因為一盒樂家杏仁糖，中咗風嘅婆婆同全家開年

因為大家都想睇生啪鮑魚麵

Btw B

B！

突然有新故~
留個名先~

B

B

會唔會輸咗再揀過

B

btw如果幾邊連載大家揀嘅嘢唔同咪要寫幾個version

正路應該係A，老人家好少食金莎
不過B都幾應該幾好玩，爭住開爐煮麵食

係喎，忽略左。最近幾年公公死左先長齋。

留名跟進

B！

想睇B 鮑魚麵，生啪又得，淥啫啫溫度快吞轟都好睇

因住阿婆攞起打到你噴血

b

恭喜大家 壽桃牌鮑魚麵跑出
而家繼續寫

認真角度 麵係生啪定煮先,煮有湯就死硬

我都好鍾意食

（連登800正評加更 + 正常日更）

喺大家都冇意見嘅情況之下，我哋最後決定用民主嘅方式，投票決定。
我哋決定用ABC去代表三個選擇，然後倒數3秒，一齊講出自己想要邊個選擇嘅英文字。

A 金莎禮盒30粒裝x2
B.壽桃牌鮑魚麵禮盒裝，一盒12個
C.藍罐曲奇

「三、二、一。」

我第一時間，非常肯定咁樣叫出：「A。」

「B。」

「B。」

當我非常之驚訝咁望住我老豆老母嘅時候，佢哋居然仲因為有默契講咗同一個答案好興奮咁樣拍咗一下手。

「喂大佬你哋係咪黐線㗎 ？壽桃牌鮑魚麵喎，要煮㗎喎，煮都要時間㗎喎。煮完之後仲要等佢攤返熱先食得，仲要12個，點食啊大佬？如果食金莎嘅話，每人都係20粒，輕輕鬆鬆啦。」

「阿仔，你實在太年輕啦。」老豆無奈咁樣搖頭。

「冇錯，識揀一定係揀鮑魚麵。」老母非常肯定咁點頭，「首先，鮑魚麵營養價值最高。」

「咩料啊？而家鬥快食嘢喎，你全身都係營養維他命ABCD蛋白質胡蘿蔔素碳水化合物氫氦鋰鈹硼碳氮氧氟氖，最尾輸咗咪又係一下爆頭，營養高有咩用呀？」

「其次，其實煮個鮑魚麵唔係好需要時間。你有冇玩過數學IQ題啊？煮1個麵係3分鐘，一次過煮晒12個麵都係3分鐘，只要到時我哋煮完之後，用水幫佢過一過冷河，降低氣溫嘅話自然食得快。」我老母胸有成竹咁講。

「冇錯啦。就算唔煮熟佢啊，你當佢媽咪麵咁食唔得嘅咩？反正包麵咪又係一個麵同埋啲米粉，搖勻佢分分鐘脆脆地仲幾好食添。」我老豆從旁補充一句。「而且啲金莎甜到咁樣，張住哂個嘴，就算依家食完贏咗，我個肚腩好大兩個圈啦！贏咗個game，輸咗條腰，值得咩？好男人最緊要好腰好腎啊！」

我本身仲諗住反駁一句：「乜你都知道金莎甜嘅咩，咁甜你又送俾婆婆？」

不過望住佢兩個咁有默契夫唱婦隨一唱一和，睇來我反駁都係嘥氣㗎喇。

於是，我就睇住佢哋喺張紙上面寫低咗「壽桃牌鮑魚麵」呢個選擇。

當我哋帶住已經寫好嘅同埋接好咗嘅紙返到去客廳嘅時候，其他幾家嘅親戚亦都已經坐返埋張枱度。

呢個時候我留意到一樣嘢，喺咁多人之中，其實呢個遊戲最蝕底嘅應該係四姨媽。

因為如果一陣間真係要鬥快食嘢嘅話，根據婆婆所講嘅規則，我哋每一個家庭坐一個單位咁計。

如果係咁嘅，今日四姨媽基本上就係孤身作戰，論速度嘅話一定唔夠我哋起碼有三個人嘅家庭鬥。

「好啦，寫完啦嘛？咁我哋就準備開始遊戲啦。」

婆婆講完呢句說話之後，臉上居然出現咗一個詭詐嘅笑容，似乎係暗示緊遊戲並冇想像中咁簡單。

果然，我腦入面呢個念頭閃過嘅一刻，婆婆就講出咗一句令我哋在場每個人除咗二舅父之外都驚訝到擘大個口嘅說話：「跟住落嚟，我要講聲唔好意思。因為，頭先其實我講漏咗一個遊戲規則。雖然其實我只係中咗風，不過平時你哋都當晒我老人癡呆咁樣，連我啲壞話都係當住我面講嘅，所以而家你哋就當我老人癡呆記漏嘢啦。反正你哋隨便屈我啦，我都冇問題㗎。」

聽到婆婆呢句說話之後，在場幾個長輩都面露尷尬。

咁樣睇嚟，佢哋都曾經喺婆婆面前講過佢嘅壞話。

不過婆婆似乎亦都唔打算而家追求，佢繼續將更加震撼嘅說話講咗出嚟：「而家你哋每個人都寫咗張紙，紙上面嘅都係你哋曾經送過俾我嘅年貨。而而家我要補充嘅遊戲規則係，一陣間每個人都可以有一次機會去同任何一家人手上嘅紙作出交換。當然，你亦都可以選擇唔同任何嘅家庭作出交換。」

「咪住先，如果係咁嘅話，最後交換嘅家庭咪最着數囉，佢可以任揀唔嬲，仲唔怕會比其他人搶走！咁邊一個家庭係最後交換先？」大舅父聲大大咁樣提出咗問題。

「好簡單，就根據今年你哋送俾我嘅年貨去決定。只要我越鍾意嗰個年貨，你哋就會越遲交換禮物。相反地，你哋送你一年貨越冇用，我就會越早揀你，鬼叫你冇心肝啊。」阿婆蹙起條眉，理所當然咁講。

聽到成套規則之後，我心諗，咁咪即係同平時我同班friend玩交換禮物好似？

喺交換聖誕禮物嘅規則入面，其實都有一種嘅交換方法叫做「搶禮物」。

所謂搶禮物，其實就係大家首先揀咗一份禮物，然後再根據抽籤次序可以交換，其實即係搶走對方手上嘅禮物。

呢個交換禮物方法最特別嘅地方，就係大家可以瞄準各自手上面有嘅嘢。

唔難想像，成個交換禮物過程當中，最着數嘅一定係最後一個。

所以通常係交換禮物嘅活動入面，都會有啲設定咗嘅規則，例如係同一份禮物唔可以俾人搶兩次，以免最後一個人可以擁有一個完全同任何人交換嘅最大優勢。

一諗到呢度，我即刻向婆婆提出兩個問題：「婆婆，咁有冇話唔可以同一張紙交換兩次呢？」

「唔使咁麻煩。總之一陣間每個人交換完張紙之後，都唔可以即刻打開張紙，直至成個交換嘅程序完晒。所以簡單啲嚟講，大家都唔知大家手上面拎住嘅係啲咩，咁你不斷搶都冇乜所謂嘅。」婆婆講完呢一大段說話之後，就用力拍咗張枱一下企咗起身，「好，而家立即宣布，到底係邊個家庭第一個同人交換。」

佢一咁樣講完，大家嘅表情都即刻變得緊張。

雖然話我哋都唔知大家手上面拎住啲咩，但係始終呢個遊戲似乎都係越後嘅優勢越多，所以大家都似乎唔太想做第一組。

「第一個家庭係……七妹。」

聽到呢句說話，簡直就好似俾人判咗死刑一樣。

雖然我哋都知道，今年我哋送嘅果仁禮盒其實真係有啲差。

比起五舅父、二舅父同埋大舅父嘅禮物，係完全冇得比。

至於四姨媽送咗啲咩我哋就唔知，所以就唔多講啦。

雖然俾人揀咗做第一組好似唔係太理想，不過勝在我哋本身想揀嘅鮑魚麵其實都唔好得去邊，所以分分鐘換返嚟嘅嘢仲好。

呢個時候，我老母細細聲咁樣喺我老豆同埋我耳邊講：「每年送禮物嘅時候，通常得最好嘅都係二舅父或者大舅父。分分鐘佢哋所送嘅禮物，其實阿媽一早已經食咗。所以，揀佢哋嘅話似乎穩陣啲。」

Live

下個加更目標：900正評
Penana 加更目標：200 likes
Penana連載link：https://www.penana.com/story/173167

最後留低埋樓主IG，大家有興趣可以去嗰邊催迫樓主加更，仲有得睇埋其他故事相關嘅嘢，IG限定㗎
IG : windblowssilently
https://www.instagram.com/windblowssilently/

默颺讀者交流TG group（快啲入嚟討論劇情同掌握故事更新消息！）：https://t.me/+jD_eY63Yb5I0MmQ1

無錯，所以今次只係得連登有得玩～