血漿、炮火、慘叫同時迸發,昔日滿載歡樂嘅主題樂園頃刻變成慘烈嘅戰場。
無論人數上還是速度上,喪屍都完全壓制住警察。
就算警察有槍有炮,但好多都未嚟切瞄準就已經被咬死,有啲警察就索性唔瞄準,亂射亂開炮,好多樂園設施就咁被炸爛曬。
指揮中心內嘅警務處處長見到自己嘅手下逐個訓低,立即叫其他警員去支援:「各單位聽住,依家喺海洋公園,有三百個伙記正被接近一千隻喪屍圍攻,形勢十分不妙,你地同我全部過去支援,快!」
港島其他執勤嘅警察收到指令,紛紛前往樂園。
南區執勤嘅警察有三千人,佢地最先去增援,但同一時間,原本就喺樂園內嘅喪屍被槍火炮聲吸引,聯群結隊咁出現,加入左戰團。
喪屍瘋狂噬咬,警察竭力奮戰:「仆街喪屍,受死啦,BOOM!」「啊!!!救命!唔好咬我!」「我隻手呀!仆街,要死就一齊死!BOOM!...」
處長派埋直升機過去幫手,機上嘅警察向住下面嘅喪屍發射子彈大炮。
原本佔上風嘅喪屍又反過嚟被警察圍攻。
成個港島大約萬幾,接近兩萬個警察,陸陸續續開住裝甲車同警車趕去支援。
儘管人數上已經完全佔優,但警察都花左唔少彈藥同時間,先徹底解決曬嗰千幾二千隻發狂嘅喪屍。
園內喇叭仍然播放住hip hop樂曲。
正當嗰班警察殺死曬全部喪屍,以為可以鬆一口氣嘅時候,大門外又有一批新嘅喪屍湧現。數量比之前嘅仲要多,至少比啱先嘅多二三十倍。
即係有差唔多三萬隻湧緊入嚟,估計呢個數字比以往海洋公園每日嘅入場人數仲要多。
呢一刻,喇叭大聲播放緊 Fuck the Police:
「For police, I'm sayin, "Fuck you, punk!"
Readin' my rights and shit, it's all junk
Pullin' out a silly club, so you stand
With a fake-ass badge and a gun in your hand
But take off the gun so you can see what's up...」
上萬隻喪屍一聽到高昂嘅hip hop音樂,就用閃電般嘅速度排山倒海咁衝入園內。
面對住咁嘅場面,唔單止係現場嘅警察,就連指揮中心內嘅處長你同一眾操作員都嚇到呆左。
然後就係一場血腥嘅廝殺。
一開始班警察都勉強抵擋得住,但當彈藥用盡之後,佢地再無力反擊,最終淪為喪屍嘅早餐。
畫面殘忍血腥,來自警察嘅慘叫聲絡繹不絕。當中有被幾隻喪屍一齊咬爆頭,血漿飛曬出嚟而死嘅,有被咬完變成喪屍後俾火箭炮射死嘅,亦有逃走時不慎俾自己友拋出嘅手榴彈所炸死嘅。
廝殺何其壯烈,哀嚎聲何其悲壯,配襯節奏強勁嘅hip hop音樂,外加海洋公園作背景,形成一道血腥得嚟又帶點「chill」嘅景致。
「Sir,依家點呀?我地洗唔洗再派人去增援呀?」一名警隊高層問處長。
處長望住一幕幕警員慘死嘅畫面,突然恍然大悟,發現呢一切仿佛係一個陷阱,係有人故意設局引警察去海洋公園,再吸引一大班喪屍入嚟殺死警察。
可惜嘅係,佢依家先諗到呢一點,已經為時已晚。
二萬警察已成為砧板上嘅肥豬肉,仍由喪屍魚肉。
「Sir,點呀?洗唔洗派人增援呀?」另一名警察高層亦好心急咁問處長。
呢刻處長左右為難,一方面佢想派人去拯救,但一方面佢知道呢個係一個陷阱,擔心如果派人過去,跟住會再多一大批喪屍出現,咁恐怕到時會損失更多伙記。
佢苦苦思考左十幾分鐘,最後決定唔派出增援,壯士斷臂,眼白白睇住手下逐一俾喪屍分屍。
一個上晝過去。海洋公園滿目瘡痍,血流成河。
二萬個警察全部喪生,無一生還。
然而,處長仲未嚟得切為死去嘅伙記哀悼,喺下晝時分,又收到一個令人震驚嘅消息——
有班人突破左封鎖線,經地鐵路軌嚟到左九龍。