葉開葉開
2021-04-16 19:32:46
一百五十六
明明係我自己既問題,秋兒姐姐竟然覺得自己都要負責…
「我都好想幫你溫習多啲…」秋兒姐姐嘆道:「但係黎緊好快我就要會考…」
「咁梗係妳會考緊要喇!」呢個倒係我真心話:「會考成績會影響妳一世架。」
「唔緊要,我都會儘量幫時間你溫習…」秋兒姐姐諗左一諗,又道:「不過仲有Kitty…難得見到佢升左上中五之後發奮左好多,我都好想幫佢渡過呢個難關…」
心入面突然有小小難受…
秋兒姐姐就係咁,對朋友都係一樣咁上心、咁溫柔…
我明明知道佢不嬲都係咁…而會考比起校內既考試重要性不知多幾多倍,但我竟然因為秋兒姐姐要考慮埋幫Kitty姐姐溫書準備會考而減少同我溫書補習既時間而感到唔開心、妒忌…
唉余正熙你個人真係…
不過,我唔想比秋兒姐姐知道我有咁自私既諗法,於是我道:「我明白架。」
「但係你放心。」秋兒姐姐突然道:「叔叔交得你比我照顧,我就一定會好好睇住你,你一定可以升到班。」
「嗯…」淨係因為老豆…?
「數學…唔係肯自己死記就得。」秋兒姐姐續道:「我知你有溫書,如果冇人教既話,自己一個讀好難有進步。」
然後又嘆一口氣,道:「所以…呢個真係我既責任…」
講真,我咁自我中心,心底入面梗係希望秋兒姐姐日日都幫我補習喇。不過,我更加唔想秋兒姐姐唔開,於是我安慰道:「真係唔關妳事架。」
其實真係…幾唔合理,我自己考試唔合格,竟然由我安慰返秋兒姐姐。
明明我自己既責任更加大。
「熙熙呀…」秋兒姐姐突然定睛咁望住我。
我地互相凝視…
「熙熙…其實…我好驚。」秋兒姐姐個樣有啲扁咀:「我好驚我會考會考得唔好…」
呃…秋兒姐姐扁咀個樣…好吸引…
哎呀,錯晒重點!
係咪壓力太?秋兒姐姐竟然會突然顯露佢軟弱既一面…
我聞言即刻安慰秋兒姐姐道:「唔駛擔心架,妳既讀書成績一向非常好,冇理由會考反而考得差架嘛!」
「多謝你熙熙。但其實…我並唔聰明。」秋兒姐姐續道:「我可以讀書咁叻係因為我揀左文科,而文科大部分既科目都可以用勤力黎搭救…」
秋兒姐姐勤力係真既…煮完飯、洗埋碗、做埋家務,夜媽媽都仲會溫書。
我係佢細佬,我有眼睇。
秋兒姐姐頓了一頓,又道:「老師又好、媽咪又好,佢地好似已經當我一定可以原校升讀中六咁,甚至已經有老師搵我籌備下年既學生會又或者係諗住叫我做下年黃社既社長…
「只係…我最近好似分左好多時間比Kitty,有小小打亂左自己既溫書計劃…但佢係我既好姐妹…我冇可能唔理佢…
「我好驚…自己達唔到媽咪同埋老師、同學既期望…」秋兒姐姐雙手掩面…
我呆呆咁望住秋兒姐姐…
點解會由我考試唔格,變左做秋兒姐姐既傾訴大會?
雖然我好樂意聽…
只係我而家先得中二,根本冇辦法想像得到面對會考果種壓力…果種接近一試定人生既壓力…(當然成年後其實會知道冇咁誇張,但作為一個一向成績優異既學生,秋兒姐姐點可以承受到會考失敗?)
唔知到我考果陣又係點呢?
求求其其考完佢,就出黎踢職業波?
不過…我更加唔知道既,係秋兒姐姐背後係背負住咁多壓力,仲要分心去關照我…
而我…絲毫察覺唔到秋兒姐姐有唔開心…
我覺得好慚愧…
秋兒姐姐掩左面一陣好似好攰咁,我都淨係識得呆左咁望住佢。
「呼~」秋兒姐姐攤開返雙手,露出返佢溫柔既笑容:「講晒出黎舒服晒!其實我冇野架,不過積住左啲壓力冇人同我傾,熙熙你肯做第一個聽我講既人我好開心。」
我從來唔知秋兒姐姐都會有受到壓力既一面。
響我眼中,佢就係一個超人,讀書、課外活動、家務、煮飯、待人接物,全部都係完美。
其實,佢都只係一個普通學生。
「Sorry呀熙熙,本身係諗住同你研究下點樣幫你溫書好啲既。」秋兒姐姐少有地精精靈靈咁伸一伸舌頭,笑道:「估唔到變左我既傾訴大會添!」
秋兒姐姐仲諗緊我…
我情不自禁咁起左身行去秋兒姐姐身邊,將佢個頭攬入懷中…
(待續)