bedGeroge
2020-03-24 01:47:18
之後嘅嗰個禮拜,佢地幾個繼續四周圍「招攬」喪屍。
喪屍嘅數量慢慢就由五十隻變成兩百隻,一個天台已經唔夠擺,要用埋附近個地鋪嚟安置佢地。
而Simon就利用佢嘅電腦知識,不斷完善佢個聲控app。
原本要指令啲喪屍做嘢,要講明每一個步驟,咁樣操作上嚟其實唔係太方便,有見及此,Simon就喺個聲控app預設左幾種模式。
每一種模式都包含唔同嘅動作,例如開啟攻擊模式嘅話,只要對住電話講「attack」,咁啲喪屍就會自動自覺行上去攻擊同咬班警察。
呢種預設模式最好嘅地方就係,你只需講一個字就可以叫班喪屍做一連串動作,除左攻擊模式,仲有一個泰拳模式。
張火石將佢學過嘅泰拳招式「傳授」俾班喪屍,只要講聲「fight」,咁啲喪屍就會按預設模式入面鎖包含嘅指令,使出泰拳連環擊。
不過喪屍始終都係喪屍,佢地啲手手腳腳並無人類咁靈活,動作亦比較生硬同遲鈍,唔能夠發揮泰拳嘅全部威力。
原本仲有一個踩roller模式,弊在班喪屍確實係太鈍同埋唔識攞平衡,所以踩極唔識。
家下施政傑等人有兩百隻喪屍坐鎮,足夠對付班警察有餘。
然而,正所謂能力越大責任越大,除左自保之外,佢地都會去拯救嗰啲被警察迫害嘅生還者。
呢日天色陰沉。
喺銅鑼灣希慎廣場入面,有一大班警察揸住槍,追住手無寸鐵嘅生還者嚟掃射。
生還者之中有男有女,有老有嫩。佢地一邊逃跑,一邊喊曬口咁求饒,但班警察冷血無情,見人就射,槍槍致命,完全係毫不留情。
就喺Hollister鋪頭門前,有一對夫婦對住兩個持槍警察跪地求饒。
「阿sir唔好殺我地!我地唔係喪屍嚟架,求下唔好殺我地!」嗰老公攬住老婆同六歲嘅細路猛咁叩頭,哀求對方繞佢地一命。
兩個警察冷笑一聲,瞄準嗰對夫婦頭部,準備開槍。
就喺呢個時候,施政傑佢地帶住百幾隻喪屍行入嚟。
佢地無帶曬二百隻喪屍出街,因為都要留返啲喺傢私鋪嚟保護林伯。
「咦?有差佬喎,而且人數仲唔少添!」豹哥數一數面前警察嘅數量,大概至少有三十人。
柔柔見到商場遍地都係生還者嘅屍體,感到既憤怒又痛心:「實在太可惡啦...」
「柔柔,陣間你負責救人,班警察就交俾我地。」施政傑同柔柔講。
Simon拎部電話出嚟,傳達指示前問其他人:「咁我地今次殺曬定係點呀?」
「班差佬死不足惜,最好拎曬去喂喪屍。」張火石話。
「直接咬死曬嘅話,咁真係太便宜班打靶仔啦,我建議留返一半俾我地慢慢折磨。」豹哥提議。
「哈哈,呢個主意幾好,咁記得唔好殺曬,留返幾個慢慢玩...」Simon笑笑口話。
「砰!」遠處一名警察朝五人方向開槍,子彈差啲射中豹哥。
「仆街!咁快開槍射?前面呢班打靶仔我嚟搞掂,樓上嗰啲就交俾你地。」
講完,豹哥就命令身後五十隻喪屍撲上前,對嗰班殺人唔眨眼嘅警察「attack」。
「Attac,attac!」佢想開啟攻擊模式,但班喪屍卻無乜反應咁,「Simon,你又話嗌一下班喪屍就識得自動攻擊嘅,點解依家唔得架?」
「所以話你呢啲黑社會唔讀書,搞到英文都唔識讀,係『attack』,後尾有個K尾音架。」Simon糾正豹哥發音。
豹哥再字正腔圓讀一次,今次班喪屍就收到指令,向住前面班警察行去,準備大開殺戒。
其他人亦各自帶一批喪屍上樓上,拯救嗰班生命受到危險嘅生還者。
嗰班警察當然不甘示弱,未等喪屍逼近,就開冰霧槍周圍噴射,打算解決班喪屍先慢慢「炮製」班人。
只不過,班喪屍著曬羽絨,又封曬保鮮紙咁,根本就唔怕啲冰霧。
佢地慢慢行過去,一見到警察就飛禽大咬,好快豹哥見都咬死左幾個,跟住就轉成捕獲模式,叫班喪屍捉住班警察,唔俾佢地走。
另一邊廂,施政傑就上到二樓救人,佢先叫柔柔帶嗰對夫婦同細路去一個安全嘅地方,然後下達指令:「『fight』!」。
呢一個係泰拳模式嘅指令。
身旁幾十隻喪屍收到指示,就向住兩個連環使出泰拳招式。
佢地先喺踏前批肘,再起飛腳,然後又嚟一個轉身掃踢,最後兩下左右勾拳。
動作就做啱曬,但效果同想象中嘅有出入。
正如啱先講嘅,班喪屍動作緩慢又唔靈活,雖然係正確無誤使出招式,但就俾兩個警察避過左攻擊。
睇嚟呢個模式真係好睇唔好用。
既然係咁,咁唯有用返最普通嘅攻擊模式。
班喪屍一擁而上,撲去兩個警察身上張口亂咬。
與此同時,商場其他地方亦都傳來警察嘅慘叫聲。
剛才氣焰囂張嘅警察已變成喪家之犬,任由喪屍同施政傑等人隨意擺弄。
最後,五人救出商場裡面嘅生還者。
至於嗰班警察,有一半死左,成為左喪屍嘅早餐,另外一半就被捉起嚟,等候發落。