因為一盒樂家杏仁糖，中咗風嘅婆婆同全家開年

黑犬風易 · 2025-01-30T16:08:51+08:00

我好憎農曆新年。或者嚴格嚟講，係好憎新年要見到班親戚。其實我班親戚平時都唔係啲咩好人。但係唔知有冇巴絲同同我有一樣感覺，就係往往嚟到新年，班親戚總係特別口臭。所以，每年我都好羨慕嗰啲會同父母飛去外地避年嘅同學。「喂，得未啊？揀咁耐！」我老豆喺7仔外面催我，令我暫時從憎恨新年嘅想法之中跳翻出嚟。「得喇，買呢個啦。」我拎住一盒果仁禮盒，穿過7仔收銀前面長長嘅人龍，行到我老豆面前。「吓，果仁？好食咩？買呢個好過啦。」我老豆遞咗盒「樂家杏仁糖」俾我。「你真係『0尊』㗎喎。阿婆，即係你阿媽有糖尿㗎，點食啫？」我一邊講，一邊將我盒果仁換走咗佢盒「樂家杏仁糖」，再推咗佢去俾錢。「有咩所謂啫，都唔係佢食㗎啦……」老豆喃喃自語，似乎仲有啲唔服氣咁走咗去俾錢。我望住手上面盒「樂家杏仁糖」，無奈咁嘆咗一口氣，就將佢放回原位。直到呢一刻，我都無諗過我呢一個隨心而發嘅決定同行動，喺之後居然會救咗我全家一命⋯⋯