因為一盒樂家杏仁糖，中咗風嘅婆婆同全家開年

屌
真係眼濕濕
人在異鄉仲要望到呢個故
心up

婆婆

努力修改緊，今晚應該都好夜先會出到，不過應承大家一定會出，所以唔眼瞓嘅可以等，眼瞓嘅聽朝睇都得

加油

（大結局＋Penana 1000 likes完整加更版）

「喂，你哋嚟咗喇？咁準時嘅。新年快樂啊！」

四姨媽把聲突然響起，令我從分心之中回神。

我發現，呢一刻我嘅雙手包實咗婆婆嘅雙手。

而婆婆正雙目無神咁望實咗我，咦咦哦哦咁發出咗幾個單音。

見到四姨媽同婆婆，咁即係代表我已經重返現實。

但係我記得呢一幕，仲有呢一個環境，似曾相識。

呢一切，我應該曾經經歷過。

呢個時候，腳步聲從廚房響起，行出嚟嘅人就係四姨媽。

「四家姐，新年快樂啊！嘩，今年TVB又係播汪阿姐啊？」我阿媽指住電視機，無奈咁講。

「係啊，年年都係咁㗎啦。不過阿媽鍾意睇，咪俾佢睇下囉。」四姨媽笑住回應咗一句。

隨住佢兩個嘅說話，我先留意到，我耳邊仲聽到電視機傳來嘅歌聲。

係汪阿姐唱出嘅「迎春花」。

咦，咪住先。

我明明記得，電視機入面播嘅應該係四姨媽鍾意睇嘅「魷魚遊戲2」㗎？

望住電視機入面著住賀年裝嘅汪阿姐，我心入面不期然浮現問號。

就喺呢個時候，我留意到四姨媽向我走過嚟。

「喂，健仔，Year 3啦喎，讀書點啊？成績點啊？」

一聽到呢句，我個心即刻沉咗一沉。

我起初以為所有嘢好似Reset咗咁樣，但係原來，有啲嘢都係避唔開。

「親戚問答大賽」依然繼續。

「都係咁啦。」我無奈答咗一句，內心同時已經預料四姨媽將會講起佢個仔宏表哥。

「唔好俾自己太大壓力啦，讀書嘅嘢慢慢嚟，得閒去下旅行輕鬆下囉。」四姨媽拍一拍我膊頭，然後就行過我去咗同我老母傾計。

我有少少意外。

估唔到呢場對話居然喺無提及過「宏表哥」呢個關鍵字之下完結咗。

係改變。

我發現而家所經歷嘅，同頭先我經歷過一次嘅嘢出現咗改變。

我諗翻起頭先喺結界入面單飛曾經講過，我哋所有人經歷過嘅死亡遊戲，將會好似南柯一夢咁出現喺每個人腦入面。

如果係咁嘅話，其實大家多多少少應該都會出現一啲想法嘅唔同。

我睇住而家所有發生嘅事，腦入面有個大概嘅假設。

好有可能，其實結界嘅發動，就係從我同婆婆產生接觸嘅一刻開始。

換言之，所有喺我捉住婆婆隻手發生嘅事，都只係存在於大家腦海，或者誤以為係發夢嘅當中。

到而家出翻嚟真實世界，一切亦都係從我捉住婆婆隻手開始翻。

但係因為有咗腦入面嘅一切經歷，到而家翻到嚟現實世界，大家嘅行為先會同結界之中嘅有唔同。

如果真係咁，某程度上就達成咗公公嘅期望，就係打破假嘅「家和萬事興」，等大家可以暢所欲言之後，反而可以開心見誠。

就係呢個時候，門外傳嚟咗一啲聲音。

「咯咯」。

係敲門聲。

我咃全屋嘅人不若而同咁望向門口。

「阿媽，我同阿麗嚟咗喇。」

一把響亮嘅男人聲從門外傳出，我一聽就認出呢個係五舅父。

一聽見佢把聲，我就諗翻起佢同河馬喺遊戲入面可歌可泣嘅愛情故事。

說時遲那時快，五舅父同河馬已經打開咗門準備入嚟。

佢兩個十指緊扣，一齊想走過大門。

可惜因為佢兩個都係加大碼同加加大碼嘅份量，所以搞咗一輪之後，都係唯有前後腳走入嚟。

「四家姐，新年快樂。」五舅父第一時間唔係走向婆婆，反而先向近門口嘅四姨媽打招呼。

「屎揸啫，祝你先連塊肉，幻視如衣。」河馬好親切咁走上前，同四姨媽攬一攬。

「大家咁話啦。」四姨媽笑住掩一攬河馬。

從四姨媽嘅笑容，我睇得出，其實佢完全唔明到底河馬講緊乜。

「媽，新年快樂啊，身體有冇好啲啊？」五舅父就首先行埋婆婆身邊，而我都讓開少少，俾個位佢同婆婆傾計。

婆婆都只能夠「哦」咗兩聲，都算係應咗五舅父。

河馬呢個時候亦都走埋咗婆婆身邊，拎出一盒包好嘅禮物遞俾阿婆，再笑住同佢講：「嚟份奶末喺喎爹柒街買，巧溶，巧綿怪，嘻望奶奶梨中醫。」

婆婆拎住份禮物，不過而家嘅佢並無能力打開，所以我喺側邊出手幫佢慢慢拆開禮物包裝。

不出所料，呢份禮物，就係五色靈芝。

「我哋就唔太識得買禮物，不過睇廣告講，中風之後食下靈芝會好得快啲，又成日見阿米雪姐賣廣告，所以就買咗呢盒五色靈芝嚟囉。」五舅父笑住咁講，表情之中又有一點愧疚，「以前我都激得你多喇，而家四十幾歲人咪扮下生性囉。」

「係吖，奶奶梨計住廿廿意射，自己射環仲可以啤人射，射得多，腥體巧。」河馬從旁好親切抱一抱婆婆。

婆婆雖然無講任何說話回應佢哋，但從表情睇係滿意嘅。

送完禮之後，五舅父同河馬就加入咗我老母老豆同四姨媽嘅傾計圈。

話口未完，大門再次傳嚟敲門聲。

喺嘈吵嘅環境，其實都唔係好聽得出係邊個，不過一打開門，我就見到係三姨丈同三姨媽一家。

今日著咗唐裝衫嘅展朋同展鳥率先入場，機械式咁同我哋所有人講：「新年快樂、蛇年吉祥、萬事勝意、身體健康。」

然後佢兩個就走咗去婆婆面前，三姨丈同三姨媽見到就跟埋上去，由三姨媽對阿婆講：「媽，見係新年，展朋展鳥練咗首歌做禮物送俾你。呢首歌呢，唔容易唱㗎，不過佢哋最近入咗英文歌詠團，所以都表演下啦。展朋展鳥，唱歌俾婆婆聽。」

展朋展鳥兩個聽到媽媽一聲令下，即刻企到直一直，但係同時眉頭一皺，其中展朋擰轉頭用佢以為細聲但其實全個廳嘅人都聽到嘅聲同三姨媽講：「點解要唱歌啫？乜本身唔係背詩咩，做咩頭先無啦啦要我哋改呢？」

「媽咪諗諗下，首詩唔係太好。今日新年，唱歌啦，唱歌好意頭啊。」三姨媽快快手將展朋轉返個身向婆婆，然後主動拍手講：「嚟啦，我同你哋一齊唱啦。」

展朋展鳥聽到，唯有向婆婆鞠個躬，跟住三姨媽斷斷續續咁唱出：「Happy new year to you, happy new year to you, happy new year to yo~u, happy new year to you。」

一唱完，三姨媽首先大大力拍手，然後用手肘推咗佢老公一下。

三姨丈即刻笑住同大家講：「無錯啦，展朋展鳥喺英文歌詠團嘅成果都有目共睹啦。咁其實佢哋仲有練埋復活節、重陽節同埋中秋節版，咁大家可以期待一下，去到下個節日就有得聽㗎啦。而家呢，展朋展鳥，幫手送禮物俾婆婆先。」

展朋展鳥聽到，即刻拎住個紙袋去到婆婆面前，然後從中拎出咗一盒嘢俾婆婆。

咦，咪住，又係五色靈芝？！

呢邊婆婆仲拎住份禮物，敲門聲又再一次響起。

今次到場嘅，係六舅父。

「媽，新年快樂啊。嗱，呢盒嘢送俾你嘅。」

六舅父一走入屋，第一時間拎住個膠袋嚟到阿婆面前。

見到佢，我心裡面有少少緊張。

我都諗緊，如果佢又拎盒樂家杏仁糖出嚟，會唔會全家又再玩多次啲遊戲呢？

但係估唔到，當佢打開膠袋之後，拎出嚟嘅居然，又係一盒五色靈芝。

「嘩！阿六，你轉死性啊？」五舅父口直心快咁笑住講。

「人一世物一世，一年一度都唔爭在嘅。」六舅父懶係無所謂咁，自己坐埋咗一邊睇電視。

雖然目前婆婆已經收咗三盒五色靈芝，但係見到大家呢個改變，總係好過之前。

望住呢一切嘅發生，我個心暗暗高興，替公公嘅夢想終於成真而開心。

「阿媽，我啊，上嚟同你拜年啦。」
呢一把中氣十足嘅聲音，唔洗諗，係大舅父到。

大舅母同大舅父大搖大擺咁樣入咗屋，行到去婆婆身邊講：「送份禮俾你，祝你身體健康，笑口常開。」

當佢哋拎咗份禮物出嚟，六舅父一頭霧水咁問：「咩嚟㗎？啲雞腸我睇唔明。」

「呢個係……」

大舅父正準備回答，無諗過室內嘅五舅父、河馬、四姨媽、我老豆老母仲快佢一步講：「呢啲係法文，呢個係法國礦泉水放濕器，不過就Made in China嘅。」

大舅父打咗個突，好疑惑咁望住大家：「你哋點知㗎？」

「唔知呢，好似唔知喺邊度見過囉。」五舅父、河馬、四姨媽、我老豆老母幾個對望一眼，大家都有少少好奇互相係點知道。

我作為旁觀者，真係覺得呢件事好奇妙。

就喺呢個時候，電話響起咗，由於我最近電話，所以我走咗過去聽。

「喂？」

「喂，健仔？」

「二舅父？」由於最後係我同二舅父比賽，所以佢把聲我非常容易就認得。

「嗯，我有少少唔舒服，所以今日唔嚟喇，你幫我同婆婆講聲新年快樂，我哋下次食飯再見啦。唔該哂你啊健仔。」二舅父好平和咁交待完，就咁收咗線。

我不期然再次諗起遊戲嘅事。

或者，二舅父經過呢個遊戲，佢自己都需要時間消化一下同屋企人嘅關係？

都係嘅，都咁大個人，有啲嘢，其實無必要強迫自己違心咁做。

好似而家我眼前呢班親戚，有改變咪幾好囉。

之但係，咪住。

我走近佢哋呢班傾緊計嘅親戚，開始聽下佢哋傾咩。

「嘩，展朋展鳥啊，最近參加咗印尼印象派繪畫比賽幼年4月出世組嘅亞軍同季軍啊！衝出國際啊，幾犀利啊！」

「你講起呢樣呢，阿宏佢啊，喺公司今年個業績都好好，仲拎咗新人獎。我都叫佢唔好太高調，但係佢份人缺點就係太勤力囉，唉，所以佢今年又返唔到嚟過年啊陰公。係呢……阿健仔佢拍拖未啊？」

「未啦，邊有女仔鍾意佢啊？又懶散，家務又唔做，似足佢老豆咁啊。」

「四妹，唔緊要啦，返唔到嚟我買啲英國嘢俾你，等你當係陪緊個仔囉。我呢度啊，有盒英國茶葉，唔係個個買到。我用咗成幾千蚊，先搶到一盒翻嚟， 一陣每人飲翻杯茶先好走啊。」

「禾hi身震多神日忍茶喎，嗰個賴屎之茶，巧巧味。」

「哇，你嗰啲嘢，成杯都係化學週期元素表，飲少啲啦，你望下你老公個肚腩大到！一陣記得飲我英國茶添啊，包保你鍾意。」

「飲茶好啊，嘩，阿媽呢盒放上格床嘅瑞士糖真係好鬼甜，一陣要整杯茶沖沖口。」

親戚之間，轉眼間已經故態復萌。

我望住同聽住佢哋呢啲無乜營養價值嘅對話，無奈咁嘆咗一口氣，但同時又明白嘅。

佢哋都做咗幾廿歲人，要改，都唔係一朝一夕。

或者今日改少少，慢慢改下改下，遲早都會變得……無咁乞人憎嘅。

只不過，對住呢班親戚，諗起公公嘅願望應該無咁快可以實現，內心都覺得有少少可惜。

諗起公公，我望返向我身邊嘅婆婆。

「若世界太趕只想再回到初夏的夜裡」。

唔知點解，有一句歌詞跑咗入去我個腦入面。

當歌詞出現，我眼前呢一班親戚嘅多餘廢話，霎時間好似靜音哂。

我所專注嘅，就係淨翻低我身邊嘅婆婆。

「若世界太趕只想再回到初夏的夜裡」。

係喎。

我企咗起身，走向好投入咁同親戚傾計嘅老母。

「我想帶婆婆出去行個圈。」我講。

「你得唔得㗎？你識推輪椅？」老母有少少擔心。

「我可以嘅，我成日同朋友打機玩『Mario Kart』。」我拍一拍心口講。

老母應該聽唔明我講咩，不過三四姨媽已經繼續一輪嘴咁講嘢，所以我老母求其點一點頭，當係批准咗。

我暗地裡叫咗一聲，然後就出手推住婆婆嘅輪椅，喺無乜人留意到之下離開咗間屋。

我慢慢推住佢，迎住走廊之間嘅少少涼風前行。

呢個時候，我哋經過隔離屋，屋內仲係傳出緊少少臭氣。

我見婆婆塊面轉向咗呢間屋，我就同婆婆講：「你放心，你除咗有家務助理陪你之外，我哋都喺你身邊，你唔會孤獨。」

我輕輕拍一拍婆婆，開始講下我大學所有發生嘅事，例如係上莊失敗、追女仔唔成功直接俾人friendzone、做兼職賺咗人生第一份人工、仲有而家讀緊咩科、對將來有咩打算。

我唔知婆婆聽到幾多，明到幾多，但係我一路講，心入面一路都有一種前所未有嘅暢快感。

嗯，就係咁啦。

世界太趕，我又點解要改變個世界呢？

世界唔會因為我改變。

但係，我可以自己改變，一個人回到初夏的夜裡。

所以，無論親戚們最後有冇變，重要咩？

我推住婆婆走過公屋大廈嘅大門，望到管理員嘅位置空咗。

嗰度有一個好核突嘅手寫牌，上面寫住：「外出工作，如有利是，請放枱頭，多謝合作。管理員單飛字。」

作為鎮魂師，估唔到連新年利是都無得逗，我諗單飛應該好忙。
（如對鎮魂師故事有興趣，歡迎閱讀正傳故事《香江鎮魂師》https://www.penana.com/story/148044/）

我笑咗一笑，繼續推住婆婆離開大廈。

我哋沿途走過公園、馬路、商場，見盡好多唔同嘅人。

有一家大細、有單身麻甩佬、亦有喺公園捉棋嘅老人家。

呢一段路，令我諗翻起細個，由婆婆拖住我手走過呢一段路嘅往事。

「以前，你拖住我㗎；今日，到我做翻你司機。」我笑住講，慢慢講翻好多以前同婆婆發生過嘅往事。

記憶，呢樣嘢好有趣。

當我唔提起，我會以為自己已經忘記；但係當我刻意發掘，我先發現原來重要嘅事情一直都在心頭。

我哋最後行到街市。

我跟從自己記憶，推住婆婆喺街市入面左兜右兜。

終於，去到去到我心目中嘅目標。

無錯，係砵仔糕檔。

呢個地方，盛載咗我同婆婆非常美好嘅回憶。

我諗住帶婆婆嚟重溫一下往事，所以先有呢個諗法去嚟到呢度。

但係行到嚟呢個位，我就呆咗咁企咗喺度。

因為我無諗過，原來砵仔糕檔早已經執咗。

而家呢個位，變成咗一個「自提點」。

我偷望咗婆婆一眼，佢依然木無表情，都睇唔出佢到底明唔明白發生咗咩事，或者個心有冇任何嘅失望。

但係，我要承認，我有啲失望。

我明白，街市店舖執笠，已經係一個常態。

但係我失望在於，我同婆婆最美好嘅回憶，竟然不知不覺間已經消失咗，而我竟然從來無呢份警覺性。

最後，我喺唐記包點買咗一個七蚊嘅砵仔糕，然後同婆婆去咗公園度坐。

「嘩，呢個好難食啊，咬落去呢，實的的，啫喱糖咁。而且仲有咁多紅豆……」我一邊怨，一邊無奈咁望住婆婆。

婆婆無出聲，安靜咁用雙眼望住我手上嘅砵仔糕。

「婆婆啊，其實，係咪所有最好嘅嘢，都只會發生喺以前，喺回憶裡面？」
我放低咗砵仔糕，若有所思咁問。

「我細個，覺得大個所有嘢就會變好，又或者自己就可以令到所有事都同自己想像嘅一樣。所以，我好想快啲努力咁變成大人。但係，到咗大個，我先發現原來好多美好嘅嘢，都留咗喺以前。而呢個『以前』，唔似得好似大人，唔可以靠『努力變成』。呢個『以前』，係點追都追唔返嘅。啊啊啊啊啊啊，到底可以點啊？點解做一個大人咁難啊？」

我講到呢度，對從前嘅掛念、內心嘅失望可惜，全部都化成咗眼淚流出。

我唔想自己咁失禮，所以想喺褲袋拎出紙巾抹一抹眼淚。

我摸唔到紙巾，但係摸到另一樣奇怪嘢。

係一封利是。

但係，照計頭先我未逗利是就走咗出嚟。

咁呢封係咩嚟呢？

我伸手將利是拎咗出嚟。

我認得，呢封係結界入面，婆婆俾我嘅「獎勵」。

乜發生喺結界入面嘅唔係幻覺咩？

咁呢封又係咩嚟呢？

我一邊諗，一邊感覺到利是封入面嘅嘢手感有啲特別。

我唔考慮得太多，直接就將利是打開咗。

我發現，係一張即影即有相。

相入面，係我喺結界入面攬實咗婆婆喊嘅一刻。

我反轉張相，見到背面寫住咗「家庭」兩個字。

呢兩個字，我認得，正正就同我御守上面刺繡上去嘅「家庭」兩個字一模一樣。

我望住呢張相，心入面浮現咗一個答案。

一個，對於我頭先個問題嘅答案。

「其實，係咪所有最好嘅嘢，都只會發生喺以前，喺回憶裡面？」

我伸手，攬住咗我眼前嘅婆婆。

就同張相入面嘅情境，一模一樣。

此時此刻，最好不過。

（全故完）

＝ ＝ ＝
本身好想打埋篇完故感想，但係真係寫完呢五千幾字，真係人都謝哂。
歡迎大家睇完故事，寫翻幾粒字嘅感想俾我先，
好想知大家睇完呢個鳩得嚟又鳩唔哂嘅故事有咩想法
我聽日先再補翻少少對呢個故事嘅感覺同想法

簡單多謝所有由年初一陪我到今日嘅讀者，
有咩聽日再講
早抖

一入嚟就睇到大結局live

呢個故真係好感動
扭得好好
一開始以為係生存遊戲系故事，打爆大boss就完，所有嘢回覆正常

點知臨尾先發現原來係教仔嘅故事，真係一睇就諗起屋企人

最後有冇講過四姨媽一開始送咗咩俾婆婆

睇到啲眼淚自動流出嚟

五色靈芝植入廣告

2舅母表姐同隻雀呢

結語

各位巴打絲打好，終於，嚟到故事完結嘅一日。
衷心地講，無諗過個故會寫咁耐。
最初，一切都只係年初一拜年無無聊聊諗起嘅一個小主意。
嗰時走過7-11，見到店員堆咗成棟樂家杏仁糖，我心諗，拜年真係食到咁多？你送俾老人家點食啊？

無錯，就係呢個咁簡單嘅想法，成為咗呢個月大家睇到嘅呢一個故事。
所以喺度要先講聲唔好意思，因為今次嘅故事同以往唔同，過往都會有好詳細嘅計劃去諗每一個部份，但今次相反地真係逐日寫，甚至係放工一路諗然後翻屋企就開始爆字。
所以，有時瘋狂寫嘅時候，係會錯過咗一啲設定，又或者錯字漏字之類，如果呢啲嘢影響咗大家觀感，先講聲唔好意思。
係攰嘅，只不過今次呢個過程同樣令我覺得好正。
每日睇大家留言，微妙對故事作出少少改動，呢種間接嘅互動、仲有每日俾大家加爆更爆文唔停得手嘅狀態，有少少似我幾年前開始寫第一個故事嘅感覺。
所以呢個任由我發揮嘅故事，的確令我重拾翻寫作嘅種無拘無束嘅本質。

好，講翻故事本身。
我知大家都視呢個故事為一個「鳩故」。
其實起初我自己都係，所以我亦都毫不猶豫地派膠。
只不過，學樓上有某位巴打所講，「估唔到一個『鳩故』都會有文有路，仲有洋蔥」。
嗯，呢個就係今次故事我想做到嘅目標。
我想寫一個大家睇得舒服開心，但同樣可以有共鳴同諗到少少嘢嘅故事。

有別於先前嘅《尖東遊戲》、《灣仔遊戲》、《長相廝殺》之類，今次呢個故事嘅腦細胞用少好多。
但係相反，投放嘅感情就多咗。
呢份感情，亦源於我對自己公公婆婆嘅情感。

有人問，點解主角設定咁怪。
明明一開始好討厭親戚，但係好似又同婆婆好好感情。
唔知大家覺唔覺得矛盾，不過對我自己嚟講就好合理，因為呢個正正就係我自己。
對某啲親戚，我有時真係有一種講多句都嫌多嘅感覺（都係某啲啫，有啲都好好，無錯，我都係戴定頭盔先）。
但係同時，我係鍾意自己公公婆婆嘅。
可能亦都係因為咁，所以寫到去公公婆婆嘅位，放入嘅感情特別多，亦都因此令大家多多少少共鳴多啲。

呢個故事想講咩，相信我唔需要再重複，或者亦都留俾大家自己感受一下啦。
我覺得就算你唔認為個故帶俾你任何嘢，但係至少享受咗每日睇鳩故嘅片刻快樂，咁都已經好好。

最後想講兩樣嘢。
一、關於呢篇故事，我其實仲有嘢想講。不過，因為講嘅嘢比較個人，我就會轉翻去IG講啦。所以，無錯，又係賣廣告時候。歡迎大家Follow IG，以後出故大家就可以第一時間知道～
IG：windblowssilently
https://www.instagram.com/windblowssilently/

二、一如以往，完一篇故，又會休息一輪，再上嚟寫一個故事。回顧翻，原來我上一次寫連登故已經係接近一年前。今次翻嚟，可以有咁多巴打絲打留言同參與討論，感覺好好，多謝每位從年初一陪我到今日嘅讀者。

感謝每位曾經留言支持，又或者無留言但係默默睇到呢度嘅大家。
期待，下一個故事再見大家。

我係默颺。
各位，字海再見。

係喎，要答大家兩個好多人問嘅問題。

一、到底四姨媽送咗咩？
呢個問題，其實故事入面都俾咗非常非常唔顯眼嘅答案。
不過可能唔太明顯，所以大家唔覺。
大家有冇留意，四姨媽一開始係點樣登場？
係廚房。故事入面提過，佢係煎緊糕。
同時間，諗翻交換年貨嗰一個回合，四姨媽送嘅嘢其實一早俾人清哂，所以佢張紙上嘅嘢係連食都唔洗食。

咁到底佢送咗咩呢？
如果以我自己想法再加上四姨媽人設，其實我內心係諗，佢每年都會自己學婆婆整糕嘅方法，然後送俾婆婆，再代婆婆煎俾大家食。

呢樣嘢，我都係從我親戚身上學。
因為好簡單，老人家，其實你送咩俾佢，佢都未必實際有用。
所以有時送上服務，仲有啲你可以煮埋俾佢即刻食嘅，反而更加適合。

所以，可能無咩驚喜，不過呢個係我對四姨媽送咩嘅內心設計。

二、二舅母同表姐仲有隻雀係咩一回事？
二舅母喺全個故入面，唔計死人嚟講，存在感可以話係最低嘅一個。
佢嘅設定，本身係想用側寫，俾大家理解下二舅父性格。
二舅父表面斯文講道理，但係所有生死關頭，其他親戚都會真情流露，對自己另一半或者親人有感情，但唯獨二舅父完全無同屋企人有過對話。
可想而知，二舅父同自己家人關係一樣唔好，你可以當佢係因為細個從家庭之中無乜溫暖，所以即使大個自己成家，其實一樣唔識得同自己家人建立關係。
所以，二舅母對於成件事嘅發展，根本就無話語權。
佢某程度，就好似一個外來人一樣，就算關係到生死，但係佢都無得為自己生死揸主意。

咁所以喺遊戲入面，佢成個人都近乎抽空，任由件事發展，因為反正二舅父唔在意佢感受。
但亦都因為呢種抽空，二舅母最早留意到窗外隻雀係靜止狀態。
正如故事講，因為結界，其實所有嘢都係假。
咁呢隻雀，可以當係咁啱主角健仔同婆婆接觸而產生結界嘅一刻，同時帶入結界嘅影像。
所以，呢隻雀一直無任何移動。

當眼前一切本身都唔正常，而呢隻雀更反映到狀態嘅奇怪，作為一個一直觀察緊隻雀嘅二舅母，多多少少會聯想到自己未必喺正常世界。
所以換言之，佢會可以諗到，話唔定其實係可以「返去」本來世界。

同樣道理，放喺表姐身上。
佢喺設計之中，代表咗下一代。
因為無機會同時間寫多啲，但其實佢都反應一樣嘢，就係二舅父不滿公公婆婆，但其實到佢做父母，佢同樣無成功令表姐覺得佢係好父母。

咁喺遊戲當中，表姐都係處於抽離角色。
從表現上，我會幻想佢同媽媽相對親近，亦都會明白媽媽嘅處境。
所以，佢同二舅母可能會有直接交流，又或者佢會留意到二舅母留意嘅嘢。
因此，佢亦都會留意同思考到隻雀嘅狀態。

特別係前文講過，表姐係識得「無量空處」。
代表佢都會睇下動漫，所以對於呢啲特殊情況，可能比佢阿媽更容易理解得到。

呢個解釋，就係我自己嘅想法。
本身想留白一下，俾大家估下，不過見大家問咗幾次，我就嘗試交出我嘅答案。
希望可以為大家提供多一個角度去睇呢個故事

煎糕果段原來係為咗主角先專登整

眼淚終結者：原來婆婆係撞聾，聽唔到健仔講嘅嘢

健仔同表姐重甜未出
Btw好好睇，多謝樓豬