自己一個去旅行遇到既難忘事

係Brighton石灘發動海鷗召喚術

食薯片間中掉少少喂佢地, 無被搶

有冇睇佢地係咁踢飛個波
仲有個西班牙阿叔行到入黎先笠件巴塞波衫 跟住成堆英國曼聯fans指住佢係咁唱歌

個時去九州搵左個地方睇遺址，叫岡城址
睇遊記見到左車站有shuttle bus 上去
但去到搵唔到，問案內所個姨姨話因為遊客太少已經無左shuttle好耐
佢見我一個女仔去覺得好奇怪，我話我上網睇覺得幾特別
然後佢拎地圖出黎教我去
我出左門口勁迷失（無乜方向感）
行左幾步個姨姨出左黎叫停我
拉左我上車話車我去驚我迷路
勁感動，沿途我係咁周圍望
佢就勁緊張叫我要認真認路
因為一陣要行返落車站先走到

最後分開個陣佢係咁叫我小心啲
好有愛

正呀 祝你成功睇到

佢只係講你同行既女仔

喺日本住hostel
隔離床係個七十歲以上嘅日本婆婆
每次佢上床落床都聽到佢用日文講「好痛 好痛」
後尾見到佢手腳都好大範圍瘀哂
有次幫佢叮嘢食 開始講兩句
但都雞同鴨講
後來靈機一觸用google translate同佢溝通

記得佢好似係唔覺意跌親 嚟睇醫生嘅
佢話我同佢個孫差不多年紀
我走嗰日佢仲特登叫我自己一個小心啲

好深刻
因為個婆婆係好典型嘅慈祥老人家樣
頭髮鬈鬈哋 戴副眼鏡咁
見到佢咁傷 又得自己一個 好心酸

係lisbon去左個遠少少既地方
開始天黑諗住搭返車返hostel
等左架tram勁耐，架架都full
差唔多等左個半鐘先終於有少少位可以上
點知我一上，有個呀叔單手的左我落車，
我 完全唔知咩事
之後佢自己上車 仲要回眸望住我一笑
我嬲到大叫左句fuck u asshole!
然後眼濕濕（我一嬲會喊）

後來再等左陣都係無我要坐既車
已經勁灰 又開始天黑

跟住有架車黎左，隔離個男仔拍一拍我指住架車
我未知發生咩事 未回得切神
佢就拖住我上左車
我又唔知點解勁乖跟住上車
諗住企係到乾等都無用，離開左個到再算
之後我地排排坐，但無講野，耐唔使就對望一眼笑一下，好尷尬咁
後來有個婆婆上車，佢就起身讓座
呢個時候我先發現⋯⋯佢勁似c朗

後來再過左陣，間tram竟然經過我hostel
我就即刻起身同佢道別就下車了

狗咩

好sad

上星期去緬甸玩分別識咗4個當地人
喺曼德勒第一日call grab同個司機用英文傾幾句
到咗目的地就say bye bye
點知第三日朝一call grab又遇返佢
乘勢包佢一日車
傾傾下原來大家都係父親早逝
雖然大家認識唔深但都好有共鳴
食晏叫佢帶我食地道街邊檔，果餐請佢食
仲一齊隊啤
臨走果陣交換聯絡方法同selfie
仲話佢女朋友好鍾意我部相機
下次再去會介紹我識

去到曼德勒山識到個小僧侶
大家傾下各自生活，想法都幾有趣

喺蒲甘食晚餐識到老闆娘同女待應
果晚得我一枱客
食住吹咗成兩三粒鐘
老闆娘英文好好
至於個女待應英文就麻麻，不過笑容滿面
要寫紙仔溝通
結果最後一日再去食多次

全部都有keep contact,下次會再去見佢地
緬甸人真係好nice，未試過喺其他地方識到咁多人

另一件小事係Stockholm 發生
果陣hostel同一個非常outgoing既亞洲女仔同房
佢好主動搵我地幾個roommate一齊去食飯
之後我地幾個就出街搵餐廳
而佢就係咁問路人
邊度有地道瑞典菜食
問下問下
結果有本地路人join埋我地
最後我地總共8個人一齊去左間local餐廳食

第二日我地幾個roommate又一齊去左個local fair又玩又食

一個人旅行真係好正好隨心