【重甜】【明就明唔明就黎明】《XG快落》(7)

1001 回覆

6 Like 0 Dislike

第 1 頁第 2 頁第 3 頁第 4 頁第 5 頁第 6 頁第 7 頁第 8 頁第 9 頁第 10 頁第 11 頁第 12 頁第 13 頁第 14 頁第 15 頁第 16 頁第 17 頁第 18 頁第 19 頁第 20 頁第 21 頁第 22 頁第 23 頁第 24 頁第 25 頁第 26 頁第 27 頁第 28 頁第 29 頁第 30 頁第 31 頁第 32 頁第 33 頁第 34 頁第 35 頁第 36 頁第 37 頁第 38 頁第 39 頁第 40 頁第 41 頁

飛揚 2024-10-14 19:00:05

上回講到綽廷聽到出面有槍聲！仲要嚟自四面八方！
當綽廷想望出去，就俾阿南打中！
隻揪就專心啲啦！
原來國安班人嚟到！
綽廷同阿南拳來腳往！互有攻守！
不過阿南都係好打啲嘅！
阿南話明明喺天堂生活咪好囉！做乜係都要面對地獄嘅事實呢？
假㗎！全部都係假㗎！自欺欺人真係好咩？！
唔係可以點吖？反抗到咩？咁辛苦有用咩？最後連命都冇吖！
國安都應承咗阿南會俾佢喺幻覺中有更好嘅生活～
就喺阿南快要用匕首刺向綽廷之時，阿南俾晴晴一槍打爆頭！
又俾晴晴救咗喇～
「裡面嘅人聽住！」出面傳嚟廣播聲！「你哋已經被包圍！」
佢哋...佢哋已經被包圍...
「唔好再作無謂嘅反抗！」廣播聲好大！「立即棄械投降！否則後果自負！」
要佢哋投降？
綽廷望望大家...望住新哥...
「我哋係唔可以投降...」新哥擰擰頭！
呢點綽廷都估到㗎喇...不過唔投降...又可以點呢？
「必要時...」新哥諗一諗，「自爆...」
自爆？
係喎！唔好唔記得佢哋呢間屋裝晒炸彈㗎喎！
「唔得！」晴晴擰晒頭！「就算要自爆...都要帶咗惠惠逃走先！」
綽廷望住無辜嘅惠惠...
冇錯呢...佢哋死都唔緊要...唔可以要惠惠同佢哋一齊犧牲...
但點先可以帶到惠惠逃走呢？佢哋已經被重重包圍！
跟住既劇情發展又會係點呢？

準備出文

飛揚 2024-10-14 19:00:18

惠惠仲係唔知發生咩事...只係有啲驚...

『你哋唔係去攞車㗎咩？』攞咗車咪走得甩囉！

新哥擰擰頭：「架車根本就撻唔著...阿南呢個仆街仔...」

我望住阿南條屍...

大家都跟住我望...就連惠惠都一齊望...

晴晴用隻手遮住惠惠對眼仔...

新哥行去窗邊，偷偷望出去：「我哋想駁返好啲線，睇吓撻唔撻得返著架車...國安就出現！」

『你哋頭先就係同佢哋駁火...』我都偷偷望出去...

除咗望到被裝甲車包圍...仲見到有唔少著晒武裝嘅特種部隊揸晒突擊步槍指住我哋呢邊！

飛揚 2024-10-14 19:01:16

「嗯...」新哥點點頭，「佢哋火力好猛呢！」

『咁我哋嘅火力都唔少呢...』頭先都試過大大支狙擊槍嘅威力啦...

「你哋有五分鐘時間！」出面又大大聲廣播！「五分鐘之後，我哋就會全面進攻！格殺勿論！」

『五分鐘...』會唔會太少時間吖...

新哥望住惠惠同大孖：「我哋一定要令佢哋平安逃走！」

『當然啦...』我隱約見到天空有Drone盤旋，『但點先做得到？』

強弱懸殊...敵眾我寡...唔好話要令佢哋平安...留有全屍都開心啦...

飛揚 2024-10-14 19:02:33

「見唔見到嗰架車？」新哥偷偷咁望出去...

大家都跟住偷偷咁望去遠處...

『嗯...嗰架白色車...』最遠...最普通...好似警車一樣嘅白色車...

新哥點點頭：「我哋搶嗰架車逃走！」

『點搶吖？』我哋俾人包圍緊㗎嘛！

「我哋首先上上層...」新哥諗一諗，「等時間到佢哋攻過嚟！然後引爆炸彈！盡量引佢哋去前面！同佢哋駁火之時...佢哋嘅火力都會集中喺前面！我哋就趁住呢個一閃即逝嘅機會由後面衝出去！搶嗰架車逃走！」

「嗯！」大家好認真咁點點頭！

飛揚 2024-10-14 19:04:06

『唔...咁真係好咩？先唔好話爆炸會唔會自殺...引唔引得晒佢哋上前面...我哋要由上面跳落嚟？點跳吖？』一樓都會死人㗎！

「後面係車房吖嘛...」新哥冷眼望住我，「車房後面有個斜板㗎嘛...你冇留意㗎咩？」

『我...我...點會無啦啦留意呢啲嘢吖？』去旅行吖？參觀度假屋吖？！

「點都好啦！點都要博一博！」新哥喺地上執起支狙擊槍交俾我！「大家上去準備！」

晴晴拖實惠惠，細孖扶住大孖，我哋就跟住新哥上上層！

將所有房嘅窗簾都拉埋！遮到實一實！出面一啲光都射唔到入嚟！我哋就嚟到最後面嗰間房...

「你哋仲有三分鐘！」出面又大大聲廣播！

我拎多兩盒彈夾，新哥就帶住我行前少少...前面兩間房...

飛揚 2024-10-14 19:05:02

新哥喺前面準備：「一陣你喺後面間房盡量掩護我...」

『嗯...』我點點頭...都用狙擊槍準備！

「盡量好喇...」新哥就用突擊步槍準備！

『吓？』盡量好？

「見差唔多...」新哥打量我一眼，「就退後...」

『哦...』雖然唔係好明新哥嘅意思...

「點都要令佢哋安全逃脫...」新哥再次做好準備！

『一定！』一定可以！

飛揚 2024-10-14 19:06:13

「你哋仲有一分鐘！」出面又大大聲廣播！「立即棄械投降！否則格殺勿論！」

唔好講咁多廢話啦！快啲嚟個你死我活啦！

大家都好緊張！聚精會神！準備好迎接生死戰！

一分鐘...好似好耐...又好似好快...

“砰砰！啪啪！”話咁快下面就砰砰啪啪聲！

攻入嚟喇！由四方八面！

“轟轟隆隆！”隨即就由下面傳嚟爆炸聲！

成個地面仲要震震！震震！震得好勁！

都係由下面後方傳上嚟！係細孖引爆炸彈！

飛揚 2024-10-14 19:07:02

引唔引到國安上前呢？會唔會未引到...成間屋都爆到冧埋呢？！

都唔理得咁多㗎喇！啲煙都開始飄上嚟喇！

國安都應該好快會攻上嚟...上到嚟！

幾個全副武裝嘅特種士兵用突擊步槍指指咁由樓梯指到上嚟！

“砰砰砰！”新哥立即開槍！

特種士兵立即縮後！

打巷戰咁...喺條走廊打巷戰！

我都瞄準...瞄準...開槍！

飛揚 2024-10-14 19:07:38

“砰！！！”一聲響！成幅牆就轟穿咗個大窿！

打唔中！

“砰砰！砰！”新哥繼續開槍！吸引火力！

冇錯！我哋要做嘅就係引佢哋去對面！越多越好！

“砰！！！”我都開槍！

“砰！！！”打落條樓梯度又好！

“砰！！！”打落牆身又好！

總之就盡量引佢哋上前面支援！

飛揚 2024-10-14 19:08:54

不過呢種做法又行唔行得通？

對方係特種部隊！應該好快就睇穿...好快就有應對...

話口未完...

“啪啪！”前面兩間房嘅窗被打爛！

佢哋喺對面房！

“轟轟隆隆！”兩聲！房間嘅牆身被炸開！

「走！」新哥一邊開槍！一邊退後！「走！」

“砰砰！砰！砰砰砰！”

飛揚 2024-10-14 19:09:32

我都立即後退！同時見到有特種士兵由牆身大窿走出嚟！

“砰！！！”我都邊開槍邊後退！

幾個特種士兵都邊開槍邊搵掩護！

“砰砰！砰！！！砰砰砰！砰！！！”

我哋邊走邊掩護邊駁火！

都唔知有冇射中人！又唔知自己有冇中槍喇！總之就俾我哋後退到最後嗰間房！

「走！」新哥守住門口！「趁而家快啲走！」

大家點點頭！晴晴就拖住惠惠爬出窗外！

飛揚 2024-10-14 19:10:21

“砰砰砰！砰砰！砰砰砰！”槍聲四起！子彈橫飛！

細孖再撳撳手上部電話...

“轟轟隆隆！”幾下爆炸聲！成間屋都震幾震！

細孖就扶住大孖爬出窗外！

「走！」新哥仲係守住門口！「快啲走呀！」

『哦哦！』我都爬出窗外！大家都由斜板滑到落地面！

我喺車房頂望望出面！果然冇乜敵人！

飛揚 2024-10-14 19:11:09

我就快快手手跳落斜板！滑到落地面！

扶傷帶幼咁向住遠處嘅白色警車跑過去！

我就回身用狙擊槍指住一樓窗口！見到新哥正要爬窗出嚟！

我用狙擊槍掩護住新哥！但就喺佢差唔多爬出窗外之時...

“砰砰！砰砰砰！”

「嗚！」新哥中槍趴咗喺車房頂！

飛揚 2024-10-14 19:11:26

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～