一百五十四
我同陳日朗條撚樣對望左一眼。
「阿朗佢今日話想同我地一齊食。」淇淇見狀解釋道:「阿儀佢地都冇問題,熙熙你唔介意架呵?」
我聳聳肩,不置可否。
阿必個樣唔係幾高興,不過就冇出聲。
「咁我地行喇。」淇淇笑道。
「熙熙。」陳日朗對我笑道:「你都唔介意我咁叫你架呵?」
屌你老味男人老狗咁叫我好撚基。
我黑住面望住佢,冇出聲。
都好明顯喇吓嘛?
「我當你唔介意架喇喎?」陳日朗笑道。
佢呢隻微笑好撚假。
「你都唔好介意我咁講,」陳日朗繼續假笑道:「我地作為男仔,對女仔係要有紳士風度啲既。你咁冇風度對女仔係唔啱架。」
「哦?」我戚起一邊眉。
「就好似啱啱咁…」呢個時候彈彈妹同佢朋友都由課室走緊出黎,陳日朗趁機扮作情聖咁道:「你點可以對呢兩位咁可愛既女士口出惡言,之後仲要無視佢地走左去呢?」
屌,你鍾意周圍撩女仔係你既事。
於是我微笑咁回應:「噢,咁一定要好似陳先生你咁,一見到女仔就要笑到成個烚熟狗頭咁嘞。」
陳日朗笑容僵硬左。
阿必好誇張咁哈哈大笑:「笑到烚熟狗頭咁款,係咪即係笑到好似我而家咁誇張?」
我微笑咁回答阿必:「應該誇張過你,你唔係狗頭係柒頭。」再對陳日朗微笑道:「我係驚啲女仔見到陳生你咁笑法會嚇到走左去咋?但你咁多女圍應該唔驚喇?」
陳日朗僵笑咁回應:「哈哈…咁又真係冇女仔見到我會走左去既。」
我望住淇淇道:「嗱,佢自己話架咋,係佢自己認屎認屁話冇女仔見到佢會走左去。」
陳日朗望住淇淇急道:「我唔係咁既意思…」
「哎呀呀…」我啐了一聲:「其實你咪即係男版公廁?」
我搭上左Kitty姐姐已經超過一年,已經明白「公廁」呢兩個字既含意。
阿必又答嗲:「公廁?好污糟架喎!」
八婆儀打左阿必個頭一下,怒道:「你唔好再亂講野!」
「咩喎!」阿必指住我:「佢夠亂講野,妳又唔打佢?」
啊…你個仆街必…
淇淇呢個時候出聲了:「夠喇熙熙。」
「好既,好既。」我聳聳肩,然後又加多句:「不過我都係講事實啫。」
陳日朗道:「我呢啲叫紳士風度…」
「係係。」我笑道:「係咁扮比女圍去食女就真係夠晒風度嘞…」
「熙熙。」淇淇道:「算喇,唔好再講喇,佢都係我朋友黎。」
「Okok。」見到淇淇維護陳日朗,唔知點解我有啲氣上心頭,唔通我唔係妳朋友?於是我又加多句道:「妳唔好話比我知妳都加入埋一份子呀?」
淇淇望實我。
啪!
我塊面捱左一記耳光。
「喂,妳有冇搞錯,我啱啱講笑咋喎!你真係打阿熙!?」阿必怒道。
冇錯,打我既唔係淇淇,而係八婆儀。
八婆儀指住阿必怒道:「收聲死人必!」再對住我道:「我都忍左你好耐喇!」
「妳係咪以為我唔敢郁妳?」我向八婆儀怒目而視。
「喂,你係咪想郁手打女人呀!?」陳日朗推左我心口一下。
「喂屌你老母啊,打我兄弟!」阿必衝埋去扯住陳日朗心口。
好彩呢個時候差唔多全部同學都走晒,如果唔係一定會驚動到老師。
「大家停手呀!」淇淇大叫道。
大家比淇淇呢聲突如其來既呼喝嚇停左。
我從來未見過淇淇咁大聲嗌出黎。
呢個時候一直響旁邊食花生既彈彈妹走埋陳日朗前面,笑左一笑:「陳先生,多謝你既好意喇,不過我鍾意熙哥哥,所以佢點講我都冇乜所謂架。」然後饒有深意咁望左淇淇一眼,再道:「就算熙哥哥點對我都冇問題。」
全場既氣氛突然變到好怪異。
淇淇同彈彈妹對望左一陣,然後又望下大家,最後又望下我,突然粒聲唔出就轉頭走左去。
「淇淇!」八婆儀乾瞪左我同阿必一眼,之後就追上去。
「淇淇,等埋我!」陳日朗都追埋上去。
鄭海欣望一望我同阿必,再望一望淇淇走既方向,然後終於都向住淇淇個方向慢慢離開。
「咁我地而家點?」阿必問,同時又望下我同彈彈妹佢地。
「屌,返屋企換衫踢波,你黎唔黎?」今日真係頭頭碰著黑,最好踢波發洩下。
然後我同阿必就將啱啱表白完但我完全冇放過響心上既彈彈妹仲有佢個friend留響原地。
…
奇怪。
我擰轉望一望彈彈妹,只見佢繼續企響原地,甜甜咁笑住望住我。
好奇怪既女仔。
(待續)