Samsung Note 8/S8/S9/討論區 S9紅色版不遠矣! (17)

個人用後感(由Note 8轉S9+)：

首先Note 8機身太長好易拎唔穩，S9+就黃金比例(似V30+)，手感極佳。數字上S9+只係輕Note 8少少，但就明顯冇咁贅手。

S9+隻藍色比較subtle，個人覺得靚過S8+同Note 8嘅藍色。

指紋掣搬返落嚟實在係德政，冇咁易按錯主鏡頭整汚糟。指紋或intelligent scan解鎖都極快。

S9+個mon可算歷代之中最靚，就算用FHD已經滿意，色彩自然順眼，字體顏色紮實，亦好夠光。不過略嫌個mon四隻角太圓，當要按右上角X整走pop up ad時，個X會難按咗。

Note 8我用咗半年後啲電開始倒水，S9+明顯好咗，中用量我頂到一日，但始終去唔返S8+嗰陣咁襟用。

S9+用S845行Android 8.0，操作比Note 8更流暢，上網速度亦有提升，可以用爽嚟形容。不過有啲apps支援8.0未夠好，例如死人香討app就偶爾會hang同回覆/編輯時顯示唔到文字。

影相一向係三星強項，今次最大進步係低光拍攝，比Note 8少noise而又不至油畫化。

S9+聽歌明顯贏S8+一條街，比Note 8就好少少，總能夠調音調到自己啱聽，令我可以放棄用初階DAP。

Smart Octopus由Note 8轉過去S9+好方便，連銀行自動增值都順利過渡。

整體上你可以話S9+比Note 8進步唔多，但淨係手感提升同低光拍攝好咗已經令我唔後悔換機。