勇氣問道：「可唔可以問妳小小問題…」

林秋兒眨眨眼睛，不置可否。

「放心…我對妳冇野架喇…」我唔可以響呢一刻退縮：「只係有一樣野想知。」

「嗯…」林秋兒思考左一陣，道：「好。」

「不如…跟我出一出去先？」我提議。

林秋兒諗左諗，終於都點點頭。

*

響走廊冇乜人既位置我倚住欄杆，深呼吸一啖，終於問：「點解果陣妳會話唔想拍拖住既？」

「唔…？」

「放心，我冇其他特別意思。」我笑道：「我只係想知道我死因啫。」

林秋兒默默咁思考緊。

佢終於開口：「…因為如果我拍拖既話，就會唔夠時間去照顧一個我心目中好重要既人。」林秋兒繼續認真思考地道：「正確啲應該話…唔止係時間問題，而係一個人對其他人既感情係有限既，我好難將同等份量既關心，分比男朋友之餘又分埋比佢。」然後笑了笑：「同埋我係好學生黎，要讀書架嘛。中學生不應談戀愛呀。」

我心抽左一下，再問：「果個人…係余正熙？」

「嗯…」林秋兒面上出現紅暈。

其實我應該一早估到。

「但…唔通妳真係照顧足佢一世咩？佢而家都大個仔，中學生黎架喇。」我心下不忿。

「唔知呢…？」林秋兒嘆左口氣再擰轉頭望向遠方。

我都嘆左口氣，道：「不過…多謝妳肯講我知。」我擰轉身，笑道：「我走喇，希望妳會考順順利利喇。」

「你A level都係呀。」林秋兒臉上露出溫柔既微笑。

*

「行喇Bonnie。」

我同Bonnie並肩行出學校大門口。

不過…

今次我係拖住佢隻手行既。

Bonnie有啲驚訝咁望住我。

「咁樣唔好咩？」我向佢微微一笑。

「好。」Bonnie俏面一紅，再dup低頭同我一齊行。

過去既感情，就由得佢留返響學校喇。

重要既，係把握現在、展望未來，係唔係？

（待續）

天若磪有情 2021-04-28 19:26:05

褲都除埋

睇操女教練 2021-04-28 19:28:08