因為一盒樂家杏仁糖，中咗風嘅婆婆同全家開年

公公其實又講得幾好
同埋我覺得經過呢單嘢，大家關係應該會好咗

應該暈咗啫
邊有可能咁易俾木劍殺死

都話結界入邊

重諗緊點最後點兜返個故仔 又幾好

三姨同六舅父開場未玩就死
醒番味唔知咩事

但點解二舅母同暗黑系表姐好似知道成壇嘢都唔係真實咁? 唔通佢哋係晴明後代?

如果個獎勵係可以同婆婆傾計就好了

有洋蔥

1200正皮

可能係婆婆中風好返呢

好問題，呢個可以之後解釋

今晚加更

留名

早咗入嚟 Penana都1000咗

（連登1200 正評加更+夜更）

呢個時候，「公公」走近我，從本來忿忿不平嘅表情轉為溫和嘅笑容。

「我嘅出場就差唔多喇。」佢伸出一隻手放咗喺我頭上面，望咗我一眼，有啲欣慰咁講：「健仔，你高咗好多，真係大個仔喇。」

我仲未及回應，一陣強烈嘅金光就喺我眼前綻放，令我咩都睇唔到。

先唔講之後發生咩事，但係呢一刻，我完全無察覺到，頭先呢幾句說話，就係公公同我嘅最後告別。

原來，有時候離別，真係可以發生喺懵然不知之間。

講返轉頭，當呢一陣強光過去之後，我發現自己唔知點解去咗婆婆嘅屋外。

我有啲疑惑咁樣望住眼前嘅鐵閘，諗咗一諗，都係決定打開佢。

一打開門，一陣食物嘅香氣撲鼻而來。

呢股香味，久違而熟悉。

係蘿蔔糕嘅味道。

或者精準少少，係婆婆手製蘿蔔糕嘅味道。

點解我會分得出？

因為我細個嘅時候，亦都係婆婆仲行動自如嘅時候，佢每年新年都會自己整蘿蔔糕。

而佢所整嘅蘿蔔糕同街上嘅味道唔同，食落去係多咗一份鮮味。

聽我老母講，係因為婆婆會喺蘿蔔糕度加入魚露。

呢個做法，好似係婆婆從家鄉學翻嚟嘅特別煮法。

可能就係因為呢份特別嘅感覺，令我由細到大都食慣咗蘿蔔糕係呢一隻味，所以到大個反而食唔慣街上面其他大牌子嘅蘿蔔糕，覺得好似總係爭咁啲嘢。

但係可惜嘅係，自從婆婆老咗再加上中風之後，我已經再無食過呢個味道嘅蘿蔔糕。

（如果想提升閱讀體驗，嚟到呢個位，歡迎大家戴起耳機，然後㩒入以下呢一首歌，當歌聲開始，就可以繼續睇落去。當然，如果唔方便或者唔想聽歌，直接睇落去又得。）

https://www.youtube.com/watch?v=GLP7lcaAoYc&ab_channel=Somethingsmissing

我帶住期待嘅心情走入屋，慢慢跟住呢一股香味走。

「『現Doy』，坐低，好快有嘢食。」

聽到呢句說話，仲有「現Doy」呢個咁親切嘅稱呼，我有啲不敢相信咁樣原地企咗喺度。

「現Doy」，其實即係「健仔」，係夾雜咗婆婆少少鄉音，而且聽我老母講，「仔」喺婆婆家鄉都係叫做「Doy」，所以叫下叫下，我喺婆婆口中就係「現Doy」。

自從佢中風講唔到嘢之後，我再無聽過婆婆用呢個名叫我。

我聽到婆婆嘅吩咐，亦都乖乖聽話咁樣喺枱度坐好，期待到底一陣間有咩食。

果然，好快我就見到婆婆拎住一碟冒哂熱煙嘅蘿蔔糕，從廚房之中走咗出嚟。

我眼前呢個婆婆，就好似十幾年前仲係生生猛猛照顧我嘅佢咁樣，滿臉笑容，行動自如。

我望住枱面上嘅蘿蔔糕，個肚好自然發出「咕咕」聲。

「食啦，唔好等。不過唔好心急，小心辣親。」婆婆笑住坐低，將一件蘿蔔糕夾咗俾我。

我嗱嗱聲吹咗件蘿蔔糕兩下，然後即刻咬咗一啖。

嗯，就係呢隻味。

就係呢隻令人懷念嘅味道。

「好食嘛？」婆婆無起筷，只係笑住咁睇住我一邊鯨吞咗成件蘿蔔糕，一邊又從個口不斷吹翻啲熱風出嚟嘅狼狽樣。

「好食啊，我好耐無食過喇！」我瘋狂點頭，好快手又再夾咗一件落去隻碟度。

我食到呢度，突然間諗翻起，自己點解無啦啦會喺度食蘿蔔糕呢？

係喎，獎勵，頭先公公話我贏咗遊戲會有獎勵。

唔通就好似「獎門人」贏咗會有「花之戀」咁，贏咗呢個死亡新年遊戲就會有蘿蔔糕食？

如果係又真係正喎，話哂我已經好耐無食過婆婆親手整嘅蘿蔔糕。

「『現Doy』，你會唔會嬲婆婆啊？」

聽到呢個問題，我咬住半舊蘿蔔糕抬翻起個頭。

婆婆好專心咁望住我，期待緊我嘅答案。

「點會呢？啲蘿蔔糕好好食啊。」我衷心咁笑住講。

「我唔係講蘿蔔糕。我係講玩遊戲呢件事。有冇嚇親你啊？」婆婆好溫柔咁問，就好似從前佢照顧我嘅時候，關心我返學、識朋友、讀書都係用呢個語氣。

「少少啦，不過而家知道大家都無事就好。」

「嗯，其實被你公公上身，佢話同我合作教下班仔女，我本身都唔太想。我話大家和和氣氣咪幾好囉，但係你知佢啲牛脾氣，佢死都話要俾佢哋有嘢就講，有屁就放，唔好次次上到嚟口不對心，黑口黑面。」婆婆搖一搖頭，嘆咗一口氣，「其實佢哋七個會變成咁，都係我哋唔識教。以前無錢，就迫阿大一早出嚟打工；好喇，到阿二讀到書，我哋就望子成龍，要佢成讀爛讀，唔想佢走翻我哋條舊路。唉，講多無謂喇，總之而家諗翻，我同你阿公都係唔識做人父母。我哋做父母咁差，其實仲憑咩想佢哋孝順吖？講真，佢哋自己生性，過到好日子，我都安樂㗎喇。」

聽到呢度，我默默地放低咗口入面塊蘿蔔糕。

「咁其實到底要做到點樣嘅父母，先值得俾仔女孝順呢？」我忍唔住問咗一句。

諗翻起我老豆老母，要鬧佢哋有咩唔好嘅話，老豆就平時愛理不理，但係鬧起我嚟就大大聲聲；老母就婆婆媽媽，成日依依哦哦，重唔重要嘅事都係講足三次，而且次次都有佢講無我講，我答一句佢就補三句。

我無數次同過我身邊嘅朋友講，我老豆老母真係好乞人憎。

但係，其實咁計又公平咩？

我諗翻大舅父佢哋呢一班親戚，係，佢哋喺呢個屋企入面都有過唔同嘅經歷，所以先令佢哋成為今日咁樣嘅人。

但係，公公婆婆咪一樣有佢哋嘅人生，有佢哋嘅經歷。

如果佢哋可以怪公公婆婆做唔好一對父母，難道佢哋咁多個又做到一個乖仔乖女咩？

諗到呢度，我忍唔住捉住婆婆隻手。

「婆婆，我唔知佢哋覺得你點，但係，我覺得你好好。」我笑住講，然後準備夾多一件蘿蔔糕。

「呢件唔係你㗎，係我本身準備俾阿二嘅。因為我唔知你哋邊個會贏嘛。」婆婆講。

「吓，無所謂啦，都係蘿蔔糕啫，反正二舅父都已經離開咗。」我一邊講，一邊夾起件蘿蔔糕放入口度。

咦，奇怪。

唔同味嘅。

呢舊蘿蔔糕，係無我食開嗰種鮮味。

「唔同味呢？」婆婆摸一摸我個頭，「佢哋呢，唔太鍾意食有魚露嘅蘿蔔糕，得我掛住家鄉嗰陣味，所以先整少少俾自己食，然後另外就整一底無魚露嘅俾佢哋食。哈，點知有一年你走嚟廚房偷食，咁啱食正咗我嗰件有魚露嘅蘿蔔糕，所以我先每年整多一底有魚露嘅咋。」

我個心浮現咗一股內疚嘅感覺。

原來當我話忙話唔得閒去探婆婆嘅時候，佢曾經默默為我花多咁多時間，只係為咗滿足我嘅口味。

「唔洗唔開心喎，婆婆明㗎。仔大仔世界，唔通要你成日陪我喺度粒聲唔出咁樣睇電視咩。婆婆知你有心，年年新年嚟到，你都走埋嚟同我打招呼，婆婆我心滿意足㗎喇。」

望住婆婆好真摰嘅笑容，唔知點解反而我會流出咗幾滴眼淚。

「你……你咁鍚我，我……咩都無做到……」混雜住傷心同內疚，我嘅眼淚愈流愈多。

「邊有得咁計嘅啫？咩你你我我？」婆婆將手放到我塊面度，輕輕抹走我啲眼淚，「一家人，唔洗計咁多。」

一家人，唔洗計咁多？

或者，就係因為我之前計太多，所以我先唔覺得我班親戚似一家人。

我計較大舅父嘅曬命，我計較四姨媽成日提住表哥。

我從來都無打算去視佢哋為一家人。

直至，從頭先個遊戲之中，有啲零碎嘅記憶慢慢記返起，我先開始覺得，佢哋或多或少，都係我嘅家人。

跟住落嚟，我一邊食住蘿蔔糕， 一邊同婆婆慢慢傾計。

我哋傾咗好多好多嘢。

佢話咗好多關於親戚們成長嘅故事俾我聽，而我亦都同婆婆分享下我嘅大學生活。

我從來都無發現，原來婆婆係可以咁好傾。

或者應該咁講，自從我大個之後，我根本都無好好認真坐低同婆婆傾過計。

呢個時候，我諗起一首歌。

係Rubberband嘅「夏令時間」。

呢一刻嘅時間，就好似同首歌一樣，好悠揚，好舒服。

婆婆一句，我一句，而時間就好似停頓咗咁樣。

呢個空間無人趕住下個行程、唔需要急住去下一家拜年、唔會有人打擾插嘴、唔怕婆婆會因為中風而講唔到嘢。

唯一喺呢個空間入面流動嘅，係我同婆婆嘅感情。

時間，就係咁樣凝結咗喺某個時候，直至到婆婆突然企咗起身，講咗一句：「嗯，時間都差唔多，呢個地方差唔多要消失喇。」

我一時間未消化到呢句說話，但係婆婆已經笑住講咗一句：「好喇，食完蘿蔔糕，係時候俾獎勵你喇。」

獎勵？乜原來蘿蔔糕都唔係獎勵？

婆婆行向電機機旁邊嘅大櫃，打開櫃桶拎咗啲嘢，然後走到去我面前，微笑住咁講：「最初，你阿公話上我身搞呢場大龍鳳，我真係唔願意㗎。不過後尾，佢用一個條件成功說服咗我。」

婆婆慢慢從身後，拎咗一樣嘢出嚟。

係一封利是。

「佢話，只要俾佢搞完個遊戲，佢會俾我嘅魂魄留喺呢個空間入面一陣。咁我就諗，如果我可以親手派一封利是俾贏咗遊戲嘅人都唔錯吖。」婆婆低頭一笑，「人老，身體就唔聽話，呢幾年婆婆中風之後真係好渣，連利是都揸唔穩，所以無得親手派俾你哋。所以難得今次有機會，我真係想親手將呢封利是送俾你，話哂都係一個祝福吖嘛。」

我望住呢封利是，本身停止咗嘅眼淚又再次流出。

我隻手有少少震，慢慢接住咗婆婆呢封利是。

「『現Doy』，婆婆祝你，學業進步，萬事如意，出入平安，身體健康。」

「婆婆，咁我都祝你……」

本來，我打算開口講出幾句祝賀語。

但係，我個大腦好自動咁樣快速過濾咗一輪，發現好似無咩祝賀語適合喺呢一刻講。

我望住婆婆。

佢雙眼笑成一條線咁，期待緊我嘅說話。

到底，婆婆需要啲咩嘅祝福先好呢？

望住婆婆，我吸咗一口氣。

我張開雙手，將佢攬住咗。

我覺得，發財、福星、百歲、進步，任何嘅祝福都不及一個擁抱更適合婆婆。

「多謝你咁錫我。」我將婆婆攬到好實，就好似以前每次喺街市當婆婆買完砵仔糕俾我之後，我會好識做咁樣即刻獻殷勤好肉緊咁攬住婆婆。

我相信，呢一個擁抱，會比起任何家用、利是、年貨，更可以令婆婆感到滿足。

「『現Doy』，好開心係你贏咗個遊戲，等婆婆可以同你傾計。」婆婆喺我耳邊講，「不過，呢個地方嘅時間有限，好快，我哋就要去翻現實。到時嘅我，應該同唔到你傾計喇。」

「唔緊要，我同你傾。」我繼續攬住婆婆，唔捨得放手，「我會好似我阿媽咁長氣，講嘢講到你驚為止。」

「『傻Doy』。」婆婆俾我嘅無聊說話氹到笑咗。

而佢嘅笑聲，唔知點解好似入咗去一個山洞咁樣慢慢變成悠長嘅回音，一次又一次喺我耳邊迴盪。

我開始感覺到，周遭嘅環境慢慢變暗，我攬住嘅亦都變成咗自己一雙手臂。

「婆婆！婆婆！」我好大聲嗌，但係唔成功阻止任何變化。

慢慢，我就被黑暗包圍咗，完全失去咗意識同方向……

（未完待續，下篇大結局見）

睇到眼濕濕