關於心態
一場社會運動牽連咗至少二百萬人,如果你想團結咁大量嘅人,你唔單止要話比人知你點諗,更加重要嘅係要知道同理解身邊嘅人諗咩,咁你先會得到最多人嘅支持。
試問如果你所講嘅心態係咁理所當然,人之常情嘅,點解今日街頭會如常人來人往而唔係個個嬲到爆出黎抗爭?唔通就係因為我出篇文所以佢地就放棄咗咁理所當然嘅心態?
大家兩年黎經歷咗咁多事,付出有多有少,每個人都失望過攰過,淨低嘅力量到底仲有幾多,仲係咪咁經得起情緒勒索,仲可以咁勇敢向前?
你講嘅大家有仇報仇付出所有抗爭至死當然理想,但事實香港人表現出黎嘅係疲累,恐懼,無奈,絕望,依啲唔係下下鬧佢話佢冇膽叫佢比啲骨氣就可以處理到。
假如你唔當身邊嘅香港人係個有血有肉嘅人時,點樣去說服佢地信任你同你一齊齊上齊落?
無人生來就係英雄,但唔代表唔需要將大家當係人咁對待,一個健康抱有希望嘅人,先會成為到英雄