因為一盒樂家杏仁糖，中咗風嘅婆婆同全家開年

啜手指好大提示，可能用口水做記號

唔好兜啦
大家都當係花生故咁睇
如果當認真故睇
你果堆前言不對後語同人物性格設定
根本冇辦法睇落去

先唔講婆婆完全唔似婆婆
就算想教訓啲細
唔理最後係真死定假死
都冇理由用強逼佢哋互相殘殺嘅方法
唯一解釋係佢鬼上身
但隻鬼又點解咁清楚佢過去
呢啲一日未解釋雖然唔算bug
但作為伏線已經太過突兀

二舅父個設定基本就係一個敏感細心嘅人
呢樣嘢係你想表達嘅
而一個敏感細心嘅人
基本上係唔可能送出一罐糖比糖尿病人
即使真係送錯一次半次
個list係3選1
二舅父要係三個入面選一個肯定比婆婆食咗嘅
都唔會係難事
何況依家罐糖只係第三差嘅選項
（因為另外兩個被放棄嘅必然比罐糖更糟糕）
提到可交換呢件事係發生響交表後
說明二舅父亦唔可能刻意選嚟靠害
再者二舅父亦無法預知自己嘅交換排名
可以話呢罐糖嘅出現
只係單純因為你嘅惡趣味
想設定一個小心眼嘅角色
但同時你需要明白
每一個人嘅優點同缺點
好多時其實係一體兩面
就好似自信嘅人必然有少少自戀
猶豫不決嘅人必然係心思謹慎
小心眼 必然係 敏感細心
你唔可以一味為咗滿足你對小心眼嘅人嘅仇恨
去強制佢犯一啲佢唔會犯嘅錯…
佢可以死於唔信人
可以死於孤立
可以死於過份謹慎
可以死於害人終害己
但就唔可能作出一個唔細心嘅選擇
再靠-6+害人跳反
因為一個敏感細心/小心眼嘅人
係唔可能係提早暴露自己嘅攻擊性
保留主角一家對佢嘅友好度
可以增加你如果同佢敵對時嘅猶豫
相反佢依家跳反
佢暴露完
下一關無論對戰定合作
對佢都冇好處
粒糖佢可以收埋咗
亦可以踢咗去梳化底
大把方法唔洗衝出嚟認
呢家個情況就好似夜神月忽然間拎本筆記出嚟
係你面前一路講佢係新世界嘅神
然後一路當你面寫本筆記仲要陰陰咀笑

anyways
當係無厘頭故睇係幾得意
而我相信大部份人都係抱住呢個心態先睇到呢度
所以你就唔好出嚟同人兜劇情啦
由佢專心作好個故佢啦
有時直接無厘頭好過你懶有邏輯但錯哂

未買過年貨？好多時都係買上去比拜年既人食架啦
講真老人家食得d乜

我之前一直都話希望仲有五集就完，點知寫極都有，所以我決定都係唔好答大家

不過預期中都就快到結局

細心！！！

大家今晚唔需要等太夜
今日有啲攰，預計聽朝執埋會出返今晚呢篇

早晨

樓主加油

多謝幫我打氣
一個鐘內有文（用緊lunchtime打文）

早啊交合巴

推 好耶 食飯有文睇

樓主lunch time係咪兩個鐘

可能扮工俾人周到

大家久等，準備出文～
知道大家等得耐，所以呢篇會長少少，當做加更咁出
再次感謝所有等文同為我打氣嘅大家

我捽一捽手，難得地掌心冒汗。

我就知道而家自己有幾緊張。

老實講，我真係無諗過我老豆老母會早死過我。

喺我腦海入面，佢哋好似仲係當年照顧我長大嘅、三十幾歲嘅嗰兩個人。

距離死亡，好似仲係好遙遠。

但係我眼前嘅年盒就話我知，喺呢一刻，我已經要為佢哋嘅生死去負責任。

「點啊？唔好用『拖字訣』，快啲答，到底係『有』定係『無』？」二舅父輕鬆咁樣用右手敲住枱面，無形地俾緊壓力我。

我回頭望向老豆老母，佢哋兩個似乎都無哂意見，只係一致地俾一個扮作唔太擔心嘅表情我。

到頭來，都係要靠我自己。

我望實年盒。

我學二舅父咁樣，伸出手指公摸一摸個盒面，但係盒面一如我所見嘅平滑，根本就摸唔出任何端倪。

到底我可以點樣做？

我嘗試諗出所有方法，又或者所有可以用邏輯去解釋出嘅答案。

可惜，根本就無咁嘅答案。

我開始怪自己，頭先做咩要攬炒。

如果唔用「無敵風火輪」，話唔定我仲有更多時間去準備好，然後先對付二舅父都唔遲。

「你做人唔好咁心急啦，慢慢諗清楚先做唔得咩？」

老母過往成日講嘅嘢喺我耳邊浮現，過往我會覺得佢好似烏蠅咁煩，但係呢刻嘅我，先明白佢所講嘅或許係啱。

不過，可能已經太遲。

唔係嘅，唔會遲。

應該仲有得救。

冷靜，陳志健，鬥運啫，你仲有 50%機會。

我用力打自己大脾一下，試圖令自己清醒一啲。

然後，我決定將一切交俾命運。

「有。呢一格係『有』。」我吐出一口大氣，將我嘅答案講咗出嚟。

婆婆聽到，無特別評論啲咩，準備伸出手去打開呢一格。

而二舅父亦都坐直咗個身，似乎佢都非常好奇呢一場嘅結果係咩。

呢一格年盒蓋慢慢打開。

世界嘅時間好似慢咗落嚟，婆婆嘅動作亦都好似落咗慢鏡咁嘢。

唯獨係我嘅心跳，依然不斷加速。

開。

空。

我企咗起身，唔敢相信咁樣左望右望，想睇下到底呢一格入面會唔會有一粒半粒攝埋咗一二邊嘅瓜子。

好可惜，無論點睇，結果都係無。

「你輸咗，而家你可以揀邊一個爆頭先。」婆婆講低咗呢一句，就自己坐翻去佢張輪椅上面。

「我！我答錯，爆我啦！」我即刻拍哂自己心口。

「頭先規則已經講明，參賽者會繼續玩到尾。所以，你可以揀嘅就只有你阿爸或者你阿媽。」婆婆毫不留情咁講。

聽到呢句說話，我慢慢擰翻轉頭，望到老豆老母都喺度望實我。

「仔，揀我啦，起居飲食嘅嘢仲需要你阿媽。我打工咁多年都攰喇，俾我早啲抖下啦。」老豆扮作輕鬆咁講，但係其實我聽得出佢把聲有隱藏唔到嘅抖震。

「唔得！你阿爸係家庭支柱，你大學都未讀完，之後仲要佢繼續供你。你揀我啦，我呢啲師奶仔咩都唔識，少咗個唔覺眼㗎。」我老母指住自己，踏前咗一步。

「咩啊，你日日煮餸不知幾重要。無你，你個仔日日食街邊啲嘢，高油高鹽高糖，死得仲快啊。你留低陪佢緊要啲。」老豆將老母拉翻後一步。

「煮飯人人都可以學，你做人老豆，係阿仔嘅榜樣，呢樣無得替代。之後佢仲要成家立室，你大把嘢要教佢，你唔係成日都講，已經諗定要同阿仔兩個去英國睇波當係畢業旅行咩？」

「咁你夠係啦。你成日都話，好恨快啲飲阿仔杯新抱茶，仲同我輸賭自己喺阿仔結婚嗰日會唔會喊。你先係最想睇到阿仔將來嘅人啊，你點可以而家死啊？」

「夠啦！」我大喝一聲，雙手撐住塊地咁樣跪低咗喺佢哋面前，啲眼淚流到停唔到，「唔好講喇。你覺得我真係揀得落手咩？」

我喊，唔係怕佢哋死。

我喊，係因為我發現我比自己想像中更加唔捨得佢哋。

我認，我曾經好多好多次諗過，如果呢個世界無咗我老豆老母就好，因為佢哋真係好＿煩。

但係，直到而家呢啲生離死別位，我先知道，其實我好想俾佢哋一直煩落去。

再加上佢兩個而家嘅對話，我更加明白，佢哋係幾咁愛我。

愛，有時真係一樣好抽象，好特別嘅嘢。

愛，係美好嘅，但有時候加上咗人嘅性格、表達、接收、思考，往往出到嚟，就會多咗好多味精，甚至扭曲。

一個家庭，經歷太多，難免會係愛中有恨，恨中有愛。

但係當愛回歸到最基本，好似而家老豆老母呢種互相都想犧牲自己而去成就對方嘅愛，又或者最簡單咁樣表達自己對我嘅不捨，呢種最原始嘅愛，先會令人知道自己感受到最著緊嘅係啲咩。

老豆老母走到去我身邊，各自搭住我一邊膊頭，將我攬住咗。

「阿仔，你點揀，我哋都唔會怪你。」

「我哋知你盡咗力，我哋知你緊張我哋，我哋都好開心。」

再多嘅安慰，喺呢一刻都變成咗重擔。

我根本就無可能揀得到到底要佢哋邊個死。

「仔。」
我聽到老豆喺我耳邊好細聲咁叫我，但由於老母攬住我喊緊，佢似乎唔察覺。

「你揀我死啦。你阿媽內心好堅強，無咗我，佢依然可以生存到。但係我份人咁一支公，無埋你阿媽，我諗我頂唔順。所以，你揀我啦，你同你阿媽得㗎喇。記住，而家你唔係要揀邊個死，而係要幫我哋其中一個生存落去。」

老豆呢一番說話，令我稍為驚訝，一時間唔識得點樣反應。

但係，我知道，佢講嘅無錯。

「嗯，我明白。」我含淚點頭，然後下定決心講：「我揀阿媽留低。」

突然聽到我有決定，老母好驚訝咁望實我，然後不斷搖頭大叫：「唔好啊，揀我啦揀我啦……」

「決定已有，就跟你嘅決定。」婆婆冷冷咁答咗一句，望向咗我老豆。

我老豆攬實咗我同狂喊緊嘅老母。

呢種靠近、呢種親密、呢種距離，令我突然諗起，原來我哋已經好耐無咁一家人攬埋過。

「乖仔，終於俾老豆型翻次。老婆，仔，好好生活，我愛……」

血，灑滿咗我同老母塊面。

我哋抱住只係剩翻個身嘅老豆，不斷咁喊。

「喂，好喇，上翻嚟玩埋佢啦。我哋趕住走啊。」二舅父語氣非常輕鬆咁講。

佢輕挑嘅聲線，令我不禁無名火起。

我就唔信個天真係咁唔公道。

我點都要守住我老母，唔可以俾我老豆白白枉死。

我收拾心情，握緊拳頭，坐翻上去圍枱嘅櫈度。

「嗱吖，玩吖。」我捲起衫袖，一副準備好迎戰嘅樣。

呢個時候，我再次望到二舅父身後嘅表姐。

佢居然繼續喺度啜緊手指。

或者係因為佢嘅動作實在太奇怪，所以我忍唔住望多兩眼。

佢舉起咗手掌，望實自己隻中指，無發出任何聲音咁樣錫下錫下。

唔通……係性暗示？

痴線，生死關頭，俾乜嘢性暗示呢？

正當我喺度諗緊嘅時候，我發現表姐向我望咗過嚟。

佢同我四目交投，再一次舉起咗佢隻左手，非常刻意地向我反咗兩反，然後再一次錫一錫佢嘅中指指尖。

從佢成套動作，我開始感受到，佢似係有啲嘢想同我講。

但係「啜手指」到底係咩意思呢？

我仲喺度猶豫緊嘅時候，我見到表姐兩隻眼突然瞪大似乎諗到啲嘢。

佢停咗啜手指嘅動作，改為掂一掂佢副眼鏡，然後用手指掃過眼鏡框側邊嘅位置，然後好低調咁指向二舅父背脊。

二舅父？眼鏡？眼鏡臂位？

我記得，無耐之前二舅父就將自己副眼鏡拋咗落地下。

我嘅目光，好自然咁望向咗地上，嗰一副二舅父落在不遠處嘅眼鏡。

我諗起表姐頭先嘅動作，嘗試集中咁睇下眼鏡臂。

咦，我發現咗一樣嘢。

我個腦，好似突然有一道閃光穿過所有嘢。

表姐嘅所有動作、呢場比賽所有嘅細節同突兀，突然全部都可以合理咁解釋到。

我似乎，搵到可以逆轉戰局嘅關鍵。

（未完待續）

下個加更目標：1200正評
Penana 加更目標：500 likes
Penana連載link：https://www.penana.com/story/173167

最後留低埋樓主IG，大家有興趣可以去嗰邊催迫樓主加更，仲有得睇埋其他故事相關嘅嘢，IG限定㗎
IG : windblowssilently
https://www.instagram.com/windblowssilently/

默颺讀者交流TG group（快啲入嚟討論劇情同掌握故事更新消息！）：https://t.me/+jD_eY63Yb5I0MmQ1

終於等到啦

得閒就入嚟睇下樓主更新左未
緊張過溝仔

竟然同眼鏡有關

不嬲都死兜 當鳩故睇吓算