因為一盒樂家杏仁糖，中咗風嘅婆婆同全家開年

嬲豬上射小d刀吾屎射屎禾地山果下話

河馬尋仇

（連登1000正皮加更＋補更）

婆婆呢句說話，令在場所有人都相當意外。

五舅父、河馬同埋四姨媽一臉不解，完全唔明白到自己輸咩？

相反，大舅父同大舅母相當驚喜，攬埋一齊大叫，展現死裡逃生嘅興奮。

「阿媽，你係咪睇漏眼呢？」出聲嘅人係我老母，「頭先，我見到係四家組同五哥呢邊快少少食哂㗎喎。」

「嗯，我都見到，真係四姨媽五舅父快啲。」我見老母出聲，忍唔住都幫下口。

因為其實雖然四姨媽成日提住佢個仔，但除此之外，佢好多時都會問候下我讀書讀成點，問完又會真係俾到幫助我，所以諗翻轉頭，我並無咁討厭佢；

至於五舅父，佢婚姻係點我唔知，但佢對我確實無咩唔好。

佢不時仲會拉埋六舅父同我一齊打機，算係咁多親戚之中比較好傾同親近嘅一個。

所以，我當然唔忍心見到佢死。

四姨媽同五舅父見到我哋幫口，都向我哋呢邊投向感激嘅目光。

「喂，幾時到你兩個講嘢啊？收皮啦，阿媽話咩就係咩。」大舅父好緊張咁呼喝我哋。

「喂，幾時到你鬧我老婆同個仔啊？佢哋無講錯喎。」平時愛理不理嘅老豆，終於都忍唔住出聲。

「啪」一聲，大舅父大大力拍落張枱度：「我做大嘅，鬧啲細嘅有咩唔啱？」

望見大舅父起哂鋼咁樣呢，我都有少少淆底。

而理論上呢，作為和平主義者加上唔鍾意嗌交嘅老豆，喺呢啲位都會由得佢就算。

之但係估唔到嘅係，當老豆見到大舅父拍枱嘅一刻，佢居然諗都唔諗，即刻跟住「啪」一聲拍落張枱，企埋起身粒聲唔出啤實大舅父。

眼見老豆眼神兇悍、咬牙切齒、塊面充血谷到紅哂成個關公上身咁樣，大舅父一時間都唔知點樣反應好。

嘩，望見老豆咁型，我突然覺得有少少感動，估唔到佢會為咗保護我同阿媽而挺身而出。

「好，全部坐低，聽我講。」婆婆平和而有威嚴嘅聲音，令我哋全部人唔敢再講啲咩，各自都坐低哂。

我拍一拍企咗起身嘅老豆，佢先回過神坐翻低。

我見佢塊面仲係谷到好紅，於是就細細聲同佢講：「喂，唔洗扮惡啦，搞掂啦。」

老豆咬緊牙關咁望實我，搖一搖頭：「唔係扮惡……頭先……我拍太大力……隻手指尾，好似斷咗……好痛……幫我call白車……」

唉，我無奈咁搖下頭。

睇嚟，老豆都係適合做翻和平主義者。

「我頭先話，今個回合生存嘅係阿大，原因好簡單，佢哋係更快完成比賽嘅一家。」婆婆一邊講，一邊望向我哋：「我知你哋點解話四妹一家快啲食哂。只不過，事實上係，佢哋其實未食哂。」

「未食哂？」五舅父一聽，即刻拎起個瑞士糖罐反轉狂倒。

但係，一粒糖都無跌出嚟。

望到咁嘅情況，大家又好自然咁望翻向婆婆。

「係，枱同罐上面已經無哂糖。不過，仲有一粒糖你哋未食到。」婆婆嘅目光轉向一直默默坐喺一邊嘅二舅父度。

當所有人嘅目光都集中喺二舅父身上嘅時候，二舅父望一望大家，乾咳一聲，伸隻手入去自己衫袋度。

然後佢隻手一拋，「得」一聲，一粒青色瑞士糖就出現咗喺枱面上。

WTF？

我個腦load咗一陣，先明白到底發生緊咩事。

「你頭先行埋嚟勸交，就係專登想收埋粒糖？」四姨媽揞住咗自己把口，完全不能夠相信呢個係事實。

「典解梨腰揀樣助？」河馬驚訝到鼻孔擴張到可以塞得入兩枝珍珠奶茶飲管。

「我要保護我屋企人，我唔想佢哋死，就係咁簡單。」二舅父再次托一托眼鏡，用平和而冷靜嘅語氣講，「好明顯，阿媽呢個死亡遊戲將會繼續去下一關。無人知跟住會點，亦無人知跟住玩咩，甚至好有可能最後只能夠玩到死淨一家人。喺呢個遊戲階段，如果出現你哋咁樣兩家人合作，會對我哋一家好不利。再加上阿媽平時咁錫四妹你，好難講之後嘅遊戲會唔會因為咁樣而令你有優勢。所以，我唔係討厭你哋，但係我只可以選擇先解決有威脅嘅對手，先下手為強。」

「咩啊？咩保護家人啊？你係我阿哥，我係你細佬，我哋都係家人！」五舅父好激動咁衝埋二舅父面前。

「係咩？我哋真係家人咩？除咗中秋新年冬至阿媽生日食餐飯，我哋仲有邊度似一家人啊？」二舅父冷靜地望實五舅父，五舅父除咗不斷喘氣，但係回答唔到二舅父嘅反問。

某程度上，二舅父可能真係講中咗。

我不禁回想起成長嘅經歷。

當婆婆依然健康，每到大時大節，我哋一家都會同呢一班親戚聚下。

每次出到嚟食飯，不外乎都會發生以下嘅事。

大舅父會爭住俾錢埋單，然後一邊食，一邊講下呢餐飯有幾貴、最近買股票同做生意賺幾多錢；

二舅父一家多數會靜靜地咁食飯，得閒先答一兩句嘴；

三姨媽、四姨媽會講下生仔湊仔，講下搵學校有幾難、養個細路有幾辛苦；

五舅父唔一定會出席，出席親都係同我同六舅父打機。

睇落似係一家人，但係呢種家庭飯局又好似只係為聚而聚。

特別係對婆婆嚟講，我每次見到大家都係到咗嘅時候先同佢講一兩句嘢，之後成餐飯都無乜點理佢。

至於真係理佢嘅時候，無非都係講：「阿媽食多啲菜啦！」

「俾阿媽食啲雞啦，佢鍾意啊。」

「唔好啦，佢身體唔好，都係叫碗白飯俾佢食啦。」

「食件桂花糕啦，佢以前成日整。」

「咁甜，老人家邊食得，由佢啦。」

細個嘅我好多時都會諗，係咪人老咗，就連食乜嘅自由都會失去呢？

係嘅，可能一班親戚覺得，咁婆婆決定食咩就係表現緊關心佢。

但係，到底呢種關心係真關心，定係只係大家為咗滿足「我有關心婆婆」而做嘅多餘行為呢？

到底，咁樣嘅關係係咪就係「親戚」呢？

「親戚」係咪應該就係呢種關係呢？

我知，世上有好多唔同家庭，亦有好多面向嘅「親戚」。

但係，我呢個屋企，從來都無令我明白過「親戚」嘅存在意義。

好似，只係一班無奈但又因為血緣關係而被迫出嚟食飯嘅人。

某程度上，直至到好似而家眼見四姨媽同五舅父要死，我先會諗翻起，其實佢哋對我亦有一定重要性。

「好喇，講夠喇，夠鐘要玩下一個遊戲。」婆婆講完呢句之後，雙眼望向四姨媽。

「媽，我唔想……」

四姨媽有一滴眼淚正準備冒出眼眶。

但係未滴出嚟，佢個頭就已經爆開咗。

「家姐！」五舅父失聲慘叫，衝埋去攬住只係淨翻身體嘅四姨媽。

但話口未完，五舅父嘅膊頭搭住咗一隻手。

呢隻手，來自河馬。

「禾巧Kai先認到梨，梨係衣個巧難忍。坐島梨撈婆禾巧善福。我嗌……」

五舅父左邊身體再次被一波血跡濺上。

呢啲血，屬於河馬。

「老婆！」五舅父聲淚俱下，跪喺地下伸出埋左手，將河馬嘅屍身都攬埋過嚟。

望住呢一幕，我發覺自己不自覺之間有兩行眼淚滑落。

而我老母，已經喺我身邊喊到收唔到聲，輕輕叫住四姨媽嘅名。

突然間，五舅父停咗無再喊。

佢慢慢轉過身，變成向住婆婆跪低。

「媽，我唔知到底點解好地地一場拜年會搞成咁。不過，事到如今，講咩都無謂。我知 我都要死喇，所以唯有講定一句，今世好對唔住，我無乜出色，又成日激你要你擔心。你嘅養育之恩，我下世再報。希望你老人家……」五舅父講到呢度，好似已經再講唔落去，但係佢仍然用力一手抹哂啲眼淚鼻涕，認真地捉住婆婆隻手，「多福多壽，身體安康。」
講完呢句，五舅父慢慢向婆婆叩咗一個頭。

跟住，五舅父就再無起身過。

佢個頭，無聲無息地喺地下上面爆開咗，只係留低咗一個好似血花嘅圖案。

「好喇，最後三家人。而家，係時候準備玩最後一個遊戲。」婆婆無理會自己下半身沾滿五舅父嘅血，好冷靜咁樣行過去木櫃，從中拎咗一樣嘢放喺枱面。

見到呢樣嘢，我、大舅父同二舅父三個家庭都有啲疑惑，唔知到底跟住落嚟要玩咩。

因為，婆婆放低嘅，係一個年盒。

「最後一關，呢個遊戲就係，『俄羅斯年盒』。」

（未完待續）

下個加更目標：1100正評
Penana 加更目標：200 likes
Penana連載link：https://www.penana.com/story/173167

最後留低埋樓主IG，大家有興趣可以去嗰邊催迫樓主加更，仲有得睇埋其他故事相關嘅嘢，IG限定㗎
IG : windblowssilently
https://www.instagram.com/windblowssilently/

默颺讀者交流TG group（快啲入嚟討論劇情同掌握故事更新消息！）：https://t.me/+jD_eY63Yb5I0MmQ1

LM

最後一關，之前個捉鬼佬幾時出嚟？

我想講，我自己睇返呢句嘢嘅時候，都要諗咗一陣先明白你講緊啲咩

突然間好欣賞咁多位讀者，睇咗咁耐河馬講嘢，次次都睇得明

問得好及時喎，今晚就會見到佢

好耐冇追新故 lm

睇呢個故好多反思

樓主個故好正 我都好耐冇追故

俄羅斯年盒咁癲
係咪每次開一格
開中就要食炸彈

多謝薛丁格之貓絲

咁都要多謝太空絲你認真看待呢個本身睇落好鳩嘅故事
呢個故事本身都係諗住俾大家輕鬆下而寫
但入面都有我想講嘅嘢 難得有人感受到 好開心

多謝里香絲

又live 咗

今晚有冇文