咁即係話，二舅父完全講中晒。
聽到二舅父嘅推測同埋說話，其實我都覺得好犀利，因為佢居然從呢一關講遊戲規則開始，已經留意到四姨媽嘅細微表情變化。
「兒歌，你都知我寡母婆湊仔。如果我死咗嘅話，宏仔一定會好傷心。你念在我辛辛苦苦供到佢想大學讀書，我都想見證佢大學畢業，成家立室，之後開開心心咁生活。」四姨媽越講越激動，居然跑到去二舅父面前跪低咗，「呢一關你只係需要唔好成為最慢嗰一個啫，你哋屋企有三個人，其實唔難贏啊。你可唔可以唔好搞我，俾我繼續生存落去啊？細個嘅時候，每次阿媽逼你讀書做功課，我都記得留返粒糖俾你，等你讀完書有糖食。我哋細個嘅時候曾經都好friend 㗎，唔係咩？」
「係喎，你唔講我都唔記得咗㖭。」二舅父慢慢走近四姨媽，向佢伸出雙手。
四姨媽見到二舅父示好，即刻露出笑容，諗住捉住二舅父隻手企返起身。
點知二舅父伸出咗兩隻手居然唔係捉住四姨媽，反而只係一手將四姨媽手上面嗰張紙拎走咗。
失預算嘅四姨媽亦都因為咁樣失左平衡，成個人趴咗喺地下度。
「細個嘅時候我喺度讀書，你哋就喺度食糖。係呀，你留返粒糖俾我呀，不過，嗰粒係你哋班人冇人想食嘅士多啤梨味呀。」二舅父表情依然溫文敦厚，唯獨係雙眼瞪得好大，呢個表情反而令到喺側邊望到嘅我都覺得有啲心寒，好似從來都未見過二舅父會有咁樣嘅表情。
「不過唔緊要。」二舅父笑住搖搖頭，「我願意以德報怨。細個你送一粒糖俾你，呢度，我還返一盒糖俾你。」二舅父將自己手上面嗰張紙塞返落去四姨媽隻手度，就係咁樣完成咗佢哋嘅交換年貨。
四姨媽無奈咁樣拎住二舅父塞入佢手上面嘅紙，面如死灰咁坐咗喺地下度。
「而家交換年貨嘅環節已經完成啦，全部人可以打開張紙。」婆婆好似對剛才發生嘅一幕視若無睹咁樣，直接宣布我哋可以將紙打開。
我同老豆老母一齊望住手上面嗰張紙。
到底喺隨機嘅命運之下，我哋換咗一樣乜嘢返嚟呢？
（未完待續）
＝ ＝ ＝
再次感謝大家，呢個輕鬆隨心寫嘅故事竟然衝到上九百正評大關
我都知呢個故事定位好特別，鳩得嚟又有啲劇情咁樣，
不過其實最緊要，都係大家睇得開心啫
樓主作者今日正日生日，文都會照出，不過大家都係預夜少少啦
如果大家可以正評上到1000賀一賀我生日就好啦，我亦唔介意生日都加更寫文送俾大家做回禮
好多錯字
