《監獄•喪屍•反擊戰》

感謝你既留言，其實唔係咁正氣，可能嗰個位我處理得唔好
你試下將喪屍代入成好人，或者會覺得佢地無咁正氣

夜幕降臨，四人成功逃脫後，揸住架車喺港島四周穿梭。

因為佢地過唔到海，咁唯有就喺港島到處搵下，睇下有無機會搵到張火石個妹。

雖然機會比較渺茫，但點都試一試。

街上除左喪屍之外，間唔中路過都會見到，有幾批人喺街頭同喪屍糾纏，當中有啲揸住把劍，有啲出動到標槍同鐵餅，睇嚟大家為左求存，真係使盡渾身解數。

四人都有諗過落車幫下手，但諗諗下覺得都係顧掂自己先，唔好理人咁多。

大約搵左兩粒鐘，大家見無收穫，又開始有啲攰同肚餓，打算搵個地方抖下、食啲嘢。

沿途無聊嘅豹哥拎琴日執到嘅iPhone出嚟，研究一番。

「Simon，又話部嘢可以拍片嘅？㩒邊度呀？」豹哥坐喺前排座位，問Simon點用部iPhone。

「頂，你打開之後掃一掃，見到個紅色點，咁就係拍緊片啦。」

「係咪咁呀？」豹哥掃兩下個mon問。

「揸緊車呀，我唔得閒答你住，你問其他人啦。」

「傑仔同火石攰得滯訓著左，我費事嘈醒佢地咪問你囉，況且你以前成日話自己搞呢啲id嘢好叻嘛，部電話又有『飛id』又剩咁，呢啲嘢你肯定在行啦。」豹哥將IT同id兩樣嘢撈亂左。

「首先係face id，唔係『飛』id，第二係IT，唔係id。」

「Um？我好似得左喎，㩒到出嚟，仲錄緊添喎，高科技真係高科技。」豹哥無理Simon講嘅嘢，繼續玩部機。

然而，佢地四人食左兩日7仔，終於都頂唔順，今次就喺北角搵左間麵包店開餐。

對佢地嚟講，要醫飽個肚並唔困難，因為四周圍都有嘢食，反而依家最令佢地煩惱嘅係，唔知邊度有安全地方俾佢地沖涼。

成三、四日無沖涼，佢地個身家下臭到仆街，「up」住「up」咁周身唔聚財。

聞到身上浸臭味，真係食咩都無胃口，佢地求其食完一餐，跟手就離開麵包店。

「弊！」豹哥摷一摷個身，發現身上嘅朱古力已經食曬。

「咩事？係咪有喪屍？」Simon同其他人即刻神經繃緊，左右張望。

「唔係，我好似食曬啲朱古力。」

「頂，食曬咪食曬囉，洗乜咁大反應？」Simon話。

「食完嘢唔整返條朱古力，硬係爭咁啲嘢咁，對面有間超市，趁家陣條街無乜喪屍，我過去擸返啲朱古力先。」

「唔好啦，都唔知鋪頭入面有無喪屍，都係唔好去啦。」施政傑同豹哥講，但對方已經一支箭咁過左馬路，行緊入超市。。

其餘三人唯有跟埋上去。

超市入面一片漆黑，伸手不見五指。

豹哥拎住電筒照一照四周，只見貨架凌亂，貨物散落一地。

佢地幾個打醒十二分精神，保持警覺，慎防有喪屍突然彈出嚟。

行到去急凍食品區，佢地見到有隻嘢鬼鬼鼠鼠咁喺度摷個雪櫃。

四人放輕腳步，慢慢行過去，諗住先下手為強，一齊搞掂隻嘢。

當張火石舉起錘仔，正要一錘扑爆喪屍個頭嗰陣，隻「喪屍」擰個頭埋嚟，佢見到有人拎住個鎚仔，立即就縮低。

「唔好揼我呀！我唔係喪屍嚟！」

眾人聽見係把男人聲，於是拎起個電筒再照清楚啲。

原來呢個喺雪櫃摷嘢嘅唔係喪屍，而係一名男子。

「望清楚啲，我真係人嚟，唔係喪屍。」個男人係一個年約五十幾歲嘅地中海阿伯。

「Sorry，Sorry，差啲殺錯良民添。」豹哥收返斧頭。

「好彩好彩，差啲俾你地打死。」地中海阿伯拍拍心口，定一定驚，「我叫林求德，你地可以叫我林伯，我嚟超市係想拎啲凍肉返屋企。你地呢？你地又係嚟搵嘢食？」

「係呀，我叫豹哥，我隔離呢個叫傑仔，呢位大隻佬係火石，戴眼鏡、好矮呢個就叫Simon。」豹哥介紹身旁同伴。

「點解附近唔見有其他人嘅，得你自己一個呀？」施政傑掃視一下四周。

林文德點點頭。

「下？咁多喪屍，你自己一個唔驚咩？」Simon問。

「唔驚，我拎左好多『架撐』傍身。」林文德打開背囊，展示佢啲武器，「你睇下，有木工鋸，有牛肉刀，仲有槍添。」

「哇，連槍你都有？」Simon拎支左輪手槍上手睇下。

「喺地下執嘅，我估應該係啲差佬跌嘅，入面仲有幾粒子彈架。」

「啲配備好齊全喎。」豹哥讚歎。

林文德聞到四人身上傳來酸臭味，掩住個鼻問：「唔好怪我直接，你地係咪好多日無沖涼呀？」

「係呀，我地幾個三、四日無沖涼啦。」施政傑答。

「如果唔介意，你地可以嚟我度沖個涼。我嗰度幾安全，你地唔洗驚。」

「你嗰度真係安全？」豹哥問。

「我嗰度下鋪上居，位置都幾隱蔽，附近又唔算多喪屍，匿喺嗰邊都安全架，你地唔介意咪嚟我度沖個涼，休息下囉。」

「好呀！」四人一致說好。

之後，林文德就帶佢地兜小路，避開大街啲喪屍，嚟到北角一間傢私地鋪。

有新文

支持

歡迎新讀者

(上一段因手誤打左兩個唔同名，一個「林求德」一個「林文德」，下文統一返用「林伯」作代稱。)

林伯開左傢私鋪嘅鐵閘，帶施政傑佢地入去。

佢行入去啪一啪燈掣，天花板兩盞白光燈好神奇咁著左。

「咦？點解你呢度有電嘅？」施政傑感到不可思議。

「因為我有幾個後備電箱。」林伯指一指安放喺角頭嘅五個手提式儲電箱，每個電箱大約係一個普通工具箱大細，「我仲喺天台放左幾個太陽能裝置嚟儲電，啲電勉強都夠應付日常生活。」

仔細一望，鋪頭入面地方都算闊落，面積應該有四五百呎，周圍擺放左各類傢私，例如有木櫃、梳化、飯檯等。

「咚咚！」

其中一個衣櫃無端端發出奇怪嘅聲響。

好奇嘅Simon行近去昅昅，點知未行到埋去，從衣櫃中突然跳出兩隻喪屍。

「哇屌！」Simon嚇到仆左街。

豹哥同張火石見到有喪屍，即刻揸住武器衝去幫手。

林伯跑上前阻止佢地：「唔好！佢地係我老婆同個女，你地唔好傷害佢地！」

「下？佢地喪屍嚟架喎？」豹哥感到疑惑。

「雖然佢地變左喪屍，但都係我老婆同我個女。」林伯行到衣櫃前，保護身後兩隻喪屍。

「你放兩隻喪屍喺呢度，佢地隨時會咬死你架。」施政傑話。

「唔會，你地睇下，我用鐵鏈鎖住左佢地，佢地唔會亂咁走架，亦唔會傷害你地，所以你地唔洗驚。」

兩個女喪屍嘅手腳同頸都被扣上鐵鏈，活動範圍只限於衣櫃前後一米左右。

「萬一佢地扯開條鏈，咁咪大獲？」Simon問。

「條鐵鏈好穩陣。唔會有事嘅。」

兩隻女喪屍喺林伯身後張牙舞爪，面色猙獰。

林伯叮熱左啱啱喺超市拎返嚟嘅凍肉，跟住拎啲肉嚟餵兩隻喪屍：「老婆、阿女，食飯啦。」

見到林伯若無其事咁餵兩隻喪屍，施政傑等人真係睇到眼都突埋。

兩隻喪屍大啖大啖咁咀嚼生豬肉。

「喂，傑仔，你話呢個林伯會唔會專登引我地嚟，然後隊冧我地，拎我地啲肉餵喪屍？」Simon靜雞雞咁其他三人講。

「我諗…唔會掛…」施政傑同其他人聽見Simon咁講，開始有啲擔心。

林伯唔覺意聽到Simon嘅說話，回應對方講：「你地放心，我淨係會用豬肉、牛肉同雞肉餵佢地，絕對唔會打你地主意。」

雖然林伯咁講，但四人仍未完全放心。

兩隻喪屍食左啲嘢之後，比剛才安分左少少。

「你地餓唔餓？我呢度有杯麵，又有啤酒，洗唔洗食啲嘢？」

林伯喺個雪櫃仔拎出五罐啤酒，行到一張靠墻嘅飯檯度坐低，自己先打開一罐嚟飲。

施政傑佢地你眼望我眼，不知如何是好。

「信我啦，我唔會落藥『杜』你地嘅，過嚟呢邊坐啦。」

陳伯又拎左啲零食同朱古力出嚟，擺喺張檯度：「仲有花生、薯片、朱古力，一齊過嚟坐啦。」

「朱古力？我啱喎。」豹哥聽到有朱古力，唔理咁多就坐埋去。

另外三人猶豫左一陣，決定放下戒心，相信林伯。

佢地覺得就算林伯真係出蠱惑，佢地四個對一個，點都唔會輸蝕，應該無事嘅。

於是四人就同林伯圍埋一齊飲啤酒、傾計。

有陰謀

林伯一邊飲酒一邊分享佢同佢屋企人嘅遭遇。

喪屍爆發初期，林伯一家三口收唔到風，唔知港島有喪屍出現，所以無第一時間逃走。直到佢地第二日訓醒，北角以及整個港島都大規模出現喪屍，佢地先後知後覺咁撤離。

當時佢地想從紅隧口過海離開港島，可惜去遲左一步，就喺隧道口五百米外，佢地親眼見住紅隧嘅出口俾警察炸冧左。

望住啲石屎逐忽逐忽冧落嚟，嗰刻佢地三個嘅心情可以話係無比絕望。

前無去路嘅佢地只能返轉頭，再試下搵下有無其他出路，點知過程中遇到喪屍，林伯個老婆同女不幸地俾喪屍咬左，就咁變成左喪屍。

雖然兩個親人都變左喪屍，但林伯都唔捨得離棄佢地。

當時佢趁老婆同個女完全變成喪屍之前，即刻搵啲繩綁住佢地，之後再原路折返，將佢地帶返嚟屋企。

「仆街！原來係班差佬炸左個出口？屌佢老母！佢地點解要咁做？」豹哥火冒三丈。

「唉…呢層我都唔知…」陳伯歎一口氣。

「除左紅隧，其他隧道都封左。你地話，會唔會係因為得香港島有喪屍，而政府為左保住九龍同新界，唔俾喪屍過海，所以就封左港島？」施政傑推測。

「你呢個推斷聽上去好似都幾合理，問題係我地仲有人困喺港島，你封完港島點解唔搵人救我地？點解啲直升機經過都唔救人？」豹哥無法理解。

「你地都見過直升機？」林伯問。

「我地之前見過一隻直升機，我地嗌曬救命求救，但機上嘅無視左我地。」施政傑話。

「喺我老婆同個女未俾喪屍咬之前，我地都見過一次，我地仲用埋國際求救信號，但嗰啲直升機都係無理我地。」林伯飲一啖啤酒。

「照咁睇，佢地可能真係無諗住要救人。」張火石話。

「擺明啦屌！仆街，等我過到海，我肯定帶埋班喪屍，咬死嗰班見死不救嘅死差佬。」Simon咬牙切齒，非常憤怒。

「砰！」兩隻喪屍又撞開衣櫃度門行出嚟。

「林伯，佢地又走出嚟啦，係咪又肚餓呀？」豹哥咬住一粒朱古力問。

「可能係。」

林伯又拎啲生豬肉餵佢地，但今次佢地食完嘢之後，仲係有啲「扭計」，不停咁扯條鐵鏈。

「洗唔洗我地幫手？」張火石問。

「唔洗，我仲有個方法令佢地靜落嚟。」

林伯將微波爐抬到兩隻喪屍面前，佢打開微波爐，較到最高溫，然後開著佢。

一開著左個微波爐，兩隻喪屍竟然無再發狂，亦無張牙舞爪同露出猙獰嘅表情。

佢地慢慢平靜落嚟，對住橙黃色嘅燈光發呆。

施政傑佢地睇到呆左，感到相當不可思議。

「點解佢地一見到微波爐，就變得咁…『乖』？」施政傑一時諗唔到形容詞嚟形容呢兩隻平靜嘅喪屍。

「我都唔知呀，次次我一用微波爐佢地變到好乖，可能佢地鐘意微波爐發出嘅電磁波，見到就開心唔扭計掛。」林伯話。

「都唔係無可能喎，我之前睇過啲喪屍片，入面話過啲喪屍感官系統同人類唔同，例如有啲戲嘅喪屍係會驚紫外光，所以怕曬太陽，有啲又會怕熱或者怕紅外線，話唔定佢地真係俾微波輻射吸引住。」施政傑結合睇過嘅喪屍片來分析。

「怕熱佢地就唔會，反而佢地好怕凍，我之前無加熱啲凍肉，直接俾佢地食，佢地食落去好抗拒同好似好痛苦咁。」林伯話。

「傑仔，你唔係執到包『草』？不如俾啲喪屍隊下，睇下有咩反應囉。」豹哥建議。

「唔得！你當我老婆同個女係咩呀？佢地就算變左喪屍都唔會掂呢啲嘢架。」林伯強烈反對。

「哈哈，講下笑啫。」

「仲有你呀，做咩係咁望住我個女個胸呀？」林伯指住Simon問。

「有咩？無呀。」Simon「詐詐帝」轉移視線。

「算啦，時間都唔早啦，你地如果想沖涼嘅話，我就帶你地上樓上。」

「好呀！」

林伯帶左四人上樓。

Live

推

Push

林伯住緊嘅係一座舊式單位，仲係用緊嗰種舊款要換電芯嘅煤氣熱水爐，因此就算停左電，都仲會有熱水用。

另外，佢依家多數喺樓下鋪頭照顧變左喪屍嘅老婆同女兒，好少返上樓，所以就無擺後備電箱喺度。

喺無燈無電嘅情況下，林伯就點著幾支蠟燭嚟照明。

「呢度有啲毛巾同埋衫褲鞋襪，你地鐘意就拎去著。」

林伯拎啲舊衫褲出嚟，俾四人沖完涼之後更換：「仲有，廁所有洗衣粉，如果你地要洗衫就自己拎黎用，要訓覺你地可以訓廳，或者訓我個女同我間房都得。」

「咁你呢？你訓邊呀？」施政傑問。

「我落返舖頭陪老婆同個女，你地自便啦。」

講完，林伯就落返樓下。

林伯好好人，又俾地方佢地沖涼，又讓間屋俾佢地訓，但四人心入面仲係有啲唔放心，擔心林伯趁佢地訓教嗰陣露出狐狸尾巴，會走上嚟捉佢地落去餵喪屍。

於是乎，臨訓前佢地做左一個決定，就係要輪流搵人起身喺度睇水。

不過講就係咁講，但執行嗰陣又係另一回事。

佢地呢幾日無覺好訓，無論精神上還是肉體上，都十分疲倦，佢地一攤落床就即刻訓到豬咁，原本第一個負責把守嘅Simon都一下子恰著左，之後成晚都無人起過身睇水。

而到左第二日天光，佢地都仲係完好無缺咁喺張床度訓覺，並無好似Simon講嘅，俾林伯捉去餵喪屍。

事實就係林伯單純只係一個好人，從來無諗過要害佢地，係佢地諗多左。

第二朝起身林伯仲煮埋早餐俾佢地食。

四人就咁一覺訓到自然醒，刷完牙跟住就行返落舖頭。

「你地起身啦？檯面有早餐呀，我見橫掂都煮開就煮埋你地個份，係火腿通粉嚟，唔知啱唔啱你地胃口。」

「有通粉？正喎。」豹哥垂涎三尺。

「係呀，應該仲係熱辣辣架，趁熱食啦。」

四人坐到飯檯，一齊享用早餐，至於林伯一大早就喺度「照料」兩隻喪屍。

佢一邊開著微波爐，一邊幫兩隻喪屍抹身。

「林伯，你做咩幫兩隻喪屍抹身呀？」豹哥咀嚼口中嘅火腿同通粉。，食得好滋味。

「諗住清潔下佢地身上啲血跡，等佢地望落去乾淨啲咁囉。」

「不過林伯，你諗住以後都係咁同佢地住埋一齊？」施政傑問。

林伯點點頭：「當然啦，佢地係我至親嘅人，無論佢地係咪喪屍，我都一定會照顧佢地一生一世。」

「但係啲喪屍係唔會老架喎，你好難照顧到佢地一生一世，除非你都不老不死啦。」Simon直話直說。

「哈哈，咁當我老到真係照顧唔到佢地嗰陣，咪俾佢地咬一啖，陪佢地一齊做喪屍囉。」

見到林伯同喪屍抹身，又同佢地傾計，施政傑喺度諗，或者喪屍同人類都可以一齊共存。

兩隻喪屍間唔中會用低沉嘅聲線，發出一啲含糊嘅聲音，仿佛喺度回應緊林伯嘅說話，場面睇落都幾有趣。

食完早餐，張火石就拎佢同妹妹嘅合照出嚟，問林伯：「請問你有見過呢個女仔？」

林伯搖搖頭回答：「無呀，呢個女仔係你嘅…?」

「佢係我個妹，我依家搵緊佢，但又唔知佢依家喺邊，唔知佢究竟喺九龍定係喺港島。」

「呢個我可能幫唔到你，不過我知有唔少人匿埋喺附近啲商場或者超市，你不妨去呢啲地方搵下，可能會搵到都未定。」

「好，多謝你。」

「係啦，如果你地想喺呢度留耐啲，我ok架，反正呢度食物都算充足，夠我地咁多個人食兩個禮拜都得。」林伯同施政傑佢地講。

「咁唔係幾好嘅，我地無理由喺度白食白住。」施政傑話。

「而且我地都唔想一直留喺港島，我地想過海睇下，一嚟想知對面海究竟係咩情況，二嚟想幫火石搵佢個妹。」豹哥同林伯講。

「咁好啦，我都唔會強逼你地留低，你地想幾時走隨你地。」

施政傑佢地四個，喺林伯嘅傢私鋪住多兩日，然後又重新起程。

多謝樓上推po

仲以為林伯會係啲早餐落毒

推

故事得一組壞人，其餘都是忠的

係

樓主返咩工呀 想知 個故好好睇

終於有文

推

垃圾office工

一日出一兩千字左右，可能更得比較慢