因為一盒樂家杏仁糖，中咗風嘅婆婆同全家開年

竟然係眼鏡反光望個底

lm

笑死
呢個比喻好正

喺我靈機一觸嘅呢一刻，我立即望向表姐。

表姐同我眼神交流咗一下，我非常輕力咁樣向佢點一點頭。

表姐接收到我嘅訊息，應該明白我已經知道佢想講啲咩。

「阿爸，不如算啦。」表姐突然間開口。

「嗯？」你舅父聽到表姐嘅聲音，好自然咁樣擰轉左頭。

「佢哋都咁慘，冇必要再殺人呀。」表姐平靜咁講。

「你唔係唔知道我有幾憎佢哋㗎？」二舅父堅決搖頭。

「你最憎嗰啲都死晒啦，我覺得⋯⋯」表姐開始慢慢講出佢嘅說話同想法。

佢講緊啲咩我唔知，但係我有個直覺，佢咁做嘅目的係想俾機會我。

因為佢知道，我已經接收到佢嘅訊息，所以而家佢講咁多嘢，係想俾機會我令到二舅父分心。

然後，等我可以落手。

我個腦裏面飛過無數嘅想法，其中一樣嘢我諗緊，會唔會其實表姐同埋二舅父都係夾埋想害我呢？

話哂二舅父今日已經三番四次咁樣背叛大家，作為佢個女，表姐咁樣做其實都唔出奇。

而且如果你背脊幫我嘅話，佢有機會會令到佢自己都要死，咁佢仲點解要幫我呢？

但係我好快就諗到，要害我嘅話，其實根本就唔使搞咁多嘢。

本身二舅父佢哋就勝券在握，基本上簡簡單單就可以令到我全家死晒，又洗咩啜手指咁複雜呢？

我覺得我應該要相信表姐。

就算一時間解釋唔到，到底點解佢要幫我而唔係幫佢老豆，甚至冒着自己可能會死危險都要幫我。

但係點都好啦，我都要把握呢個機會先。

因為如果唔係把握好今次機會嘅話，死嘅就會係我屋企人。

就係二舅父擰轉左頭同表姐對話嘅時候，我出手做完我應該做嘅嘢。

我一路轉個年盒，一路有少少在意咁樣望住二舅母。

因為假設表姐幫我嘅話，唔知道二舅母嘅立場係點。

如果二舅母係企喺二舅父嗰邊嘅話，而我做嘅嘢比二舅母望到，其實一樣徒勞無功。

但係有趣嘅係，我見到二舅母一直望住窗外嘅風景，好似對屋內嘅事情，甚至係佢自己嘅生死完全冇興趣咁樣。

到底二舅母諗緊啲咩呢？

算啦，好似都唔關我事，只要佢冇留意到我做咩就得。

當我啱啱好將個年盒轉到去二舅父面前嘅時候，表姐同我好有默契咁樣同時間收咗聲，於是二舅父亦都拎返個頭過嚟。

「我已經揀好啦，係呢一格。」幫緊搦住內心嘅緊張情緒，伸出手指，指俾二舅父睇佢眼前嘅嗰一格。

「好啊，邊格都冇所謂。」二舅父照舊將手指公擺咗上年盒蓋面，慢慢咁摸。

但係我而家已經知道，其實重點唔係佢隻手指公，係佢放喺年盒下面嘅四隻手指。

手法就好似魔術師咁樣，佢講緊對白，或者向你展示一啲道具，但係其實真正嘅魔術手法，就已經喺你分心嘅一刻做完。

二舅父摸左個年盒蓋一陣，氣定神閑咁樣講：「我有答案，呢格，係『有』。」

聽到佢嘅答案之後，我瞪大雙眼，張開咗口。

二舅父望到我呢個樣，無奈咁笑住擰頭：「健仔，其實我都冇心要殺死你哋，只不過如果呢個遊戲裏面只能夠有一個生還者，咁一定係我。就當係咁多年來，我喺呢個家庭裏面我經歷咗咁多不公平之後，俾返一個公道我。所以，希望你明白⋯⋯」

二舅父一邊講，婆婆一邊伸出手打開咗個年盒蓋。

「⋯⋯我唔係想做一個衰人，只不過⋯⋯」二舅父講講吓嘢突然間就冇咗聲。

因為佢望到年盒入面嘅狀況。

佢見到，佢所揀嘅嗰一格，係空嘅。

成功咗。

我同表姐嘅合作真係成功咗。

頭先我嗰個目瞪口呆嘅樣唔係做出嚟，而係我估唔到呢個方法真係會成功。

「點解⋯⋯？」二舅父出現咗前所未有嘅震驚樣望實我，睇得出佢完全意料唔到點解自己會估錯。

亦都代表，佢仲未發現我同表姐嘅合作。

只不過佢嘅震驚好快就已經從佢嘅表情度睇得出平復咗，佢深呼吸咗一口氣，望向婆婆講：「我已經決定好，我老婆死先啦。」

二舅父向二舅母眼都無望過一下就已經決定咗，而二舅母亦都好似當二舅父呢個決定同自己完全無關咁樣，雙眼繼續望住窗外嘅風景。

我好好奇，到底二舅母咁出神咁望緊啲咩呢？

我跟住二舅母嘅目光望過去，發現原來有一隻麻雀企咗喺窗框嗰度。

呢隻麻雀好似俾人點樣穴咁樣，郁都唔郁，定咗型咁樣喺窗框嗰度，就咁睇真係會令人誤會係一隻假嘅公仔。

「碰」。

我喺我好專心掛住睇雀仔嘅時候，一回神，二舅母已經爆頭死咗。

「而家都係二對二啫，再嚟。」二舅父隨手將年盒一轉，年盒就好似陀螺咁樣轉動，亦都好快就停咗喺我面前。

睇住二舅父嘅動作，我都幾佩服佢處變不驚，完全唔打算試探我係咪知道啲咩，以免打草驚蛇。

既然係咁，我決定再度出手，殺佢一個措手不及。

「爸，點解你頭先唔殺我？」表姐喺呢個時候又開口講嘢。

「一陣先講。」二舅父冷靜咁回應咗一句，雙眼專心咁望實我，睇嚟今次佢已經唔再落搭。

無辦法，既然二舅父係要望到實，咁我就俾佢睇下，我已經識穿佢嘅把戲。

我大大方方喺佢面前笑咗一笑，然後講：「話你知，我啱啱執到一個道具，『時間寶石』。」

我一邊講，一邊從個鼻度撩咗一粒鼻屎出嚟：「有呢粒寶石，我就可以睇到未來一千四百九十四萬五千七百八十二個可能性。而從呢一堆可能性入面，我已經睇到呢一格入面係啲咩。」

講完呢一番廢話之後，我慢慢將我嘅手指公放咗上年盒，同時四隻手指放喺年盒之下。

睇到我呢個動作，二舅父倒吸咗一口氣。

似乎，佢已經明白頭先佢點解會答錯。

而我，亦都已經知道呢一關嘅答案。

「無。呢一格入面咩都無。」我講完之後，自己好有信心直接將呢一格盒蓋打開。

果然，乜都無。

「點解你會知？」二舅父表情嚴肅咁問。

我當然明白，佢咁問，問嘅唔係「點解知道呢回合答案」，而係「點解知道佢可以玩轉呢一關嘅秘密」。

「都話用『時間寶石』囉。嗱，唔好嬲，呢粒『時間寶石』係可以同你分享嘅。」我笑住，將粒綠色嘅鼻屎彈向二舅父。

傻啦，我梗係唔會話佢知，如果唔係咪好似出賣表姐咁？

不過，我知道，你哋都好想知。

所以，我淨係話你哋知。

（未完待續）

＝ ＝ ＝
下個加更目標：1200正評
Penana 加更目標：1000 likes
Penana連載link：https://www.penana.com/story/173167

最後留低埋樓主IG，大家有興趣可以去嗰邊催迫樓主加更，仲有得睇埋其他故事相關嘅嘢，IG限定㗎
IG : windblowssilently
https://www.instagram.com/windblowssilently/

默颺讀者交流TG group（快啲入嚟討論劇情同掌握故事更新消息！）：https://t.me/+jD_eY63Yb5I0MmQ1

好緊張

好緊張
究竟係點出術

唔係癡鼻屎咁核突呀嘛

表姐要死了

係年盒底落左marking
Maybe眼鏡臂d裝飾？

我都睇緊有冇人會估到到底點樣出術

眼鏡臂剩係諗到潤滑油做marking

快啲出

又啜手指又眼鏡又鼻屎咁

一定係

硬幣導致感應器的磁通量改變

pish

可唔可以解釋下最後一句點解

利申：文科人

在線等

今晚會唔會有呢

Google 幫到你

嗯，到底應該從邊度講起呢？

好，就從我發現破綻嘅一刻開始。

一切就要從二舅父副眼鏡開始講起。

話說我望住表姐喺度啜手指，睇來睇去都唔知佢喺度做乜嘢。

然後嗰陣時表姐就突然間靈機一觸，喺度做咗一個眼鏡嘅動作。

亦都係因為咁樣，所以我就將我嘅目光轉咗落去二舅父地下嘅眼鏡上面。

呢副眼鏡，係二舅父之前激動講嘢嘅時候一嘢掉咗落地下度。

本身我望埋去，都覺得冇咩特別。

但係一見到表姐嘅動作，提醒我要留意眼鏡臂嘅時候，我就留意到一樣嘢。

喺眼鏡臂上面，有一撻啡色嘅痕跡。

呢一撻啡色，令我即刻諗起一樣嘢。

係年盒裏面嘅朱古力。

當呢撻朱古力嘅痕跡，再加上表姐啜中指嘅動作，連埋頭先二舅父每次轉年盒嘅時候嘅動作，我個腦裏面嘅所有線索慢慢咁樣自然地加埋一齊。

我開始識破到到底二舅父所謂嘅特異功能係咩一回事。

首先，一開始嘅時候，婆婆喺枱面度放咗好多唔同嘅年貨零食。

我相信就係嗰段時候，二舅父已經靜靜雞收起咗一粒朱古力，再用佢隻手嘅溫度去溶化一粒朱古力。

然後，佢利用朱古力作為痕跡，幫助自己認得出到嚟邊一格有嘢，邊一格冇嘢。

諗返起成個遊戲最初，當二舅父向我哋提出要合作一齊生存嘅時候，佢一直都喺度轉動緊個年盒。

我諗就係呢個時候，佢將朱古力集中留喺中指上面，一邊同我哋講嘢，一邊靜靜雞喺年盒下面做手腳。

做嘅手腳都好簡單，只需要喺有嘢嘅嗰一格嗰度留低少少朱古力嘅痕跡，之後每次佢只要喺轉動年盒嘅時候輕輕掂唔到有朱古力，咁就會立即知道嗰一格裏面有嘢。

諗返轉頭，每次當二舅父都係會用左手去轉年盒，我諗最大嘅原因就係因為佢隻左手嘅手指已經沾滿晒朱古力漬，為免俾我哋提出佢嘅破綻，所以佢一用完就會即刻收起隻手，唔俾我哋睇到。

當佢喺年盒嘅下面落咗記號之後，佢一開始就刻意以為我哋會同佢合作，令我哋放鬆警覺，慢慢唔記得咗每一格嘅分布。

等到我哋真係唔記得嘅時候，佢就開始執行佢嘅計劃。

因為佢有記號幫手，所以無論嗰年盒點樣變，佢都會知道答案。

不過可惜，頭先同佢講嘢嘅時候，可能因為佢太過激動，隨手就用咗左手去將副眼鏡掉落地下。

所以亦都因為係咁，佢嘅眼鏡臂先會有朱古力嘅痕跡，成為咗我發現一切嘅關鍵。