bedGeroge
2020-02-13 00:00:08
嗰個猛咁嗌肚痛嘅人就係Simon。
由於佢實在唔想再喺水飯房踎落去,所以就詐肚痛,睇下可唔可以「博大霧」去醫療室。
不過陳sir一眼就睇穿Simon喺度扮嘢:「點撚樣呀你?我依家心情好撚差,你唔好同我玩嘢!」
「唔係呀,我個肚真係好痛,我估有可能係食物中毒。」Simon雙手掩肚,扮到好辛苦咁樣。
「屌!唔好同我嚟套,你最好合埋把口,乖乖地喺入面踎,如果再詐肚痛,我就打柒你!」陳sir「砰」一聲用棍敲落Simon面前嘅鐵欄。
Simon見對方唔落搭,所以費事都再扮落去:「Um...突然間好似又無咁痛...我諗我應該唔洗去醫療室。」
「無問題就啱啦,咁其他人呢,有無人仲有問題,如果無就同我安分守己,唔好喺度搞埋曬啲小動作,understand?」
「喂,咁你個死光頭佬諗住幾時放我同我地大佬出去呀?」肥龍用不禮貌嘅語氣問陳sir,瘦虎跟住講:「仆街,困左我地成日,快撚啲放返我地出去!」
「屌你老母,幾時輪到你兩條蛋散教我做野?」
「你話邊個蛋散呀?依家無名俾你叫呀?平時喺監獄就『也文也武』,出到去你咪又係一條俾人睇唔起嘅死蛋散,你估你真係《監獄風雲》張耀揚呀?」瘦虎反擊。
「咪就係,你有乜資格話我地呀,死蛋散!」肥龍和應。
本來陳sir心情已經好差,再俾人激一激,成個人當堂嬲到出煙。
「仆你老母臭街!話撚左我今日心情好撚差,你兩條蛋散仲夠膽惹我?屌你老母!」
陳sir怒火中燒,命令手下:「你地幾個即刻同我捉呢兩條友出嚟!」
「Yes,sir!」在場四個懲教署職員聽從指示,捉左肥龍同瘦虎出嚟,並合力將二人壓埋去走廊嘅墻邊上。
肥龍同瘦虎手手腳腳都俾人鉗制住,動彈不得。
「屌你老母,你敢郁佢地,我實唔會放過你!」豹哥動怒。
「你收嗲!陣間就到你!」
「屌你老母,快啲放開佢地兩個!」
陳sir無理豹哥,行到肥龍面前:「死肥仔,啱先咁撚串下話,我就睇下你個頭硬定係我碌棍硬!」
肥龍瞪大眼,怒睥對方。
陳sir 舉高手上嘅碌棍,準備一下扑落肥龍個頭度,而就係呢個時候,在場一名職員好興奮咁話: 「喂,陳sir,快啲睇下,Wilson佢地返左嚟呀!」
陳sir擰轉頭睇一睇,見到Wilson慢慢行緊過嚟,喺佢隔離仲有五個嚟接更嘅同事。
見到Wilson終於出現,陳sir呢刻嘅心情豁然開朗,臉上難掩喜悅之色:「哇,Wilson你個死仔,終於捨得返黎啦咩!等左咁耐,我終於有得收工啦,哈哈!」
跟住佢收返支伸縮棍,同肥龍、瘦虎講:「算你地好彩,阿sir依家要返屋企訓教,我今日暫時放過你兩個仆街仔。」
「下?」肥龍、瘦虎無諗到陳sir竟然咁輕易就放過佢地。
陳sir主動行去迎接Wilson:「頂你,你條友死左去邊呀?點解依家先蒲頭?知唔知我等左好耐呀?」
Wilson無出聲,只係一邊向前行,一邊發出奇怪而低沉嘅喉音。
陳sir行近見到Wilson等人心口掛住張員工證,但仲未換上制服:「搞咩呀?原來你地仲未換衫?快啲去換衫啦,仲等咩呀?」
而當陳sir再行近嘅時候,佢留意到Wilson同佢另外五個同事個樣同平時好唔同。
佢地雙眼反白,皮膚潰爛帶血,且呈深灰色,而且雙手仲沾滿血跡。
但陳sir卻不以為然,一心淨係諗住收工:「你地幾個做咩化妝化到鬼五馬六?Halloween都未到,就喺度扮喪屍?快啲去換衫啦!」
Wilson仍然係問極唔應,陳sir喺Wilson個面前揚一揚手:「無反應嘅?啞左呀你?」
殊不知,Wilson低聲嚎叫一聲,猛然撲向陳sir。
「Wilson,你做咩呀?」陳sir喺毫無防備之下,被推跌落地。
Wilson好大力咁捉住陳sir隻手,並張開血盆大口,一啖咬左落去。
佢鋒利嘅牙就好似鋸齒一樣刺破陳sir手上嘅皮肉。
深紅色嘅鮮血從傷口中噴發出嚟,場景猶如屋企水龍頭爆左一樣,不過眼前湧出嚟嘅唔係水,而係鮮血。
「啊!!!!!」
陳sir發出痛不欲生嘅慘叫。
在場四個職員、肥龍、瘦虎以及仲困喺水飯房入面嘅四個囚犯見到咁嘅場面,全都嚇到呆左。
bedGeroge
2020-02-14 00:08:13
「救命呀!」陳sir竭力反抗。
在場四個職員放開肥龍同瘦虎,立刻衝上去救陳sir。
同Wilson同行嘅五個同事亦都發曬狂咁,撲向嗰四個職員同陳sir。
佢地張牙舞爪,見人就咬,完全失去常性。
混亂之際,一條水飯房鎖匙唔知從邊個職員身上跌左出嚟。
肥龍同瘦虎立刻執起條鎖匙,跟住行去打開另外四間水飯房嘅大門,逐一釋放其餘四人出嚟。
同一時間,Wilson等人如野獸一般向著陳sir佢地亂擒亂咬。
一開始陳sir佢地拼命反抗,雙方肢體碰撞產生劇烈嘅打鬥聲。
但好快打鬥聲慢慢變成悲鳴聲,再過多一分鐘,悲鳴聲都消失埋,剩返 「Jap Jap Jap」嘅咀嚼聲。
施政傑、Simon、張火石同豹哥一出到嚟,就聞到一陣濃烈嘅血腥味,跟住再望清楚眼前血淋淋嘅畫面,佢地差啲以為自己去左屠房。
呢刻嘅陳sir同四個職員全身血肉模糊,郁都唔郁攤左喺地下,佢地嘅髪膚、血漿同內臟四散一地。
呢五個人就咁活生生俾「人」咬死左,
Wilson拎起地下一塊新鮮熱辣嘅人肝,然後好似食菠蘿包咁一啖咬落去。
施政傑同Simon見到咁嘅場景,忍唔住反胃作嘔。
「我有無眼花?班人係咪咬死左陳sir,仲食緊佢個肝?」施政傑邊嘔邊講。
「你無眼花,班友真係生食緊陳sir佢地嘅內臟,我估班人可能係high嘢high大左。」瘦虎同施政傑講。
「唔係下嘛,人都咬死埋喎,點會淨係high大左咁簡單,我睇落覺得佢地似怪物多啲,大佬,你點睇?」肥龍問豹哥。
「會唔會係殭屍呀?」豹哥反問。
「但係殭屍唔係應該舉直雙手,彈下彈下架咩?」肥龍一邊講,一邊模仿殭屍行路嘅動作。
「又係喎,殭屍應該係彈下彈下架喎。」
「點會係殭屍,一睇就知係喪屍啦!」Simon嘔到無嘢好嘔,佢將琴晚嘅水飯全部都嘔曬出嚟咁滯。
「喪屍?!」豹哥、肥龍同瘦虎異口同聲。
就喺呢個時候,啱先斷左氣嘅陳sir同嗰四個職員竟然「原地復活」。
佢地嘅手腳被咬到爛曬,而且心肝脾肺腎差唔多都被挖曬出嚟,但居然咁都仲企得返起身。
「嚟料啦嚟料啦,個死人光頭佬俾喪屍咬完,依家都變埋喪屍啦!」Simon一臉驚慌。
其他人都睇到呆左一呆,施政傑直頭懷疑自己喺度發緊夢,唔敢相信眼前所見到嘅嘢。
「唔係掛?咁都死唔去?」豹哥話。
「豹哥,我諗Simon講得啱,呢班可能真係喪屍。」施政傑捽一捽眼,確認自己真係無眼花。
陳sir、Wilson同佢地嘅「喪屍」伙記伸出血淋淋嘅手,一步一步向住施政傑等人逼近。
「仆街,佢地行緊過嚟,我地快啲走啦!」Simon十分驚青。
「走去邊?後面係掘頭路嚟。」施政傑往身後一望,發現後面無路可走。
水飯房嘅唯一出口就喺佢地正前方,問題只係前面有十幾喪屍擋住條路。
「咁點算呀?班喪屍就殺到嚟啦,呢度仲有無其他出口?我仲咁後生,我唔想咁快死住呀。」Simon驚到騰騰震。
「呢度好似得一個出口。」施政傑環顧四周。
「有乜點算,打低曬佢地咁咪出到去囉。」豹哥同Simon講。
「係喪屍喎,唔係壽司喎,你點夠佢地打呀?」Simon問。
「夠唔夠打,呢層要打過先知。」平時比較沉默嘅張火石呢個時候出聲。
佢從身上嘅囚衣撕出兩塊布,將布條當作係繃帶,用嚟包實拳頭。
「哈哈,火石就講得啱啦。夠唔夠打,真係要打過先知。」豹哥讚同。
張火石身先士卒,大步踏上前。
陳sir同Wilson見到有獵物主動送上門,第一時間就撲埋去。
張火石迅速躲開,然後一個轉身飛踢,凌空踢開Wilson,跟住再跳起飛膝撞低陳sir。
只係幾下動作,張火石就打到兩隻喪屍趴街。
「哇~犀利啊~」其餘五人一齊發出讚歎。