《監獄•喪屍•反擊戰》

只不過，陳sir同Wilson好快又企返起身，跟住佢地就連同其他喪屍，一窩蜂湧上去攻擊張火石。

豹哥、肥龍同瘦虎二話不說，立即衝上前幫拖。

Simon就驚到騰騰震，想匿返入去水飯房，但就俾施政傑阻止。

「Simon，你做咩呀？」施政傑拉住Simon

「匿入去水飯房囉。」

「傻架咩你，咁難得先出返嚟，仲想返入去？況且你喺入面匿到一時，都匿唔到一世啦…」

「小心！」張火石衝過嚟擋開Simon同施政傑，然後一下低掃踢，掃低面前嘅喪屍。

施政傑佢地啱先掛住傾計，連有喪屍埋身都唔知，如果唔係張火石及時出現，佢兩個可能已經俾喪屍咬左。

「接住！」張火石將喺地下執到嘅伸縮棍拋俾施政傑同Simon，然後又繼續搏鬥。

佢使出各種泰拳招式對付喪屍，例如係批肘、膝撞同掃腿，幾乎每下都命中目標。

施政傑吸一啖大氣，揸住碌棍，衝上去同大家一齊打喪屍。

佢唔理三七二一，一見到喪屍就攞住碌棍毆落去，但毆左幾棍之後，佢發現隻喪屍好似一啲事都無，佢見唔對路，立即調頭走。

而事實係除左張火石之外，其他人都陷入左苦戰，就連豹哥佢地幾個都招架唔住。

「大佬，唔掂喎，班喪屍真係好難搞，好似打極都傷唔到佢地咁。」瘦虎講左一句嘢，搞到自己分左少少心，差啲俾隻喪屍Wilson打中。

喪屍Wilson「砰」一聲一拳打爆佢身後牆上嘅火警鐘。

「鈴鈴鈴！！！鈴鈴鈴！！！鈴鈴鈴——」監獄裡隨即響起火警鐘聲。

另一邊廂嘅肥龍啱先唔小心俾一隻喪屍抓到，同對方糾纏角力左一陣，好唔容易先走得甩：「頂，班友唔知食左咩，好鬼大力，我咁肥咁大份，班嘢竟然一手就推得開我，再係咁真係唔係辦法，我地都係快啲三十六計走為上計吧啦！」

「我都係咁話，我真係估唔到班喪屍咁好打。」豹哥一鎚「窩」落去喪屍陳sir個肚度，但對方不痛不癢，佢快速再補多腳踢佢入水飯房，跟手閂埋門困住佢。

佢用力頂住度門，但度門好快俾對方一下輕易咁推開左。好彩佢退後得快，如果唔係實俾喪屍陳sir抓到。

通常喪屍都有三個特點，第一係鐘意咬人，第二力量好大，第三就係打極都打唔死。

張火石試過幾次將班喪屍打到一仆一碌，但隔一陣之後，班喪屍又企得返起身，完全係打不死。

呢班喪屍有齊呢三項特點，某程度算係一班稱職嘅喪屍。

「講左話唔夠班喪屍打架啦，你以為你豹哥做過黑社會，啲喪屍就怕你呀？」Simon知道自己唔夠打，所以左匿右匿，匿完喺張火石後面，又匿去豹哥後面。

「俾我後生多二十年，我肯定夠抽。」豹哥同Simon講。

Simon急急腳又走去匿喺張火石背後，唔得閒應豹哥。

「咁我地依家點算？」施政傑一邊問一邊閃避喪屍。

「梗係走人啦！」Simon話。

「但班喪屍擋住曬條路，點走呀？」施政傑繼續閃避。

呢個時候，張火石再次挺身而出：「我嚟開路，你地跟上！」

佢左一個肘頭，右一腳飛踢，再不停用掃腿，將班喪屍逐一「慣」低。

張火石真係不愧為泰拳冠軍，佢身手靈敏，每一拳每一腳都勁道十足，直頭就係Tony Jaa上身，戰力爆燈。

Tony Jaa打喪屍，就咁聽都知有幾猛啦。

喺短短幾分鐘之內，張火石幾乎憑一己之力，掃低十幾隻喪屍。

但正如頭先所講，班喪屍好似打不死咁，就算俾人打低左，但好快又會起返身。

因此佢地六人趁班喪屍仲未嚟得起返身，拿拿臨搏曬老命咁向前跑，最後幾經辛苦成功逃出水飯房。

「......幾經辛苦，終於* 成功逃出水飯房。」

期待

好睇樓主加油出多啲

好睇好睇

佢地一直向前跑，轉角之後沿樓梯直落，一直跑到去飯堂。

只但係，飯堂嘅情況同樣慘烈。

一大班喪屍佔據飯堂，並且到處咬人。

「救命呀！救命呀！」「你班怪物，快啲走開！唔好咬我！」「啊！好痛啊！救命！」

唔少囚犯躲避不及，不幸成為左喪屍嘅早餐。

當中有人俾咬完之後都變成左喪屍，亦有人啲手手腳腳同內臟俾班喪屍吞曬落肚，連頭都被咬甩埋。

施政傑佢地見到形勢不妙，立即調頭走，離開飯堂，而喪屍陳sir佢地仍然喺後面窮追不捨。

六人沿住走廊一直跑，沿路見到唔少相識嘅囚友俾喪屍擒住，但佢地都唔理得咁多，繼續向前跑。

而喺逃跑嘅過程中，六人唔小心分散左。

施政傑、豹哥同Simon就跑左去圖書館，其他三個人就落去左操場。

「唔得啦，唔得啦，我無氣啦。」Simon上氣唔接下氣，跑到成頭大汗，「呢度無喪屍，我地喺度抖下先啦。」

「我都係，我都無氣啦…」豹哥都喘曬氣。

施政傑望一望周圍，發現張火石佢地唔見左：「咦？其他人呢？」

「係wor，肥龍、瘦虎佢地呢？佢地去左邊？」

「仲理其他人，我地顧自己先啦。」Simon一邊喘氣一邊講。

「唔得，我唔可以丟低肥龍同瘦虎，我要去搵佢地。」

豹哥想行返出去搵佢兩個兄弟，但未行出到門口，喪屍陳sir同其他喪屍就撞開左度門，湧入嚟圖書館。

豹哥即刻調頭，然後同施政傑、Simon一齊匿左去最後一排書架後面。

「仆街啦！今次我地死硬啦屌！」

「冷靜啲，未死得住，唔洗騰曬雞咁嘅。」豹哥同Simon講。

「豹哥，咁依家我地點算呀？」施政傑問。

「最衰我地無『架撐』，如果有武器喺手，或者仲有得同佢地打下。」

「我有呀。」Simon同施政傑一齊拎出之前張火石俾佢地嘅伸縮棍。

「得支棍有鬼用咩，至少都要有把斧頭啦。」

「霎時間邊度嚟把斧頭呀？」Simon反問。

施政傑思考左一陣，然後話：「有呀，工場咪有囉，電鋸、錘仔、斧頭乜都有。」

「係喎。」

「係你個頭咩，搞掂依家班喪屍先講啦。」Simon話。

「踏踏—」喪屍陳sir同其他喪屍越行越近，佢地三個唔匿得幾耐。

豹哥突然喺度翻弄書架上嘅書。

「喂？你喺度搞咩科？」Simon問。

「我摷下有無聖經囉，睇下可唔可以鎮得住班喪屍。」

「乜喪屍驚聖經架咩？我記得好似得吸血鬼先驚渣喎。」施政傑話。

「咪係囉，聖經有鬼用咩，你不如搵本九陰真經，即刻學返幾招嚟打喪屍仲有用。」Simon同豹哥講。

「唔理咁多，依家咩方法都試下啦。」豹哥喺書架上層搵到一本厚厚嘅聖經。

同一時間，喪屍陳sir已經殺到埋身，豹哥即刻對本聖經出去，但喪屍陳sir一手就拍走本聖經，然後伸手想抓住對方。

施政傑同Simon即刻掹走豹哥，佢地繞過書架，從書架另一邊逃走。

佢地幾個一邊跑，一路推跌啲書架同書架上嘅書，盡量擋住條路，唔俾啲喪屍咁容易埋身。

喪屍雖然力量大，但行動力較遲緩。

佢地三個搏曬老命咁跑，成功跑到出圖書館之後，佢地喺一條走廊重遇返張火石、肥龍同瘦虎。

「大佬，你去左邊呀，擔心我地啦...」

「唔好講咁多，我地快啲去工場！」

於是六人就一齊跑到去工場。

嚟到工場，佢地馬上搵幾個木櫃嚟頂住度門，暫時唔俾班喪屍闖入嚟。

大力過一般人少少，又未去到變形俠醫既level

「頭先唔見左你地，差啲以為你地俾喪屍食左。」豹哥入到工場，喺平時自己個位度搵到一排朱古力。

佢分幾舊俾大家，等其他人都可以補充下能量。

「我地三個啱先去左操場，嗰度都俾喪屍佔據左，應該話依家成個監獄幾乎每個地方都有喪屍。」肥龍將一小塊朱古力放入口。

「我估出面至少有幾百隻喪屍。」瘦虎話。

「咁點算？呢幾個櫃頂唔到好耐，班喪屍遲早都會衝入嚟。」施政傑用衫袖抹走額頭嘅汗。

豹哥拎起一把斧頭：「既然無路可走，咁唯有衝出去同佢地死過啦。」

「咪玩啦，你都聽到啦，出面成幾百隻喪屍，點打得贏佢地？」Simon問。

「砰——！」

班喪屍不斷衝撞大門，中間條門罅越嚟越寬，有幾隻血淋淋嘅手已經伸左入嚟。

「點都係死架啦，不如博一博，至少死都死得轟烈啲！」豹哥講。

「我同意大佬講嘅，一於同班喪屍死過！」肥龍認同。

「係！同佢地死過！」瘦虎附和。

張火石拎起一把鎚仔，然後話：「如果我地走到出去，或者唔洗死。」

「出去？你講緊監獄出面？」豹哥問。

張火石點點頭回答：「無錯，如果走到出監獄外面，我地可能仲有一線生機。」。

「砰——!」

喪屍繼續衝擊大門，喪屍陳sir已經從門罅中攝左半個身位入嚟。

「憑我地幾個就可以逃出監獄？得唔得呀？」Simon問。

「都係嗰句，得唔得，呢層要試過先知。」張火石「fing一fing」手上嘅鎚仔。

「火石講得有道理，與其同班喪屍喺度困獸鬥，倒不如試下殺出條血路，睇下出唔出到去出面，出到去嘅話可能仲有一線生機。」

「好，我地一於殺出重圍，反正我地喺度踎左二十年，一早就想出去。」肥龍同瘦虎每人都揀左斧頭作武器。

「你地都快啲拎『架撐』，等班嘢衝入嚟，我地六個就一齊殺出去。」豹哥同施政傑、Simon講。

「唉頂，諗唔到我先三十歲，咁快就要英年早逝。」Simon攞起一把電鋸，佢感到十分絕望。

「放心啦，有我同火石喺度，唔會咁易俾你死嘅。」豹哥同Simon講。

「我信得過張火石呀，不過你就...難講啲囉...」

「雖然我都好驚死，但我都相信，只要我地齊心合力，絕對有可能逃出生天。」施政傑都揀左一把電鋸做武器，佢拉一拉開關，啟動電鋸。

「砰——！」

門後幾個木櫃全都被撞開，工場頓時變成「無掩雞籠」。

班喪屍開始湧入嚟，帶頭陣嘅喪屍正係人見人憎嘅光頭陳sir。

「郁手啦！」豹哥率先動手，佢舉高斧頭，向下一劈，第一下劈唔中，第二先斬中陳sir條頸，「你個死人光頭佬，恰我地恰得咁過癮？等我今日就斬死你個仆街！」

豹哥本來諗住一下就斬甩對方個頭，可惜結果唔成功不得止，把斧頭仲「kick」住喺條頸度。

「喂，把嘢『kick』住左，有無人嚟幫幫手？」

「豹哥，等我幫你！」施政傑拎住把電鋸，對準陳sir個頭，一嘢鋸落去佢個天靈蓋度。

「等我鋸爆你個光頭佬！」

「滋滋滋——」鋸齒快速旋動，電鋸慢慢陷左入去陳sir個頭入面，切口越鋸越深。

黑色嘅腦漿同零碎嘅血肉飛濺出嚟，噴到施政傑同豹哥成面都係。

豹哥抽出斧頭，而施政傑由上而下一鋸鋸到底，將陳sir整個人一分為二。

「平時打我打得咁爽，呢次仲鋸死你個仆街！」施政傑對住條屍再踢多幾腳，發洩心中對陳sir嘅積恨。

面對工場入面二十幾隻喪屍嘅圍攻，眾人使出渾身解數。唯獨係Simon揸住把電鋸都唔敢上，最後都係趴喺地下周圍「捐」嚟躲避喪屍。

好彩佢身形矮小，趴喺地下唔容易俾喪屍察覺，勉強都仲頂得下。

至於講到最打得嗰個，當然就係張火石。

佢繼續Tony Jaa上身，揸住鎚仔打爆啲喪屍，呢度講嘅「打爆」真係講緊物理上嘅打爆。

張火石驚人嘅臂力加上堅硬嘅鐵鎚，形成強勁嘅衝擊力，佢嘅每一鎚都打到啲喪屍爆漿。

喪屍Wilson就係俾佢一鎚打爆頭打死左。

依家佢地嘅目標係逃離赤柱監獄，而唔係打低全部喪屍，所以佢地就好似之前咁，靠張火石開路，一搵到機會，就即刻跑出去。

離開工場之後，六人搵路跑去監獄大門。

監獄每處走廊都佈滿血跡，濃烈嘅血腥味飄散四周。

一路上，佢地不斷遇見迎面而來嘅喪屍，張火石跑喺前面，狂「fing」手上嘅鎚仔，一見到喪屍就大力打落去，完全係毫不留手，而其他人就從旁協助，負責補刀。

六人就係咁邊打邊逃走，用盡力氣不斷衝、不停跑，幾經辛苦嚟到左赤柱監獄嘅大門口前。

驟眼一望，阻擋喺面前嘅約莫二十隻喪屍，只要打低埋佢地，咁六人就可以逃出生天。

佢地認得出當中有幾隻著住囚衫嘅喪屍，係一齊住喺九號倉嘅囚友。

「一、二、三……」

「豹哥，你喺度數咩？」施政傑同其他人一樣，全身都沾滿血水，而且滿頭大汗。

血嘅鐵腥味同汗臭味混合一齊所產出嘅氣味，真係又難聞又惡頂。

「數下有幾多隻喪屍囉，無數錯嘅話，應該有二十一隻。」

「呢個時候仲數數？後面仲有幾百隻過緊嚟，快啲打低前面班喪屍，拿拿臨衝出去啦。」Simon講得無錯，依家唔係點算喪屍嘅時候。

「大家集中攻擊佢地個頭，只要打爆佢地個頭，咁啲喪屍就會徹底死亡。」

喺啱先同喪屍搏鬥嘅過程中，張火石已經掌握到喪屍嘅要害。

「無錯，要打爆佢地個頭，好似打機咁，一下head shot，咁啲喪屍就會即刻收皮。」Simon執人口水尾。

「你條友仔，啱先一隻喪屍都無打過，仲喺度懶叻。」豹哥「潤」Simon。

「你知咩呀，我啱先喺度儲緊氣，陣間就『隊冧』返隻喪屍俾你睇。」

「哈，睇下點。」

「大佬，唔好講咁多啦，上啦！」肥龍舉起斧頭，衝入喪屍群。

佢同瘦虎重拾返當年周圍同人「開片」嘅快感，越打越興奮。

但畢竟佢兩個都四十歲，體力上唔似後生嗰陣咁好，肥龍一個唔留神就俾一隻喪屍同雙手抓住左條頸，而瘦虎就俾一隻喪屍撞低。

豹哥立即幫拖，佢先扶起瘦虎，跟住上前用斧頭劈斷抓住肥龍嗰隻喪屍個頭。

「多謝，大佬！」二人感謝豹哥幫手解圍。

另一邊廂，張火石繼續遇神殺神，遇喪屍殺喪屍，但唔知係咪體力下降嘅關係，佢嘅動作對比之前明顯無咁靈活，但都照樣打到班喪屍落花流水。

淨係佢一個，就差唔多就解決左十隻喪屍。

而施政傑就按張火石所講嘅，打橫抬高把電鋸，對準喪屍嘅頭鋸落去。

佢覺得呢刻嘅情景有啲似佢細個喺電話度玩Fruit Ninja，嗰陣佢用手指打橫一掃，就將遊戲入面嘅西瓜一分為二，家陣佢都舉起電鋸打橫一鋸，個喪屍個頭亦好似西瓜咁一分為二。

雖然把電鋸好使好用，但就一啲都唔輕，施政傑啱先拎住佢一路跑一路打，已經消耗左好多體力。

正當佢手腳發軟之際，一隻喪屍撲埋嚟，將佢成個人推跌。

嗰隻喪屍㩒佢落地下，作勢要咬佢。

施政傑俾人㩒住，所以發唔到力，隻喪屍mak大口，個頭越哄越埋，想一啖咬落去佢度。

就喺呢個危機關頭，有把電鋸突然從後劈落去喪屍個頭度。

隻喪屍成個頭一下子打直被劈成兩半，腦漿連帶血肉噴落一地。

而呢把電鋸嘅主人，正是最弱雞嘅Simon。

「Yes！終於砌低一隻！」Simon自鳴得意， 「睇到未呀豹哥，我一出手就搞掂一隻喪屍。」

Simon啱先匿埋一邊，捕左好耐先捕到一個機會出手。

「得啦，知你勁啦。」豹哥回應。

「大佬，小心！」

一隻喪屍想從背後襲擊豹哥，肥龍同瘦虎及時出手，用斧頭一人斬斷喪屍一隻手，豹哥及時轉身，批埋喪屍個頭落嚟埋齋。

六人齊心合力，終於解決曬二十一隻喪屍。

佢地筋疲力盡，推開大門，帶住疲倦嘅身軀踏出監獄門口。

出面嘅太陽好耀眼，藍天清澈，白雲悠然。

豹哥大大啖吸一口氣：「哇，出面啲空氣真係另舍清新。」

其他人同豹哥一樣，吸一啖大氣，佢地幾個真係點都諗唔到，自己竟然係以咁嘅形式出獄。

眾人百感交集，再仔細望一望外面嘅風景，有一種好唔真實嘅感覺。

從喪屍突然出現直到依家逃出監獄，短時間發生左咁多事，的確有啲令人唔敢相信呢一切都係真嘅。

「唔好掛住索空氣，快啲走兩步，陣間班喪屍又追出嚟架啦。」Simon不敢怠慢，好醒目咁閂返埋監獄大門，唔俾入面啲喪屍出嚟。

「話曬我地踎左二十年，出到嚟第一時間梗係chur多幾啖自由嘅空氣。」豹哥又吸一啖新鮮空氣。

「砰！砰！砰！」過左一陣，監獄裡面嘅喪屍衝擊鐵門。

「班喪屍又想湧出嚟啦，此地不宜久留，我地快啲行啦。」Simon帶頭前行，其他人緊隨其後。

要從赤柱監獄出返市區，就必須經過一條長長山路。

天氣十分炎熱，六人加快腳步，沿著山路行落去。

而呢一刻嘅佢地仲未知道，外面嘅世界已經起左翻天覆地嘅變化。

訓前一推

Lm

睇到Er..Er..笑左
Btw 有文未

多謝支持
一般夜晚先得閒出文

lm

Push

六人行左好一段路之後，都未見有喪屍嘅蹤影，只係沿路上見到唔少翻側嘅汽車，亦有見到好幾架車撞埋左一齊。

每部車都唔見到有司機同乘客，估計佢地都經已變左喪屍，又或者係俾喪屍吞左落肚。

六人啱先同喪屍搏鬥完，體力幾乎透支，加上天氣酷熱同無水無糧，佢地行到中途，都不得不停落嚟休息一下。

「啲喪屍好似無再追嚟，我地應該暫時安全啦。」施政傑不時望返轉頭睇。

「但係我地仲要行幾耐先出到市區，我家陣又攰又口渴，好辛苦呀。」豹哥攤喺路中間休息。

「頂，我都係，好頸渴呀。」Simon成件衫都濕曬，啲汗不停滴落嚟。

張火石就索性除左囚衫，匿喺樹蔭下抖涼。

施政傑就同肥龍、瘦虎兩個就去啲失事汽車上搵下有無水同食物，結果係一無所獲。

之後佢地休息左一陣，就繼續上路。

大約再行左一個半鐘，佢地行到接近山腳嘅一個路口，見到前面大約三百米方向，有一架van仔停靠喺路邊。

架小巴無翻側、無炒車，車上亦都無人，完好無缺咁停泊左喺度。

「你地見唔見到前面架van仔呀？部車無穿無爛，我地不如揸佢出市區囉，我真係攰到唔想行啦，你地點睇？」豹哥提議。

「我讚成，我都攰到行唔郁啦。」Simon彎低腰，按摩一下大髀。

「好，我都讚成。」張火石腳步浮浮，講講下差啲成個人企唔穩跌親。

施政傑立即埋去扶一扶佢：「你無野呀嘛？」

「無咩事，可能天氣太熱，又太耐無飲水，有小小見暈啫。」張火石口唇乾裂。

之前佢出盡力同喪屍搏鬥，消耗左大量體力，出到嚟之後又無水同食物作補給，所以依家出現有小小虛脫嘅情況。

「大佬，你地快啲睇下！」肥龍同瘦虎突然一齊指住前面。

施政傑佢地望向山路下面，見到密麻麻一片，目測至少有一百隻喪屍聯群結隊行緊上山。

「唔係掛？出到嚟都仲見到喪屍？」Simon驚到面都青埋。

「咁我地依家點算呀？」施政傑拎起電鋸，神經繃緊。

「以我地依家嘅體力同裝備根本打唔贏咁多喪屍，我地最好就拿拿臨坐上架van仔，然後揸住佢衝落山，直出市區。」豹哥提議。

「第一次咁認同你講嘢，唔好等啦，快啲跑過去啦。」Simon加快腳步。

六人朝van仔位置行去，但突然間，有十幾隻喪屍從後襲擊佢地。

呢班喪屍係喺啱先佢地經過嘅路口度衝出嚟。佢地一時疏於防範，就俾啲喪屍有機可乘。

疲倦不堪嘅佢地逼於無奈再次同喪屍展開搏鬥。

施政傑舉起電鋸，想重施故技鋸爆喪屍嘅頭，但唔知係咪因為無電，把電鋸轉轉下突然停左落嚟，之後佢點撻都撻唔返著。

一隻女喪屍撲埋嚟，單手抓住佢個膊頭唔俾佢走，而喺佢隔離嘅豹哥埋嚟幫手，佢用斧頭一下斬斷女喪屍隻手，再一腳踢開對方。

「傑仔，你無事呀嘛？」

「無事。」

「不如你同Simon去撻著部車先，呢度我地搞掂。」豹哥話。

「好！」

豹哥、肥龍同瘦虎咬實牙關，揮動手上斧頭嚟對付喪屍。

至於六人中最好打嘅張火石亦因為體力透支而陷入苦戰。

佢俾三隻喪屍圍住，情況十分不妙，不過作為一個拳擊手，佢知道無論自己處於點樣嘅劣勢，只要唔氣餒，憑住堅毅嘅意志力一定可以反敗為勝。

佢大嗌一聲，幫自己振奮士氣，隨即就揮動鐵鎚，瞄準喪屍個頭一下打落去。

喪屍頭顱爆裂，身軀倒地。

同一時候，施政傑同Simon已經上到小巴，並撻著左架車，佢地慶幸車匙無俾人攞走。

而前面百幾隻喪屍逐漸逼近，依家距離小巴不足五十米。

施政傑探出車門大嗌：「前面啲喪屍就嚟殺到啦！你地快啲上車啦！」

張火石花光最後嘅力氣，一鎚打死眼前嘅最後一隻喪屍，跟住馬上轉身逃跑，最後成功上到車。

但係，豹哥佢地三個就俾七八隻喪屍包圍住，想走但一直都走唔到。

「大佬，你快上車啦！呢度我同肥龍頂住！」瘦虎力有不逮，不停揮動斧頭但都劈唔中啲喪屍。

「係呀，大佬，你快上車啦，前面仲有百幾隻喪屍嚟緊，你唔再走就嚟唔切架啦。」

「唔得，要走嘅話就一齊走！」豹哥再斬斷一隻喪屍嘅手臂。

「豹哥，肥龍，瘦虎！快啲上車！班喪屍真係殺到嚟啦！」施政傑繼續大嗌。

過百隻喪屍已經逼近在眼前。

肥龍同瘦虎見豹哥唔肯走，於是一齊用力將對方推開到幾米後，然後二人轉身向後向山上跑。

嗰七、八隻喪屍就跟埋佢地一齊上山。

「大佬，你快上車！我地嚟幫你引開呢幾隻喪屍。」肥龍一邊跑上山一邊講。

「唔好望啦，快啲跑上車，我地唔會有事架，你放心啦！」瘦虎揮手示意叫豹哥快啲走。

見到二人漸行漸遠嘅背影，豹哥好想衝埋上山，但同時聽到百幾隻喪屍一齊行緊上嚟嘅腳步聲，佢又好驚。

「大佬，你地走先，等搞掂埋呢班喪屍，我地再落山會合你地。」肥龍越跑越遠。

「你放心啦，我地唔會咁容易死架！」瘦虎帶住肥龍轉入路口。

豹哥猶豫左一陣，最後佢選擇跑上小巴。

佢咁做唔係無義氣，而係佢對佢兩個兄弟有信心，佢相信二人一定會平安返落山。

「肥龍同瘦虎呢？」施政傑問。

豹哥一邊喘氣一邊答：「佢地為左俾我甩身，兩條友跑返山上引開喪屍。」

「咁洗唔洗返去救佢地？」張火石問。

「砰！」前面已經有喪屍喺度拍打車頭，嗰百幾隻喪屍慢慢開始圍過嚟。

「嚟唔切啦，快啲開車！」

「大家坐穩啦！」

坐喺司機位嘅Simon踩盡油門。小巴急速向前衝，好似一支箭咁衝落山。

嗰啲擋路嘅喪屍就好似保齡球樽咁統統被撞開。

車入面嘅車速顯示器由80一路狂飆上110。

Simon見到前面有彎位，想減速入彎，但佢踩極個brake都無反應：「大獲！個brake好似壞左，踩極無反應！」

「你踩大力啲再試下。」豹哥同Simon講。

「唔得呀！」Simon再踩多幾次但都無反應，「轉彎啦，你地快啲扶穩同綁好安全帶。」

小巴高速入彎，差啲就失控炒車。

車速慢慢由110升到120，Simon揸住架車一路狂奔。

出到市區之後，架車仲喺收唔到制，周圍咁左穿右插。

最後成架車鏟埋赤柱廣場入面，撞到入面一幅主力墻後架車先停低。

本來咁撞法，架車肯定散，但咁啱墻嘅前面擺左一個好高嘅氣墊公仔，架車撞爆個公仔，卸左啲衝擊力，最後只係撼爛左個車頭。

而車入面嘅四個人雖然無飛出車，但都無可避免咁撼親個頭，全部人就咁暫時暈左過去。

加油啊推

推呀