P牌說故事
2020-06-15 19:19:03
我想好了，我決定待會詢問Cathy有沒有暗戀對象。
沒多久 ，我倆就到達綠油油的草地，草地上一個人也沒有，她總是有辦法找到這些人煙稀少的地方。
「到啦！我哋快啲set嘢！」她忽然變得活潑起來。「哦.......」而我的狀態就變得越來越不自在，生怕她對我有意思。要是她真的喜歡我的話，這也算是正常的，畢竟我如此有魅力。
「你帶咗咩食？」她一邊吃水果，一邊向我問道，「我帶咗啤酒、汽水、薯片。」
「全部都係Junk food嚟？好彩我帶嘅都係健康同Home made，有飯團、水果，同埋冰水。」
「係喎，唔記得你唔飲酒，咁我唯有一個隊酒。」說到這裏，我又把啤酒灌進口中。
「成日飲酒傷身嘛，你少飲都好。」她總是對我無微不致，使我禁不住問道：「其實........你有冇鐘意嘅人？」
她尷尬笑着：「你又會突然咁問嘅，搞到我好驚喎。」她沒有正面回答我，難道她........
「唔驚，Yes no question 嚟姐。」我嘗試引導她。
「你知嚟做咩？」她就不能好好說嗎？
「好奇咋。」
「你講先，你講咗我先答你。」她變得調皮起來，既然如此，我只好如實回答：「我無暗戀嘅人。」
「哦........」
「你係要答我，而唔係哦我！」我激動起來。
「得啦，想輕鬆下氣氛姐，唔洗咁大反應喎。」，Cathy接着說：「我曾經有，但而加無。」
甚麼啊，還以為她是喜歡我的，沒想到這是我的一廂情願。
「曾經有，咁即係邊個？」我好奇道。
「唔通你想我答係你？講咗你都唔識㗎啦，過咗去就算啦。」
「就係過咗去，咁講嚟都無所謂啦。」不知何時開始，我喜歡聽別人的故事。
「你真想聽？唔會反感？」
「反感？點解咁講？」我不解。
「因為.......我係鐘意女仔。」
「吓？」我愕然。
「哈，果然大家嘅反應都係一樣。
我好耐之前就意識到自己係鐘意女仔，亦都從來無同人講過呢件事，一直對拍拖呢回事無感覺，以為自己呢世都唔會鐘意人，直至我識到Yoyo。
佢係一個好識照顧人嘅人嚟，同佢一齊嘅我可以無後顧之憂，可以依賴係佢身上，所有事都會有佢陪我。
雖然係咁，但我都只係以好朋友嘅身份同佢相處，無話想要做情人嘅諗法，直到後來，佢喺情人節約我出嚟，然後問我有冇過鐘意佢。」說到這裏，Cathy突然眼泛淚光。
「你無事嘛？」我緊張地問。
她搖搖頭微笑，然後逕自說：「我當時以為佢都鐘意我，所以我坦白承認對佢嘅感情。
但係，
當我講完之際，佢身邊突然出現一個男仔，對方警告我，叫我唔好再纏住Yoyo，Yoyo係佢女朋友，所以佢係點都唔會鐘意我，仲叫我死心。」
「拍戲咩.......」我衝口而出。
「係拍戲就好，我都想佢話我聽，呢啲一切全部都係假。
自此之後，佢再無理過我，我一直以嚟嘅支柱、所依賴嘅人，都係嗰一𣊬間幻滅。
所以，我應承自己，我以後都唔會再依賴人，我要學識獨立，只要我自己學識咗，咁我就再唔洗依賴人。」怪不得她幾乎精進所有事，可謂是全能，唯獨感情方面，她卻學不會。
「最諷刺嘅係，連我自己都不知不覺咁學咗佢，會成日去照顧人，搞到人誤會我對佢有意思，但我只係會對對方做朋友。好彩，你唔係咁。」她笑說。
「我都想拜托你，幫我照顧一個人。」我一本正經地說。
「邊個？」
「幫我照顧你自己。」這句說話有似曾相識的感覺。
然而，她沉默不語。
於是，我把啤酒遞給她：「飲啦。」
她反感地說：「咪話咗我唔飲囉。」我仍然遊說她：「一啖，你試下就得。」
最終，她屈服並且嘗試喝一口：「哇，好苦。」
「咁人生苦，定啤酒苦？」我反問道。
Cathy沒有正面回答：「唔怪得，大家都咁鐘意飲酒。」
她又接着說：「不過我想知，你會唔會因為知道我嘅性取向，而覺得我好奇怪，唔想再同我做朋友。
你唔想嘅話真係可以同我講，我唔會怪你，我都明白有人接受唔到。」
這樣的話⋯⋯
A、表示無法接受
B、表示尊重及並不認為有問題