葉開葉開
2021-04-21 19:25:04
一百五十九
「4E班房?」我奇怪地問。
點解秋兒姐姐會帶左我黎4E班房既門前既?
「嗯。」秋兒姐姐笑道:「我幫你搵左個補習老師。」
我聽完之後心涼左一大截。
我想既係秋兒姐姐陪我溫書,唔係搵個二打六黎幫我補習。
如果係咁既話我寧願自己一個溫書。
…
雖然成效成疑。
秋兒姐姐望左入4E班房,然後微笑道:「嘉嘉,唔好意思呀,要妳等咁耐。」
「唔會唔會。」一個樣貌中上,但就幾甜美,冇帶眼鏡,一頭烏黑既長髮,又好似識識地打扮,紮住馬尾既女仔道:「副社長妳幫左我咁多,我等妳一陣有乜所謂?」
呢個咪係今年黃社既副社長Jessica?
「而家既妳先係副社長,」秋兒姐姐微笑道:「我已經唔係好耐。」
「妳永遠都係我心目中既副社長!」Jessica感激地道:「妳響社務上面既經驗分享真係幫左我好多。」
「應該既。」秋兒姐姐微笑道:「係呢,上次同妳傾過既事妳真係冇問題?」
Jessica笑住咁望左我一眼,再向秋兒姐姐笑道:「冇問題呀。」
…
我開始明白發生緊咩事。
「熙熙,呢位係謝珮嘉Jessica,不過其實唔駛我介紹你都應該識架喇?佢係今年黃社既副社長。」秋兒姐姐微笑道:「佢讀既係理科,而且數學科考試未試過跌出全級頭三,我諗搵佢教你數學應該好合適。其實唔止數學,你如果有其他理科既科目唔明白都可以問架。」
「哦。」我目無表情地回答。
我唔係想咁。
「佢就係熙熙喇。」秋兒姐姐向Jessica介紹道。
「識架喇,我地中一練水運會啦啦隊果陣已經識。」Jessica笑道。
純粹互相知道大家係邊個,咁係咪叫識呢?
「黎緊呢一個學期都辛苦妳喇。」
「都係一個星期一兩個鐘啫。」Jessica笑道:「唔會佔我好多時間。」
哦?
其實…算少喎。
比起秋兒姐姐果陣同我溫書所用既時候的話。
「熙熙,你都要唔該嘉嘉呀。」秋兒姐姐提醒我。
「哦,唔該。」我無目表情地道。
「唔駛客氣喇。」Jessica笑答。
佢睇唔出我句唔該好假架咩?
「我之後再黎搵你夾時間喇。」Jessica笑道,邊孭起書包:「我去搵阿邦先喇,唔好要佢等得太耐。」
阿邦?
阿邦社長?
「嗯,總之真係唔該晒妳喇!」秋兒姐姐笑道。
*
今日冇波練,我同秋兒姐姐一齊走,諗起之後秋兒姐姐唔會再同我補習,我就悶悶不樂…
唉,之前先話完自己唔可以咁自私霸住秋兒姐姐搞到佢冇得溫書準備會考,今日我就為左佢唔會再同我補習而唔開心,我真係差勁。
「熙熙?」秋兒姐姐響我地搭緊巴士返屋企果陣問:「你冇事吖嘛?」
?
秋兒姐姐妳識讀心術?
定我個樣太易估?
「冇事呀。」我答道。
唔通將我咁自私既諗法講出黎咩?
秋兒姐姐側頭諗諗,然後溫柔地笑道:「我冇講過唔同你補習呀。」
!
秋兒姐姐妳真係識讀心!?
「我真係冇野呀。」我急住去否認。
我唔想秋兒姐姐覺得我係一隻唔成熟既自私小學雞…
…
…
…
不過我面上情不自禁咁掛起左個笑容…
「你仲話冇野?」秋兒姐姐面上罕有地露出個奸笑,續道:「你聽到我話我冇講過唔同你補習之後個樣笑到?」
真係笑得咁明顯咩?
「我…我…」
秋兒姐姐好快回復返溫柔既笑容,道:「不過我知你係唔想我分心,想我專心溫書,所以先冇將呢個諗法講出黎既,係咪?」
我點點頭。
其實係。
正如我之前所諗咁,見到秋兒姐姐咁大壓力,唔通我仲可以厚住面皮咁自私要求佢幫我補習咩?
「我係驚自己分唔到太多時間出黎幫你,所以先問下嘉嘉得唔得閒幫手同你溫下書。」秋兒姐姐續道:「佢既數學同其他理科都真係好好,雖然一個星期佢淨係可以幫你補一兩個鐘,但一定可以幫到你。」
「嗯。」其實都冇咩好投訴喇,係咪?唔駛錢既補習班。
「我應承你…如果Kitty佢唔要求我一齊同佢去自修室既話,我就同你一齊溫書,好唔好?」秋兒姐姐柔聲問道。
「好!」秋兒姐姐響任何地方都溫到書。如果唔係Kitty姐姐既邀請,我諗佢多數都會留響屋企溫書。
「係呢,」我突然諗起樣野,好奇地問:「社務唔係已經七七八八喇咩?點解佢要急住去搵社長既?」我口中既社長係今年既阿邦社長。
(待續)