《監獄•喪屍•反擊戰》

484 回覆
44 Like 2 Dislike
2020-03-04 08:36:37
個藍牙可以植入
2020-03-04 10:03:51
2020-03-04 10:28:35
有時啲嘢就係咁化學
2020-03-04 23:42:07
today無文,訓前推一推
2020-03-05 00:10:48
2020-03-05 00:35:56
睇咁多喪屍故第一次見,呢個諗頭幾好
樓主加油
2020-03-05 09:25:26
多謝支持
2020-03-06 00:43:04
Simon從褲袋中拎部iphone出嚟,原來啱先部電話一直開住控制遙控車嘅聲控app。

佢心諗唔通佢控制緊隻喪屍?

「企起身。」Simon對住電話講。

喪屍仔聽從指示,真係企返起身。

「退後兩步,轉一個圈嚟睇下。」

喪屍後退兩步,轉一個圈,Simon講啲乜佢都照做。

「喂,你地見唔見到呀?我叫隻喪屍做乜,佢就做乜呀!」

Simon叫喪屍仔再轉多圈,結果喪屍仔真係又轉多個圈。

施政傑等人同Eric、Monica佢地都感到十分不可思議,一齊慢慢圍埋去,睇真啲咩事。

Simon開始嘗試叫喪屍仔做各種動作,例如舉手、點頭、拍手等等。

無論係咩動作,喪屍仔都一一照做,眾人都覺得十分神奇。

「你落左降頭呀?點解隻喪屍咁聽你話嘅?」豹哥仔細打量一下喪屍仔,睇下有咩唔妥。

「啱先隻嘢吞左架遙控車嘅接收器,跟住就變成咁啦,可能佢吸收左個接收器,家陣變成左『智能喪屍』。」Simon話。

「好神奇呀!可唔可以試下叫佢做其他動作呀?」Monica俾眼前呢隻聽教聽話嘅喪屍吸引住。

「係囉,你叫佢打個側手翻睇下。」豹哥提議。

「好呀。」Simon對住電話發出指令,「喪屍,打個側手翻嚟睇下。」

喪屍仔雙手撐地,向前一翻,成功完成一個側手翻。

「哇!好犀利呀!」Monica拍手叫好。

「Monica不如你試下玩下,好過癮架。」Simon遞部電話俾Monica。

「好呀!」Monica開心接過電話。

之後,佢地一大班人輪流試下「操控」呢隻喪屍。

啱先去廁所嘅肥龍、瘦虎返到嚟,見到成班人圍住曬喺度,走埋去八卦下。

「大佬,你地圍埋一齊搞咩呀?」肥龍行埋去一望,見到喪屍仔做緊一字馬,嚇左一跳。

「哇!喪屍嚟架喎,你地仲等咩?仲唔打死佢?」瘦虎同樣地嚇左一跳。

「唔係呀,呢隻喪屍好似中左降頭咁,我地叫佢做乜就做乜,好鬼過癮架!等我示範俾你睇下啦!」

豹哥從隔離施政傑手中拎過電話,然後對住屏幕話:「轉兩個圈,然後彎腰向前行兩步,跟住返轉頭青蛙跳五下。」

雖然指令聽上去有啲複雜,但喪屍都好準確咁完成以上動作。

「哇,我唔係眼花下話,隻喪屍咁聽話嘅?」肥龍捽一捽眼,確認自己無睇錯。

「你地兩個都試下玩一玩。」豹哥將電話交俾瘦虎,「你地諗下仲有咩可以俾佢做。」

「係咪呀?隻喪屍真係咁勁?真係可以跟足指示?」瘦虎有啲質疑,於是佢拎起手機話:「喪屍仔,請你原地跳三千下。」

「跳三千下?會唔會攰死佢架?」柔柔問。

「哈哈,無咁易死掛,話曬都係喪屍喎。」施政傑笑住話。

「試下咪知囉。」瘦虎開始計住喪屍跳嘅次數。

「如果真係跳到三千下,咁就證明隻嘢真係100%跟足指示。」Simon都細細聲數緊,「三下...四下...五下.......」

喪屍仔按自己節奏原地跳動,跳一下停一停,再向上跳。

一開始大家都圍埋一齊數,但其實時候都唔早,都差唔多係凌晨十二點,大家開始見攰要訓教。

為左唔俾外面嘅喪屍,趁佢地訓教嘅時候偷襲,夜晚佢地會搵人輪流看守門口。

肥龍、瘦虎話唔係好眼訓,所以輪第一更,而其他人就入鋪頭訓教先。

施政傑、豹哥、Simon同張火石去商場嘅補習社度訓,柔柔、Monica同幾個學生妹就喺美容店訓,至於Eric同嗰幾個男仔就訓其他鋪頭。

肥龍、瘦虎先暫停一下喪屍仔,跟手帶埋喪屍仔上樓上,暫停嘅方法簡單直接,就係講一聲「停」就得啦。

佢地兩個一邊睇住門口出面,一邊數喪屍仔跳左幾多下,而下一更嘅人都係咁,橫掂佢地看住門口都好無聊,不如數下數等時間容易過啲。

除左嗰對老夫婦,其他人都要輪班,每隔一個鐘就會換人。

凌晨三點鐘,柔柔同Monica輪完班,本來應該到施政傑同Simon,但Simon訓到死豬咁,叫極唔醒。

好彩柔柔抵得諗,肯捱義氣頂多更。

皎潔嘅月光穿過玻璃門,映照在商場地板上。

傍住隔離默默原地跳嘅喪屍仔,施政傑同柔柔一齊坐喺玻璃大門前,睇住外面嘅情況。
2020-03-06 11:38:30
有文推
2020-03-06 23:13:51
輕輕再推
2020-03-07 01:20:26
「八百三十一…八百三十二…八百三十三…」施政傑靜靜雞仲喺度數緊喪屍仔跳嘅次數。

柔柔打一個喊露,然後話:「唔係呀嘛,你仲喺度數呀?」

「反正又無嘢做,出面又水靜鵝飛咁,咪數下數解下悶囉。我見你打曬喊露咁,如果眼訓就去訓啦,我落去摷返醒Simon條友。」

「唔洗啦,我頂得順呀。係啦,你個褲袋漲起一大舊,你袋左啲咩喺度呀?」柔柔指一指施政傑右手邊褲袋。

施政傑從褲袋攞出一袋大麻,嗰陣喺hip hop友身上跌出嚟,佢執左之後就袋到依家。

「呢袋咩嚟架?」柔柔問。

「大麻。」

「睇唔出喎,咪你原來好呢味野架?係咪就係因為咁,所以俾人拉去坐監?」

「係呀,但其實我都唔係咁好呢味野,我一開始食都只係因為想追返之前嘅女朋友。」

「有故仔聽喎?講多啲嚟聽下。」

「我之前有個女朋友,我地一齊左三年,感情一直都幾好,不過後來俾一條hip hop友撬左我墻腳,嗰條友又窮又樣衰,日日無所事事,淨係識隊大麻,俾條咁嘅『騎呢蘇』搶走左女朋友,我當然好唔甘心,於是我選擇改變自己,學條hip hop友咁,扮下rapper隊下大麻,自以為咁樣就能令我嘅前女友回心轉意,結果唔成功不得止,仲好黑仔咁喺買大麻嗰陣遇著警察踢竇,最後俾人告藏毒,仲入左去赤柱踎,亦都係因為咁,就喺入面識左你大佬。」

「哈哈,咁你幾憨居喎,以為變成另一個人就可以追返你女朋友。」

「係,依家諗返都覺得自己傻仔。」

「咁食大麻個感覺係點架?」柔柔好奇地問。

「食完之後有一種好飄嘅感覺,個腦不停喺度轉,但成個人嘅反應變得好慢,我都唔識點形容,你想唔想試下?」

柔柔有點猶豫。

施政傑打開個透明膠袋,拎張捲煙紙出嚟,倒小小大麻喺上面,再卷埋一齊,用打火機點著支嘢,吸左一啖。

「要唔要試一啖,睇下咩感覺?」施政傑遞支大麻俾柔柔。

「好,試咪試。」柔柔就拎支大麻上手,細細啖吸左一啖。

「點呀?有咩感覺呀?」

「無咩感覺,俾返你,咳咳—」柔柔遞返支大麻俾施政傑。

施政傑拎上手吸一啖,呼出煙圈,同時間望住街外零星喪屍喺度無目的咁游來蕩去,突然感到一點惆悵:「柔柔,你話我地仲有咩方法過到海?會唔會成世都要困喺港島出唔返去?」

「你識唔識游水呀?如果游水叻嘅話,可以試下游過對面海,而我自問就游唔到過去啦。」

「我游水都好屎,我驚未到岸就浸死。」

「哈哈,最衰細個無好好學游水,依家真係後悔都嚟唔切。」

「哈哈,係呀。」

「但係講開又講,其實我最唔明嘅係,點解隧道啲出入口都俾人炸爛曬?」

「聽人講話三條隧道其實係警察炸嘅,我估應該係政府唔想俾啲喪屍過九龍,所以封曬所有出口。」

「唔俾啲喪屍過九龍?咁即係話,九龍新界都無喪屍,得港島有?所以就唔俾喪屍過海?」

「有呢個可能。」

「我諗諗下,我記得嗰日啲地鐵全部故障,可能就係因為呢個原因,所以啲喪屍無經地鐵傳去對面海。」柔柔托頭回想。

「呢個我就唔知啦,我淨係知我地一日過唔到海,一日就要喺呢個充滿喪屍嘅香港島生活落去。」

「雖然港島周圍都係喪屍,不過你又諗下,如果唔係有喪屍出現,你同我阿哥可能仲喺監獄踎緊,仲受緊牢獄之苦。」柔柔同施政傑講。

「哈哈哈!你好似又講得無錯喎,咁我咪要多謝喪屍嘅出現?」諗起牢獄之苦,施政傑第一時間就諗起嗰段幾乎日日俾懲教主任陳sir虐待嘅日子。

家下雖然有喪屍但就無左光頭佬陳sir,兼且回復自由身,計落似乎都有賺添。

「梗係啦,哈哈!」

二人傾得幾投契,傾傾下就到四點,都係時候叫人嚟接更,

「四點啦,我地落去叫你阿哥同豹哥落嚟輪更啦。」施政傑整熄左支大麻,佢啱先只係吸左兩啖咁大把。

「好呀,我地一齊落去呀。」

「弊啦,我好似唔記得數隻喪屍跳到幾多下。」

「由佢啦。」

喪屍仔仍然喺度原地跳緊,施政傑睇一睇,發覺佢嘅動作好似變得遲鈍左:「咦?你覺唔覺隻喪屍,好似跳得慢左咁呀?」

「慢左?」柔柔打一個喊露,佢又攰又眼訓。

「頭先佢跳一下,停一停跟住就跳第二下,佢依家好似停得耐過之前,動作都無咁靈活咁。」

「係咪你啱先吸左兩啖大麻,睇嘢睇得慢左渣?」

「可能啦,又或者眼訓得滯睇錯左。」

「唔好望啦,快落去啦。」柔柔忍唔住又打喊露。

佢兩個叫醒張火石同豹哥後,就各自返去訓教。

到左第二日,大家訓完一覺,又開展新嘅一日。

琴晚臨訓前,瘦虎同肥龍喺運動用品店搵左個跳繩計步器,並將佢放喺喪屍仔嘅身上。

佢地朝早拎嚟睇下,發現喪屍仔真係跳左三千下,佢地無諗到喪屍仔會跟足指令。

Simon對此亦感到十分興奮,因為佢發現自己寫嘅聲控app不單只可以操控遙控車,依家仲能夠操控埋喪屍。

佢一大早繼續嘗試對喪屍發出唔同指令,睇下仲開發到啲動作出嚟。

然而平時柔柔、Monica同Eric食完早餐,就會一齊揸車出去,搵下食物、日用品或者汽車電池等物品。

但今日Monica掛住同Simon撚喪屍,話想休息一日,Eric就留低做「電燈膽」,妨礙Simon,唔俾對方有機可乘搶走佢嘅Monica。

因此施政傑、張火石同豹哥就代替佢兩個,陪柔柔出去。
2020-03-07 01:20:53
多謝幫推
2020-03-08 19:12:55
陽光普照,大街馬路上有喪屍、有廢置嘅汽車、亦有路過嘅生還者,當中有幾個見到柔柔都會主動打招呼,好似樓下街坊相互問候咁。

一班被拋棄喺港島嘅生還者,各自摸索到自己一套生存方式,習慣左呢個充滿喪屍嘅環境後,慢慢搵到左一份後末日時代嘅閒適。

施政傑將校巴駛到油站,幫架車入完油,佢地就分成兩組去搵物資,豹哥同張火石一組,施政傑就跟柔柔。

柔柔喺車尾拎左兩對roller:「喂,你識唔識踩roller呀?」

「細個學過溜冰,唔知依家仲識唔識。」

「著上去試下,用溜冰鞋代步慳力好多架。」柔柔遞一對roller俾施政傑。

「好呀。」

施政傑同柔柔一齊著上roller,雖然好耐無踩,但佢嘅技術似乎都無生疏。

佢兩個一個拎住長鐵通,一個揸住電鋸,就咁踩住roller,喺大街小巷中穿梭,又小心翼翼咁喺喪屍間穿插。

「我地依家去邊呀?」

施政傑踩得比較快,佢擰轉頭問身後嘅柔柔,同時迎面吹來嘅微風吹起佢蓬鬆嘅劉海。

柔柔望一望手上嘅清單:「公公婆婆佢地就叫我去藥房拎啲止咳藥,三個𡃁妹就叫帶兩包煙同一個打火機,Monica就要一盒粉底同唇膏。既然係咁,我地不如去藥房先?」

「你做咩幫人做阿四?幫班友帶呢樣帶嗰樣?」

「哈哈,舉手之勞啫,橫掂我都鐘意出嚟逛下,咁咪順便幫手帶啲嘢囉。」

「咁我地咪又要去藥房又要去化妝店…」

「喂!你小心前面!」柔柔指住前面。

施政傑掛住講,無留意前面有一隻喪屍擋住前路,好彩佢反應都算快,即刻側身踎低閃過喪屍。

「哇!好彩你提一提我,如果唔係我就大獲啦。」施政傑拍拍心口,定一定驚

「哈,諗唔到你都閃得幾快,身手都幾好喎!」

「咪係拜以前監獄個光頭佬陳sir所賜,嗰條友郁啲就落棍打人,最鐘意突然間攻擊你,如果唔想俾佢打中就要識得避開,同埋要反應及時,我無意中可能就練成依家左閃右避嘅身手。」

「哈哈,咁你嗰幾個月監都算無白坐。」柔柔開玩笑咁講。

施政傑笑一笑話:「話可能無講錯,但有得揀,我真係寧願無入過去。」

「哈哈,我都係講下笑,唔好太上心。」

「我地唔好講咁多啦,快啲搵齊啲嘢返去啦。」

「係喎,掛住講,我都差啲唔記得有嘢做添,哈哈。」

一個鐘之後,二人搵齊要搵嘅嘢,行返去加油站。

路上佢地仲遇到林伯,對方帶變成喪屍嘅老婆同女兒出嚟曬太陽,仲俾左一袋芽菜佢兩個,話係佢天台種出嚟嘅。

至於豹哥同張火石佢地早就拎住幾袋食物喺度等。

等齊人跟住大家就開車返商場。

除左出去搵物資,佢地大部分時間都匿埋喺商場。無聊嘅時候撚下喪屍仔,有時又諗下有咩方法過海,再唔係就食下嘢hea下咁,間唔中都會有喪屍想闖入嚟,但都俾佢地一一引走曬。

如是者,施政傑佢地喺商場無驚無險咁生活左一個禮拜。

然而,喺佢地逐漸適應左呢種「安逸」生活嘅同時,佢地唔知道有一股危險勢力正慢慢逼近。

而呢股危險勢力唔係來自身邊嘅喪屍,而喺來自對面海。
2020-03-08 20:10:27
支持 輕輕一push
2020-03-09 00:30:44
呢日一大早,施政傑、柔柔、豹哥同張火石食完早餐,如常地出去外面逛一逛、搵下物資。

臨出去前,Simon拉埋施政傑到角落頭,拜託佢一啲事。

「有咩事呀?」施政傑問。

「傑仔,麻煩你幫我帶幾盒condom返嚟。」

「condom?你要嚟做咩呀?」

「咁都仲要問?要condom就梗係拎嚟扑嘢啦!呢排我同Monica感情大增,我諗我唔洗兩日應該就溝到佢上床,所以咪叫你幫手搵定幾盒避孕套返嚟傍下身囉。」

「哦,咁你要邊款呀?」

「最薄嗰隻,拎多幾隻味。不過唔怕老實講同你講,其實我都唔多鐘意戴套,但我又驚搞大佢個肚,你知啦,搞大左嘅話,好長手尾跟架嘛,所以都穩陣啲好,係咪咁話?」

「你講到好似就嚟得米咁,你快睇下嗰邊,你個Monica同Eric佢地玩到攬埋一舊,你驚唔驚俾人截胡呀?」施政傑指一指Simon後面。

Simon擰轉頭一望,睇見Eric佢地借玩「非洲話事啤」之名,喺度猛咁抽Monica水。

「我頂呀,嗰班仆街趁我行開一陣,就搞我個Monica。我唔同你講住啦,總之你記住幫我買condom,唔該曬!」講完,Simon走埋去加入Eric佢地,唔俾其他人有機可乘搶走佢嘅獵物。

施政傑行上校巴,坐上司機位,之後就開車出發。

「做咩咁遲嘅你?」坐喺隔離嘅座位柔柔問。

「無呀,Simon啱先拜託我,要我幫佢帶啲嘢啫。」

「帶咩呀?」柔柔追問。

「Er…呢個…都係一啲日用品咁囉。」施政傑唔好意思講condom呢個字講出口。

「你地發唔發現,條街呢兩日好似少左啲喪屍?」張火石望出窗,佢發現街上嘅喪屍數目比以前少左。

「覺呀!」豹哥都有同感,「呢兩日街上真係少左啲喪屍,而且之前喺街周不時都會見到其他生還者,但呢兩日都好似唔見曬咁。」

「講開又好似係喎,呢幾日又真係少左見其他人喺街出現。」柔柔回想一下。

「會唔會係附近啲喪屍同生還者遷移左去第二度渣?」施政傑猜測。

「都唔排除有呢個可能嘅,話唔定啲人同喪屍都走曬去第二度搵食。」豹哥同其他人都覺得施政傑猜測合理。

同往常一樣,施政傑駛到油站停低。

佢地一落到車,就見到地下有幾具喪屍,郁都唔郁咁攤左喺度,佢地身上全都結左一層薄薄嘅霜。

「哇,咩事呀?天氣咁熱,點解啲喪屍全部結曬冰,一隻二隻好似凍死曬咁款嘅?」豹哥行近去一望。

「豹哥,你行到咁埋,小心佢地突然彈起身咬你呀。」施政傑提醒。

「係喎,都係行返開啲先。」豹哥拿拿臨退後返到一米後。

「睇落真係結曬冰。」張火石仔細打量地下班喪屍。

「你地話,呢幾隻喪屍會唔會係唔小心入左去啲冷藏庫度,搞到自己凍死左?」柔柔問。

施政傑諗一諗,跟住話:「應該唔會,因為成個港島都無電,連冷氣都開唔到,啲冷藏庫更無可能運作到。」

「係喎,你又講得有道理,咁佢地點解會凍到結冰?」柔柔感到不解。

「咁就真係唔知啦...」施政傑亦無法理解。

「算啦,唔好理咁多,幾條『凍屍』都無乜好研究,我地快去分頭搵物資啦。」豹哥講完,就同張火石行去左邊條路。

施政傑同柔柔就換上溜冰鞋,然後先出發,佢地就行右手邊嘅路。

二人好似平時咁喺街上穿梭流連。

施政傑碌下碌下,碌入去一間OK便利店度。

佢彎低腰喺收銀櫃檯下嘅貨架上,搵下有無condom。

「你做咩喺度摷condom呀?」柔柔好奇地問。

「係Simon叫我帶啲返去俾佢…」

「下?佢要condom做咩呀?」

「Er…呢個…我都唔知…」施政傑唔好意思話Simon拎condom係想同Monica上床用。

「車!你唔講我都知啦,攞condom都係做嗰啲嘢啫,唔通拎嚟吹氣球咩?」

「係呀,都係嗰啲嘢啦,你明架啦,哈哈...」施政傑尷尷尬尬咁笑一下。

「哈哈哈!我見Simon成日黐埋去Monica度,都知佢想點架啦。」

柔柔笑完跟住問:「乜Monica真係咁正咩?我見你地個個男人都咁嗒佢糖,唔單止係Simon,連Eric、Johnny佢地都好冧Monica咁。」

「Er…我諗應該係因為佢身材夠好掛…」

「你呢?你係咪都成日𥄫Monica個胸呀?」

「無,梗係無啦。」

施政傑當然係口是心非,相信喺呢種情況下,大部分男人都唔會自認鹹濕。

「哈哈,睇你個樣咁心虛就知你講大話啦。」

施政傑俾人戳爆左,有少少尷尬,尷尬得有少少面紅。

「喂,咁你揀完未呀?唔好扮第一次買condom喺度左揀右揀喎,哈哈。」

「揀完啦,揀完啦。」施政傑求其擸幾盒走算。

二人從便利店行出嚟,周圍兜左一陣,沿途都見到地下有好幾隻同啱先油站一樣嘅「冷凍喪屍」。

但咁都不得止,行行下佢地仲見到,之前路過都會同佢地打招呼嘅幾個相熟生還者,竟然橫屍喺街頭。

而嗰幾個人都唔係俾喪屍咬死,而係中槍死。

佢地身上佈滿子彈窿,睇嚟係俾亂槍掃射致死。
2020-03-09 00:39:27
thx bro
2020-03-09 09:29:50
2020-03-09 10:26:08
2020-03-10 13:23:43
2020-03-10 23:45:11
推一推
2020-03-11 00:56:45
「佢地幾個…發生咩事…」

幾具屍體死狀駭人,柔柔行近過去但不敢正視。

「成身都係子彈窿,應該係俾人開槍射死。」施政傑打量眼前嘅屍體。

「無端端俾人用槍射死?」

「我估都唔會係無端端嘅,最大嘅可能性就係佢地同人爭食物而發生打鬥,嗰批有槍嘅人一怒之下就射死左佢地。」

「唔係喎,你快啲睇下。」柔柔踎低身,拎起屍體附近一袋裝滿乾糧嘅白色膠袋,入面有罐頭,樽裝水,餅乾同啤酒。

「如果因為爭野食,咁無理由啲人殺完人唔拎埋袋野走。」柔柔話。

「如果唔係爭嘢食,咁都有可能有人睇錯佢地係喪屍,所以錯手殺死佢地?」施政傑揣測。

「可能係啦。」

「弊啦,你快睇下,有喪屍圍緊過嚟。」施政傑望到附近嘅喪屍慢慢咁圍緊過嚟,「此地不宜久留,我地快啲走啦。」

「等一等。」柔柔踩住roller,好小心咁避開路中心嘅喪屍,碌去對面街嘅服裝鋪入面。

佢喺鋪頭拎左兩塊白布,用嚟冚住攤喺地上嘅幾具屍體,希望白布能夠遮掩一下,唔俾啲喪屍咁易發覺到,免得佢地變成喪屍嘅早餐。

之後施政傑同柔柔迅速逃離現場,返去油站。

張火石同豹哥早就喺車上等候佢地。

而豹哥唔知喺邊度托左成箱朱古力返嚟。

「豹哥,洗唔洗一次過托成箱朱古力咁多?」施政傑一邊開車一邊問。

「哈哈,今日係阿叔我生日,梗係拎箱朱古力返去賀下啦!哈哈!」豹哥放一粒朱古力入口。

「乜原來今日係你生日?生日快樂喎!」施政傑祝賀。

「做咩唔早啲講呀?如果提前知今日係你生日,我就幫你搞個生日會啦。」柔柔同豹哥講。

「係囉,唔講都唔知你生日。」張火石話。

「哈哈,都一把年紀啦,仲搞咩生日會,況且只要有朱古力食,我就好happy架啦!」豹哥手執朱古力,露出滿足嘅笑容。

返到商場,佢地分發物資俾其他人。之後到左夜晚,眾人好似平時咁圍埋一齊開餐。

今日佢地唔係燒嘢食而係打邊爐。

但係由於超市啲凍肉幾乎都腐爛曬,所以佢地都搵唔到肉食,只可以淥其他嘢,例如係罐頭午餐肉、豬肉乾、鹹魚等等,總之擺得食得極都擺曬落去。

「點搞呀?打邊爐要淥豬肉乾,無肉或者魚蛋嗰啲啦咩?」

「係囉,都無樣好食嘅,仲有無其他呀?」

「成條鹹魚擺落去,真係睇到都唔開胃呀。」

三個學生妹拎住匙羹喺嗰煲度撩下撩下,搵極搵唔到啱食嘅嘢。

「無啦,成個港島停左兩個幾星期嘅電,連超市啲急凍食品都腐爛曬,係得返呢啲乾糧渣。」柔柔同三個學生妹講。

「𡃁妹,我有朱古力喎,你地要唔要呀?」豹哥遞三排朱古力俾佢地。

「唉,無胃口呀,去食煙好過。」三個學生妹拎住煙仔同打火機,行開去左煲煙。

而嗰對老夫婦都話無乜胃口,亦都返去瑜伽室度休息。

Monica見無嘢好食,就夾條鹹魚試下,結果鹹到佢要即刻吞出嚟:「哇!好鹹呀!」

「嚟嚟嚟,Monica,快飲啖可樂甜下個口」Simon拿拿臨遞支可樂俾佢沖淡口中嘅鹹味。

Monica拎住支可樂,擰極都擰唔開:「Simon,打唔開喎。」

Simon幫手擰開,但唔知係咪個蓋收得太實,就連佢都擰唔開,於是佢就搵喪屍仔幫手:「你快行過嚟幫我扭開個汽水樽蓋。」

喪屍仔收到指令,慢慢從遠處角落頭行埋嚟。

佢好聽話咁用力一扭,就扭開左個樽蓋。

可惜慢左一步,Monica已經大啖大啖飲緊Eric俾佢嘅礦泉水。
2020-03-11 01:48:21
「連樽蓋都要隻喪屍幫你開,有無咁廢呀?」Eric串Simon。

「哼,我呢啲叫物盡其用,你識咩呀?」Simon反駁。

「死淨得把口,無鬼用。」Eric一臉不屑,「Monica,呢啲人唔啱你架。」

「你話邊個無…」

「嘿!Simon,呢條豆豉鯪魚啱啱熟,快啲食唔好講嘢啦。」施政傑夾起一條罐裝豆豉鯪魚俾Simon,並藉機打斷佢講嘢,費事俾佢同Eric拗落去。

「話時話,肥龍、瘦虎佢兩隻嘢去左邊呀?我地飯都食左一半,都仲未見人嘅?」豹哥左右張望。

「我啱先見到佢地,好似喺走廊盡頭間麵包鋪。」張火石話。

一講曹操,曹操就到。

肥龍、瘦虎捧住一個插住蠟燭嘅蛋糕,慢慢由走廊行出嚟。

「祝你生日快樂—祝你生日快樂—」

佢兩個一邊唱住歌,一邊拎住蛋糕行到豹哥面前,「祝你生日快樂—祝大佬你—生—日—快—樂—」

「哎呀,你兩條友,做咩整生日蛋糕咁老土?」豹哥口話老土,但其實心入面十分感動。

「大佬,今年係二十年嚟第一次同你喺出面慶祝生日,梗係整個蛋糕賀一賀佢啦!」瘦虎好興奮咁話。

「係呀,呢隻蛋糕我地落左好多心機整架,入面放左大量你鐘意食嘅朱古力,你快啲吹完蠟燭就切嚟食啦!」肥龍遞把刀俾豹哥。

豹哥合埋眼吹熄蠟燭,跟住切開蛋糕,分俾大家食。

「點呀大佬,正唔正呀?」肥龍問。

豹哥品嘗一口蛋糕:「咬落啖啖都係朱古力,好正喎!哈哈,都算你兩個衰仔有心,無唔記得大佬生日。」

「哈哈,大佬你嘅生日我地日日都記住,點會唔記得呀!?」瘦虎講笑咁話。

「哈哈,個蛋糕好正,多謝你地。」

「啱先話我地老土,依家自己又咁老土,講埋呢啲客氣說話,大佬,咁多年兄弟,心照得啦!」肥龍回應話。

「不過個蛋糕你地係點整架?啲焗爐唔係用唔到咩?」柔柔咬一啖蛋糕問。

「溝啲啫喱粉同魚膠粉,咁洗焗爐都整到架,我地以前喺赤柱乜都無,都係咁整啲糕餅出嚟。」瘦虎同柔柔講,「阿妹,搵日得下教下你啦。」

「哈哈,好呀!」

「砰鏘!」

突然,樓上傳來十分響亮嘅爆玻璃聲音,令沉醉喺輕鬆快樂氣氛嘅各人當堂打醒十二分精神。

「係咪有喪屍入左嚟?」施政傑神色緊張。

「聽聲應該係商場度玻璃大門俾人打爛左。」柔柔同張火石即刻拎起武器戒備。

「唔係掛?又有喪屍?」豹哥感到有點掃興。

「大佬,有我兩個保護你,無有怕!」肥龍、瘦虎搭住豹哥膊頭話。

而Eric同另外四個男仔行近扶手電梯口,探頭望上樓上。

「哈!唔係喪屍黎架!係警察!係嚟救我地出去架!」Eric十分興奮。

八個著住藍色制服,戴住頭盔兼且蒙住面嘅警察,每人手上拎住一支長槍,好小心咁從電梯行落地庫。

「阿sir,你地終於嚟救我地啦?太好啦!」Monica同三個學生妹好雀躍咁圍埋過去電梯口,迎接幾位阿sir。

「等左咁耐,終於等到你地嚟救我地啦!」Eric滿心歡喜。

嗰八個警察行落地庫,快速掃視一下四周,之後其中一個人問Eric:「呢度就得你地咁多人?」

Eric點點頭:「係呀,加埋瑜伽室嗰對老夫婦,我地呢度總共十八個人。」

Eric話音剛落,Simon就立即接住話:「搞錯呀?等左兩個禮拜,你地班差佬家下先過嚟救人?遲唔遲啲呀?」

「咪就係!好彩我地命大,靠你地真係死得啦!」豹哥附和。

嗰幾個警察無出聲,其中一個人淨係講左句:「伙記,開工。」

跟手八個警察舉起長槍,拉動扳機。
2020-03-11 01:53:09
多謝樓上幫推
2020-03-11 06:51:55
有新文push
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞