【重甜】【明就明 唔明就黎明】《XG快落》(7)

[Day 13－背後匕首] PART 02

“砰砰！砰！砰砰砰！”出面傳嚟槍聲！已經係嚟自四方八面！

咁講法...

當我退後兩步，想回望窗外...

「仲有閒情顧出面？！」阿南一個右勾拳打落我塊面！

『嗚呀！』我成個人跌喺地上碌兩圈！

「隻揪嘅時候就專心啲啦戇鳩仔！」阿南磨拳擦掌咁望出窗外，「終於都嚟到喇...國安班人...」

『隻揪就專心啲啦！』我一起就一個升龍拳打落阿南下巴！

「嗚！」阿南退後一步！一企穩就向我揮拳！「仆你個街！」

我同阿南拳來腳往！

『點解？點解要出賣我哋？！』我一個左直拳！

「點解？」阿南避開我嘅左直拳，向我揮左勾拳！「你班傻仔仲要問點解？」

『嗚！』我又被打中！後退兩步！

「你班傻仔打生打死為乜吖？」阿南乘勝追擊！

『嗚！』我又中拳！

「好地地過住天堂嘅生活咪幾好！」阿南向我拳打腳踢！

『嗚！嗚！』我都唔知係中緊拳定中緊腳！

「天堂嘅生活幾咁美好！」阿南迫我埋牆角狂揪！

『嗚！假㗎...嗚...假㗎！』我就喺牆角捱打！

「假又點吖？假又點呀？答我吖！答我呀假又點呀？！開心就得啦！」阿南向我連環左右揮拳！

『假...假㗎...開心都係假㗎！』我一拳就直轟落阿南塊面！

「假嘅開心都係開心！」阿南退後一步...又再衝埋嚟！

『邊可以自欺欺人！』我又向阿南揮拳！

「自欺欺人有乜問題呀？點都好過而家嘅地獄吖！」阿南一手就捉住我個頭！

『嗚！』我就俾阿南壓住個頭埋窗前！

「睇清楚呀！」阿南大大力咁壓！「睇清楚出面呀！地獄呀！係地獄呀！」

我睇到出面有唔少白色嘅...裝甲車？

有唔少裝甲車圍住咗我哋！

係國安？

“砰！砰砰！砰砰！砰！”仲有槍聲！嚟自四方八面嘅槍聲！

「睇到未吖？係地獄呀！點解係都要搵出真相？俾你哋搵到真相又點姐？」阿南大大力咁壓我個頭埋玻璃窗！「係地獄嘅真相呀！知道自己原來係身處喺地獄真係好咩？！」

『就算係地獄都...』我用盡全力...向後批踭！『都好過蒙在鼓裡！』

「嗚呀！」阿南一鬆開手...

『唔知都算！』我追住阿南嚟打！

「嗚！」

『明明知道眼前嘅天堂係假！」左右左右咁向住阿南塊面揮拳！

「嗚！呀！嗚呀！」

『仲點可以自欺欺人呀？！』打到阿南失晒重心！後退後退再後退！

「嗚呀！呀！嗚！嗚呀！」

『地獄又點吖？就算係地獄...都要勇敢面對！』我再一個左直拳直轟向阿南塊面！

「所以話...」阿南一手就捉實我個左拳！「你哋太天真呢...」

天真？

阿南用力一扭！

『嗚呀！』我就俾阿南壓喺地上！

「面對地獄又點？嗄！」阿南騎住我！從後拔出匕首！「好勇敢咩真係？」

我望住阿南舉起鋒利無比嘅匕首！

「面對住壓倒性嘅權力仲要作出無謂嘅反抗...」阿南一把匕首就向住我插落嚟！「係愚蠢！」

『嗚！』我雙手捉實阿南隻手！擋住佢插把匕首落嚟！

「以卵擊石...」阿南用力壓！「咁大幅高牆...你哋呢啲雞蛋仔就只有自取滅亡！」

『嗚！嗚！我就算係雞蛋...嗚！都要...都要爛得有尊...尊...尊...嗚...』我用力推！雙手用力向上推！試圖推開阿南隻手！

但以下犯上嘅我...再加上阿南都已經用上雙手...把匕首越嚟越接近！匕首尖直指落我胸口！

「冇用㗎...傻仔...幾有尊嚴都好...勝者為王...敗者為寇...革命失敗...咪又係犯人...咪又係遺臭萬年...冇人會當你哋係英雄...歷史係勝利者寫㗎嘛...」阿南笑住口咁壓把匕首落嚟...

『嗚...嗄！』望住把匕首越嚟越落...匕首尖都就快壓到落嚟！

「就算天堂係幻覺...我寧願活喺幻覺～國安局都應承咗俾我喺幻覺中過更好嘅生活～」阿南邊笑笑口，邊壓把匕首落嚟！「你哋鍾意喺地獄生活吖～咁就落地獄啦！」

『嗄...嗚！』望住匕首尖快要壓到落我胸前...就快插到...

唔通...唔通我就要...死喺...

就喺呢個時候...

“砰！”一聲響！

阿南個頭中槍！然後倒喺地上！

『嗄...嗄！』我推開阿南條屍！坐返起身...就望到晴晴揸住支手槍！

「我想打爆佢個頭好耐㗎喇...」晴晴行過嚟...向我伸出左手...

原來唔係得我一個想打爆阿南個頭嘅～

『你又救咗我呢...』我捉住晴晴隻左手...

「唔好講呢啲住...」晴晴拉返我起身！

「點吖？」細孖都扶住大孖同時又拖住惠惠走入嚟，「冇事吖嘛？」

『死唔去...死唔去...』我望住新哥都行埋入嚟，『咩情況吖？我見出面好多裝甲車！又好多槍聲！你哋冇事吖嘛？』

「冇...仲未...」新哥擰擰頭，「不過好難講...好快就出事...」

「裡面嘅人聽住！」出面傳嚟廣播聲！「你哋已經被包圍！」

我哋...我哋已經被包圍...

「唔好再作無謂嘅反抗！」廣播聲好大！「立即棄械投降！否則後果自負！」

要我哋投降？

我望望大家...望住新哥...

「我哋係唔可以投降...」新哥擰擰頭！

呢點我都估到㗎喇...不過唔投降...又可以點呢？

「必要時...」新哥諗一諗，「自爆...」

自爆？

係喎！唔好唔記得我哋呢間屋裝晒炸彈㗎喎！

「唔得！」晴晴擰晒頭！「就算要自爆...都要帶咗惠惠逃走先！」

我望住無辜嘅惠惠...

冇錯呢...我哋死都唔緊要...唔可以要惠惠同我哋一齊犧牲...

但點先可以帶到惠惠逃走呢？我哋已經被重重包圍！

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～

三句預告

惠惠仲係唔知發生咩事...只係有啲驚...

『你哋唔係去攞車㗎咩？』攞咗車咪走得甩囉！

新哥擰擰頭：「架車根本就撻唔著...阿南呢個仆街仔...」

睇嚟要挖地道，坐大飛

扶傷帶幼仲挖唔挖得切

挖唔切就榮獲達爾文獎

有時真係
知道自己活係地獄真係好咩嘢
都冇力改變現狀
仲會令自己不斷咁係痛苦中輪迴

改變唔到唯有承受

咁就要出盡奶力去挖喇

或者活得比地獄更地獄都係一種方法

我會選擇折磨自己 等自己更加痛苦 就唔覺得地獄有乜咁可怕

定係出盡奶力去奶

要睇吓咩奶喇

說服自己還有地方比呢度更差
比上不足 比下有餘

咁樣可能會令自己更快長大
接受左佢

我要呢度更加差 一齊死啦

做個苦行僧

間屋好似醉仙樓一樣。。。有地道逃走