I fell ship with ptbf

push

push

push

push

push

push

可能根本唔係故事

Live左，樓主加油

push

push, 樓主加油！

推

又幾好睇
好少文以女生視角為主

PUSH

等你最後一次見面
文筆好好 完全有聲有畫

個故好正

PUSH

pish

細路好快又覆返我。

細路：「横掂原本已經心情唔好，所以點考都會考得唔好，唔重要啦。同埋其實我真係收咗山冇諗住再做ptbf㗎啦，但係你就覺得我講笑我呃你。不過你要咁諗我嘅，我都冇辦法。如果我真係要女朋友，我12個鐘頭內一定會搵到，但係問題係我唔想求其搵一個」

細路咁樣講，即係講得啲咩？
我睇到呢一大段訊息，眉頭皺咗一皺。
細路而家唔開心我係明嘅，所以字裡行間有啲晦氣說話我都能夠諒解。但係，就好似之前咁講，佢做嘅行為令我分辨唔到究竟佢係咩意思。少咗接客同唔做ptbf係兩回事，明明佢之前都仲講緊性誕節約咗之前嘅女客去街；我上年年尾去旅行前仲約我又約其他人；差唔多次次出嚟都係會搞嘢⋯⋯你叫我可以點樣有希望，有啲咩信心會認為呢個人鐘意我，會想同我一齊？

所以我一直唔敢相信，細路口中或者訊息打個啲掛住我、呷醋嘅字句，驚自己期望愈多，失望愈大。但係，但係，細路而家字裡行間，係咪暗示或者明示緊，其實我一直期望嘅嘢唔一定只係空想？只係我而家咁樣講話要唔好再見，會唔會傷害到佢？

我：「因為我就係知道你可以好輕易揾到女朋友，女人緣好，所以好多時你同咗女一齊都好易⋯⋯我真係勁後悔自己㩒唔住講野，咁大個人仲要害到你⋯⋯」

如果佢唔係玩玩下，如果佢真係認真嘅話⋯⋯我今次咁樣講話走，就真係好錯啦。
作為比較年長嘅一方，我呢到仲係俾情緒所掌控，唔夠成熟忍耐咁去處理呢段關係。

細路：「唔關你事，係我自己冇專業操守，係我自己沉船先會咁，我冇沉船嘅話，你而家飛起我根本唔會有任何問題發生，係我衰，係我對你有咗感情有咗feel，仲差啲當咗你係女朋友咁看待，先會出事，所以其實唔關你事，唔好怪自己」

呢一個訊息我自己一字一句咁係咁重覆來回咁睇。
我個腦一片空白，完全load唔到其他嘢，好似突然之間患咗痴呆症咁，睇完堆字但係完全唔明解係咩意思。我逐隻逐隻字睇完佢send嚟嘅訊息，大概唔知過咗幾耐，我個腦先好似慢慢清醒過嚟，先真正睇到明白到個訊息。

細路話，對我有咗感情。
細路話，對我有咗feel。
細路話，差啲當咗我係女朋友。

我坐喺床上面，對住發住光嘅電話mon發咗一陣呆。世界好靜好靜，我只能夠聽到我個心砰砰聲跳個唔停，一下又一下充斥住我耳仔，震到我塊面都燒起嚟熱起嚟可以煎蛋咁。我丟開部電話，摀住咗自己嘅眼睛。

我想喊。
我真係冇諗過佢會咁樣覆我。

我以為，我察覺到嘅嘢都係我嘅錯覺幻想。我嘅意思係，我大約會估到細路對我係有好感嘅，如果唔係都唔會繼續同我有來往啦係咪？但係我都係成日同自己講，細路只不過係貪求就手，有得食咪食，所以都唔好投入咁多感情落去。我冇諗過，先陷入去嗰個可以係佢；我冇諗過，我哋真係可以有happy ending。

細路最後嗰句先至係最觸動到我嘅嗰部份。就算再享受曖昧不明嘅樂趣，好多女人最後都想要一個名份。我冇諗過細路原來有當過我做佢女朋友嘅諗法，呢點係我之前諗都唔敢諗。我一直認為，我哋嘅世界相差得太遠啦，而且佢條件唔差選擇咁多，點會揀我呢個大佢咁多，又冇青春又唔可愛嘅老女人一齊呢？

亂七八糟咁喺床上面碌嚟碌去諗咗好耐嘢，我隔咗成七分鐘先至覆到佢message。

我：「你唔好咁講啦⋯⋯其實係大家溝通出現咗問題，我感覺唔到你有對我認真，我以為你當我sp，我先講返我唔想再做落去咁。如果係女朋友，我冇特別覺得你當我係；如果係sp，我諗大家咩時候都可以叫停」

我都講得好婉轉，我只係想希望佢理解同明白，我係冇心傷佢心嘅⋯⋯咁樣講清楚返唔會破壞我哋之間一齊嘅可能性㗎可？

細路：「其實咪即係根本一路都係我問題，我一直拍唔到長拖嘅原因都係女朋友感覺唔到我當佢係女朋友，所以先會嘈先會散，其實根本只係唔知點解我俾人嘅感覺點都係咁⋯⋯可能我啲咁嘅人注定成世自己一個㗎啦」

細路越講越係度賣慘，但係我已經睇唔到亦都唔在意呢點。我嘅心已經被佢上面嘅個幾句俘虜咗，成個人都好似癲咗咁淨係諗緊一樣嘢：佢咁樣講⋯⋯係咪即係鐘意我？佢⋯⋯係咪可以俾我做佢女朋友？

我：「咁真係堅慘⋯無論如何，你考完試出到嚟我同你講吓女仔點諗同點解女仔咁諗啦。無論點都好，我都唔想你唔開心，聽日同後日考好個試𠳔！」

細路：「其實最諷刺嘅係，我呢一個好容易識到女仔嘅人，出名單身不過48小時嘅人，竟然比起一啲識唔到女仔嘅男仔，更加孤獨，更加冇人愛⋯⋯點考都係咁㗎啦，已經無心情温啦。」

我：「唔好啦，乖啦温埋𠳔⋯⋯」

細路：「唔溫啦」

我：「你要點樣先肯温」

細路：「其實我而家好辛苦，我分唔到依家係真係心痛，定係傷心嘅心痛，同埋嗰頭真係好痛⋯⋯同埋我間房有人喺度，我一瞌埋眼就會唔小心諗到我同你嘅嘢，就會好唔小心咁喊左出嚟，比佢哋聽到就死啦」

傻瓜。
如果細路嗰一刻係我面前，我一定會毫不猶豫咁攬住佢，摸吓佢個頭，然後錫一錫佢。唔係淨係男仔望到女仔喊會覺得佢楚楚可憐，女仔望見男仔為自己而喊而心痛，同樣都會覺得對方可憐又可愛。

細路只係打咗呢幾隻字，就足以令我嘅心酸好酸，恨不得時光倒退，自己冇打過話要走嘅訊息出嚟，繼續忍落去。我從來冇諗過要傷害細路，我咁講嘅初衷只係想保護自己，唔想受傷害，但點解到頭來我呢種自我保護嘅行為反而會令到細路受傷呢？

我：「你咁講我好內疚⋯⋯其實你唔好諗咁多，我地星期五出嚟先再慢慢傾啦」

細路：「我控制唔到個腦諗咩」

我：「我唔會消失，起碼係未講清楚所有嘢之前，我唔會消失喺你生活入面嘅。真心，如果唔係我神早block左你，刪埋ig ，好似你以前個啲女朋友咁啦」

我好記得細路講過，佢其中一任嘅女朋友喺同佢分手嗰陣係悄無聲息咁消失，社交媒體上面嘅嘢完全封鎖，拉曬入黑名單，就好似美劇黑鏡有一集入面咁樣，當你被封鎖咗之後，嗰個人就完全係你世界入面徹底消失無踪，你揾唔到佢，甚至到咗一個點你係會懷疑呢個人係咪存在。我聽到嗰陣都有啲覺得心有戚戚焉，然後暗自決定以後即使要同細路講掰掰都唔會咁做。我覺得細路之所以成為今日嘅細路，呢個經歷都應該係原因之一。

細路：「信住先啦，以前都係得一個女朋友係咁⋯⋯」

我：「我真係唔會，因為我知咁樣會hurt到你」

我希望你知道，我心疼你。

細路：「唔緊要啦，已經比人hurt 慣」

我：「唔好咁自暴自棄啦，唔學精下一次都會再受傷，你快啲訓啦，訓咗就唔會亂諗嘢」

細路：「我宜家只係del剩你一個女嘅，冇寄托仲可以點⋯⋯要學精嘅都學晒啦，只不過係我自己攞嚟衰，每次都調返落去個窿到，我一行出嚟個感覺就係咁花弗，以前啲女朋友啱啱識我嗰陣已經係咁同我講，唔關我嘅行為事」

我嘅理智話俾我知細路上面好多都係籍口，但係我嘅感情同我講，算啦，唔需要再糾纏對與錯、真與假，最重要嘅係，佢而家話對你有感覺。

我：「唔係，我唔會俾你外在蒙騙，係你嘅言行俾個咁嘅感覺我⋯⋯唔講啦，你聽日仲要考試，我星期五見你再講啦」

細路：「咩言行？」
細路：「好啦咁我唔阻你⋯⋯」

細路嘅訊息再繼續彈出嚟，但我唔打算㩒開繼續回覆。
我放低手機，訓喺床上面睇住天花板發呆。

然後，我下咗一個決定。

分唔到細路真定假...好想信但係又好懷疑

樓主加油 希望有happy ending啦

樓主 live