《好地地，我做乜鬼無啦啦帶個港女Friend嚟台灣特訓？》

巴打幾時先update紙言個跑online故

係喎 等我病好就直接搞埋佢 我會找埋啲數先

當我拎好曬床鋪，諗住今晚打地鋪做廳長啦，點知Kiki講：「你瞓地下啊？」

我話：「係啊，你瞓床得啦。」

「洗乜啊，你張床咁大，一齊瞓咪得囉。」Kiki絲毫不介意，但其實我好介意啊大佬……

我唔係驚你啊，我係驚我自己。

我間房幾大嘅，雖然啲嘢全部都係單人設施，但唯獨張床係雙人床嚟。

「唔係咁好嘅……」我輕輕地婉拒。

「你又無女朋友，我又無男朋友，加上我相信你嘅。」Kiki加上一個天真活潑嘅笑容，嗰顆純真嘅心直直插入我心。

「我唔忍心見住我fd瞓地下，同埋係我過嚟玩，有咩可能要主人瞓廳？」

此時此刻，Kiki港女嘅形象全部化為烏有，嚟到台灣之後發現咗佢令人感到可愛嘅一面。

我不禁為我今朝鬧佢嘅說話而感到內疚，真係鬧錯佢啊！簡直係天使。

「咁好啦，你都講到咁囉，你今晚唔好搶我被就得啦。」講下笑化解下啲尷尬先。

過咗無耐，我哋等埋個頭乾，跟住就熄燈瞓。

我哋互相講咗句早抖之後，就墮入了黑暗。咁Kiki就瞓入面，而我就瞓出面，我張床係靠係牆邊嘅。

第一次同女仔同床共枕，雖然大家都知唔會有啲咩，但總係有莫名嘅緊張感。

我連大氣都唔敢抖啖，仲好清楚咁聽到自己心跳添。你話啦，你叫我點瞓得著先得㗎？

我本來係背對住佢瞓嘅，但係喱個漆黑嘅環境中，時間過得異常漫長，你會慢慢感受到時間一滴一滴流走嘅感覺。

我忍唔住，擰轉身。卻俾我發現Kiki仲係度㩒緊手機，因為佢都一樣背住我，但手機屏幕嘅光照咗落牆度，唔難發現。

「仲唔瞓？」我多口關心下。

「你都係啊。」我聽佢聲線，感覺好似有啲沈重。

「做咩事啊？」直覺話我知，好似有啲嘢唔妥。

我坐起身睇佢發生咩事啦，跟住我就望到啦，條友仔係度睇返以前啲相。

知道咗之後，我秒速瞓返低。

「仲以為你飲完酒會好想瞓，點知仲係度睇以前啲相。」我嘆了一聲大大嘅氣。

「其實……你講嘅，我都知啊，但我個心仲好掛住佢。」咔嚓一聲，係熄屏幕嘅聲音。

「身在其中係難抽離㗎啦，但我知道你之後再回望返依家嘅自己，一定覺得自己好蠢。」

漆黑一片嘅晚上，係容易令人胡思亂想，一啲負面情緒沿住床邊一路爬，爬入你心靈。

「逼自己唔好諗，瞓醒又係一條好漢。」我理智咁同Kiki講。

喱啲失眠嘅日子我唔係未經歷過，如今諗返起，我都唔知自己點撚樣捱過去。

「我每晚就係咁，望住以前啲相，越係開心嘅相，我就越痛，每晚都係痛住瞓，起身第一時間就係睇佢啲嘢，我都唔知自己幾時會好，幾時會放低佢……」

加速

留名

正評有助加速

等你

「放低佢唔洗時間，坦白講，你依家成日記住佢都無用，索性乾脆啲仲好啦，俾自己型返次啦。」

「唉，我都唔知點做好。明明以前好乾脆，話唔鐘意就唔鐘意，就算對方飛我，我都可以無咩事，全身而退。但依家？我都唔知點解做唔到。」

估唔到我哋係喱個伸手唔見五指，只能夠透過一扇窗搵到些少光茫嘅房間入面，仲要一男一女瞓係同一張床度，大家都係後生世仔，一樣都乾柴烈火，但咩事都無發生到。

將今日喱件事隨便話俾一班男仔fd知，你一定俾人笑到傻，咩都無做過就咁過一晚，我已經可以想像到佢哋會笑你咩：無能、戇鳩、係咪男人嚟㗎？

但老實講，喱種心靈上嘅交合，我更加享受，大家都係俾個心出嚟，同自己啲fd做嗰啲嘢，我真係做唔出，過唔到自己嗰關。

一旦破壞咗，我哋就返唔到去以前嗰種純潔嘅關係，至少我唔會過嗰一條底線。

就算自己幾想都好，始終都做唔出，就算今日係Kiki做主動都係咁話，換著第二個男人，會二話不說，屌咗先講。但我……我可能連扯都扯唔起。

「因為你之前無愛得咁深囉，喱啲嘢唔輪到你話事㗎嘛，係咪？」我係度諗，我哋會唔會就咁傾天光？今日只係第一日咋喎，之後仲有好長時間喎。

「嗱，你嚟到周圍去玩下，識下台仔，台仔player只係佔少數，好多個樣呢……普普通通咁啦，但勝在夠專一、夠溫柔。」

「我係度生活兩年，個人意見啦，我識嗰啲都唔差嘅。」

「我同自己講，過埋今晚就唔諗啦，去到一個新地方，去識新嘅人，開展自己嘅新生活！」Kiki講到好理想，好紅日feel。

「你係先好啊，唔好講完聽晚又打回原形。」同嗰啲每日話要早睡早起嘅人一樣，大部分都係做唔到嘅fd嚟。

聽日會加速 見正評多返啲係幾開心
承蒙大家厚愛

Btw可唔可以講下睇完之後有咩感受/意見
小弟想知有咩地方要改善
目前為止，我覺得個進度拖得幾慢下 不過之後劇情會再推快啲

講下講下，我哋就靜咗落嚟，無幾耐我都聽唔到咩聲，就瞓著咗。

第二朝我哋瞓到自然瞓，我醒咗都Kiki都仲未醒。我一起身望到Kiki，本來仲有睡意嘅我，擰轉身見到佢就成個人醒曬。

琴日嘅回憶都湧曬出嚟，成個人清醒曬。

不得不說，Kiki嘅睡姿真係好小朋友，攬住我放係床邊嘅喬巴公仔瞓，劈大個口得個隆，搞到我都忍唔住笑咗出嚟，霎時間覺得，如果Kiki做我女朋友都唔錯喎？

你諗乜鬼啊？你心入面明明仲有可妮㗎，你真係呢！

我間房係無廚房，你朝早想食早餐啊，要自己唔係唔得嘅，要自己去買器材返嚟整囉。

所以直接落樓下買係最快。

我梳洗好之後，就落街買早餐，以我對Kiki嘅了解，佢同我都差唔多係垃圾口嚟，食唔慣啲咩高級嘢，買咗啲我認為佢鐘意食嘅嘢返去。

當我返到去嘅時候，Kiki已經起咗身。

「起咗身啦？」我仲以為佢會有排瞓添，琴晚佢實夜過我瞓。

「你出門口已經嘈醒咗我啦。」Kiki坐係張床度玩手機，真係手機不離身嘅人。

「買咗早餐俾你食啦，快啲落床食啦。」我將啲嘢食放係張Ikea枱仔度。

「咁好？」Kiki即刻好興奮咁沖落嚟，「哇，係台灣早餐啊！」

見到佢好似小朋友咁，我都開心嘅。

「你買咗啲咩俾我啊？」小瑤雀躍咁係咁摷嚟睇。

「嗱！嗰袋啊。」我指一指俾Kiki睇。

佢打開完之後，就開始港女啦，「下？我都唔食蛋，又唔飲豆漿……」一臉嫌棄嘅表情。

「你真係呢，港女嚟㗎喎你。」啊，買埋俾佢仲嫌三嫌四，真係呢！

「唉我同你換啦，你食我嗰份。」

「你嗰份咩嚟㗎？」佢完全無視咗我話佢嘅嘢，淨係掛住食。

「哇！有小籠包喎，我最鐘意食㗎啦！」真係挑剔……

「係啊，好似你個波咁囉。」我一時口快快…….

「屌你啦！」Kiki好大力咁一嘢拍落嚟，「我以碼有B囉！」

其實我都知，都係串下姐……琴日揸車都feel到嘅。

留名

「係食就食快啲啦，一陣約咗個台灣朋友帶你出去玩。」我催促Kiki。

「下？你唔同我講嘅？」Kiki啱啱啪開隻筷子，諗住開餐，點知俾我喱句搞到呆咗係度。

「叫個fd嚟帶你去散心仲想點啊？我fd好好人㗎，你唔好蝦人添啊。」我先小人後君子咁講。

「你早啲同我講等我有啲心理準備啊嘛！加上我依家又未化妝未襯好衫！佢幾時嚟啊？」原來佢係擔心自己個樣……

咁又係嘅，第一印象咁緊要，尤其是佢依家失戀緊，任何男性對佢嚟講，都可能係下一春。

「無咁快你放心啦，我約佢晏啲去食個早午餐，所以喱個早餐食少少就好，係俾你試下台式早餐咁咋。」

「快！依家已經9點啦！」佢用行動嚟話俾我知咩叫快。」

跟住佢就全程開始整理緊佢自己，我坐係張床度食花生打機。你知男仔㗎啦，出個街洗幾耐姐，但女人唔一樣，出街好似打仗咁。

佢先係吹頭整理咗個頭髮先啦，跟住又要電下頭，我唔知佢個喼邊得嚟咁多位，仲要裝埋啲衫啊化妝品，成個百寶袋咁。

接住落嚟，就係重頭戲啦，喱個變身嘅過程都有幸俾我見到。Kiki執好曬佢頭先食早餐張枱，將啲化妝品放曬上嚟。

上面啲顏色，你無返咁上下功力，你根本分唔清。

等佢襯埋衫最後再加工一下，前前後後大約個半鐘至兩個鐘左右啦。

犀利犀利！我都唔知打咗幾多鋪機，夠我爬一個排位了。

我哋出發去餐廳嗰邊，我個fd都去緊啦。

我哋都係揸直路，由台灣大道一路揸落去，我後面嗰個已經坐到無曬感覺咁，仲好自然咁玩緊手機，錄緊ig story。

「WOW!!!!!」揸揸下車，Kiki係我後面鳩叫。

「你嚇鬼死我咩，揸緊車㗎嘛。」

「無啊，啲電影都係咁樣嗌㗎啦坐電單車。」

「係啊係啊，咁你係咪上親郵輪都要講you jump I jump啊？」唔知咩邏輯嚟，好新鮮。

「你理得我啊！」我原以為佢咁樣會收手唔叫，點知仲繼續嚟，一邊鳩叫一邊拍片。

我哋去到嘅時候，我朋友已經到咗。

「嗨，你很早到喔？」我用熟練嘅台式普通話同我朋友講嘢。

基本上台灣嘅普通話係無捲脷音，所以講嘢輕快好多，間中夾雜下啲台語咁樣，就好似我哋講廣東話都要夾雜啲英文一樣。

「沒有啦，剛來沒多久。」傑克好客氣咁講。

「啊，這是我朋友，Kiki。」果然Kiki今日悉心打扮係有用㗎，Kiki打扮完係真係女神咁款嘅，我觀察到傑克望佢嘅眼神係不一樣。

男人係比女人更為膚淺嘅物種嚟。

「李好，我事Kiki。」Kiki佢今日無琴日咁膽小怕事，驚驚青青咁講普通話。

但咁就出曬事。

佢唔知拿來嘅自信，諗都唔諗就講出嚟，仲要講到一臉自信咁，不禁令我諗起古天樂講嘅普通話，加上謝霆鋒嘅自信。

「喂……」我想細細聲提下佢，但已經嚟唔切了。

「你好，我是傑克。」傑克佢笑笑口咁回應返佢，相互握個手。

反而我好似個局外人咁企咗係度，搞咩啊大佬……？

出快啲好冇

推