因為一盒樂家杏仁糖，中咗風嘅婆婆同全家開年

二舅父好似同全家人都有仇咁
二舅母同表姐見到自己老公/阿爸咁都無反應？

打文中大家稍等

問得好, 睇落去就知

推下先~

（16/2 補更）

二舅父嘅變臉同發言，令我同大舅父一時間無言以對。

我好奇咁望向二舅父身後嘅二舅母同表姐，佢哋反而無咩大反應。

到底係因為佢哋都好滿意二舅父嘅所作所為可以救到佢哋一家，定係佢哋一早都知道二舅父嘅真面目？

我無助咁望向自己老豆老母。

我見到老母個樣好擔心咁望實我，而老豆就攬實咗佢膊頭嘗試安慰佢。

望到佢兩老咁嘅樣，我知道而家可以救到佢哋嘅就只有我。

只不過，而家始終都係大舅父嘅回合，所以一切都要首先睇咗佢嘅表現先再講。

大舅父從鼻孔中不斷噴出氣，睇得出佢都好緊張。

大舅母呢個時候行到佢身邊，捉一捉住佢隻手，同佢講咗一聲：「唔洗驚，信自己就得。」

呢句說話，好似鎮定劑咁令大舅父稍為冷靜。

佢深呼吸一口氣，之後指實二舅父講：「你條反骨仔！我話你知，人善天不欺，我今次一定過到關！到時你就知，到底邊個冚家剷！」

大舅父望實眼前嘅年盒，大喝一聲：「呢一格，係『有』！」

「『有』。好，呢個就係你答案。咁答案就係……」婆婆一手揭開嗰一格年盒嘅蓋。

空空如也。

大舅父第一時間捉實咗身邊嘅大舅母，啞口無言咁望住佢。

大舅母搖一搖頭，無奈咁笑咗一聲，伸手摸一摸大舅父塊面講：「你唔需要其他人認同自己，因為你本身已經係一個好好嘅……」

鮮血，好似煙花綻放。

剎那間，大舅父成個頭成塊面都係血。

「啊！！！！！！！」大舅父對住自己老婆嘅屍身不斷咁咆哮。

我諗起一套唔知幾時睇過嘅紀錄片，係講關於獅子嘅族群。

紀錄片入面，有一幕係一隻母獅死咗，一隻公獅就走到去佢身邊，望住個天係咁狂叫。

就算人類聽唔明獅子講咩，但係從佢嘅叫聲之中，都可以感受到嗰一份悲憤。

而而家嘅大舅父，就同嗰一隻獅子一模一樣。

大舅父淚流滿面，攬實咗大舅母嘅屍身。

成屋充滿咗呢份愁雲慘霧，無人夠膽喺呢個時候講半句嘢。

唔知大舅父喊咗幾耐，只係直到有一刻，佢嘅叫聲突然停止。

佢慢慢將大舅母嘅屍身放咗落地，然後企翻直身。

佢從頭到上半身都沾染哂大舅母嘅血，所以望住大舅父，只係見到一片血紅色，就連佢個樣都睇唔清楚。

大舅父個身搖搖晃晃咁樣坐低咗喺我側邊。用佢嗰對染滿鮮血嘅手捉住我雙手，然後講：「健仔，你頭先都聽到啦，你二舅父想我哋死哂，我哋中咗佢計。而家無辦法，我哋唯有合作比佢更快殺死佢，先有可能救到自己。我係蠢，但係我都識計數，我知我捱唔過下一回合。所以，跟住落嚟要靠你幫我報仇喇。」

大舅父一邊講，一邊伸手㩒住年盒盒蓋，向住同頭先相反嘅方向轉咗四格。

換言之，又去翻我哋之前十個回合嘅嗰一個熟悉嘅格。

「係呢格喇。」大舅父望住我，「我俾你輕鬆過關先，之後，再做死二舅父。」

我唔明「做死二舅父」係咩意思，不過既然大舅父將遊戲還原基本步，我都決定快手答咗呢一題先。

當我答中過關之後，我望向大舅父，想聽下佢所講嘅「做死二舅父」係咩意思。

「好簡單，你一陣就好似頭先二舅父咁樣，求其轉一格俾佢，等佢答唔出，點都死個人先。」大舅父講。

我望住年盒，再望一望異常冷靜嘅二舅父，腦入面諗到一個比較壞嘅可能性。

「我記得以前我老母講過，二舅父不嬲都好醒，好讀得書。講真，最壞情況係可能佢已經一早背好哂十二格嘅位置，之後再引我哋落搭，等我哋鬆懈唔記得咗啲位置就陰我哋。所以我哋無論轉邊一格俾佢，佢都可能有信心可以記得到。」我擔心咁講。

「吓，仆街吖。係，佢由細到大都好讀得書，所以阿爸阿媽先錫哂佢。估唔到，條反骨仔而家居然食碗底反碗面，又唔諗下當年我都有份出去打工俾屋企，佢先有錢讀到上大學咋……」大舅父憤憤不平咁講，講講下直頭提高埋聲線指住二舅父嚟鬧，「如果唔係你死好彩天生讀書命，出去打工賺錢嗰個就係你！」

「哈，好彩？不如試下掉轉啊！當全家人永遠都一齊玩、一齊食，而你自己一個人喺屋企讀死書、然後好成績就係俾阿爸阿媽拎嚟同親戚哂命嘅時候，你覺得呢啲就係『好彩』？」二舅父冷笑一聲作出反駁。

「哈哈！你而家怪阿爸阿媽供你讀書？你唔係讀到書，邊有今日咁嘅成就？你仲唔係死好彩？」大舅父反駁佢個反駁。

「好彩？哈，如果有得揀，我就有把握肯定我嘅人生唔會係咁。你咪又係讀唔成書，結果出去打下工，轉眼就做埋老闆，條路起碼自己有得揀。邊似得我，日日都聽住你同阿爸阿媽講咩『我哋好辛苦養大你啊，記得孝順啊！』。想當年，我連讀咩科、做咩工都無得揀啊！你班人呢？個個輕輕鬆鬆無王管，日日放學就出去走廊同鄰居玩、到中學就放學打波拍拖。我呢，我日日都要翻屋企讀書啊！你哋幾兄弟妹各有各熟，我呢？我最熟就係Phy chem bio啊！」二舅父一手拎住自己眼鏡，「啪」一聲掉咗落地下。

喺大舅父同二舅父數緊陳年恩怨嘅時候，佢兩個嘅對話令我靈機一觸。

「好彩？哈，如果有得揀，我就有把握肯定我嘅人生唔會係咁。」

好彩、有得揀？

我望向大舅父，好興奮咁講：「有啦！就算二舅父記得哂所有格數，我都有方法！」

（未完待續）

＝ ＝ ＝
Penana距離加更目標不遠，歡迎大家過去嗰邊幫下手
逐篇like哂又得, 因為每篇都計數，所以一人可以貢獻到廿幾三十個like，大大加速

＝ ＝ ＝
下個加更目標：1200正評
Penana 加更目標：500 likes
Penana連載link：https://www.penana.com/story/173167

最後留低埋樓主IG，大家有興趣可以去嗰邊催迫樓主加更，仲有得睇埋其他故事相關嘅嘢，IG限定㗎
IG : windblowssilently
https://www.instagram.com/windblowssilently/

默颺讀者交流TG group（快啲入嚟討論劇情同掌握故事更新消息！）：https://t.me/+jD_eY63Yb5I0MmQ1

大家等待更新嘅時候，放低其他舊故嘅Link 俾新讀者慢慢追翻上個故

又或者如果大家鍾意喺連登睇 起我底一樣搵到以前舊故㗎

【穿越/愛情】我同鍾意咗十一年嘅人表白，佢竟然跳海死咗
Penana：https://www.penana.com/story/63218

【寫實/愛情】（出咗實體書啦！）我專門幫人擺分手和頭酒
Penana：https://www.penana.com/story/66301

【科幻/懸疑】你以為Flycation呢件事真係咁簡單？
Penana：https://www.penana.com/story/76137

【初戀/愛情】《副校長發現我寫甜故，竟然送一段初戀俾我》
Penana：https://www.penana.com/article/635866

【暴走/搞笑】《求婚嗰日-我發現我女朋友鍾意食屎》
Penana：https://www.penana.com/story/90310

【人性/鬥智】《尖東遊戲//坐上尖沙咀開出嘅列車之後，我被送咗入一場死亡遊戲》（出咗實體書，可見於各大書局！）
Penana：https://www.penana.com/story/99588

【童年/二創】《我是出木杉，我要對大雄復仇》
Penana：https://www.penana.com/story/99588

【人性/鬥智】《灣仔遊戲》（已有實體書，可於網上訂購！）
Penana：https://www.penana.com/story/125647

【關係/攻心/多重反轉】《長相廝殺》（本年最新出版實體書！）
Penana：https://m.penana.com/story/155427

唔通係扮轉兩格，實質轉三格？

轉到風扇咁快，賭運

二舅父嘅恨牽強咗啲。
男主係唔係會大力一轉，快到根本睇唔到

其實主角可以靜雞雞同大家講有人救 拖時間做場戲咪得 邊個唔想大家比人救就係鬼

一家人可以坐埋枱食飯嘅恨基本上好難去到想對方死不過睇故由佢啦 唔大影響

Live咗，留言支持

其實都唔係㗎，去轉酒樓都聽唔少。
好多同枱成飯一樣針鋒相對，句句有骨好似想激死啲屋企人咁
我成日都覺得呢啲傳統飯局係最精彩

多謝20879絲留名支持

二舅父係一個甚少被老母提及嘅人。

從細個開始，我對親戚嘅認識，就係從老豆老母嘅描述之中慢慢明白嘅。

例如係，大舅父為人疏爽，不過就鍾意話事同點人做嘢；

三姨媽好鍾意同人比較，份人好小心眼，最鍾意就係出風頭；

四姨媽好鍾意照顧人，好後生就已經開始拍拖，係全屋戀愛經驗最豐富嘅人；

五舅父份人善良而且好易話為，經常被三姨媽四姨媽同我老母點佢幫手做嘢；

六舅父非常之唔痴家，好似中學就已經群埋啲壞同學，後來好彩轉好咗，不過懶散性格從來無變。

呢啲關於親戚嘅逸事，我都係從老母口中講述佢嘅青春往事嘅時候慢慢收集翻嚟嘅。

至於二舅父呢，我就真係無乜聽佢提起過。

唯一一次有印象嘅呢，就係我中四溫緊Physics嗰陣時。

當時我揀科無耐，對科目都唔係太適應，所以讀起上嚟有啲吃力。

我老母知道之後，嗰時就講咗一句：「讀書嘅嘢，問下你二舅父啦，話唔定幫到你。」

「二舅父？」喺我印象中，通常講到讀書，我老母都會叫我問四姨媽嘅宏表哥，好少可係提起二舅父。

「無錯啊，二舅父係我哋全家讀書最叻嗰個。而且佢當年係讀理科，所以實幫到你。」我老母咁講。

「唔怪得佢平時咁靜，原來係個『學霸』。」我恍然大悟。

「咩係『學霸』？」我老母皺眉一問。

「即係讀書好勁好叻嘅人囉。」

「哦……咁佢都係嘅。我記得細個去拜年呢，通常阿爸阿媽都唔會理我哋其他兄弟姊妹，淨係會叫阿二哥去同親戚打招呼，然後又講下佢考試有幾勁，成績有幾好咁。就算係平時啊，二哥都會自己一個人溫書，唔會同我哋玩㗎。」

「嘩，咁慘？」我幻想緊所有兄弟姊妹玩緊，二舅父自己一個溫書嘅情境，當時嘅二舅父應該都幾孤單。

「係㗎。有一次六哥唔知死，走去撩埋二哥同我哋玩，哈，俾你公公知道咗，鬧咗六哥一獲，然後再拎衣架打到二哥飛起添啊。之後，我哋咪無人敢撩佢玩囉。無計啦，二哥呢啲讀得書嘅人，對於你當年要當兵嘅公公嚟講，根本就係難得到飛起啦。所有有時我都幾感恩有二哥係度，因為有佢咁叻幫手頂哂啲期望，我咃班細佬妹先可以自由自在。」老母有啲慶幸咁講。

＝ ＝ ＝
二舅父對屋企嘅憎恨到底有幾多呢？

我真係難以想像，亦相信可能仲有好多我未發現嘅嘢。

只不過，我肯定嘅係，佢應該比我所想像中仲要聰明。

所以，記哂十二格有冇嘢，或者對佢嚟講真係唔係一件難事。

既然係咁，要贏佢，一定要兵行險著。

頭先聽完大舅父同二舅父嘅對罵之後，我心入面浮現咗一個計劃。

呢個計劃，就係用「好運」去剋制二舅父嘅實力。

方法好簡單，就係我將會使出我細個玩爆旋陀螺嘅實力，去將呢個年盒轉到好似「風火輪」咁快。

就算二舅父再可以記得啲格有啲咩，但係當個年盒快到咁嘅時候，我肯定佢連認都認唔到邊格打邊格。

咁嘅話，我哋就會有一絲生機。

只不過，呢個方法，亦都會有一個好嚴重嘅缺憾。

就係損人不利己。

當個年盒轉到咁嘅時候，到翻我去估嘅時候，我同樣會完全失去哂方向唔知點估。

我應唔應該同二舅父攬炒呢？

我諗起最近我同班Friend好興玩緊嘅Pokemon Go。

入面有一個經常被我哋討論嘅制度，叫做「先攻」「後攻」。

詳細就唔多講啦，但係重點係，攻擊嘅次序，好影響到勝負。

如果以目前形勢，我使出「風火輪」式轉法嘅話，二舅父失手機會會相對提高。

目前我同二舅父都係三人家庭，用最壞情況去睇，假設我同佢之後每一個回合都估錯，咁由於我搶佔先機令佢先死人過我，所以理論上我生存機會高過佢。

咁當然，過程之中都只係估「有」同「無」，所以亦有機會可能係俾二舅父搏中咗，咁我嘅如意算盤就打唔響。

只不過，運氣嘅嘢，真係無得講。

就正如二舅父天生係讀書材料，偏偏就成為咗家庭之中最背負期望同壓力嘅一個，仲令到佢無機會同家人連繫，孤單咁度過佢嘅童年。

呢樣嘢，又可以怪邊個呢？

相反地又好似大舅父講，喺佢眼中，二舅父可以安然喺屋企讀書，阿公阿婆俾好多資源佢，反而大舅父就要細細個出去捱世界。

到底家庭中嘅「幸福」與「不幸」，又係邊個可以落到定案呢？

唉，咪住，我唔應該諗咁多無謂嘢。

我望實個年盒，認真咁思考咗片刻，然後慢慢伸出手。

我下定咗決心。

我，決定要使出「無敵風火輪」，轉到二舅父嘅記憶力都無用。

我一手㩒住年盒蓋，然後用力反手一擰。

年盒立即轉到「發發」聲。

大舅父同二舅父見到我呢一招，各自露出意想不到嘅表情。

只見年盒轉咗好多個圈之後，慢慢停定咗一格喺二舅父面前。

「我唔知你嘅童年有幾不幸，亦唔知你有幾憎你屋企人。不過，我好鍾意自己屋企，所以我一定要保護佢哋。」我指住年盒上停定嘅一格，堅定咁望向二舅父，「二舅父，我哋今次一於搏鋪大啦。係呢格喇，你估啦。」

（未完待續）

＝ ＝ ＝
下個加更目標：1200正評
Penana 加更目標：500 likes
Penana連載link：https://www.penana.com/story/173167

最後留低埋樓主IG，大家有興趣可以去嗰邊催迫樓主加更，仲有得睇埋其他故事相關嘅嘢，IG限定㗎
IG : windblowssilently
https://www.instagram.com/windblowssilently/

默颺讀者交流TG group（快啲入嚟討論劇情同掌握故事更新消息！）：https://t.me/+jD_eY63Yb5I0MmQ1

推

二舅父憎晒所有人其實都正常

D細佬妹正常都唔搵佢玩啦玩完俾人打 邊個會搵