44 Like
2 Dislike
雷霸龍123
2020-02-27 16:25:58
抗戰義士
2020-02-27 22:16:57
推
奧比旺
2020-02-27 23:49:58
加油
bedGeroge
2020-02-28 01:04:07
為左過海,施政傑佢地去埋碼頭,試下可唔可以揸隻遊艇過海。
結果當然唔成功啦,佢地連點開船都唔識,更莫講話要揸出海。
時間每日流逝,換過幾架車,又換過一批新嘅「架撐」,一路打打停停,不知不覺間,四人已經喺呢個喪屍滿佈嘅香港島上,生活左一個幾禮拜。
呢日天色陰沉,天氣極之悶熱,焗到個人透唔到氣咁滯。
一大早,四人喺灣仔一個商場逛下,睇下張火石個妹有無匿埋喺度。
呢排佢地主要都係聽林伯所提議嘅,去啲商場或者超市搵下。
逛左幾個圈,佢地咩都搵唔到,淨係見到一班喪屍,以及十幾個一邊踩住滑板,一邊拎住棒球棍攻擊擋路喪屍嘅後生仔。
班人睇落都係得十七八歲,似乎好enjoy喺無人嘅商場中盡情地踩滑板。
張火石拎住張相行去問班後生仔有無見過佢個妹,對方話無人見過。
四人一無所獲,行出商場後又俾七八隻喪屍襲擊,焗住要喺呢個咁悶熱嘅天氣下打喪屍。
由於各人之前用開嘅武器都受到唔同程度嘅損耗,所以佢地都換左批新貨。
張火石換左把磅數更重、手柄更長嘅日本製大鐵鎚,豹哥就用更鋒利嘅斧頭,施政傑同Simon轉左用輕身啲嘅電鋸。
其實,佢地都試過執到啲槍械,但最後都無用到,原因係近戰用槍並唔多適合,同埋又驚射射下會無子彈。
同幾隻打左一輪,四人成功逃脫,但就全身都濕曬,佢地熱到猛咁標汗,就連底褲都濕埋。
呢啲天氣又悶又焗,最好應該留喺冷氣房嘆冷氣,無奈家陣成個港島都無電,連風扇都無得吹,更唔洗旨意有得涼冷氣。
喺無冷氣又無風扇嘅情況下,唯有就搵個空曠啲安全啲嘅地方抖下涼。
四人於是就爬左一座行人天橋橋頂攤抖下。
「屌!點解一啲風都無架,想熱撚死人咩!」Simon不斷用手扇風。
「個天好似越嚟越陰沉,應該好快會落大雨。」施政傑大啖大啖咁飲水。
「要落就快啲落啦,我啲朱古力都熱到融曬。」豹哥收埋喺褲袋嘅朱古力全部融曬。
「我估依家氣溫至少有38度。」張火石剝左衫嚟抹汗。
「天呀!好熱呀!求你快啲落雨啦!」Simon對天大嗌。
「哈哈,齋嗌唔夠架,至少都跳返part求雨舞啦。」豹哥笑笑口話。
「咁熱仲跳舞?你當我傻架。」
「你嗌兩聲就落雨?你當個天傻架?」豹哥同Simon又開始互相「窒」對方。
同一時候,橋底隱約傳來兩把聲音。
「你地聽唔聽到有人喺度嗌呀?」豹哥聽到好似人嗌大佬。
「大佬!」兩把聲音變得清晰。
「係我地呀,大佬!」
四人順住聲音望落橋下面,見到兩個熟悉嘅人影。
肥龍同瘦虎。
「哇!你地見唔見到?係肥龍、瘦虎呀!哈哈,我真係無講錯,我兩個兄弟果然唔會咁易就死,哈哈!」豹哥見返兩個兄弟,難掩興奮之色。
佢地幾個馬上落去迎接二人。
一落到橋,豹哥即刻衝上去,好激動咁攬住肥龍同瘦虎:「太好啦!你地兩個真係無事!」
「咁多日無見,我地兩個好掛住大佬你呀!」肥龍著住鬆身衫褲,手上拎住一把斧頭。
「大佬,都話左我地會返嚟搵你架啦!諗唔到竟然喺行人天橋頂見到你地。」瘦虎上身背心,下身牛仔褲,孭住一個綠色背囊,手上亦都拎住斧頭。
「嗰陣咁多隻喪屍追住你地,你地係點走甩架?」豹哥問。
「好簡單渣,我地跑上左山,匿左入一架失事嘅私家車,lock住度車門,直到等班喪屍慢慢走曬先出返嚟,跟住咁就避過左啦。」瘦虎講解當時嘅情形。
「啲喪屍睇唔到我地喺架車度,俾我地好符碌咁避過一劫,我諗個天都唔想俾我地咁快死住,哈哈!」肥龍笑住講。
「哈哈,見返你地實在太好啦!」豹哥滿心歡喜。
「滴噠、滴噠、滴噠......」個天終於落雨,而且唔係毛毛雨,而係滂沱大雨。
「落雨啦,我地搵地方避雨先啦。」施政傑用手擋住頭上密集嘅雨點。
「係呀,大佬,唔好講咁多,我地避雨先啦!」
六人想跑去前面屋簷下避雨,但跑到中途,殺出一班擋路嘅喪屍,數量仲唔少,至少有三四十隻。
天空轟隆一聲,響起震耳欲聾嘅打雷聲。
暴雨之中,佢地六個又好似喺監獄嗰陣咁,一齊同幾十隻喪屍搏鬥起上嚟。
媽的貢丸
2020-02-28 02:54:18
推
雷霸龍123
2020-02-28 15:22:22
追故mode on
雷霸龍123
2020-02-29 01:46:41
樓主出文未
媽的貢丸
2020-03-01 12:49:12
消失左樓主,尾已爛
bedGeroge
2020-03-01 14:13:03
※ ※ ※
大雨之中,施政傑等六人正同幾十隻喪屍開戰。
雨水狂瀉,雨大到令人睜唔開眼睛,六人視線模糊,再加上全身濕透,導致佢地攻擊力減弱,成日都打唔中目標,因此陷入左苦戰。
「頂佢個肺,啲雨係咁dup落嚟,眼都mak唔開,點打呀?」豹哥一邊用手抹走眼角嘅雨水,一邊揮動斧頭,但好多下都劈唔中。
「大佬小心!」肥龍用身軀撞開一隻想從後襲擊豹哥嘅喪屍。
「啲雨越落越大,啲水入曬眼,咩都睇唔到…」施政傑講下講下,俾一隻喪屍行過嚟捏住左佢條頸。
好彩張火石咁啱喺隔離,幫手一鎚打走隻喪屍。
「屌啦星,班喪屍包圍住曬,想走都走唔到。」Simon拎住電鋸,左「捐」右「捐」,周圍搵路走。
「咁依家點算呀?」豹哥索性瞇埋眼,揸住斧頭亂斬亂fing,唔俾喪屍埋身。
「大佬因住呀,差啲劈中我!」瘦虎踎低閃避完一隻喪屍,再起身嗰陣差小小俾豹哥打中。
「Sorry,Sorry。」
過左一陣,地下「啪」一聲濺起一攤水花。
最好打嘅張火石都招架唔住,俾三隻喪屍撲倒,成個人撻左落地。
幾隻喪屍圍攻張火石,張開口拼命想咬佢。
其他人想上去幫手,但又俾其他嘅喪屍纏住。
就喺呢個危險關頭,有一個身穿黑色風䄛同短褲,戴住粉紅色頭盔,同時戴住護目鏡、手上拎住一支長鐵通嘅人,踩住roller衝入喪屍堆裡面。
嗰個人舞動手中嘅鐵通,再配合滾軸溜冰鞋嘅步法移動,「三趴兩撥」幾下手勢就打低攻擊張火石嘅喪屍。
跟住佢又埋去幫其餘幾人解圍,佢身手十分靈敏,踩住roller穿梭喺喪屍之間,並且好聰明咁針對喪屍隻腳嚟攻擊,唔同佢地硬碰硬,淨係「慣」低班喪屍。
幾分鐘之內,呢個人幾乎憑一己之力,打到幾十隻喪屍趴街。
六人睇到呆左,心入面都喺度諗,呢個到底係何方神聖。
嗰個人碌到張火石面前,除低護目鏡講:「阿哥,你無嘢呀嘛?」
「柔柔?」張火石露出喜悅嘅表情。
無錯,呢個踩住roller衝入喪屍群,打低咁多隻喪屍嘅就係張火石個妹。
柔柔。
「火石,呢個係你嘅…?」豹哥問。
「呢個就係我個妹柔柔!柔柔,呢幾個係我喺監獄識到嘅朋友。」
張火石諗唔到竟然咁樣重遇自己個妹,呢刻心情既驚喜又興奮。
至於嗰班被打低嘅喪屍又慢慢逐一企返起身。
「阿哥,呢度好危險,班喪屍好快又會企返起身,我地快啲離開呢度先。」
「好!」
之後柔柔佢帶住六人穿過幾條橫街,上到一架停靠路邊嘅黃色校巴。
「師姐,你去左邊呀?仲以為你有咩事?」坐司機位嘅年輕男子同柔柔講。
「係呀,我地好擔心你呀,」同車仲有一個後生女,「咦?呢幾個係…?」
「呢個係我阿哥,其他呢五個係我阿哥嘅朋友。」柔柔介紹,「阿哥,呢兩個係我大學嘅師弟、師妹,Eric同Monica。」
Eric同Monica仔細打量六人,望真啲佢地係咪喪屍。
「唔洗望啦,佢地係人唔係喪屍,Eric,你快啲開車啦!」柔柔催促。
「哦,知道!」Eric攬好安全帶,開車出發。
bedGeroge
2020-03-01 14:15:41
唔會爛尾的
bedGeroge
2020-03-01 18:41:32
出面仍然係大雨滂沱。
柔柔上到車,除左對roller,換上人字拖,佢雙腿十分修長,鹹濕嘅Simon啱先係咁留意人地對腳,直到上到車之後,見到柔柔旁邊個師妹Monica身材更加好,個胸更加大,慢慢就將焦點轉去Monica對36D大波波度。
柔柔除埋護目鏡同頭盔,展露一頭清爽短髮,仔細一望,同後生時嘅日本演員滿島光有幾分相似,同樣散發住一種獨特嘅魅力。
「火石,原來你個妹咁勁架,啲身手同你一樣咁好,真係有其兄必有其妹。」豹哥讚歎。
「哈哈,唔好咁講,講到身手,我阿哥勁我好多,我嗰啲都係三腳貓功夫。」柔柔十分謙虛。
「唔通你又係打泰拳?」Simon問柔柔,對眼「借啲意」望去隔離Monica對波度。
「係呀,我由細到大都係跟阿哥學泰拳。」
「唔怪得咁犀利啦,一個人拎住鐵通就打低咁多喪屍。」施政傑見到啱先柔柔踩住roller以一敵眾,真心覺得呢個女仔好型。
「哈哈哈,過獎啦!不過話時話,阿哥你地係點樣從赤柱出嚟架?」柔柔發出爽朗嘅笑聲。
「啲喪屍攻入嚟監獄,我地就趁機走左出嚟,咁你呢,你一直都喺港島?我仲以為你喺九龍。」張火石問。
「喪屍病毒爆發嗰日,咁啱大學工程學院都搞活動,我呢個師姐見放假無嘢做,咪返學校幫下手,到晏晝搞完啲嘢就同班師弟師妹入淺水灣燒嘢食,然後夜晚出到嚟市區,就見到一街都係喪屍,我地十幾二十人見到情況不妙,即刻搵地方匿,仲打算過海返九龍,但係就唔知點解三條隧道俾人炸左,就係咁我地就一直困喺港島,走唔返出去。」
「咁你地知唔知點解無端端會有喪屍?」施政傑問。
「聽講嗰日下晝兩點幾,港大一個實驗室突然爆炸,仲發生氣體洩漏,就係嗰啲生化氣體令到啲人變成喪屍。」柔柔話。
「好彩我地嗰日下晝唔喺campus,如果唔係我地全部都奶曬嘢變曬喪屍。」揸緊車嘅Eric講。
「師姐…」Monica掹一掹柔柔嘅衫角,細細聲講:「嗰個男人由上到車就一直望住我個胸,好變態…」
Monica講嘅嗰個男人當然就係Simon,條友條褲濕曬,扯旗都扯得特別明顯。
Simon留意到Monica發現左佢偷望,即刻掩住下面,望出窗扮無嘢。
「咦?點解後面咁多汽車電池嘅?」
「仲有兩個黑色膠袋,入面係裝咩架?」
肥龍同瘦虎見到後面座位擺左五六座汽車電池同兩個黑色大膠袋。
「成個港島都無電,咁我咪去啲車房偷啲汽車電池嚟發電,途中落大雨,避雨嗰陣咁啱撞到阿哥你地同班喪屍打緊,咁我咪即刻去幫手。至於黑色膠袋應該係食物同炭?」
Monica補充:「係呀師姐,一袋係炭,一袋係醃肉同啲蔬菜,但唔知啲炭有無淋濕左。」
「你地拎咁多炭,諗住燒嘢食?」施政傑問。
「哈哈無錯,因為我地個個煮嘢食都唔叻,所以多數就係打邊爐或者燒下嘢食咁囉。」柔柔
笑住回答。
「好醒喎,識得用火燒,我地幾個三餐淨係啃乾糧渣。」豹哥話。
「大佬,我地都係呀,我同肥龍都係日日食罐頭渣。」瘦虎打開背囊,入面全部都係罐頭,仲有幾盒朱古力。
「正喎,有朱古力,仲要我鐘意食嗰隻添。」豹哥喺背囊拎盒朱古力。
「我同瘦虎知道你鐘意食,特登擸左啲擺喺度。」肥龍話。
「哈哈,你兩條友都算有我心。」豹哥拆開包裝,好滋味咁食朱古力。
幾分鐘之後,佢地就嚟到位於北角嘅城市中心商場。
「各位,我地到啦!」Eric將校巴停泊到路邊。
北角城市中心商場係一個舊式嘅屋邨商場,柔柔等人用呢個商場作為避難基地。
當中無咩特別原因,只係佢地第一次入嚟呢度嗰陣,咁啱裡面一隻喪屍都無,於是決定用呢度作為避難所。
趁條街無喪屍,佢地幾個拿拿聲拎住啲嘢入去商場。
bedGeroge
2020-03-02 00:06:13
商場入面有好多鋪頭,有快餐店,有玩具店,亦有賣衫嘅鋪頭,仲有補習社同診所。
另外商場下面仲有一個地庫,柔柔佢地主要喺地庫中央位置附近活動,其他啲鋪頭就拎啲做休息室,而廁所就拎嚟沖涼。
除左柔柔、Eric同Monica之外,商場仲有四個後生男仔,佢地都係柔柔嘅大學師弟,平時主要負責看守住商場嘅門口。
除此左佢地幾個,仲有三個中三學生妹同一對七十幾歲嘅年老夫婦。呢幾個都係北角街坊,喺柔柔等人未進駐之前就已經匿喺商場入面。
柔柔換上乾爽嘅衣物,著住白色鬆身衫同運動長褲行出嚟,Monica就換左小背心同短裙,傲人嘅身段表露無遺,仲露左小小乳溝出嚟。
施政傑等人都搵左間服裝店換左啲乾淨衫。
「傑仔,個Monica真係好撚正,好想同佢搞嘢,你話我應該點做先溝到佢?」由換衫到行出鋪頭,Simon一直喺施政傑耳邊講住話Monica好正。
「依家呢個時勢仲諗住溝女,不如諗下點樣過海逃走仲好啦。」
「就係呢個時勢先要溝女,今日唔知聽日事,話唔定我地聽日就俾喪屍咬q死左,臨死前如果有個大波妹搞下,咁都叫係死而無憾,人生先不算枉過,你快啲彈兩招過嚟啦。」
「你要溝咪自己諗辦法囉,話曬你年紀都大過我,溝女呢啲嘢你經驗多過我啦。」
「頂,我搵私鐘妹就熟路啫,溝女呢啲嘢我唔多掂架渣。」
呢個時候,Eric同另外四個男仔同學行上前攔住施政傑同Simon:「你兩個,有嘢同你地講。」
「有咩事?」Simon問。
「我提一提你兩個唔好打Monica主意,佢係我地幾個溝先嘅,你地唔好諗住遲嚟先上岸,尤其係你呀,死矮仔,睇你個樣咁鹹濕就知你想溝Monica。」Eric對住Simon話。
「傻架你?大家公平競爭,邊個有本事邊個就溝到大波妹,你地五條薯嘜以為自己溝先就大曬?」Simon開火反駁。
「哈,你條死矮仔咁臭串,公平咪公平競爭,睇你條友『矮得得』,生得又猥瑣又樣衰,Monica都唔睇得上你。我地幾個就唔同啦,同佢係同學識得耐呢啲唔講,齋講樣都贏你幾條街啦,勸你都係唔好不自量力,匿埋打飛機算吧啦!」Eric反擊。
「收皮啦,識得耐都溝唔到,證明佢睇唔上你地五條薯嘜囉。」
「屌你老母,你個死矮仔咁撚串?」企喺Eric身邊嘅all-back頭仔谷起二頭肌,好似想郁手咁款。
「Johnny,由佢啦,我睇呢條友都係得把口架啫。」Eric同all-back頭仔講。
「喂傑仔,你地兩個棟喺做咩呀?快過去燒嘢食啦。」豹哥同肥龍、瘦虎換完衫出嚟話。
「係囉Simon,我地快啲行出去啦。」施政傑拉Simon走。
外面個天開始變黑,商場入面都慢慢變得昏暗。柔柔駁埋幾部汽車電池嚟發電,電量勉強供應到兩座落地燈作照明同一把風扇嘅運作。
佢地咁多個人拎住燒烤叉,圍住個炭爐。
「話時話,我地咁樣係室內bbq,會唔會焗死架?」
施政傑燒緊一條腸仔,佢隔離左手邊坐左張火石同柔柔,右手邊就係Simon同豹哥。
「放心啦,我已經打開左上面通氣口,部風扇會吹啲煙上去。」柔柔轉動手上嘅燒烤叉。
「不過阿妹,你又話有十幾個大學師弟師妹一齊?但點解呢度得你地七個?」張火石問。
柔柔歎一口氣,然後話:「本來我地同行有十五人,但其他八個唔見左。」
bedGeroge
2020-03-02 00:25:53
「唔見左?你地失散左?」施政傑問。
柔柔搖搖頭回答:「都唔算係失散,幾日前佢地幾個諗住去行落地鐵,想沿住路軌行過海,但突然間音訊全無,唔知去左邊。」
「係喎!可以從地下鐵軌道過海,點解我地之前一直都諗唔到!」豹哥有種恍然大悟嘅感覺。
「你話佢地音訊全無?會唔會係中途俾喪屍咬左?」張火石問。
「我地係跟埋佢地一齊落地鐵,嗰陣地鐵站入面一隻喪屍都無,佢地八個揸住對講機行入路軌,每隔一百米就會用對講機同我地講一聲。本來諗住佢地先探路,成功過到去油塘站之後,我地先過埋去,但去到八百米九百米嘅時候,佢地就無左聲氣,對講機淨係傳來沙沙聲,叫極都無人應。」
「唔係掛?唔通路軌都有喪屍?」施政傑感到奇怪。
「有呢個可能,我都唔知。」
「其實我地都叫佢地唔好博架啦,不過佢地死都唔聽,係都要想從路軌過海。」Eric插嘴話。
「咁佢地都係想盡快逃離呢個咁危險嘅地方啫。」柔柔替失蹤嘅八人辯護。
「如果經路軌都走唔到,但應該真係無方法過到海。」施政傑歎一口氣,感到灰心。
「係呀,真係唔知點算好。」柔柔望住火堆,鼓埋泡腮發愁。
豹哥燒燒下聞到一陣煙味,佢望一望隔離,見到身邊三個學生妹喺度食煙。
「哇!你三隻𡃁妹,未夠十八歲就學人食煙?」豹哥同三個學生妹講。
「阿叔,家陣我地『無皇管』,鐘意做咩就做咪架啦,我地食煙管你叉事咩!」其中一個學生妹好串咁同豹哥講。
「頂呀,你幾條𡃁妹咁撚串?睇你地幾時得肺癌死。」
「阿叔,你食咁多朱古力,小心糖尿病添呀!」另一條學生妹話。
見到豹哥俾人串,Simon忍唔住陰陰嘴喺度笑。
「頂你個肺!你三條八婆夠膽串我大佬?」
「咪就係!未死過呀你地?!」坐喺豹哥對面嘅肥龍同瘦虎即刻企起身,指住三個學生妹鬧。
「咩呀?兇我地咁話?以為紋曬身就係黑社會呀?我地唔驚你架阿叔!」第三個學生妹chur住煙反駁。
「咳咳!咳咳!咳咳!」嗰七十幾歲老翁突然咳個不停。
「伯爺公,你無嘢呀嘛?」老翁身旁嘅妻子不停幫佢掃背。
「咳咳!咳咳!咳咳!」七十歲老翁仍然咳個不停。
「公公,如果你唔舒服,不如返鋪頭休息下先啦。」
柔柔放低燒烤叉,陪老夫婦行去一間瑜伽室度休息。
「Monica,個阿伯咳得咁犀利,你知唔知咩事呀?」Simon問對面嘅Monica,想乘機撩對方講嘢。
圍喺Monica身邊嘅Eric同幾個男仔即刻搶答。
「個阿伯有長期病,身體一直都唔係咁好,基本日日都喺度咳。」Eric燒好左隻雞翼,「Monica,我隻雞翼燒好左啦,你試唔試下我啲手勢呀?」
「好呀,多謝。」Monica眼尾都無望過Simon。
「你都係無行架啦,食腸仔啦。」施政傑分一條廚師腸俾Simon。
「頂你,咁快潑我冷水…」
「砰!砰!砰!」
樓上商場門口傳來拍打玻璃門嘅聲音。
唔洗審都知,又係班喪屍喺度搞鬼。
吾好搞我後面牙
2020-03-02 01:06:42
生化壽屍
抗戰義士
2020-03-02 09:05:51
又有文
雷霸龍123
2020-03-02 12:58:47
bedGeroge
2020-03-02 13:15:42
做乜好似想起我底咁
btw 無
雷霸龍123
2020-03-02 18:00:21
無野好奇問
bedGeroge
2020-03-03 00:58:40
佢地咁多個人行上去商場門口,見到門外大約二十幾隻喪屍逼埋一齊,想破門衝入嚟商場。
「大家快啲擸嘢,班喪屍又殺到嚟啦!」豹哥大感不妙。
「大佬,有我同瘦虎喺度保護你,無有怕!」肥龍同瘦虎嚴陣以待。
張火石亦擺好陣勢,準備迎戰喪屍。
「睇嚟呢度都唔係好安全,Monica,你話我地點算好呀?」Simon淆低得嚟又不忘借機撩Monica講嘢。
可惜手法拙劣,對方都唔多想理佢。
「唔洗咁緊張,你地幾個定啲嚟,冷靜啲睇我地表演啦。」Eric十分淡定,臉上毫無驚慌之色。
佢先叫四個男仔同學頂住度門,跟住行落地庫拎車匙。
至於三個學生妹丟低手頭上嘅煙頭,自動自覺行去唔同嘅鋪頭,各自攞左唔同嘅嘢出嚟。
佢地一個拎住一部黑色遙控車,上面插住支竹竿,一個就抬住一個人咁高嘅吹氣公仔,另一個就攞住一袋動物內臟。
三人先將啲內臟塞入去個吹氣公仔度,跟手搵條繩綁個公仔喺支竹竿度,佢地動作都相當熟手,唔洗一分鐘就搞掂好曬。
「咦?!呢部車咪係我之前間公司開發嘅智能遙控車?」Simon行近望真啲部車仔。
「頂你,唔好阻住曬,有咩留返拜山先講啦!」三個學生妹一齊拉開Simon。
Eric先叫其他人退後小小,跟手㩒一㩒車匙個開鎖掣。
「嗶嗶嗶—嗶嗶嗶—」
停靠喺商場門口對出馬路嘅校巴發出警報聲,前後車燈閃下閃下。
呢架校巴個防盜系統「神神地」,只要按車匙開鎖掣就觸動到防盜警報鐘。
班喪屍馬上就俾警報聲吸引住,慢慢擰轉身朝校巴行去。
「你地想咁樣嚟引走啲喪屍?」施政傑問。
「啱,但只係答啱一半。」Eric話。
等門外嘅喪屍開始散開,四個男仔就解開鎖鏈,打開商場玻璃大門。
「喂!你地做乜打開門?好危險架!」豹哥大聲話。
「Shh!唔好嘈!」Eric叫豹哥收聲。
隨即三個學生妹嘅其中一人拎部iPhone出嚟㩒兩下,然後對住部電話講:「速度60,向前行一百米然後停低。」
架遙控車收到指令,用不快不慢嘅速度,載住吹氣公仔駛出商場門口外。
二十幾隻喪屍見到有個人型物體投懷送抱,一下子就一擁而上撲埋去。
「向左轉,加速到120,行到八百米之外先可以停。」學生妹講完,遙控車突然加速並向左轉,令到班喪屍撲左一個空。
架遙控車越跑越遠,成班喪屍一窩蜂跟曬上去,逐漸遠離商場。
Eric等人就咁巧妙地成功引走曬班喪屍。
施政傑佢地幾個有小小大開眼界,諗唔到可以咁輕描淡寫就化解一次危機。
「點呀?我地呢招調虎離山係咪好勁?」Eric叫四個男仔同學鎖返度大門。
「厲害厲害!」豹哥豎起拇指稱讚。
「諗唔到仲有呢招。」張火石暗自讚歎。
「無事啦,咁大家返落去燒嘢食啦。」Eric帶頭返落地庫。
好奇嘅施政傑透過玻璃大門,繼續跟進下外面嘅情況。
佢見到個Mary公仔俾班喪屍五馬分屍,成個咬到爛曬,啲動物內臟跌曬出嚟,班喪屍好似見到金咁爭住去搶。
睇落其實啲喪屍都幾鈍,連真人同假人都分唔清楚。
Simon就上前同三個學生妹講:「你地幾個𡃁妹識貨喎,識揀我地公司出嘅智能遙控車嚟引開啲喪屍,你啱先用嘅聲控app係咪好好用?肯定係啦,因為個app係我寫架嘛!」
Simon之前話自己搞IT,其實就係幫一間玩具公司開發呢款聲控智能遙控車。
「下?乜原來個app你寫架?好垃圾喎,懶係玩聲控咁,但又成日都彈app,有時仲會錄唔到人聲,手掣遙控好用好多倍!」
「係呀,同埋你啲車無人買架,堆埋曬喺玩具鋪門口,我地都係因為手動遙控嗰啲款用曬,所以先拎呢隻嚟用。」
「無錯呀!」
三個學生妹食住煙同Simon講。
「車!無人買係啲人唔識貨啫,加上後期發現左有個bug,不過總體而言,呢部智能遙控車都係正嘢嚟架,諗返起嗰陣我同之前班同事日夜寫program......」
Simon回憶起當初開發呢款智能遙控車時嘅情境,但三個學生妹掛住食煙,半句都無聽入耳。
「係啦,邊度玩具店有呢部車?等我攞部出嚟擺下,順便展示俾Monica睇下我有份參與整呢款遙控車,話唔定佢會對我另眼相看。」Simon問。
三個學生妹隨手指一指身後嘅玩具鋪,跟住就落返地庫燒嘢食。
bedGeroge
2020-03-04 00:55:29
「啱先我聽樓上有啲聲,係咪有喪屍?」柔柔陪完老夫婦到瑜伽室休息後,慢慢行出嚟。
「係呀師姐,不過已經引走曬啦。」Eric答。
「你地啱先咁樣引開啲喪屍,呢個辦法雖然係work,但夜晚訓曬覺嗰陣點算?」施政傑問。
「訓教嗰陣,我地會輪流兩個兩個咁看住門口,一有動靜就會叫醒其他人。」Eric放一粒墨魚丸入口。
「係呀,所以阿哥你地幾個今日都要輪流看門口。」柔柔同張火石講。
「無問題。」張火石話。
慢慢夜色漸深,眾人都差唔多食飽。
食飽無嘢做嘅Simon控制住一部智能遙控車,喺大家周圍繞來繞去:「實不相瞞,你地啱先用嘅呢款聲控智能車係本人有份研發嘅,Monica,請問你覺得呢部車點呀?」
「咪同普通遙控車差唔多。」Monica回應Simon。
「咪就係,咩聲控咩智能,懶係特別咁,用起上嚟咪又係同一般嘅遙控車差唔多。」Eric一臉不屑。
「錯啦,呢部車最特別嘅地方係,佢係用藍牙連去手機,只要用我研發嘅app講出指令,咁部車就會根據你嘅指令行左行右,行前行後,Monica,你話係咪好犀利?」
「Er…係掛…」Monica唔多想理會Simon。
Simon將遙控車駛到腳下,拆開車頂一個小部件:「話俾大家聽啦,一般嘅藍牙接收距離最多得一百米,但呢架車連到去電話嘅藍牙之後,去到一千米都接收到信號,原因就係我手上呢個無敵接收器,唔好睇小呢舊咁細嘅嘢,佢釋出緊好強嘅電磁波信號嚟連接電話嘅藍牙,你地話呢舊嘢係咪好堅……」
Simon一輪嘴喺度講,其他人包括Monica聽到恰曬眼訓,根本無人留心聽佢up。
其中一個學生妹好唔耐煩咁同Simon講:「得啦得啦,好煩呀你!可唔可以收嗲呀?」
「聽到未呀,叫你收聲呀,咁多廢話,仲噴曬啲口水落我地啲嘢食度…」
豹哥講講下,見到Simon身後有一個奇怪嘅身影,指住後面話:「喂!你後面好似有啲嘢喎?」
「哇!喪屍呀!」Monica驚到大嗌一聲。
其他人立即望過去,有一個身形矮小嘅喪屍仔由走廊靜靜雞咁行到Simon背後。
大家即刻神經反射式企起身,連忙退後幾步。
「喪屍?」
後知後覺嘅Simon回頭一望,看見喪屍仔同佢只有唔夠一米嘅距離,嚇到佢即刻彈開,仲差啲撞埋個炭爐度。
隻喪屍仔著住一件染血嘅海綿寶寶衫同有花紋嘅短褲,塊面灰白帶血,mak大個口,露出沾血嘅利齒。
從外表判斷,喪屍仔生前應該只係一個大約五六歲嘅細路仔。
「點解...點解會無端端有隻喪屍架?」Monica驚慌失色。
「Johnny,會唔會係你唔記得鎖防火門呀?」Eric擋喺Monica前面保護佢,手肘有心無意咁hi落對方對36D大胸度。
「無理由架,我明明好似閂左架?」All-back頭仔話。
「救命!快啲過嚟救我!」Simon大嗌救命,隻喪屍仔已經成個人撲左上去佢個身度。
估唔到細路仔變成喪屍之後都一樣咁大力,佢搏命哄埋去Simon條頸度,想一啖咬落去。
「救我呀!」Simon見就嚟俾對方咬中,隨手執起啱先從遙控車拆出嚟嘅藍牙接收器,塞落左去對方個口入面。
喪屍仔「good」一聲將個接收器吞左落肚。
施政傑、豹哥、張火石同柔柔擸齊武器救Simon,至於Eric等人就匿埋一邊無幫手。
喪屍仔抓住Simon條頸,死都唔放手,佢成個人依附左喺Simon身上,甩都甩唔開。
其他人攻擊嗰陣要就住就住,驚唔小心誤中副車。
「傑仔睇住呀!你把電鋸差啲鋸都我!」Simon閃避施政傑電鋸。
話音剛落,手執長鐵通嘅柔柔真係一個唔小心一棍就打落Simon後背,將佢整個人打到趴左喺地,仲碌到幾米咁遠。
但呢一下將Simon同喪屍仔成功分離開。
「我個背脊好痛呀!」Simon掩住背脊,發出痛苦嘅聲音。
「哎呀,真係唔好意思,我一時錯手架!」柔柔連忙say sorry。
而被彈走不遠嘅喪屍仔好快又向住Simon逼近。
「頂你唔好再行埋嚟啦!」Simon忍住背痛,轉身往後走。
出乎意料地,隻喪屍真係停左喺度,無再行前一步。
施政傑等人眼見喪屍停左喺度,立即上前,只不過同時間,喪屍仔後面又有四五隻喪屍行緊過嚟。
逼於無奈地,佢地喺商場走廊又同喪屍大戰起上嚟。
慶幸喪屍數量唔算多,佢地四人齊心合力,好快順利解決左班喪屍。
為左唔俾外面更多喪屍行入嚟,佢地幾個即刻走去閂返好度防火門。
但當回頭一望,佢地就發現,原來走廊仲漏左隻喪屍仔未解決。
估計應該係隻喪屍仔太細粒,佢地唔覺意走漏眼。
最神奇嘅係,隻喪屍仔由啱先開始到佢地打死曬其他喪屍,都一直無郁過。
豹哥一邊小心翼翼行近,一邊撻一撻手指,測試下喪屍嘅反應:「點解隻嘢好似定左神咁嘅?郁都唔郁下,係咪中左邪呀?」
喪屍仔毫無反應,施政傑等人揸住武器逐步走近。
「好似真係郁都唔郁咁喎。」豹哥話。
「快啲行去打死佢啦,仲咁多嘢講。」Simon離遠咁同豹哥講。
Simon講完呢句,喪屍仔突然發狂,揮拳亂打。
原本明明只係識咬人嘅喪屍,突然間竟然識揮拳郁手打人。
施政傑佢地就咁啱行到埋去,一個始料不及,各人分別俾喪屍仔打左幾鎚。
之後喪屍仔一路揮拳一路行前。
Simon見到喪屍仔又想行埋嚟,拿拿聲執起地下燒烤叉:「你再行前一步我就插死你個仆街喪屍。」
喪屍仔再踏前一步,停低左,仆左落地。
Simon呆左呆,心諗咩事,點解隻喪屍好似聽緊佢指令咁嘅?
抗戰義士
2020-03-04 08:26:33
聲控